ಸಂಪಾದಕೀಯ್
ಕವಿತಾ ಆಮ್ಚ್ಯಾ ಉಸ್ವಾಸಾಚ್ಯಾ ಶಿರಾಂ ಶಿರಾಂನಿ
ಚಡುಣೆ ಪಾಂಚ್ ವರ್ಸಾಂ ಆದಿಂ ದಾಯ್ಜಿ ದುಬಾಯ್ ಅಂತರ್ಜಾಳಿಚೆರ್ 'ಕವಿತಾ ಕುಳಾರ್' ಅಂಕಣಾಚಿ ಸುರ್ವಾತ್ ಕರ್ತಾನಾ, ಆಮಿ ಚಿಂತುಂಕ್ ನಾತ್ಲ್ಲೆಂ - ಕೊಂಕಣಿ ಕಾವ್ಯಖಳಾಂತ್ ಅಸೋಯ್ ಪಾವ್ಸ್ ಶಿಂವ್ರತ್ ಮ್ಹಣೊನ್! ತೋಯ್ ಆಟಿಚೊ ಪಾವ್ಸ್! ಆಮಿ ಕೊಂಕಣಿ ಕವಿತಾ ಬರಯ್ತಲ್ಯಾಂಚಿ ಪಾಟ್ ಥಾಪುಡ್ಚೆಂ ಆನಿ ತಾಂಕಾಂ ಹುಮೆದಿಚಿಂ ವೊಕ್ತಾಂ ಪಿಯೆಂವ್ಕ್ ದಿಂವ್ಚೆಂ ಕಾಮ್ ಕೆಲಾಂ. ಆತಾಂ ಸತ್ವಾನ್ ಭರ್ಲ್ಲಿ ಕವಿತಾ ರಚುನ್ ಸಾಹಿತ್ಯ್ ಶೆತಾಂತ್ ಉಂಚಾಯೆಚ್ಯಾ ಪಾಂವ್ಡ್ಯಾಕ್ ಪಾಂವ್ಚಿ ಜವಾಬ್ದಾರಿ ಕವಿಂಚಿ!
ಹ್ಯಾ ಅಂಕ್ಯಾಥಾವ್ನ್ ಹರ್ಯೆಕಾ ಹಫ್ತ್ಯಾಕ್ ಏಕ್ ಕವಿತಾ ತುಮ್ಚೆ ಹುಜಿರ್ ಆಮಿ ದವರ್ತಲ್ಯಾಂವ್. ಪರ್ನ್ಯಾಂಚಿ ತಶೆಂ ನವ್ಯಾಂಚಿ. ಎಕ್ಶೆಂ ಬರಯಿಲ್ಲ್ಯಾಂಚಿ ಆನಿ ಫುಡ್ಲದ್ ಬರಯಿಲ್ಲ್ಯಾಚಿ. ಪರ್ನ್ಯಾಂಚಿ ತುಕುನ್ ಪಳೆಯಾ, ನವ್ಯಾಂಚಿ ಚಾಕುನ್ ಪಳೆಯಾ ಆನಿ ಜರೂರ್ ಆಮ್ಕಾಂ ಬರಯಾ.
ಕವಿಂನಿ ಹೊ ಆವ್ಕಾಸ್ ಹೊಗ್ಡಾಯ್ನಾಸ್ತಾಂ ತಾಂಚ್ಯಾ ಕವಿತಾಂಚೊ ದಾಳೊ ಆಮ್ಕಾಂ ಧಾಡುನ್ ದಿಂವ್ಚೊ. ಧಾಡ್ತಾನಾ ಥೊಡಿ ವೊಳಕ್, ಸಂಪರ್ಕಾಚೊ ಪತ್ತೊ ಆನಿ ತಸ್ವೀರ್ ಧಾಡ್ಚಿ.
ಸುರ್ವಾತ್ ಜಾವ್ನ್ ಮ್ಹಜಿಚ್ ವಿಡಂಬನಾತ್ಮಕ್ ರಾಜಕೀ ಕವಿತಾ ಹಾಂಗಾಸರ್ ದಿಲ್ಯಾ. 'ಬೂಸಾ' ಮ್ಹಳ್ಯಾರ್ ಬುಶ್ಶಾಚೆ ಪಿಲೆ. ಕಾಂಯ್ ಉಪ್ಕಾರಾಕ್ ಪಡನಾತ್ಲ್ಲ್ಯಾಂಕ್ ಆಮಿ 'ಬಜೀ ಬೂಸು' ಮ್ಹಣ್ಚೆಂ ಆಸ್ತಾ. ಹೇಯ್ ಚಡುಣೆ ತಶೇಚ್, ಪುಣ್ ಮಾತ್ಶೆ ವೆಗ್ಳೆ! ಆಮೇರಿಕಾಚೆ ಮುಟಿಭಿತರ್ ಸಂಸಾರ್ ಸಗ್ಳೊ ಉಸ್ಮಡ್ತಾನಾ ಅಸಲ್ಯಾ ಧಾರಾಳ್ ಕವಿತಾಂಚಿಂ ಬಿಯಾಂ ತುಜೆಥಂಯ್ ಸಮೇತ್ ಕಿರ್ಲೊಂಕ್ ಪುರೊ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಬೂಸಾ, ಬೂಸಾ
ಬೂಸಾ, ಬೂಸಾ, ಬೂಸಾ, ಬೂಸಾ
ಆಮೆರಿಕಿ ಬೂಸಾ
ಖಾಣಾಂ ಹಾಡುನ್ ಬೂಸಾ ಆಯ್ಲ್ಯಾತ್
ಪೊಟಾಂ ತುಮ್ಚಿಂ ಪುಸಾ
ಹಾತ್ ಮುಕಾರ್ ಹಾಡ್ಚೆ ಆದಿಂ
ಭೊರ್ಣ್ಯೊ ಭರಾ ತೆಲಾ
ತೆಲಾಂ ನಾಂತರ್ ಫಿಕಿರ್ ನಾಕಾ
ರಗ್ತಾಂ ತುಮ್ಚಿಂ ಪಿಳಾ
ಬೂಸಾ, ಬೂಸಾ, ಬೂಸಾ, ಬೂಸಾ
ಆಮೆರಿಕಿ ಬೂಸಾ
ವಸ್ತುರ್ ಹಾಡ್ನ್ ಬೂಸಾ ಆಯ್ಲ್ಯಾತ್
ತಿಕ್ಕೆ ನಾಗ್ಡಿಂ ನಾಚಾ
ಥೊಡೊ ವೇಳ್ ಅಶೆಚ್ ಆಸೊಂ
ಉಗ್ತೆ ತುಮ್ಚೆ ಪಾನೆ
ವಸ್ತುರ್ ತುಮಿ ನ್ಹೆಸ್ಚೆ ಆದಿಂ
ಭಾಗಂವ್ಕ್ ಆಮ್ಚೆ ತಾನೆ
ಬೂಸಾ, ಬೂಸಾ, ಬೂಸಾ, ಬೂಸಾ
ಆಮೆರಿಕಿ ಬೂಸಾ
ಜೂಂ, ನಾಂಗೊರ್ ಹಾಡ್ನ್ ಆಯ್ಲ್ಯಾತ್
ಗಾಂವ್ ನವ್ಯಾನ್ ಕೊಸಾ
ಪೀಕ್ ಜರಿ ಬರೆಂ ಜಾಲೆಂ
ತುಮ್ಕಾಂಚ್ ತಾಚೊ ಫಾಯ್ದೊ
ನಾಂಗ್ರಾಕ್ ಆಮ್ಚ್ಯಾ ಭಾಡೆಂ ದೀಂವ್ಕ್
ಬಾಂದ್ತಾ ತುಮ್ಕಾಂ ಕಾಯ್ದೊ
ಬೂಸಾ, ಬೂಸಾ, ಬೂಸಾ, ಬೂಸಾ
ಆಮೆರಿಕಿ ಬೂಸಾ
ಬೊಂದುಕೆಂಚೊ ಫಾರಾಂ ಸಾದ್
ಚ್ಯಾರ್ ದಿಸಾಂಕ್ ಸೊಸಾ
ಚ್ಯಾರ್ ದಿಸಾಂ ಕಾಬಾರ್ ಜಾಯ್ನಾ
ಚ್ಯಾರ್ ವರ್ಸಾಂ ರಾವ್ತಾಂವ್
ಆಕಾಂತ್ವಾದಾ ಜಿಡಿಂ ಸಗ್ಳಿಂ
ಬೊಂದುಕೆನ್ ಚಿರ್ತಾಂವ್
ಬೂಸಾ, ಬೂಸಾ, ಬೂಸಾ, ಬೂಸಾ
ಆಮೆರಿಕಿ ಬೂಸಾ
ತಾಂಚೆಲಾಗಿಂ ದೇವ್ ಶೀದಾ
ಸಂಪರ್ಕ್ ದವರ್ನ್ ಆಸಾ
ತಾಂಣಿ ಜರಿ ವಾಯ್ ಸೊಡ್ಲೆ
ಆಸ್ಲೆಂ ತಾಂಕಾಂ ಬೆಸಾಂವ್
ಆಮ್ಕಾಂ ಜರಿ ಗರ್ಜ್ ಪಡತ್
ಕೊಣಾಕ್ ಜಾಯ್ ಪಾಶಾಂವ್!
ಬೂಸಾ, ಬೂಸಾ, ಬೂಸಾ, ಬೂಸಾ
ಆಮೆರಿಕಿ ಬೂಸಾ
ಆಯ್ಲೆ, ರಾವ್ಲೆ, ಖಾವ್ನ್ ಧಾಂವ್ಲೆ
ಸಾಂಗೊನ್ ಆಮ್ಕಾಂ ಕುಸಾ!
-ಮೆಲ್ವಿನ್ ರೊಡ್ರಿಗಸ್