ಮೀರಾ ರೋಡಾಂತ್ ಕವಿತಾ ಕಾರ್ಯಾಗಾರ್ ಆನಿ ಸಾಹಿತ್ಯ್ ಮಂಚ್ ಕಾರ್ಯಾವಳ್
ಕವಿತಾ ಟ್ರಸ್ಟ್ ಹಾಂಣಿ ಕೊಂಕಣಿ ಭಾಶಾ ಮಂಡಳ್, ಮಹಾರಾಷ್ಟ್ರ ತಶೆಂಚ್ ಸೈಂಟ್ ಜೋಸೆಫ್ಸ್ ಕೊಂಕಣಿ ವೆಲ್ಫೇರ್ ಎಸೋಸಿಯೇಶನ್, ಮೀರಾ ರೋಡ್ ಹಾಂಚೆ ಸಾಂಗಾತಾ ಮೆಳುನ್, ಇಗರ್ಜೆಚ್ಯಾ ಟೆರೆಸ್ ಹೊಲಾಂತ್ ಹ್ಯಾಚ್ ಜುಲಾಯ್ 5, 2026 ತಾರಿಕೆರ್ ಕವಿತಾ ಕಾರ್ಯಾಗಾರ್ ಚಲೊವ್ನ್ ವ್ಹೆಲೆಂ.
ಸೈಂಟ್ ಜೋಸೆಫ್ ಫಿರ್ಗಜೆಚೊ ವಿಗಾರ್ ಫಾ. ಲೊರೆನ್ಸ್ ಡಿಕುನ್ಹಾನ್ ಪಣ್ಟಿ ಪೆಟೊವ್ನ್ ಕಾರ್ಯಾಗಾರಾಚೆಂ ಉಗ್ತಾವಣ್ ಕೆಲೆಂ ಆನಿ ಕಾರ್ಯಾಗಾರಾಚೆರ್ ಆನಿ ಉಪ್ರಾಂತ್ ಚಲಲ್ಲ್ಯಾ ಸಾಹಿತ್ಯ್ ಮಂಚ್ ಕಾರ್ಯಾವಳಿಚೆರ್ ಮಾಗ್ಣ್ಯಾಚೊ ಶಿಂವೊರ್ ವೊತ್ಲೊ. ಉಗ್ತಾವಣ್ ಸುವಾಳ್ಯಾಕ್ 'ದಿವೊ' ಸಾತೊಳ್ಯಾಚೊ ಸಂಪಾದಕ್ ಲೊರೆನ್ಸ್ ಕುವೆಲ್ಹೊ ಮುಕೆಲ್ ಸೈರೊ ಮ್ಹಣುನ್ ಹಾಜರ್ ಆಸಲ್ಲೊ. "ಆಮ್ಚಿ ಅಸ್ಮಿತಾಯ್ ಆಮ್ಚಿ ಮಾಯ್ಭಾಸ್ ಕೊಂಕಣಿ. ವೆವೆಗ್ಳ್ಯಾ ಜಾತೀಯ್ ಸಮುದಾಯಾಂ ಮಧೆಂ ಜಾಯ್ತಿಂ ವರ್ಸಾಂ ರಾವುನ್ ಸಯ್ತ್ ಆಮಿ ಆಮ್ಚಿ ಸಂಸ್ಕೃತಿ ತಶೆಂ ಭಾಸ್ ವಿಸ್ರುಂಕ್ ನಾಂವ್. ಪುಣ್ ಆಮ್ಚೆ ಭಾಶೆಂತ್ ತಶೆಂ ಸಂಸ್ಕೃತಿ ಆಚರಣಾಂತ್ ಬದ್ಲೊನ್ ವೆಚ್ಯಾ ಸಮಾಜಾ ತೆಕಿದ್, ಆನಿ ಕಾಳಾತೆಕಿದ್ ಪಾಟ್ಲ್ಯಾ ದಶಕಾಂನಿ ಜಾಯ್ತಿ ಬದ್ಲಾವಣ್ ಘಡೊನ್ ಆಯ್ಲ್ಯಾ. ಆಮಿ ಸವ್ಕಾಸ್ ಆಮ್ಚೆ ಭಾಶೆಥಾವ್ನ್, ಸಂಸ್ಕೃತಿಥಾವ್ನ್ ಪಯ್ಸ್ ವಚುನ್ ಆಸಾಂವ್ ಮ್ಹಳ್ಳ್ಯಾಚಿ ಭಿರಾಂತ್ ಧೊಸ್ತಾ" ಮ್ಹಣುನ್ ತಾಣೆ ಆಪ್ಲ್ಯಾ ಉಲೊವ್ಪಾಂತ್ ಸಾಂಗ್ಲೆಂ. ಮುಕಾರಿಂ ಉಲೊವ್ನ್ "ಮುಂಬಂಯ್ತ್ ನಿದುನ್ ಪಡಲ್ಲ್ಯಾ ಸಂಘ್ ಸಂಸ್ಥ್ಯಾಂನಿ ಜಾಗೆಂ ಜಾಯ್ಜಾಯ್, ತಾಂತ್ರಿಕ್ ಯುಗಾಕ್ ಲಾಗುನ್ ಕುಸ್ಕೊನ್ ವೆಚೆ ಆವಯ್ ಬಾಪಯ್ ಆನಿ ಭುರ್ಗ್ಯಾಂ ಮದ್ಲೆ ಸಂಬಂಧ್ ಪರ್ತ್ಯಾನ್ ಜಿವಾಳ್ ಜಾಯ್ಜಾಯ್. ತವಳ್ ಆಮಿ ಪರತ್ ಆಮ್ಚೆ ಭಾಶೆಕ್ ವೆಂಗುನ್ ಧರುಂಕ್ ಸಾಧ್ಯ್ ಜಾತಲೆಂ" ಅಸೊ ಭರ್ವಸೊ ತಾಣೆ ಉಚಾರ್ಲೊ.
ವೇದಿಚೆರ್ ಸೈಂಟ್ ಜೋಸೆಪ್ ಕೊಂಕಣಿ ವೆಲ್ಫೇರ್ ಎಸೋಸಿಯೇಶನಾಚಿ ಅಧ್ಯಕ್ಷ್ ಪ್ರಿಯಾ ನೊರೊನ್ಹಾ ಹಾಜರ್ ಆಸುನ್ ಸಗ್ಳ್ಯಾಂಕ್ ತಿಣೆಂ ಯೆವ್ಕಾರ್ ಮಾಗ್ಲೊ. ಕೊಂಕಣಿ ಭಾಶಾ ಮಂಡಳಾಚೊ ಕಾರ್ಯದರ್ಶಿ ಲೊರೆನ್ಸ್ ಡಿಸೋಜಾ ಕಮಾನಿ ತಶೆಂಚ್ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್ ಹ್ಯಾ ಸಂದರ್ಭಾರ್ ವೇದಿರ್ ಹಾಜರ್ ಆಸಲ್ಲೆ.
ತ್ಯಾ ಉಪ್ರಾಂತ್ ಮೆಲ್ವಿನ್ ರೊಡ್ರಿಗಸಾಚ್ಯಾ ನಿರ್ದೇಶಕ್ಪಣಾಖಾಲ್ ಕವಿತಾ ಕಾರ್ಯಾಗಾರ್ ಚಲ್ಲೆಂ. ಕವಿತಾ ಮ್ಹಳ್ಯಾರ್ ಕಿತೆಂ, ಕವಿತಾ ಕಿತ್ಯಾಕ್ ಬರಯ್ತಾತ್, ಕಿತ್ಯಾಕ್ ವಾಚ್ತಾತ್, ಕವಿತಾ ಕಶಿ ಜಾತಾ - ಇತ್ಲೆಂ ಸಾಂಗುನ್ ಕವಿತೆಚೆಂ ಸುರೂಪ್ ಕಶೆಂ ಆಸ್ತಾ, ಏಕ್ ಬಳ್ವಂತ್ ಕವಿತಾ ಬರೊಂವ್ಕ್ ಕಿತೆಂ ಗರ್ಜೆಚೆಂ ಇತ್ಯಾದಿವಿಶಿಂ ಕೊಂಕಣಿ ಕವಿತಾಂಚೆ ದಾಕ್ಲೆ ದೀವ್ನ್ ತಾಣೆ ವಿವರ್ ದಿಲೊ. ಹ್ಯಾ ಸಂದರ್ಭಾರ್ ವೆಲೊರಾ ಜೀನ್ ಕುಟಿನ್ಹೊ, ಗ್ಲಾವಿನ್ ಫೆರ್ನಾಂಡಿಸ್, ಸಾರಾ ಲೋಬೊ, ಆಲ್ರಿಯಾ ನೊರೊನ್ಹಾ, ಹೇಯ್ಡನ್ ಕ್ಸೇವಿಯರ್ ಡೆಸಾ, ರಿಯೊನ್ ಕೊರೆಯಾ, ರಿಶೋನ್ ಕೊರೆಯಾ, ಆಲಿಟಾ ಲೋಬೊ, ಎಲ್ಟನ್ ಲೋಬೊ ಹಾಂಣಿ ವೆವೆಗ್ಳ್ಯಾ ಕವಿಂಚ್ಯೊ ಕವಿತಾ ಸಾದರ್ ಕೆಲ್ಯೊ.
ಕೊಂಕಣಿ ಭಾಶಾ ಮಂಡಳಾಚೊ ಖಜಾನಿ ಮೆಲ್ವಿನ್ ಫೆರ್ನಾಂಡಿಸಾನ್ ಸೂತ್ರ್ ಸಂಚಾಲನ್ ಕೆಲ್ಲೆಂ. ಸಾರಾ ಲೋಬೊ ಆನಿ ಸಿಯೆನ್ನಾ ಡಿಸೋಜಾನ್ ಕಾರ್ಯಾಗಾರಾಚೆ ಸುರ್ವೆರ್ ಮಾಗ್ಣ್ಯಾ ಗೀತಾಕ್ ನಾಚ್ ಕೆಲೊ.
ಹ್ಯಾ ಉಪ್ರಾಂತ್ ಸಾಹಿತ್ಯ ಅಕಾದೆಮಿ, ನವಿ ದಿಲ್ಲಿ ಆನಿ ಕೊಂಕಣಿ ಭಾಶಾ ಮಂಡಳ್, ಮಹಾರಾಷ್ಟ್ರ ಹಾಂಣಿ ಸಾಂಗಾತಾ ಮೆಳುನ್ ’ಸಾಹಿತ್ಯ್ ಮಂಚ್’ ಕಾರ್ಯಾವಳ್ ಚಲೊವ್ನ್ ವ್ಹೆಲಿ.
ಲೊರೆನ್ಸ್ ಡಿಸೋಜಾ ಕಮಾನಿನ್ ಕಾರ್ಯಾಚೆಂ ಅಧ್ಯಕ್ಷಪಣ್ ಘೆತಲ್ಲೆಂ. ಸಾಹಿತ್ಯ ಅಕಾದೆಮಿಚ್ಯಾ ಕೊಂಕಣಿ ಸಲ್ಲಾಗಾರ್ ಮಂಡಳಾಚೊ ನಿಮಂತ್ರಕ್ ಮೆಲ್ವಿನ್ ರೊಡ್ರಿಗಸಾನ್ ಸಗ್ಳ್ಯಾಂಕ್ ಯೆವ್ಕಾರ್ ದಿಲೊ ಆನಿ ಸಾಹಿತ್ಯ ಅಕಾದೆಮಿಚ್ಯಾ ಕಾರ್ಯಾವಳಿಂ ವಿಶಿಂ ಮ್ಹಾಯೆತ್ ದಿಲಿ.
ಸಾಹಿತ್ಯ್ ಮಂಚ್ ಕಾರ್ಯಾವಳಿಂತ್ ಫ್ಲೋರಾ ಕಲ್ಮಾಡಿ (ಮ್ಹಜಿ ಸದಾಂಚಿ ಕಾಣಿ), ನಜ್ರೆತ್ ನೆರಿ ತಾಕೊಡೆ (ರಗ್ತಾಚೊ ಪಾವ್ಸ್) ಆನಿ ಮೆಲ್ವಿನ್ ಫೆರ್ನಾಂಡಿಸಾನ್ (ಕೊಂಕಣಿಚೆಂ ಗುಣ್ಗಾನ್ ಗಾಂವ್ಚ್ಯೊ ಕವಿತಾ) ಆಪಾಪ್ಲ್ಯೊ ಕವಿತಾ ಸಾದರ್ ಕೆಲ್ಯೊ ತರ್, ಹಿಲರಿ ಡಿಸಿಲ್ವನ್ (ಪ್ರಸನ್ನ್ ನಿಡ್ಡೋಡಿ) 'ರೇಣುಕಾ- ಝೊಪ್ಡ್ಯಾಂತ್ಲಿ ಚಲಿ’ ಕಥಾ ವಾಚುನ್ ಸಾಂಗ್ಲಿ.
ನಿಮಾಣೆಂ ಮೆಲ್ವಿನ್ ಫೆರ್ನಾಂಡಿಸಾನ್ ಸಗ್ಳ್ಯಾಂಚೊ ಉಪ್ಕಾರ್ ಆಟಯ್ಲೊ.
मीरा रोडांत कविता कार्यागार आनी साहित्य मंच कार्यावळ
कविता ट्रस्ट हांणी कोंकणी भाशा मंडळ, महाराष्ट्र तशेंच सैंट जोसेफ कोंकणी वेल्फेर एसोसीयेशन हांचे सांगाता मेळून, इगर्जेच्या टेरेस हॉलांत ह्याच जुलाय 5, 2026 तारकेर कविता कार्यागार चलोवन व्हेलें.
सैंट जोसेफ फिर्गजेचो विगार फा. लॉरेन्स डिकुन्हान पणटी पेटोवन कार्यागाराचें उगतावण केलें आनी कार्यागाराचेर आनी उपरांत चलल्ल्या साहित्य मंच कार्यावळीचेर मागण्याचो शिंवोर वोतलो. उगतावण सुवाळ्याक 'दिवो' सातोळ्याचो संपादक लॉरेन्स कुवेल्हो मुकेल सैरो म्हणून हाजर आसल्लो. "आमची अस्मिताय आमची मायभास कोंकणी. वेवेगळ्या जातीय समुदायां मधें जायतीं वर्सां रावून सयत आमी आमची संस्कृती तशें भास विसरूंक नांव. पूण आमचे भाशेंत तशें संस्कृती आचरणांत बदलोन वेच्या समाजा तेकीद, आनी काळा तेकीद फाटल्या दशकांनी जायती बदलावण घडोन आयल्या. आमी सवकास आमचे भाशेथावन, संस्कृती थावन पयस वचून आसांव म्हळ्ळ्याची भिरांत धोसता" म्हणून ताणे आपल्या उलोवपांत सांगलें. मुकारीं उलोवन "मुंबंयत निदून पडल्ल्या संघ संस्थ्यांनी जागें जायजाय, तांत्रीक युगाक लागून कुसकोन वेचे आवय बापय आनी भुरग्यां मदले संबंध परत्यान जिवाळ जायजाय. तवळ आमी परत आमचे भाशेक वेंगून धरुंक साध्य जातलें" अशो भर्वसो ताणे उचारलो.
वेदीचेर सैंट जोसेफ कोंकणी वेल्फेर एसोसीयेशनाची अध्यक्ष प्रिया नोरोन्हा हाजर आसून सगळ्यांक तिणें येवकार मागलो. कोंकणी भाशा मंडळाचो कार्यदर्शी लॉरेन्स डिसोजा कमानी तशेंच कविता ट्रस्ट अध्यक्ष मेल्विन रोड्रीगस ह्या संदर्भार वेदीर हाजर आसल्ले.
त्या उपरांत मेल्विन रोड्रीगसाच्या निर्देशकपणाखाल कविता कार्यागार चल्लें. कविता म्हळ्यार कितें, कविता कित्याक बरयतात, कित्याक वाचतात, कविता कशी जाता - इतलें सांगून कवितेचें सुरूप कशें आसता, एक बळवंत कविता बरोवंक कितें गर्जेचें इत्यादिविशीं कोंकणी कवितांचे दाकले दीवन ताणे विवर दिलो. ह्या संदर्भार वेलोरा जीन कुटीन्हो, ग्लॅवीन फेर्नांडीस, सारा लोबो, आलरिया नोरोन्हा, हेयडन क्सेवियर डेसा, रियोन कोरेया, रिशोन कोरेया, आलीटा लोबो, एल्टन लोबो हांणी वेवेगळ्या कवींच्यो कविता सादर केल्यो.
कोंकणी भाशा मंडळाचो खजानी मेल्विन फेर्नांडिसान सूत्र संचालन केल्लें. सारा लोबो आनी सियेन्ना डिसोजान कार्यागाराचे सुरवेर मागण्या गीताक नाच केलो.
ह्या उपरांत साहित्य अकादेमी, नवी दिल्ली आनी कोंकणी भाशा मंडळ, महाराष्ट्र हांणी सांगाता मेळून ’साहित्य मंच’ कार्यावळ चलोवन व्हेली.
लॉरेन्स डिसोजा कमानीन कार्याचें अध्यक्षपण घेतल्लें. साहित्य अकादेमीच्या कोंकणी सल्लागार मंडळाचो निमंत्रक मेल्विन रोड्रीगसान सगळ्यांक येवकार दिलो आनी साहित्य अकादेमीच्या कार्यावळीं विशीं म्हायेत दिली.
साहित्य मंच कार्यावळींत फ्लोरा कल्माडी (म्हजी सदांची काणी), नज्रेत नेरी ताकोडे (रगताचो पावस) आनी मेल्विन फेर्नांडिसान (कोंकणिचें गुणगान गांवच्यो कविता) आपापल्यो कविता सादर केल्यो तर, हिलरी डिसिल्वान (प्रसन्न निड्डोडी) 'रेणुका- झोपड्यांतली चली’ कथा वाचून सांगली.
निमाणें मेल्विन फेर्नांडिसान सगळ्यांचो उपकार आटयलो.