ಮೆಲ್ವಿನ್ ರೊಡ್ರಿಗಸ್ ಥಾವ್ನ್ ನವಿ ಡೆಲ್ಲಿಂತ್ ಕೊಂಕಣಿ ಕವಿತಾಚೆಂ ಹಿಂದಿ, ಇಂಗ್ಲಿಷ್ ಕವಿತಾ ವಾಚನ್
ಸಾಹಿತ್ಯ ಅಕಾಡೆಮಿ, ನವಿ ಡೆಲ್ಲಿ ಆನಿ ಸಾಂಸ್ಕೃತಿಕ್ ಖಾತೊ, ಭಾರತ್ ಸರ್ಕಾರ್ - ಹಾಂಣಿ ಹ್ಯಾಚ್ ಮಾಯ್ ಮ್ಹಯ್ನ್ಯಾಚೆ 7 ತಾರಿಕೆರ್ ಘಡೊವ್ನ್ ಹಾಡಲ್ಲ್ಯಾ ಭಾರತೀಯ್ ಕವಿತಾ ಉತ್ಸವಾಂತ್ ಕೊಂಕಣಿ ತರ್ಫೆನ್ ಕವಿ ಮೆಲ್ವಿನ್ ರೊಡ್ರಿಗಸಾನ್ ವಾಂಟೊ ಘೆತ್ಲೊ ಮಾತ್ರ್ ನ್ಹಯ್, ಹಿಂದಿ ತಶೆಂ ಇಂಗ್ಲಿಷ್ ಭಾಶೆಕ್ ಅನುವಾದ್ ಕೆಲ್ಲ್ಯೊ ಆಪ್ಣಾಚ್ಯೊ ಥೊಡ್ಯೊ ವಿಂಚ್ಲಲ್ಯೊ ಕವಿತಾ ವಾಚುನ್ ಸಾಂಗ್ಲ್ಯೊ. ಹೊ ಉತ್ಸವ್ ನೋಬೆಲ್ ಪ್ರಶಸ್ತಿ ವಿಜೇತ್ ಕವಿ ರವೀಂದ್ರನಾಥ ಠಾಕೂರಾಚ್ಯಾ 150ವ್ಯಾ ಜಲ್ಮಾ ಶತಾಬ್ದಿ ಸಮಾರೋಪ್ ಕಾರ್ಯಾ ಸಂದರ್ಭಿಂ ಮಾಂಡುನ್ ಹಾಡಲ್ಲೊ.
ಸಗ್ಳೆಂ ಕಾರ್ಯೆಂ ಸಾಹಿತ್ಯ ಅಕಾಡೆಮಿಚ್ಯಾ ರವೀಂದ್ರ ಭವನಾಂತ್ ಆಖ್ಖೊ ದೀಸಭರ್ ಚಲ್ಲೆಂ. ಹಾಂತುಂ ತೀನ್ ವಾಂಟೆ ಆಸಲ್ಲೆ. ಪಯ್ಲ್ಯಾ ವಾಂಟ್ಯಾಂತ್ ರವೀಂದ್ರನಾಥ ಠಾಕೂರಾಚಿಂ ಸ್ವತಾಚಿಂ, ಅನುವಾದಿತ್ ತಶೆಂ ತಾಚ್ಯಾ ಸಾಹಿತ್ಯಾಚೆರ್ ವೆವೆಗ್ಳ್ಯಾಂನಿ ಬರಯಿಲ್ಲಿಂ, ವೆವೆಗ್ಳ್ಯಾ ಭಾಸಾಂತ್ಲಿಂ 54 ಪುಸ್ತಕಾಂ ಸಾಹಿತ್ಯ ಅಕಾಡೆಮಿನ್ ಮೊಕ್ಳೀಕ್ ಕೆಲಿಂ. ಆಯ್ಲೆವಾರ್ ಕಬೀರ್ ಸಮ್ಮಾನ್ ಜೊಡಲ್ಲೊ ಪಂಜಾಬಿ ಕವಿ ಸುರ್ಜಿತ್ ಪಾತರಾನ್ ಹಿಂ ಪುಸ್ತಕಾಂ ಲೋಕಾರ್ಪಣ್ ಕರ್ತಾನಾ, ಸಾಹಿತ್ಯ ಅಕಾಡೆಮಿಚೊ ಅಧ್ಯಕ್ಷ್ ಸುನೀಲ್ ಗಂಗೋಪಾಧ್ಯಾಯ ತಶೆಂ ಕಾರ್ಯದರ್ಶಿ ಅಗ್ರಹಾರ ಕೃಷ್ಣಮೂರ್ತಿ ತಶೆಂ ಜಾಯ್ತೆ ಕವಿ ತಶೆಂ ರಸಿಕ್ ಹಾಜರ್ ಆಸಲ್ಲೆ.
‘ಆಯ್ಚೆಂ ಕಾರ್ಯೆಂ ಮ್ಹಳ್ಯಾರ್ ಶಾಂತಿನಿಕೇತನಾಕ್ ಏಕ್ ಮಂಗಳ್ ಯಾತ್ರಾ’ ಅಶೆಂ ಮ್ಹಣಾಲೊ ಅಗ್ರಹಾರ ಕೃಷ್ಣಮೂರ್ತಿ ಆಪ್ಲ್ಯಾ ಯೆವ್ಕಾರ್ ಉಲೊವ್ಪಾಂತ್. ‘ಹೊ ಠಾಗೋರಾಚ್ಯಾ ಜಲ್ಮಾಶತಾಬ್ದಿಚೊ ಸಮಾರೋಪ್ ಸುವಾಳೊ ಅಶೆಂ ಆಮಿ ಆಪಯ್ತಾಂವ್. ಖರ್ಯಾ ಅರ್ಥಾನ್ ಹಾಂಗಾಸರ್ ಕಾಂಯಿಂಚ್ ಸಂಪನಾ. ಆಯ್ಚ್ಯಾ ದಿಸಾ ಆಮಿ ತಾಚಿಂ ಆನಿ ತಾಚ್ಯಾ ಸಾಹಿತ್ಯಾಚಿಂ ಪನ್ನಾಸ್ ಆನಿ ಚ್ಯಾರ್ ಪುಸ್ತಕಾಂ ಮೊಕ್ಳೀಕ್ ಕರ್ತಾಂವ್. ಅಸಲೆಂ ಏಕ್ ಘಡಿತ್ ಸಂಸಾರಾರ್ ಖಂಯಿಂಚ್ ಘಡ್ಚೆಂನಾ’ ಅಶೆಂ ತಾಣೆಂ ಮುಕಾರ್ ಸಾಂಗ್ಲೆಂ.
‘ಆಮ್ಚೆ ಮಧೆಂ ದೊಗ್ ಠಾಗೋರ್ ಆಸಾತ್. ಎಕ್ಲೊ ಪಕ್ಕಾ ಬೆಂಗಾಲಿ ಕವಿ. ಹ್ಯಾ ಕವಿಕ್ ಬೆಂಗಾಲಿ ಲೋಕ್ ಸಾರ್ಕೆಂ ಸಮ್ಜತಾತ್. ತ್ಯಾ ದೆಕುನ್ ಬೆಂಗಾಲಿ ಲೋಕ್ ತಾಚ್ಯಾ ಸಾಹಿತ್ಯಾಚಿ ತಶೆಂಚ್ ತಾಚ್ಯಾ ವ್ಯಕ್ತಿಗತ್ ಜಿವಿತಾಚಿ ಠೀಕಾ ಆಜೂನಯ್ ಕರ್ತಾತ್. ಆಯ್ಲೆವಾರ್ಚ್ಯಾ ದಿಸಾಂನಿ ತಾಕಾ ಆನಿ ತಾಚೆ ಮಿವ್ಣೆಕ್ ಆಸ್ಯೆತ್ ಜಾಲ್ಯಾ ಸಂಬಂಧಾವಿಶಿಂ ಲೋಕ್ ಉಲೊವ್ನ್ ಆಸಾ ಆನಿ ಪತ್ರಾಂ ಛಾಪುನ್ ಆಸಾತ್. ದುಸ್ರೊ ಬೆಂಗಾಲಾ ಭಾಯ್ಲ್ಯಾ ಲೊಕಾಂನಿ ಸಮ್ಜಲ್ಲೊ ಠಾಗೋರ್. ತೆ ತಾಚ್ಯಾ ಸಾಹಿತ್ಯಾ ಮಾರಿಫಾತ್ ವೆವೆಗ್ಳ್ಯೊ ಚಳುವಳ್ಯೊ ಕಶ್ಯೊ ಚಲ್ಲ್ಯೊ ಮ್ಹಣೊನ್ ಸಮ್ಜೊಂಚೆಂ ಪ್ರೇತನ್ ಕರ್ತಾತ್. ಖರ್ಯಾನ್ ತೆ ಠಾಗೋರಾಕ್ ಕಿತೆಂಚ್ ಸಮ್ಜೊಂಕ್ ಆಜೂನಯ್ ಪಾವೊಂಕ್ ನಾಂತ್’ ಅಶೆಂ ಮ್ಹಣಾಲೊ ಸಾಹಿತ್ಯ ಅಕಾಡೆಮಿಚೊ ಅಧ್ಯಕ್ಷ್ ಸುನೀಲ್ ಗಂಗೋಪಾಧ್ಯಾಯ. ‘ಠಾಗೋರಾಕ್ ಗುರುದೇವ್ ಮ್ಹಣೊನ್ ಆಪೊಂವ್ಚೆಂ ಮ್ಹಾಕಾ ಸೊಸನಾ. ಕವಿಂಕ್ ಕೊಣಯ್ ಗುರು ಆಸನಾ. ಹಾಂವ್ ತಾಚೊ ವಿರೋಧಿ ನ್ಹಯ್. ಪುಣ್ ತಾಚೆ ಪಾಟ್ಲಾಮೆಕ್ ತಾಕಾ ದೆಖ್ಚೆ ರಿತಿಕ್ ಹಾಂವ್ ಕಾಂಟಾಳ್ತಾಂ. ಹಾಂವ್ ಠಾಗೋರಾಚಿ ಕವಿತಾ ವ್ಹಡ್ಶಿ ಪಸಂದ್ ಕರಿನಾ. ತಾಚೆ ಕವಿತೆಂತ್ಲಿ ಭಾಸ್ ಉಂಚ್ಲ್ಯಾ ಕುಳಾಂಚಿ ಭಾಸ್. ತಿ ಆಜ್ ಕೊಣಯ್ ಬೆಂಗಾಲಾಂತ್ ಉಲಯ್ನಾ’, ಅಶೆಂ ಕಾಂಯ್ ದೊನ್ಶಾಂ ವಯ್ರ್ ಸಾಹಿತಿಕ್ ಪುಸ್ತಕಾಂ ಪರ್ಗಟಲ್ಲ್ಯಾ ಸುನೀಲ್ ಗಂಗೋಪಾಧ್ಯಾಯಾನ್ ಸಾಂಗ್ಲೆಂ. ಇತ್ಲೆಂ ಆಸೊನಯ್ ಠಾಗೋರ್ ಏಕ್ ಉತ್ತೀಮ್ ಕಥಾಕಾರ್ ಅಶೆಂ ತೊ ಮ್ಹಣಾಲೊ. ‘ಆಪ್ಣೆಂ ತಶೆಂ ಆಪ್ಣಾಚ್ಯಾ ಇಶ್ಟಾಂನಿ ಜಾಯ್ತ್ಯಾ ಸಂದರ್ಭಾಂನಿ ಉಗ್ತ್ಯಾನ್ ಠಾಗೋರಾಚ್ಯೊ ಖೊಡಿ ಕಾಡ್ಲ್ಯಾತ್. ತಾಕಾ ಗಾಳಿ ಸೈತ್ ದಿಲ್ಯಾತ್. ಪುಣ್ ಸಾಂಜೆರ್ ಆಮಾಲಾಚೆಂ ಕೊಪ್ ಘೆವ್ನ್ ಬಸ್ತಾನಾ ಕಳಿತ್ ನಾಸ್ತಾನಾಂಚ್ ತಾಚೆಂ ರಬೀಂದ್ರ ಸಂಗೀತ್ ಆಮಿ ಗಾಯ್ಲಾಂ. ಇತ್ಲೋಯ್ ಪ್ರಭಾವ್ ತಾಚ್ಯಾ ಸಂಗೀತಾಚೊ ಬೆಂಗಾಲಾಚೆರ್ ಪಡ್ಲಾ’ ಅಶೆಂ ತಾಣೆಂ ಮುಕಾರ್ಸುನ್ ಮ್ಹಳೆಂ.
‘ಹರ್ಯೆಕ್ ಭಾಸಾಂನಿ ಲ್ಹಾನ್ ವ್ಹಡ್ ಠಾಗೋರ್ ಆಸಾತ್’ ಅಶೆಂ ಸುರ್ಜಿತ್ ಪಾತರ್ ಆಪ್ಲ್ಯಾ ಉಲೊವ್ಪಾಂತ್ ಮ್ಹಣಾಲೊ.
ಉಪ್ರಾಂತ್ ಅಕಾಡೆಮಿಚೊ ಉಪಾಧ್ಯಕ್ಷ್ ವಿಶ್ವನಾಥ ಪ್ರತಾಪ್ ತಿವಾರಿಚ್ಯಾ ಅಧ್ಯಕ್ಷಪಣಾರ್ ಕವಿಸಮ್ಮೇಳ್ ಚಲ್ಲೊ. ಹ್ಯಾ ಸಮ್ಮೇಳಾಂತ್ ಸಮೀರ್ ತಂತ್ (ಅಸ್ಸಾಮಿ), ರಂಜಿತ್ ದಾಸ್ (ಬೆಂಗಾಲಿ), ಚಂಪಾ ಶರ್ಮಾ (ದೋಗ್ರಿ), ವೀರೆನ್ ದಾಂಗ್ವಾಲ್ (ಹಿಂದಿ), ವಸಂತ್ ಅಬಾಜಿ ದಾಹಕೆ (ಮರಾಠಿ), ಕೆ.ಜಿ.ಶಂಕರ ಪಿಳ್ಳೈ (ಮಲಯಾಳಮ್), ರಘು ಲೈಶಾಂಗ್ತೆಮ್ (ಮಣಿಪುರಿ) ಆನಿ ಈರೋಡ್ ತಮಿಳಂಬನ್ (ತಮಿಳ್) - ಹಾಂಣಿ ಆಪಾಪ್ಲ್ಯೊ ಅನುವಾದಿತ್ ಕವಿತಾ ವಾಚ್ಲ್ಯೊ.
ದೊನ್ಪಾರಾಂಚ್ಯಾ ಆದೆಸಾಂತ್ ಕವಿ ಸೀತಾಂಶು ಯಶಚಂದ್ರಾಚ್ಯಾ ಅಧ್ಯಕ್ಷಪಣಾಖಾಲ್ ಕವಿ ಸಮ್ಮೇಳ್ ಚಲೊನ್ ಎಚ್. ಎಸ್. ವೆಂಕಟೇಶಮೂರ್ತಿ (ಕನ್ನಡ), ನಸೀಮ್ ಶಫಾಯಿ (ಕಾಶ್ಮೀರಿ), ಮೆಲ್ವಿನ್ ರೊಡ್ರಿಗಸ್ (ಕೊಂಕಣಿ), ವಿವೇಕಾನಂದ ಥಾಕೂರ್ (ಮೈಥಿಲಿ), ಹರಪ್ರಸಾದ್ ದಾಸ್ (ಒರಿಯಾ), ಆದಿತ್ಯ ಕುಮಾರ್ ಮಂಡಿ (ಸಂತಾಲಿ) ಆನಿ ಎನ್. ಗೋಪಿ (ತೆಲುಗು)-ಹಾಂಣಿ ತಾಂಚ್ಯೊ ಕವಿತಾ ಸಾದರ್ ಕೆಲ್ಯೊ. ಮೆಲ್ವಿನಾನ್ ಆಪ್ಲಿ ‘ಮಾರ್ಶ್ಯಾಸಾಚೆಂ ಮಾಗ್ಣೆಂ’ ಕೊಂಕಣಿಂತ್ ವಾಚುನ್, ತಾಚೆಂ ಇಂಗ್ಲಿಷ್ ಅನುವಾದ್ ವಾಚುನ್ ಸಾಂಗ್ಲೆಂ ತರ್, ಉಪ್ರಾಂತ್ ‘ಝುಜ್’, ‘ದೂಧ್ ಸುಕಲ್ಲಿಂ ಗೊರ್ವಾಂ’ ಕವಿತಾ ಹಿಂದಿನ್ ವಾಚುನ್ ಸಾಂಗ್ಲೆಂ ತರ್, ‘ಪ್ರಕೃತಿಚೊ ಪಾಸ್’ ಕವಿತಾ ಇಂಗ್ಲಿಶಾಂತ್ ವಾಚುನ್ ಸಾಂಗ್ಲಿ. ಎರಿಕ್ ಒಝೇರಿಯೊ ತಶೆಂ ಮ್ಯಾಕ್ಸಿಮ್ ಲೋಬೊನ್ ಇಂಗ್ಲಿಷ್ ಅನುವಾದ್ ಕರುಂಕ್ ಮೆಲ್ವಿನಾಕ್ ಸಹಕಾರ್ ದಿಲ್ಲೊ ತರ್, ಜೂಡಿ ಪಿಂಟೊ, ಅನಿಸಾ ಫಾತಿಮಾ ಆನಿ ಕಿರಣ್ ಪರ್ಮಾರ್ ಹಾಂಣಿ ಹಿಂದಿಂತ್ ಅನುವಾದಾಚೆಂ ಕಾಮ್ ಕೆಲ್ಲೆಂ. ಅಧ್ಯಕ್ಷಾನ್ ಮೆಲ್ವಿನಾಚ್ಯಾ ಝುಜ್ ಕವಿತೆವಿಶಿಂ ವಿಶೇಸ್ ಥರಾನ್ ತೋಖ್ಣಾಯ್ ಕೆಲಿ ಮಾತ್ರ್ ನ್ಹಯ್, ಹಾಜರ್ ಆಸಲ್ಲ್ಯಾ ಪಂಜಾಬಿ ಕವಿ ಸುರ್ಜಿತ್ ಪತಾರಾನ್ ವಿಶೇಸ್ ಹೊಗ್ಳಿಕ್ ಉಚಾರ್ಲಿ.
ಸಾಂಜೆರ್ ತಿಸ್ರಿ ಕವಿತಾ ಗೋಷ್ಟಿ ಚಲ್ಲಿ ಆನಿ ಹಾಚೆಂ ಅಧ್ಯಕ್ಷಪಣ್ ಕವಿ ಶಿವ ಕೆ. ಕುಮಾರ್ ಹಾಂಣಿ ಘೆತಲ್ಲೆಂ. ಬೋಡೊ ಕವಿ ಪ್ರೇಮಾನಂದ್ ಮಚಹರಿ, ನೇಪಾಲಿ ಕವಿ ಮನ್ ಪ್ರಸಾದ್ ಸುಬ್ಬಾ, ರಾಜಸ್ತಾನಿ ಕವಿ ಮಂಗತ್ ಬಾದಲ್, ಸಂಸ್ಕೃತ್ ಕವಿ ಹರಿ ದತ್ತ್ ಶರ್ಮಾ ಆನಿ ಸಿಂಧಿ ಕವಿ ಪ್ರೇಮ್ ಪ್ರಕಾಶ್ ಹಾಂಣಿ ಆಪಾಪ್ಲ್ಯೊ ಕವಿತಾ ಸಾದರ್ ಕೆಲ್ಯೊ.