ಗೋಧೂಳಿ ವೇಳ್ : ವಾಗಾಚೊ ನಿಯಾಳ್

ಯೆವ್ಕಾರಾಚಿಂ ದೋನ್ ಉತ್ರಾಂ ಉಲಯ್ತಾನಾ ಕವಿತಾ  ಟ್ರಸ್ಟ್ , ಟ್ರಸ್ಟಿ ವಿಲಿಯಮ್ ಫಾಯ್ಸ್ ಮ್ಹಣಾಲೊ , ಹೊ ಕಸಲೊ ವೇಳ್ ಮ್ಹಣ್ ಕಳಿತ್ ನಾ. ಹೊ ಬೋವ್‌ಶಾ ಗೋಧೂಳಿ ವೇಳ್.

ಆನಿ ಹಾಂಗಾ ಎಕೆ ಕುಶಿನ್ ಗಾಯ್ರುಂ ಆಸಾ. ಆನ್ಯೆಕೆ ಕುಶಿನ್ ವಾಗ್ ಆಸಾ. ಆನಿ ಮಧೆಗಾತ್ ಆಮಿ ಆಸಾಂವ್ - ಕೊಂಕ್ಣಿ ಕವಿ.

ಹಿ ಏಕ್ theme ಕವಿಗೋಷ್ಟಿ.

ಮುಂಬಯ್ ತಸಲ್ಯಾ ಮ್ಹಾಶ್ಹೆರಾಂತ್ ವ್ಹಡಾಂಗೆಲ್ಯೊ theme party ಚಲ್ತಾತ್. ಆನಿ ದುಸ್ರೆ ದಿಸಾ ‘ಪೇಜ್ ತ್ರಿರ್ ಖಬರ್ ಜಾತಾತ್. ಆಮ್ಚಿ theme ಕವಿಗೋಷ್ಠಿ ‘ಪೇಜ್ ತ್ರಿರ್ ಖಬರ್ ಜಾಯ್ನಾ ಜಾಲ್ಯಾರೀ ತುಮ್ಕಾಂ ಕವಿತಾ ರಸಿಕಾಂಕ್ ಆಂವಡ್ಲಿ ತರ್, ತೆಂಚ್ ವ್ಹಡ್ಪಣ್ ಆಮ್ಕಾಂ ಆನಿ ಆಮಿಂಯೀ ವ್ಹಡಾಂಗೆಲೆ ಜಾತಾಂವ್.

ಗೆಲೆತ್ಯಾ ವರ್ಸಾ ಹಾಂಗಾಚ್ ಲಾಗ್ಶಿಲ್ಯಾ ಮಲೆಕೋಡಿ ದೊಂಗ್ರಾರ್ ಕವಿಗೋಷ್ಠಿ ಚಲ್‌ಲ್ಲಿ ಆನಿ ತಾಂತುಂಯೀ ಏಕ್ ಪೇಂಯ್ಟಿಂಗ್ ದವರ್‌ಲ್ಲೆಂ. ತ್ಯಾ ಪೇಂಯ್ಟಿಂಗಾ ವಿಷ್ಯಾಂತ್ ಉಲಯ್ತಾನಾ ಹಾಸ್ಯ್ ಕವಿ ಸಿಜ್ಯೆಸ್ ತಾಕೊಡೆನ್ ಮ್ಹಳ್ಳೆಂ ‘ಹ್ಯಾ ಪಿಂತುರಾಂತ್ಲೆಂ ಚೆಡುಂ ಆಪ್ಲಿ ಭಾಯ್ರ್ ಪಡ್‌ಲ್ಲಿ ಗಾಯ್ ಸೊಧುನ್ ಗುಡ್ಯಾಕ್ ಪಾವ್‌ಲ್ಲೆಪರಿಂ ದಿಸ್ತಾ. ತ್ಯಾ ಚೆಡ್ವಾಕ್ ತಾಚಿ ಗಾಯ್  ಮೆಳ್ಳ್ಯಾ ವಾ ನಾ ತಾಚಿ ಖಬರ್ ನಾ ಮ್ಹಾಕಾ , ಪೂಣ್ ಆಮ್ಕಾಂ ಏಕ್ ಗಾಯ್ ತ್ಯಾಚ್ ಕಲಾಕಾರಾನ್ ಕರ್ನ್ ದಿಲ್ಯಾ. ಸಾಂಗಾತಾ ಏಕ್ ವಾಗ್‌ಯಿ. ಗೆಲೆತೆ ಪಾವ್ಟಿಂ ಕವಿಗೋಷ್ಠಿ ಚಲ್ತಾನಾ ಪಬ್ಬ್ ಹಲ್ಲೊ ಖಬ್ರೆರ್ ಆಸ್ಲೊ ಆನಿ ಹ್ಯೆ ಪಾವ್ಟಿಂ ಗಾಯ್ರಾ ಕಸಾಯ್ ಕಾಯ್ದೊ ಚರ್ಚೆರ್ ಆಸಾ.

ಹಾಂವ್ ಹ್ಯಾ ಗೋಷ್ಟಿಂತ್ ಪೇಶ್ ಕೆಲ್ಲ್ಯಾ ದೋನ್ ಕವಿತೆವಿಶಿಂ ಮಾತ್ರ್ ಉಲಯ್ತಾಂ. ಪಯ್ಲಿ ಮೆಲ್ವಿನ್ ರೊಡ್ರಿಗಸಾಚಿ ‘ದೂದ್ ಸುಕ್‌ಲ್ಲಿಂ ಗೊರ್ವಾಂ ಆನಿ ದುಸ್ರಿ ಮ್ಹಜಿಚ್ ಕವಿತಾ ‘ವಾಗಾಚೊ ಸ್ವಗತ್. ಬಾರೀಕಾಯೆನ್ ಪಳೆಯ್ಲ್ಯಾರ್ ಮೆಲ್ವಿನಾಚ್ಯಾ ಕವಿತೆಂತ್ ಆಸ್ಚೊಯೀ ಗೊರ್ವಾಂಚೊ ಸ್ವಗತ್‌ಚ್ , ತೆಂಯೀ ದೂದ್ ಸುಕ್‌ಲ್ಲ್ಯಾ ಲಾಚಾರ್ ಗೊರ್ವಾಂಚೊ. ತಶೆಂ ಮ್ಹಜ್ಯಾ ಕವಿತೆಂತ್ಲೊ ವಾಗ್‌ಯಿ ಪೊಟಾಕ್ ನಾಸ್ತಾನಾ ಲಾಚಾರ್‌ಚ್. ದೊಗಾಂಯ್ಚಿ ಅಸಹಾಯಕತಾ ಎಕ್‌ಚ್. ಪೂಣ್ ವಿಂಚವ್ಣ್ಯೊ?

ತೆ ವೆವೆಗ್ಳೆ. ಕಾರಣ್ ಸಂಸ್ಕೃತ್ಯೊ ವೆವೆಗ್ಳ್ಯೊ.

ಹಾಂಗಾ ಗಾಯ್ ಮ್ಹಳ್ಯಾರ್ ಏಕ್ ಸಂಸ್ಕೃತಿ ಆನಿ ವಾಗ್ ಮ್ಹಳ್ಯಾರ್ ಆನ್ಯೇಕ್ ಸಂಸ್ಕೃತಿ.  ಮುಳಾನ್ ಕಸಾಯ್ ಮ್ಹಣ್ಚಿ ಲಡಾಯ್ ಹ್ಯಾ ದೋನ್ ಸಂಸ್ಕೃತೆ ಮದ್ಲೆಂ ಘರ್ಷಣ್ ಮಾತ್ರ್ ಆನಿ ಹ್ಯಾ ಸಂಘರ್ಷಾಂತ್ ಬಾಮುಣ್, ದಳಿತ್, ಸರ್ಕಾರ್, ದೇವ್ ಯೇವ್ನ್ ಆಪ್ಲೊ ಫಾಯ್ದೊ ಉಟಂವ್ಕ್ ಪಳೆತಾತ್.

ತುಮಿ ‘ಗೋವಿನ ಹಾಡು ಮ್ಹಳ್ಳಿ ಕವಿತಾ ವಾಚ್ಲ್ಯಾ ವಾ ಆಯ್ಕಾಲ್ಯಾ ತರೀ ಆಸ್ತೆಲಿ. ತಾಂತುಂ ಪುನೆಕೋಟಿ ಮ್ಹಳ್ಳ್ಯಾ ಗಾಯ್ಕ್ ಮುಕಾರ್ ದವರ್ನ್ ಬಾಮುಣ್ ವಾಗಾಕ್ ಮಾರ್ತಾ. ತೆಂಯೀ ತಾಚೆಚ್ ಕರ್ನಾ. ಆತಾಂ ವಾಗಾಚೊ ಆನಿ ಗಾಯ್ಚೊ ಕ್ರಿಯೇಟರ್ (ದೇವ್ ನಾ ಮ್ಹಣ್ತೆಲ್ಯಾಂಖಾತಿರ್ ಹೊ ಸಬ್ದ್ ವಾಪಾರ್ಲಾ) ಏಕ್‌ಚ್ ತರ್ ವಾಗಾಕ್ ತಣ್ ಖಾವ್ನ್ ಜಿಯೊಂಕ್ ಸಾದ್ಯ್ ನಾ. ವಾಗಾಚೆಂ ನಯ್ಸರ್‍ಗಿಕ್ ಖಾಣ್ ನೆಗಾರ್‍ಚೆಂ ಮ್ಹಳ್ಯಾರ್ ತಾಚೊ ಅಸ್ತಿತ್ವ್‌ಚ್ ನೆಗಾರ್‌ಲ್ಲೆಪರಿಂ.

ಹಿ ಕವಿತಾ ಮೆಲ್ವಿನ್ ರೊಡ್ರಿಗಸಾಚ್ಯಾ ಕವಿತೆಚಾ ಸಂದರ್ಭಾರ್ ಕಿತ್ಯಾಕ್ ಉಲ್ಲೇಕ್ ಕರ್ತಾಂ ಮ್ಹಳ್ಯಾರ್, ಆಜ್‌ಯೀ ಸಮಾಜೆಂತ್ ಬಾಮುಣ್‌ವಾದ್ ಮೊರೊಂಕ್ ನಾ. ಕಾರಣ್ ಕಸಾಯ್‌ಖಾನ್ಯಾಂಕ್ ಥಾಲೆಂ ಪಡ್ಲಾಂ, ಗಾಯ್ರುಂ ಪಳೆವ್ನ್ ರಸ್ತ್ಯಾ ವಯ್ಲ್ಯೊ ಲೊರಿಯೊ ಸಯ್ತ್ ಖಣಿಯೆಂತ್ಲ್ಯಾನ್ ಚಲ್ತಾತ್. ತರ್ ಗಾಯೆನ್ ವಾಗಾನ್ ಕೆಲ್ಲೆಪರಿಂ ಖಡ್ಪಾಚ್ಯಾ ವಾ ಗುಡ್ಯಾಚ್ಯಾ ತುದಿಯೆಕ್ ವಚೊನ್ ಗುಂಡಿಯೆಕ್ ಉಡೊನ್ ಜೀವ್ ದಿವ್ಯೆತ್ ನ್ಹಯ್? ತಿ ತಶೆಂ ಕರಿನಾ, ತಿ ಅಸ್ಕತ್ ಜಾಲ್ಯಾ ಗುಡೊ ಚಡೊಂಕ್ ತಾಂಕ್ಚೆಂನಾ ಮ್ಹಳ್ಳೆಂ ತರ್ಕ್ ಕುಶಿಕ್ ದವರ್ನ್ ಮ್ಹಣ್ಚೆಂ ತರ್, ಕಾರಣ್ - ತಶೆಂ ಕೆಲ್ಯಾರ್ ಬಾಮುಣ್‌ವಾದ್ ಸಲ್ವತಾ.

ಆತಾಂ ಪಳೆಯಾ, ‘ಗೋವಿನ ಹಾಡು ಕವಿತೆಂತ್ ವಾಗಾಕ್ ಮಾರ್ನ್ ಜಿಕ್‌ಲ್ಲೊ ಬಾಮುಣ್‌ವಾದ್‌ಚ್ ಹಾಂಗಾ ದಯೆಮರಣ್ ದೀಂವ್ಕ್ ಕೊಣಾಕ್ ತರೀ ಧಾಡಾ ಮ್ಹಣ್ಚೆಕಡೆ ವಯ್ರ್ ಪಡ್ಲಾ. ಸಾಂಗಾತಾ ಭುಕೆನ್ ಮೊರ್‍ಚಿಂ ಪೊಟಾಂ ದಾಕವ್ನ್ ಭಿರ್ಮತ್ ದಾಕಂವ್ಚೆಂಕಡೆಚ್, ಮೆಳ್ಚೆಂ ನಾ ಶೆಣ್‌ಯಿ ಖಾಂವ್ಚ್ಯಾಕ್ ಮ್ಹಳ್ಳಿ ಹಳ್ತಾಚಿ ಧಮ್ಕಿಯೀ ಆಸಾ.

ಹ್ಯಾ ದೋನ್‌ಯಿ ಕವಿತೆಂನಿ ಬರೊಚ್ ಧರ್ಮ್ ಖೆಳ್ತಾ. ಸಮಾಜಿಕ್ ಧರ್ಮ್‌ಚ್, ಆಧ್ಯಾತ್ಮಿಕ್ ನ್ಹಯ್. ‘ಗೋವಿನ ಹಾಡು ಕವಿತೆಂತ್ ಅಸಲ್ಯಾ ಸತೆವಂತ್ ಗಾಯ್ಕ್ ಮಾರ್ನ್ ಖೆಲ್ಯಾರ್ ‘ಮೆಚ್ಚನಾ ಪರಮಾತ್ಮನು ಮ್ಹಣ್ಚೆಕಡೆಥಾವ್ನ್ ಹಾಂಗಾ ದೆವಾ ಧಾಡ್‌ರೆ ಕೊಣಾಕ್ ತರೀ ದಯೆ ಮರಣ್ ದಿಂವ್ಚ್ಯಾಕ್ ಮ್ಹಣ್ಚೆಪರ್‍ಯಾಂತ್. ಹಾಂಗಾ ಗುಮಾನಾಂತ್ ಘೆಜೆ  ಜಾಲ್ಲಿ ಗಜಾಲ್ - ದಯೆ ಮರಣ್ ಬಾಮುಣಾಂಚೆಂ. ದಳಿತಾಂಕ್ -  ಬಾಂಯ್, ನ್ಹಂಯ್, ತಳೆಂ - ಮೊರೊಂಕ್.

ಮೆಲ್ವಿನಾಚೆ ಕವಿತೆಂತ್ ದೂದ್ ಸುಕ್‌ಲ್ಲೆ ಗಾಯ್ಚೆ ಅಸಹಾಯಕತೆಂತ್ ಲಿಪ್‌ಲ್ಲ್ಯಾ ಬಾಮುಣ್‌ವಾದಾಕ್, ಮ್ಹಜೆ ಕವಿತೆಂತ್ ವಾಗಾಚೆ ಅಸಹಾಯಕತೆಂತ್ಲಿ ಮನ್ಶ್ಯಾ ಕಾಳ್ಜಿ ಮುಕಾಮುಕಿ ಜಾತಾ. ವಾಗಾನ್ ಸಾಂಡುನ್ ವೆಚ್ಯಾ ಪಿಲಾಂಕ್ ತುಮ್ಚ್ಯಾ ದುದಾಂತ್ ಪೊಸಾ ಮ್ಹಣ್ತಾನಾ ವಾಗಾಚೆ ಅಸ್ತಿತ್ವಾಚಿ ಸಲ್ವಣಿ ನ್ಹಯ್, ಜೀಕ್ ಆಸಾ. ಆನಿ ಹಿಚ್ ಜೀಕ್ ಮೆಲ್ವಿನ್ ರೊಡ್ರಿಗಸಾಚಿ ಅನ್ಯೇಕ್ ಕವಿತಾ ‘ದಳಿತಾಂಚೆಂ ಮಾಗ್ಣೆಂ ಹಾಂತುಂಯೀ ಆಸಾ.

ಪಯ್ಲೆ ಕವಿತೆಂತ್ಲ್ಯಾ ಬಾಮುಣ್‌ವಾದಾಕ್ ಹ್ಯಾ ದುಸ್ರೆ ಕವಿತೆಂತ್ ತಾಣೆಂ ಜಾಪ್ ದಿಲ್ಯಾ. ತೆ ದೆಕುನ್ ಮ್ಹಜಿ ಕವಿತಾ ಮೆಲ್ವಿನಾಚಾ ದುಸ್ರೆ ಕವಿತೆಕ್ ಪೂರಕ್. ತೊ ದುಧಾಕ್ ವೀಕ್ ಭರ್ಸುಂಕ್ ಮಾಗ್ತಾನಾ, ಹಾಂವ್ ಪಿಳ್ಗಿಚ್ ಹಾತಾಂತರ್ ಕರ್ತಾಂ. ರಗ್ತಾಂತ್ ವೀಕ್ ಭರ್ಸುಂಚೆಂ ಆನಿ ರಗ್ತಾನ್‌ಚ್ ಕಾಬಾರ್ ಕರ್‍ಚೆಂ - ಮುಳಾನ್ ಏಕ್‌ಚ್. ಹಾಂವೆ ಮ್ಹಜಿ ಕವಿತಾ ವಾಗಾಚೊ ಸ್ವಗತ್ ಕವಿ ಮೆಲ್ವಿನಾಚಾ ದುಸ್ರೆ ಕವಿತೆಚಾ ಪ್ರೇರಣಾನ್ ಬರಯಿಲ್ಲಿ ತರೀ ಆಪ್ಲೇಸ್ತಕಿಂ ತೀ ಏಕ್ ಸ್ವತಂತ್ರ್ ಕವಿತಾಇ ವ್ಹಯ್.  ಹೆ ವಿಶಿಂ ಆಮಿಂ  ಹಫ್ತ್ಯಾ ಮಧೆಂ ಮೆಳ್ಚ್ಯಾ ಥೊಡ್ಯಾ ಸಾಂಜೆಚಾ ವೆಳಾಂತ್ ಎಕೆ ಸಾಂಜೆರ್ ಎಂಪೋರಿಯಂ ಕೊಂಪ್ಲೆಕ್ಸಾಚ್ಯಾ ಮೆಟಾಂನಿ ರಾವೊನ್ ಉಲಯಿಲ್ಲೆಂ ಆಸಾ.

ಆತಾಂ  , ಕವಿ ಮೆಲ್ವಿನ್ ರೊಡ್ರಿಗಸಾನ್ 1986 ಇಸ್ವೆಂತ್ ಏಕ್ ಕವಿತಾ ಬರಯಿಲ್ಲಿ ‘ಗೊರ್ವಾಂಚೆಂ ರಡ್ಣೆಂ. ಥಂಯ್ ಥಾವ್ನ್ ಹಾಂಗಾ 2010 ಪರ್ಯಾಂತ್ಲಿ ಉತ್ರೊಣ್ ಏಕ್ ವೆಗ್ಳೊಚ್ ವಿಷಯ್ ತರೀ - ಏಕ್‌ಚ್ ಗಜಾಲ್ ಸಾಂಗ್ತಾ. ತೆ ಕವಿತೆಂತ್ ಶೆಣ್ ಮುತಾಕ್ ಕಾಂಠಾಳ್ಳೆಲಿಂ ಗೊರ್ವಾಂ ಹಾಂಗಾ ಶೆಣಾ ವಿಷ್ಯಾಂತ್ conscious ಜಾಲ್ಯಾಂತ್ ಕಿತ್ಯಾಕ್?

ಏಕ್ ಪೂರಕ್ ಕವಿತಾ ಜೆ.ಬಿ. ಮೊರಾಯಸಾಚಿ ‘ಗೊರ್ವಾಂಚೆಂ ನಿಮಾಣೆಂ ಫೆಸ್ತಿ ಆಸಾ. ತುಮ್ಕಾಂ ಮೆಳ್ಳ್ಯಾರ್ ದಯಾ ಕರೂನ್  ವಾಚಾ.
 
ಮ್ಹಾಕಾ ದಿಲ್ಲ್ಯಾ ವೆಳಾಕ್ ಇತ್ಲೆಂ ಪುರೊ.

ದೇವ್ ಬರೆಂ ಕರುಂ.

- ಎಚ್ಚೆಮ್

(ಕವಿ ಎಚ್ಚೆಮ್ ಪೆರ್ನಾಲಾನ್ ಕವಿತಾ ಟ್ರಸ್ಟಾನ್ ಜಾಕ್ರಿಬೆಟ್ಟುಂತ್ ಎಪ್ರಿಲ್ 11, 2010 ತಾರಿಕೆರ್ ಮಾಂಡುನ್ ಹಾಡ್ಲಲ್ಯಾ ಕವಿಗೋಷ್ಟಿ ಸಂದರ್ಭಾರ್ ಕೆಲ್ಲೆಂ ಉಲೊವ್ಪ್)