ಸೃಷ್ಟಿಶೀಳತೆಕ್ ಗೊವಾಯ್ ಜಾಲ್ಲಿ ’ಯುವ ಸಾಹಿತಿ’ ಕಾರ್ಯಾವಳ್
ಕವಿತಾ ಟ್ರಸ್ಟ್ ಹಾಂಣಿ ಸಾಹಿತ್ಯ ಅಕಾದಮಿ, ನವಿ ದಿಲ್ಲಿ ಆನಿ ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಠಾನ್ ಹಾಂಚೆ ಸಾಂಗಾತಾ ಮೆಳುನ್ ಮಾಯ್ 18, 2026 ತಾರಿಕೆರ್ ವಿಶ್ವ ಕೊಂಕಣಿ ಕೇಂದ್ರಾಂತ್ ಮಾಂಡುನ್ ಹಾಡಲ್ಲಿ ’ಯುವ ಸಾಹಿತಿ’ ಕಾರ್ಯಾವಳ್ ಸೃಷ್ಟಿಶೀಳತೆಕ್ ಗೊವಾಯ್ ಜಾಲಿ ಮಾತ್ರ್ ನ್ಹಯ್, ಆಮ್ಚೆ ಯುವಜಣ್ ಕೊಂಕಣಿ ಸಾಹಿತ್ಯಾಂತ್ ನವೆಂ ಚಿಂತಪ್ ಹಾಡುನ್ ಆಸಾತ್, ಆಪ್ಲಿಂ ಇಂದ್ರಿಯಾಂ ಸದಾಂ ನವ್ಯಾ ಸಂಗ್ತಿಂಕ್ ಉಗ್ತಿಂ ದವ್ರುನ್ ಆಸಾತ್ ತಶೆಂಚ್ ಆಯ್ಚ್ಯಾ ಕಾಳಾಚ್ಯಾ ಜಳ್ತ್ಯಾ ಗಜಾಲಿಂಕ್ ಆಪ್ಲ್ಯಾ ಬರ್ಪಾಂನಿ ಜಾಪಿ ಸೊಧುನ್ ಆಸಾತ್ ಮ್ಹಳ್ಳೆವಿಶಿಂ ದಾಂಬೂನ್ ಸಾಂಗ್ಚ್ಯಾಂತ್ ಸುಫಳ್ ಜಾಲಿ.
ಕಾರ್ಯಾಚೆ ಸುರ್ವೆರ್ ಸಾಹಿತ್ಯ ಅಕಾದಮಿಚ್ಯಾ ಕೊಂಕಣಿ ಸಲ್ಲಾಗಾರ್ ಸಮಿತಿಚೊ ನಿಮಂತ್ರಕ್ ಮೆಲ್ವಿನ್ ರೊಡ್ರಿಗಸಾನ್ ಯೆವ್ಕಾರ್ ದಿಲೊ. ಸಾಹಿತ್ಯ ಅಕಾದಮಿ ದರೆಕಾ ಎಕುಣ್ವೀಸ್ ವೊರಾಂಕ್ ಏಕ್ ಪುಸ್ತಕ್ ಪರ್ಗಟ್ ಕರುನ್ ಆಸಾ ಆನಿ ದರೆಕಾ ಸತ್ರಾ ವೊರಾಂಕ್ ಸಾಹಿತ್ಯ ಅಕಾದಮಿಚಿ ಏಕ್ ತರೀ ಕಾರ್ಯಾವಳ್ ಭಾರತಾಚ್ಯಾ ಖಂಯ್ಚ್ಯಾ ಎಕಾ ಕೊನ್ಶಾಂತ್ ಜಾವ್ನ್ ಆಸ್ತಾ ಮ್ಹಣುನ್ ತಾಣೆ ಸಾಂಗ್ಲೆಂ. ಯುವ ಸಾಹಿತಿ ರಿತ್ಯಾ ಕೊಳ್ಶಾಬರಿ ನ್ಹಯ್, ತಾಂಚ್ಯಾ ಕಾಳ್ಜಾಂನಿ ಫುಡಾರಾಂತ್ಲೆ ಪ್ರಕೃತಿಂತ್ ಸಮತೋಲನ್ ಹಾಡ್ಚಿಂ ರಾನಾಂ ವಾಡೊಂವ್ಚ್ಯಾಕ್ ಗರ್ಜೆಚೊ ಬಿಯಾಳೊ ಆಸ್ತಾ. ಹ್ಯಾ ಬಿಯಾಳ್ಯಾಕ್ ಜೊಕ್ತೆ ಮಾತಿಯೆಂತ್ ಘಾಲುನ್ ತಾಚೊ ಪೋಸ್ ಕರುನ್ ರೂಕ್ ಜಾವ್ನ್ ವಾಡೊಂವ್ಚೆಂ ಕಾಮ್ ಸಾಹಿತ್ಯ ಅಕಾದಮಿ ಕರುನ್ ಆಸಾ ಮ್ಹಣ್ ತಾಣೆ ಸಾಂಗ್ಲೆಂ. ಅಸಲೆ ಕಾರ್ಯಾವಳಿಂ ಬರಾಬರ್ ಕವಿತಾ ಟ್ರಸ್ಟ್ ಸದಾಂ ಆಸ್ತಲೆಂ ಅಶೆಂ ತೊ ಮ್ಹಣಾಲೊ.
ಕಾರ್ಯಾವಳಿಚೆಂ ಅಧ್ಯಕ್ಷಪಣ್ ಉದೆತೊ ಕಥಾಕಾರ್, ಕವಿ, ನಿರ್ದೇಶಕ್ ಸ್ಟೇನಿ ಬೆಳಾನ್ ಘೆತಲ್ಲೆಂ. ತಾಣೆ ಆಪ್ಲಿ ಕಥಾ ಹ್ಯಾ ಸಂದರ್ಭಾರ್ ವಾಚುನ್ ಸಾಂಗ್ಲಿ. ಸಾಹಿತ್ಯ ಅಕಾದಮಿ ಯುವ ಪುರಸ್ಕಾರ್ ವಿಜೇತ್ ವಿಲ್ಮಾ ಬಂಟ್ವಾಳ್, ಕರ್ನಾಟಕ ಸಾಹಿತ್ಯ ಅಕಾದಮಿ ಪುರಸ್ಕಾರ್ ವಿಜೇತ್ ಕವಿ ವೆಂಕಟೇಶ್ ನಾಯಕ್, ಶ್ವೇತಾ ಎಮ್. ಪೈ, ಲವೀಟಾ ಡಿಸೋಜಾ ನಕ್ರೆ ಹಾಂಣಿ ಆಪಾಪ್ಲ್ಯೊ ಕವಿತಾ ವಾಚ್ಲ್ಯೊ ತರ್, ಆಯ್ಲೆವಾರ್ ಆಪ್ಲೊ ’ಹೆರಿಡಿಟಿ' ಕಥಾಸಂಗ್ರಹ್ ಪರ್ಗಟ್ ಕೆಲ್ಲ್ಯಾ ಗ್ಲ್ಯಾನಿಶ್ ಮಾರ್ಟಿಸಾನ್ ಕಥಾ ಸಾದರ್ ಕೆಲಿ.
ಮಂಗಳಾ ಭಟಾನ್ ಸೂತ್ರ್ ಸಂಚಾಲನ್ ಕೆಲೆಂ. ಹ್ಯಾ ಸಂದರ್ಭಾರ್ ಕೊಂಕಣಿ ಸಲ್ಲಾಗಾರ್ ಸಮಿತಿಚೊ ವಾಂಗ್ಡಿ ಹೆನ್ರಿ ಪೆರ್ನಾಲ್ ಹಾಜರ್ ಆಸ್ಲೊ. ಸಗ್ಳ್ಯಾ ಯುವ ಸಾಹಿತಿಂಕ್ ಮೆಲ್ವಿನ್ ರೊಡ್ರಿಗಸಾನ್ ಪ್ರಮಾಣ್ ಪತ್ರಾಂ ವಾಂಟ್ಲಿಂ.
सृष्टीशीळतेक गोवाय जाल्ली ’युव साहिती’ कार्यावळ
कविता ट्रस्ट हांणी साहित्य अकादमी, नवी दिल्ली आनी कोंकणी भास आनी संस्कृती प्रतिष्ठान हांचे सांगाता मेळून माय 18, 2026 तारकेर विश्व कोंकणी केंद्रांत मांडून हाडल्ली ’युव साहिती’ कार्यावळ सृष्टीशीळतेक गोवाय जाली मात्र न्हय, आमचे युवजण कोंकणी साहित्यांत नवें चिंतप हाडून आसात, आपलीं इंद्रियां सदां नव्या संगतींक उगतीं दवरून आसात तशेंच आयच्या काळाच्या जळत्या गजालींक आपल्या बरपांनी जापी सोधून आसात म्हळ्ळेविशीं दांबून सांगच्यांत सुफळ जाली.
कार्याचे सुरवेर साहित्य अकादमीच्या कोंकणी सल्लागार समितीचो निमंत्रक मेल्विन रोड्रीगसान येवकार दिलो. साहित्य अकादमी दरेका एकुणवीस वरांक एक पुस्तक पर्गट करून आसा आनी दरेका सत्रा वरांक साहित्य अकादमीची एक तरी कार्यावळ भारताच्या खंयच्या एका कोनशांत जावन आसता म्हणून ताणे सांगलें. युव साहिती रित्या कोळशाबरी न्हय, तांच्या काळजांनी फुडारांतले प्रकृतींत समतोलन हाडचीं रानां वाडोंवच्याक गरजेचो बियाळो आसता. ह्या बियाळ्याक जोकते मातयेंत घालून ताचो पोस करून रूक जावन वाडोंवचें काम साहित्य अकादमी करून आसा म्हण ताणे सांगलें. असले कार्यावळीं बराबर कविता ट्रस्ट सदां आसतलें अशें तो म्हणालो.
कार्यावळीचें अध्यक्षपण उदेतो कथाकार, कवी, निर्देशक स्टेनी बेळान घेतल्लें. ताणे आपली कथा ह्या संदर्भार वाचून सांगली. साहित्य अकादमी युव पुरस्कार विजेत विल्मा बंटवाळ, कर्नाटक साहित्य अकादमी पुरस्कार विजेत कवी वेंकटेश नायक, श्वेता एम. पै, लवीटा डिसोजा नक्रे हांणी आपापल्यो कविता वाचल्यो तर, आयलेवार आपलो ’हेरिडिटी' कथासंग्रह पर्गट केल्ल्या ग्लॅनीश मार्टीसान कथा सादर केली.
मंगळा भटान सूत्र संचालन केलें. ह्या संदर्भार कोंकणी सल्लागार समितीचो वांगडी हेन्री पेर्नाल हाजर आसलो. सगळ्या युव साहितींक मेल्विन रोड्रीगसान प्रमाण पत्रां वांटलीं.