|
ಸಾಂಪಾಕ್ ಹುತೊ, ಅನಾಥ್ ರಿತೊ - ಕಸಲಿ ವಿಟಂಬಣಾ?
ಮೆಲ್ವಿನ್ ರೊಡ್ರಿಗಾಸಾಚ್ಯಾ ಸಂಪಾದಕೀಯಾಚ್ಯಾ ಮಾತಾಳ್ಯಾರ್, ‘ಗೊರ್ವಾಂಕ್ ಗೊಟೊ, ಸರ್ಪಾಕ್ ಹುತೊ, ಪುಣ್ ಅನಾಥ್ ಹೊ ಉಗ್ತೊ, ರಿತೊ’, ಭಕ್ತ ಆರ್. ಕಾಞಂಗಾಡ್ ಹಾಚ್ಯಾ ‘ವಿಟಂಬಣಾ’ ಕವಿತೆಚೊ ಸಾರ್ ಆಟಾಪ್ಲಾ. ತಿತ್ಲೆಂಚ್ ನ್ಹಯ್ ಕಿತ್ಲೆಶ್ಯಾ ಹಜಾರೊಂ ಲೊಕಾಚೆ ಹಾಲ್ ಚಿತ್ರಿತ್ ಜಾಲ್ಯಾತ್.
ಮನ್ಶಾ ಹಕ್ಕಾಂಚ್ಯಾ ಘೋಷಣಾಕ್ ಹ್ಯಾ ವರ್ಸಾ ದಶೆಂಬ್ರ್ ಧಾ ತಾರಿಕೆರ್ ಸಾಟ್ ವರ್ಸಾಂ ಸಂಪ್ತಾತ್. ಮನ್ಶಾ ಹಕ್ಕಾಚೆಂ ಅತಿಕ್ರಮಣ್ ಹಜಾರೊಂ ವರ್ಸಾಂ ಚಲ್ಲಾಂ ಆನಿ ಆಜೂನ್ ಚಲೊನ್ ಆಸಾ. (ಮಂಗ್ಳುರ್ ಆಮ್ಚೆಂ ಶಾಂತೆಚೆ ಥಳ್, ಕೊಮುವಾದಿಂನಿ ಝುಜಾಥಳ್ ಜಾವ್ನ್ ಪರಿವರ್ತಿತ್ ಕೆಲ್ಲೆಂ ಏಕ್ ಕಾಳೀಜ್ ಕಡಂವ್ಚೆಂ ನಿದರ್ಶನ್ ಮಾತ್ರ್!). ತರಿಪುಣ್ ಕ್ರಿಸ್ತಾಂವಾಂಕ್ ಧಾ ಉಪದೆಸ್ ಆಸ್ಲ್ಲೆಪರಿಂ ಹೆಂ ಘೋಷಣ್ ತಿಚ್ಯಾ ತೀಸ್ ನೆಮಾಂ ದ್ವಾರಿಂ ಖಡ್ಪ್ಯಾ ಕಾಳ್ಜಾಂಕ್ ತೀರ್ ಜೊಕ್ತಾ. ಹ್ಯಾ ಪಯ್ಕಿ ಏಕ್ ನೆಮ್ ಆಸಾ: "ಹರ್ಯೆಕ್ಲ್ಯಾಕ್ ತಾಚ್ಯಾ ದೇಶಾಚೆ ಗಡಿ ಮಧೆಂ ಚಲಾವಣೆಚೆಂ ಆನಿ ಖಾಸ್ ಆಸ್ರೊ ಕರ್ಚ್ಯಾ ಸ್ವಾತಂತ್ರ್ಯಾಚೆಂ ಹಕ್ಕ್ ಆಸಾ". ಪುಣ್ ಪರಿಗತ್ ಅಶಿ ಆಸಾಕೀ ಹ್ಯಾ ಸಂಸ್ರಾಂತ್ ಎಕಾ ನಿರ್ದಿಷ್ಟ್ ವೆಳಾರ್ ಏಕ್ ಮಿಲಿಯಾ ವಯ್ರ್ ಲೋಕ್ ಪುಣಿ ನಿರಾಶ್ರಿತ್ ಆಸಾ. ಮ್ಹಣ್ಜೆ ಲಾಕೊಂ ಲೋಕ್ ಘರ್ದಾರ್ ನಾಸ್ತಾಂ ಮೊನ್ಜಾತಿಂ ಪಾಸ್ಟ್ ಆಸಾ! ಬರೆಂ ಏಕ್ ಘರ್ ನಾ ಮ್ಹಣ್ ಖಂತ್ ಕರ್ತೆಲ್ಯಾಂಕೀ ಮತ್ ಗಯ್ರ್ ಕರ್ಚೆ ಅಂಕ್ಡೆ ಹೆ!!
ಹಾಂಗಾಸರ್ ಕವಿಕ್ ಹೆ ಪರಿಗತಿಚಿ ಖಬರ್ ಆಸಾ. ತ್ಯಾ ಖಾತಿರ್ ತೊ ಆಟ್ಲಾ ಇತ್ಲೊ ಆನಿ ತಿತ್ಲೊ ನ್ಹಯ್. ದೆಕುನ್ಚ್ ತೊ ದಾಂತ್ ಚಾಬ್ತಾ ಅಸಹಯಾಕ್ಪಣಿ: "ಕಸಲಿ ವಿಟಂಬಣಾ? ಸುರ್ಯಾಕ್ ಆಸಾ ಸ್ವಸ್ಥ್ ಘರ್, ವಿಶಾಲ್ ದರ್ಯಾ ಪಾರ್. ಸೆವ್ಣ್ಯಾಂಕ್ ಸಯ್ತ್ ಆರಾಮ್ ಕರುಂಕ್ ಆಸಾ ಆರ್ಕತ್ ಗೂಡ್. ಸಾಂಪಾಕ್ ಆಸಾ ಕೊಣೇಂಯ್ ಸಜವ್ನ್ ದವರ್ಲಲೊ ಹುತೊ ಆನಿ ಗಾಯ್-ಬೈಲಾಕ್ ಮನ್ಶಾಂ ಖುಸ್ತಾರ್ ನಿರ್ಮಳ್ ಗೊಟೊ".
ಭಕ್ತ ಆರ್. ಕಾಞಂಗಾಡಾಚಿ ಕವಿತಾ ವಾಚುಂಕ್ ಚಿಚಾಯಾ
ಪುಣ್ ಸಂಪೂರ್ಣ್ ತದ್ವಿರುದ್ಧ್ ಜಾವ್ನ್ ಸೃಷ್ಟೆಚೆಂ ಥಿಕ್, ವಯ್ಲ್ಯಾ ಸರ್ವ್ ರಚ್ಣೆಚೊ ಕಾರ್ಬಾರಿ ಜಾವ್ನಾಸ್ಚೊ ಹೊ ಮನಿಸ್ ಮಾತ್ ಅನಾಥ್, ಆಲಂಭ್ಹೀನ್. ತಾಕಾ ಆಪ್ಣಾಚೆಂ ಅಶೆಂ ಕಾಂಯ್ ನಾ. ತಾಚೆ ಪ್ರತೀಕ್ಷೆಕ್ ಕೊಣ್ ನಾ. ಆನಿ ಮಾತೆಂ ತೆಂಕುಂಕ್ ತಾಕಾ ಖಂಯ್ಸರಿ ಠಿಕಾಣ್ ನಾ. ಅರೆ, ಮನಿಸ್ ಜಾಲ್ಲ್ಯಾ ಕರ್ಮಾಕ್ ಹೆ ವೆಕ್ತಿಕ್ ಘರ್ ಮ್ಹಳ್ಳೆಂಚ್ ನಾಂಮು! ಹಿ ಕಸಲಿ ವಿಟಂಬಣಾ!
ಹೆರ್ ರಚ್ಣೆಕ್ ಮನ್ಶಾ ಭಾಶೆನ್ ಗಿನ್ಯಾನ್ ನಾ, ಆಸ್ಚೊ ಸೈಂಭಿಕ್ ಗೂಣ್ ಮಾತ್. ಪುಣ್ ತಿಂ ರಚ್ಣಾಂ ತ್ಯಾ ಸೈಂಭಿಕ್ ಗುಣಾಚೊ ಪರಿಪೂರ್ಣ್ ಉಪೆಗ್ ಕರುನ್ ಆಪ್ಲೆಂ ಜಿವಿತ್ - ಮಟ್ವೆಂ ವ ಲಾಂಬ್ - ಬಿಂದಾಸ್ ಸಾರ್ತಾ. ರಚ್ಣಾರ್ ಲೆಗುನ್ ತಾಚ್ಯಾ ವರ್ತ್ಯಾ ಗಿನ್ಯಾನಾನ್ ಹರ್ ರಚ್ಣೆಕ್ ಪೊಸ್ತಾ, ಸೊಭಯ್ತಾ ಮ್ಹಣ್ಚೆಂಯ್ ಸಾರ್ಕೆಂ. ಪುಣ್ ಮನಿಸ್ ವೆಗ್ಳೊ. ತಾಕಾಯ್ ರಚ್ಣಾರ್ ಪೊಸ್ತಾ ಖಂಡಿತ್. ಪುಣ್ ವಿಶೇಶ್ ಕರುನ್, ಮನ್ಶಾಕ್ ರಚ್ಣಾರಾನ್ ಅಪೂರ್ವ್ ಗಿನ್ಯಾನಾಚಿ ಮ್ಹೊರ್ಚ್ ಮಾರ್ಲ್ಯಾ. ಬೆಜಾರಾಯೆಚಿ ಗಜಾಲ್, ಗಿನ್ಯಾನಾನ್ ನೆಟ್ಲ್ಲೊ ಮನಿಸ್ ಏಕ್ಚ್ ಆಪ್ಲೆಂ ಗಿನ್ಯಾನ್ ಪುರುನ್ ದವರ್ತಾ; ರಚ್ಣಾರ್ ತೊ ಸರ್ವ್ ಪದ್ವೆದಾರ್, ತೊಚ್ ಆಪ್ಣಾಕ್ ಸಗ್ಳೆಂ ಕರುಂದಿ ಅಸಲ್ಯಾ ಬಾವಾರ್ಥ್ ಮ್ಹಳ್ಳ್ಯಾ ಪಿತಿಸ್ಪಣಾಚ್ಯಾ ಲೆಪಾನ್. ವ ಆನಿ ಕೊಣ್ ಆಪುಣ್ ಅಸಹಾಯಕ್, ಆಪ್ಣಾಲಾಗಿಂ ಕಾಂಯ್ ನಾ, ಆಪ್ಣಾಚೆಂ ನಶಿಬ್ ಪುಟ್ಲಾಂ ಮ್ಹಳ್ಳೆ ಸ್ವ-ಬಿರ್ಮತೆನ್ ಪಿಂರ್ಗತಾ. ವ ಹೆರ್ ಕೊಣ್ ತಾಚ್ಯಾ ಗಿನ್ಯಾನಾಚ್ಯಾ ಖೊಟ್ಯಾ ಉಪ್ಯೊಗಾನ್ ತಾಚಾಚ್ ಮನ್ಶಾಂ ಜಾತಿಚೆಂ ಸತ್ತ್ಯಾನಾಸ್ ಕರುಂಕ್ ಪೆಂಕಾಡ್ ಬಾಂದ್ತಾ.
ತ್ಯಾಚ್ ವಿಶಿಶ್ಟ್ ಗಿನ್ಯಾನಾನ್ ಬೆಸಾಂವ್ ಘಾಲ್ಲ್ಯಾ ಮನ್ಶಾಚೆಂ ಅಶೇಯ್ ವಿವಿಧ್ ತರ್ ಕಿತ್ಯಾಕ್? ಕಸಲಿ ಹಿ ವಿಟಂಬಣಾ! ತರ್ ವಿಟಂಬಣ್, ಮನ್ಶಾಕ್ ‘ತೆಂ ನಾ’, ‘ಹೆಂ ನಾ’ ಮ್ಹಳ್ಳೆಂ ನ್ಹಯ್, ಬಗರ್ ರಚ್ಣಾರಾನ್ ದರಬಸ್ತ್ ದಿಲ್ಲೆಂ ಮನಿಸ್ ಕಿತ್ಯಾ ನೆಗಾರುನ್, ನಾಕಾರುನ್ ಅಕ್ಲಾಸ್ ಸೊಡ್ತಾ ಮ್ಹಳ್ಳೆಂ. ಆನಿ ಅಪ್ಣಾಕ್ ಫುಕಟ್ ಮೆಳ್ಲ್ಲೆಂ ಮನಿಸ್ ಕಿತ್ಯಾ ಮುಡೆ ಬಾಂದುನ್ ಗುದಾಂವಾಂನಿ ಜಮಯ್ತಾ ಮ್ಹಳ್ಳೆಂ. ಲಾಕಾಂಕಟ್ಲೆ ಲೋಕ್ ಆಪ್ಲ್ಯಾ ಮುಳಾವೆಂ ಹಕ್ಕ್ ಜಾವ್ನಾಸ್ಚಾ ಆಸ್ರ್ಯಾಕ್ ಭುಂಯ್ ಆನಿ ಆಕಾಸಾ ಮದೆಂ ಉಗ್ತೆ ಪಡೊನ್ ಹಾಕ್ ಮಾರ್ತಾನಾ ಹೆರ್ ಥೊಡೆ ವಿಂಚುನ್ ಕಾಡ್ಲಲೆ, ಗಾಂವಾಂತ್ ಏಕ್, ಶೆರಾಂತ್ ಏಕ್ ಆನಿ ಪರ್ಗಾವಾಂತ್ ಆನ್ಯೇಕ್ ಮ್ಹಣ್ ದಂದೊ ಕರ್ಚೆಂ ತಿ ವಿಟಂಬಣಾ! ಎಕ್ಲೊ ಆಪ್ಲೆಂ ಸಗ್ಳೆಂ ವಿಕುನ್ ಪೆಲ್ಯಾಕ್ ಉದ್ದಾರ್ ಕರುಂಕ್, ಆಪ್ಲೊ ಜೀವ್ಚ್ ರಿಸ್ಕೆರ್ ಘಾಲ್ನ್ ಹೆರಾಂಕ್ ಧರ್ಮಾಂಚ್ಯಾ, ಜಾತಿಚ್ಯಾ, ಅನೀತ್-ಅನ್ಯಾಯಾಚ್ಯಾ ಗುಲಾಮ್ಪಣಾಂತ್ಲೆ ಸೊಡಂವ್ಕ್ ಪೆಚಾಡ್ತಾನಾ, ಆನ್ಯೆಕ್ಲೊ ಮೊಸ್ರಾನ್ ಜಳೊನ್ ಗುಲಾಮಾಂಕ್ ನೆಣಾರ್ಪಣ್ ಆನಿ ಬೆಕಾರ್ಪಾಣಾಚೆ ದಾವ್ಲೆಂತ್ ವಳ್ವಳಾವ್ನ್ ಆಪ್ಲಿ ದಾಳ್ ಶಿಜಂವ್ಕ್ ಸಮಾಜಾಂತ್ ಕ್ರೋಧ್, ಖುನ್ಯೆಚೆಂ ರಾಜ್ ಬಾಂದುಂಕ್ ಪೆಚಾಡ್ತಾ ತಿ ವಿಟಂಬಣಾ!
ತರ್ ಹಿ ಕಸಲಿ ವಿಟಂಬಣಾ!!
ಮ್ಯಾಕ್ಸಿಮ್ ಲೋಬೊ
ಮೊತಿಯಾಂಚಿಂ ಮೊಲಾಂ:
ಇಕ್ರಾ: ಜೆಮೆನಾಸ್ತಾಂ ಜಾಗಿಂ ಉರ್ಚಿಂ ಉತ್ರಾಂ (ಶರತ್ಚಂದ್ರ ಶೆಣೈ)
ಧಾ: ಸುವರ್ಣ ಗಾಡ್ ಹಿಚೆ ಕವಿತೆಂತ್ಲಿಂ ಮೊತಿಯಾಂ
ನೋವ್: ವಾರ್ಯಾಚೆಂ ಆವ್ಕ್ ಸಂಪ್ತಾನಾ, ಕವಿಚೊ ಸ್ವಾಸ್ ತುಟ್ತಾ (ವಿಲ್ಸನ್ ಕಟೀಲ್)
ಆಟ್: ಎಡ್ಡಿ ಸಿಕೇರಿಚ್ಯಾ ‘ಮ್ಹಾಕಾ ಸೊಧ್ತಾಂ ಹಾಂವ್’ ಕವಿತೆಂತ್ಲಿಂ ಮೊತಿಯಾಂ
ಸಾತ್: ‘ಹಾತಾಕ್ ಮ್ಹೆಳೆಂ ತರ್ ತೊಂಡಾಕ್ ಕೆಳೆಂ’ ಪಾಚಾರ್ಚಿ ಅರುಣಾ ರಾವಾಚಿ ಕವಿತಾ
ಸ: ಮಿಸ್ತಿಕಾತೆಚ್ಯಾ ಅನ್ಭೋಗಾಂತ್ ನ್ಹಾಣಂವ್ಚೊ ‘ಪ್ರಕೃತಿಚೊ ಪಾಸ್’ (ಮೆಲ್ವಿನ್ ರೊಡ್ರಿಗಸ್)
ಪಾಂಚ್: ಜಿಣ್ಯೆನ್ ಮ್ಹಾಕಾ ಸಗ್ಳೆಂ ದಿಲೆಂ (ರ. ವಿ. ಪಂಡಿತ್)
ಚ್ಯಾರ್: ಗ್ವಾದಲೂಪಾಚಿ ಕವಿತಾ - ದೇವ್ ಖಂಯ್ ಆಸಾ?
ತೀನ್: ಒತ್ತಾಯ್ ಕೋರ್ನಾಕ್ಕಾ ಮಾಕ್ಕಾ - ಸುಧೀರ್ ಕೊಡಕಣೀ
ದೋನ್: ಆತಾಂ ಹಾಂವ್ ಹ್ಯಾಚ್ ಕಾಳ್ಖಾಂತ್ ಜಿಯೆತಲೊಂ (ಪ್ರಕಾಶ್ ಪಡ್ಗಾಂವ್ಕಾರ್)
ಏಕ್: ಜಾಯೊ ಜುಯೊ (ಮನೋಹರ್ ಸರ್ದೇಸಾಯಿ)
ಮ್ಯಾಕ್ಸಿಮ್ ಲೋಬೊಚಿಂ ಲೇಖನಾಂ:
ಕೊಂಕ್ಣಿ ಕಾವ್ಯಾಚ್ಯಾ ಪಕ್ವನಾ ಸಂಗಿಂ ಅಮೃತ್ ಚಾಕ್ತಾನಾ!
ಘಟ್ ಧರಾ.. ! - ಮ್ಯಾಕ್ಸಿಮ್ ಲೋಬೊ ಸ್ಪೇಯ್ನಾ ಥಾವ್ನ್ ಬರಯ್ತಾ
ವಾಸ್ತವಿಕತೆಚ್ಯಾ ವಿಪರ್ಯಾಸಾನ್ ಆನಿ ವಿರೋಧಾಭಾಸಾಂತ್ ಜಿಣ್ಯೆ ಶೆವೊಟ್ ಪಾಚಾರ್ಚ್ಯೊ ಕವಿತಾ
ಮ್ಯಾಕ್ಸಿಮ್ ಲೋಬೊಚ್ಯೊ ಕವಿತಾ:
ಭರ್ವಶ್ಯಾ ಕಿಟಾಳ್
ಸೊಧ್ನಾಂ
ಡಣಾ ಡಣಾ
ದೊರೆ
ಹಾಂವ್ ಜಾತಾನಾ
|
