ಸಂಪಾದಕೀಯ್:

ವಾರೆಸ್ದಾರ್ ನಾತಲ್ಲಿಂ ಸಪ್ಣಾಂ!

ಥೊಡ್ಯಾಂಕ್ ಮಾರೆಕಾರ್ ಸಪ್ಣಾಂ ಪಡ್ಚಿಂ ಆಸ್ತಾತ್. ಥೊಡ್ಯಾಂಕ್ ರಂಗ್‌ರಂಗಾಳ್. ದಿಸಾಚ್ಯಾ ನೀಜ್‌ಪಣಾಂತ್ ಘಡೊಂಕ್ ಸಾಧ್ಯ್ ನಾತ್‌ಲ್ಲೆಂ ರಾತಿಚೆ ನಿದೆಂತ್ ಕಿತ್ಲೆಶೆ ಪಾವ್ಟಿಂ ಪೊಂತಾಕ್ ಪಾವ್ತಾ. ತ್ಯಾ ಸಂತೊಸಾನ್ ಆಮಿ ಉಪ್ಯೆ ಉಪ್ಯೆತಾನಾ ಕಶಿ ಆನಿ ಕಿತ್ಯಾಕ್ ಕೊಣ್ಣಾ ಆಮ್ಕಾಂ ಜಾಗ್ ಜಾತಾ ಆನಿ ಸುಖಾ ಸಂತೊಸಾಚೊ ಖಿಣಾಚೊ ಸಂಸಾರ್ ಫುಟೊನ್ ವೆತಾ. ಸಪ್ಣಾಂಚೊ ಸಂಸಾರ್ ವೆಗ್ಳೊಚ್. ಅಸೋಚ್!

ಕವಯಿತ್ರಿ ರೇಖಾ ಮಸ್ಕರೇನ್ಹಸಾನ್ ಕಸಲಿಂ ಸಪ್ಣಾಂ ಮ್ಹಣೊನ್ ಸಾಂಗನಾಸ್ತಾನಾಂಚ್ ಸಪ್ಣಾಂಚ್ಯಾ ಸಂಸಾರಾಕ್ ಆಮ್ಕಾಂ ಆಪವ್ನ್ ವ್ಹರ್‍ಚೆಂ ಸಾಧನ್ ಹಾಂಗಾ ಕೆಲಾಂ. ಸಪ್ಣಾಂ ಪಡ್ತಾತ್ ಮ್ಹಣೊನ್ ಸಾಂಗೊಂಕ್ ಲಜನಾಸ್ಚಿ ಹೆ ಕವಿತೆಂತ್ಲಿ ವೆಕ್ತಿ, ಕಸಲಿಂ ಸಪ್ಣಾಂ ಮ್ಹಣ್ ಸಾಂಗೊಂಕ್ ಭಿಯೆತಾ ಕಿತ್ಯಾಕ್? ಮಾಗೀರ್ ಹಿಂ ರಾತ್ಚೆ ನಿದೆಂತ್ ಪಡ್‌ಲ್ಲಿಂ ಸಪ್ಣಾಂ ಯಾ ದಿಸಾ ಉಜ್ವಾಡಾಚೆ ಭೃಮಿದೆಂತ್?

ರೇಖಾಚ್ಯೊ ಕವಿತಾ ಜಾಯ್ತ್ಯಾ ಕೊಂಕಣಿ ನೆಮಾಳ್ಯಾಂಚೆರ್ ಪರ್ಗಟ್ ಜಾಲ್ಯಾತ್. ಸದ್ದ್ಯಾ ತಿ ಸಾವ್ದಿ ಆರೇಬಿಯಾಂತ್ ಆಪ್ಲ್ಯಾ ಕುಟ್ಮಾ ಬರಾಬರ್ ವಸ್ತಿ ಕರ್‍ತಾ. ಉತ್ರಾಂಲಾಗಿಂ ಖೆಳ್ಚಿ ಕಲಾ ತಿಣೆ ಬರಿಚ್ ಆಪ್ಣಾಯ್ಲ್ಯಾ. ಸಾದೆ, ಸೊಂಪೆ ಕವಿತೆಂತ್ ಆಪುರ್ಬಾಯೆಚಿಂ ಸಾವ್ಳಿ ರುಪಾಂ (ಸಿಮಿಲೀಸ್) ಉಟೊನ್ ದಿಸ್ತಾತ್.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಸಪ್ಣಾಂ

          ಕಾಳ್ಜಾ ಗುಂಡಾಯೆಚ್ಯಾ ಆಂಗ್ಣಾಂತ್
        ರಂಗಾಚಿಂ ಫುಲಾಂ ಫುಲೊನ್
      ಸುಗಂಧ್ ಶಿಂಪ್ಲಲ್ಯಾಬರಿ
    ಸುಮಧುರ್ ಜಾವ್ನಾಸ್ಲಿಂ
ಮ್ಹಜಿಂ ಸಪ್ಣಾಂ

          ಆಂಬ್ಯಾ ರುಕಾಚ್ಯಾ ಫಾಂಟ್ಯಾರಿ
        ಆಂಕ್ರ್ಯೊ ಫುಲೊನ್ ಯೆತಾನಾ
      ಕೊಗ್ಳೆಚೆಂ ಗಾಯಾನ್ ಆಯ್ಕೊನ್
    ಮನ್ ಪಿಸ್ವೊಂಚೆ ತಸಲಿಂ
ಮ್ಹಜಿಂ ಸಪ್ಣಾಂ

          ಸಕಾಳಿಂ ಸುರ್ಯಾಚ್ಯಾ ಕಿರ್ಣಾಂಕ್
        ಫುಲಾಂಚ್ಯಾ ಪಾಕ್ಳೆಂಚೊ ಧೋವ್
      ಲಜೆವ್ನ್ ಕರ್ಗಲ್ಲೆಬರಿ
    ಮಾಯಾಗ್ ಜಾಲಿಂ ಆತಾಂ
ಮ್ಹಜಿಂ ಸಪ್ಣಾಂ

 -ರೇಖಾ ಮಸ್ಕರೇನ್ಹಸ್