ಕೊಂಕಣಿ ಕವಿತಾ ಸಾದರೀಕರಣ್ ಸರ್ತೆಂತ್ ನಿನಿಶಾ, ಎಲ್ವಿನ್ ಆನಿ ಪ್ರೀತನ್ ಪಯ್ಲಿಂ
ಕೊಂಕಣಿ ನಾಟಕ್ ಸಭಾ ಆನಿ ಕವಿತಾ ಟ್ರಸ್ಟ್ ಹಾಂಣಿ ಸಾಂಗಾತಾ ಮೆಳುನ್ ಹ್ಯಾಚ್ 2026 ಆಗೋಸ್ತ್ ಮ್ಹಯ್ನ್ಯಾಚೆ 2 ತಾರಿಕೆರ್ ಡೊನ್ ಬೊಸ್ಕೊ ಸಾಲಾಂತ್ ಮಾಂಡುನ್ ಹಾಡಲ್ಲ್ಯಾ 24ವ್ಯಾ ಕೊಂಕಣಿ ಕವಿತಾ ಸಾದರೀಕರಣ್ ಸರ್ತೆಂತ್ ಭುರ್ಗ್ಯಾಂಚ್ಯಾ ವಿಭಾಗಾಂತ್ ಬೊಂದೆಲ್ಚ್ಯಾ ನಿನಿಶಾ ಪ್ರಿಶಾ ಮೊಂತೇರೊನ್ ಪಯ್ಲೆಂ ಸ್ಥಾನ್ ಜೊಡ್ಲೆಂ ಜಾಲ್ಯಾರ್, ಯುವಜಣಾಂಚ್ಯಾ ವಿಭಾಗಾಂತ್ ಶಿರ್ತಾಡಿಚ್ಯಾ ಎಲ್ವಿನ್ ಡೆಸಾನ್ ಪಯ್ಲೆಂ ಸ್ಥಾನ್ ಆಪ್ಣಾಯ್ಲೆಂ. ಮ್ಹಾಲ್ಗಡ್ಯಾಂಚ್ಯಾ ವಿಭಾಗಾಂತ್ ದೆರೆಬೈಲ್ಚ್ಯಾ ಪ್ರೀತನ್ ರೆನಿಟಾ ಪಿರೇರಾಕ್ ಪಯ್ಲೆಂ ಸ್ಥಾನ್ ಫಾವೊ ಜಾಲೆಂ.
ಪಂದ್ರಾ ವರ್ಸಾ ಸಕಯ್ಲ್ಯಾ ಭುರ್ಗ್ಯಾಂಚ್ಯಾ ವಿಭಾಗಾಂತ್ 33 ಜಣಾಂನಿ ಭಾಗ್ ಘೆತಲ್ಲೊ ಆಸುನ್ ದುಸ್ರೆಂ ಇನಾಮ್ ಹೊಸ್ಪೆಟ್ಚ್ಯಾ ಏಂಜೆಲ್ ಮೇಘನ್ ಕುಟಿನ್ಹಾಕ್ ಗೆಲೆಂ. ತಿಸ್ರೆಂ ಇನಾಮ್ ಬೊಂದೆಲ್ಚ್ಯಾ ನಿಶೆಲ್ ಪರ್ಲ್ ಮೊಂತೇರೊಕ್ ಮೆಳ್ಳೆಂ. ಪ್ರೋತ್ಸಾಹಕ್ ಇನಾಮಾಂ ಆನ್ಯಾ ಡೆಸಾ, ಸಿಯಾನಾ ವೇಗಸ್, ಬಜ್ಜೋಡಿ ಆನಿ ಎಲ್ರಿನ್ ರಿಶಾಕ್ ಡಿಸೋಜಾ, ಕಾಸ್ಸಿಯಾ ಹಾಂಕಾಂ ಫಾವೊ ಜಾಲಿಂ.
ಪಂದ್ರಾ ತೆಂ ತೀಸ್ ವರ್ಸಾಂ ಭಿತರ್ಲ್ಯಾ ಯುವಜಣಾಂಚ್ಯಾ ವಿಭಾಗಾಂತ್ಲೆಂ ದುಸ್ರೆಂ ಇನಾಮ್ ನೀರ್ಮಾರ್ಗಾಚ್ಯಾ ಪ್ರಿನ್ಸಿಯಾ ಡಿಸೋಜಾನ್ ಜೊಡ್ಲೆಂ ಜಾಲ್ಯಾರ್, ತಿಸ್ರೆಂ ಇನಾಮ್ ಗುರ್ಪುರ್ಚ್ಯಾ ಆಲ್ರೀಶಾ ವೆಲನಿ ರೊಡ್ರಿಗಸ್ ಆನಿ ಬೆಂದುರ್ಚ್ಯಾ ಎಶ್ಲಿನ್ ವಿಸ್ಮಯ ಲೋಬೊಕ್ ಫಾವೊ ಜಾಲೆಂ.
ತೀಸ್ ವರ್ಸಾಂ ವಯ್ಲ್ಯಾಂಚ್ಯಾ ಜ್ಯೇಷ್ಠಾಂಚ್ಯಾ ವಿಭಾಗಾಂತ್ ದುಸ್ರೆಂ ಇನಾಮ್ ಕಾಸ್ಸಿಯಾಚ್ಯಾ ಐರಿನ್ ಮೆಂಡೊನ್ಸಾಕ್ ಫಾವೊ ಜಾಲೆಂ ಜಾಲ್ಯಾರ್ ತಿಸ್ರೆಂ ಇನಾಮ್ ನಕ್ರೆಚ್ಯಾ ಲವೀಟಾ ಡಿಸೋಜಾಕ್ ಫಾವೊ ಜಾಲೆಂ.
ಹಿ ಸಗ್ಳಿ ಸರ್ತ್ ವಿನ್ಸಿ ಪಿಂಟೊ ಆಂಜೆಲೊರ್, ಸ್ಮಿತಾ ಶೆಣೈ ಆನಿ ಫೆಲ್ಸಿ ಲೋಬೊ ಹಾಂಣಿ ವೊರವ್ಣಿ ಕೆಲಿ.
ಸ್ಪರ್ಧ್ಯಾಚೆ ಸುರ್ವೆರ್ ಕೊಂಕಣಿ ನಾಟಕ್ ಸಭೆಚೊ ಅಧ್ಯಕ್ಷ್ ಫಾ. ರೊಕಿ ಡಿಕುನ್ಹಾ, ಉಪಾಧ್ಯಕ್ಷ್ ಫ್ಲೊಯ್ಡ್ ಡಿಮೆಲ್ಲೊ, ಕಾರ್ಯದರ್ಶಿ ಪ್ಯಾಮೆಲಾ ಸಾಂತೊಸ್, ಖಜಾನ್ದಾರ್ ಡಿಸಿಲ್ವ ಆನಿ ಕೊಂಕಣಿ ನಾಟಕ್ ಸಭೆಚೆ ಹೆರ್ ಕಾರ್ಭಾರಿ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್ ಹಾಂಚೆ ಬರಾಬರ್ ವೇದಿರ್ ಆಸಲ್ಲೆ. ವೇದಿ ವಯ್ಲ್ಯಾ ಮಾನೆಸ್ತಾಂನಿ ವೊರಯ್ಣಾರಾಂ ಬರಾಬರ್ ಆನಿ ಕಾಂಯ್ ಥೊಡ್ಯಾ ಸ್ಪರ್ಧಿಕಾಂ ಸಾಂಗಾತಾ ಪಣ್ಟಿ ಪೆಟೊವ್ನ್ ಹಿ ಸರ್ತ್ ಉಗ್ತಾವಣ್ ಕೆಲಿ. ಫಾ. ರೊಕಿ ಡಿಕುನ್ಹಾ ಯೆವ್ಕಾರಾಚಿಂ ಉತ್ರಾಂ ಉಲೊವ್ನ್ ಸರ್ತೆಚ್ಯೆ ಯಶಸ್ವೆಖಾತೀರ್ ಮಾಗ್ಲೆಂ. ಮೆಲ್ವಿನ್ ರೊಡ್ರಿಗಸಾನ್ ಪಾಟ್ಲ್ಯಾ ಜಾಯ್ತ್ಯಾ ವರ್ಸಾಂನಿ ಹಿ ಏಕ್ ಸರ್ತ್ ಚಲೊವ್ನ್ ವ್ಹರುಂಕ್ ಸಂಧಿ ದಿಲ್ಲ್ಯಾ ಕೊಂಕಣಿ ನಾಟಕ್ ಸಭೆಚೊ ಉಪ್ಕಾರ್ ಭಾವುಡ್ಲೊ. ಕವಿತಾ ಟ್ರಸ್ಟಾಚ್ಯಾ ವಾವ್ರಾವಿಶಿಂ ಸಾಂಗುನ್, ವೊರಯ್ಣಾರಾಂಚಿ ವಳಖ್ ಕರುನ್ ದಿಲಿ ಆನಿ ಸರ್ತೆಚ್ಯಾ ನೆಮಾಂವಿಶಿಂ ವಿವರ್ ದಿಲೊ.
ಜೋಕಿಮ್ ಪಿಂಟೊನ್ ಉಪ್ಕಾರ್ ಭಾವುಡ್ಲೆ. ಮೆಲ್ವಿನ್ ರೊಡ್ರಿಗಸಾನ್ ಫಳಿತಾಂಶ್ ಪರ್ಗಟ್ ಕೆಲೆಂ. ಸಕ್ಕಡ್ ಸ್ಪರ್ಧಿಕಾಂಕ್ ಕವಿತಾ ಟ್ರಸ್ಟಾಚೆಂ ಪುಸ್ತಕ್ 'ಸಾಹಸಿ ಆನಿ ದಯಾಳಿ ಜಿವಿತಾಂ' ವಾಂಟ್ಲೆಂ.
ಎವ್ರೆಲ್ ರೊಡ್ರಿಗಸ್ ಆನಿ ವೆಂಕಟೇಶ್ ನಾಯಕ್ ಹಾಂಣಿ ಕವಿತಾ ಟ್ರಸ್ಟಾ ತರ್ಫೆನ್ ಸಹಕಾರ್ ದಿಲ್ಲೊ.