ದಿವೊ ಜಳ್ಳ್ಯಾರ್ ಉಜ್ವಾಡ್ ಜಾತಾ, ಕಾಳೀಜ್ ಜಳ್ಳ್ಯಾರ್ ಫಕತ್ ಧುಂವರ್

ಗುಲ್ಜಾರಾ ಸಂಗಿಂ ಏಕ್ ಸಾಂಜ್...ಥೊಡೆ ಉಗ್ಡಾಸ್..

ಸುಮಾರ್ ತೀಸ್ ದೀಸ್ ಜಾವ್ನ್ ಗೆಲ್ಯಾತ್, ಹಾಂವೆಂ ಗುಲ್ಜಾರಾ ಸಂಗಿಂ ತೆ ಥೊಡಿಂ ವೊರಾಂ ಖರ್ಚುನ್. ದೋನ್ ಘಂಟೆ ತಾಚಿಂ ಉತ್ರಾಂ ಆಯ್ಕತ್, ಉಪ್ರಾಂತ್ಲೆ ದೋನ್ ಘಂಟೆ ಫಕತ್ ತಾಚ್ಯಾ ಆಸ್ ಪಾಸ್ ರಾವೊನ್! ತ್ಯಾ ದಿಸಾ ಮ್ಹಜ್ಯಾ ಮಾತ್ಯಾರ್ ಚಡಲ್ಲಿ ನಶಾ ಆಜೂನ್ ತಶಿಚ್ ಉರ್‍ಲ್ಯಾ.  ಪನ್ನಾಸ್ ದೀಸ್ ಉಬ್ಲೆ ತರೀ, ಹಾಂವ್ ಆನಿಕೀ ತೆಚ್ ಭೃಮಿದೆಂತ್ ಭೊಂವಾಡೆ ಮಾರುನ್ ಆಸಾಂ.  ತ್ಯಾ ಸೊಭಾಗೆಚ್ಯಾ ಅನ್ಭೊಗಾ ಥಾವ್ನ್ ಭಾಯ್ರ್ ಯೆಂವ್ಚಿ ಆಶಾ ಮ್ಹಾಕಾ ನಾ, ದೆಕುನ್ ಹಾಂವ್ ಹಾಂಗಾಚ್ ಮಸ್ತ್....!

ತಶೆಂ ತ್ಯಾ ಕವಿವರಾಚೊ ಪ್ರಭಾವ್; ತಾಚೆ ಜಾಣ್ತಿಕಾಯೆಚೊ, ತಾಚ್ಯಾ ಕವಿಮನಾಚೊ ಪ್ರಭಾವ್...

ತಾಣೆಂ ಕಾಳ್ಜಾಚೆಂ ಆಂಟೆನಾ ಇಲ್ಲೆಂ ಚುರುಕ್ ದವರಾ ಮ್ಹಳ್ಳೆಂ ಆನಿಂ ತ್ಯಾ ದಿಸಾ ಪರತ್ ಚಾಲು ಜಾಲ್ಲೆಂ ಆಂಟೆನಾ ಭೊಂವಾರಿಂ ಚಲ್ಚ್ಯಾ ಘಡಿತಾಂಕ್ ಸ್ಪಂದನ್ ಕರ್‍ನಚ್ ಆಸಾ! 

ಖಂಯ್ ಪರ್‍ಯಾಂತ್ ಮ್ಹಳ್ಯಾರ್, ಮ್ಹಜ್ಯಾ ಫೋರ್ಡ್ ಕಾರಾಚ್ಯಾ ಹೆಡ್ ಲೈಟಾಂತ್, ಭಿತರ್ಲ್ಯಾ ಸರ್ಕ್ಯುಟಾಂತ್ ಆನಿ ಸರ್ಕ್ಯುಟೆ ಭಿತರ್ಲ್ಯಾ ಸೋಫ್ಟವೇರಾ ಭಿತರ್ ಸಯ್ತ್ ಮ್ಹಾಕಾ ಕವಿತಾ ಮೆಳುಂಕ್ ಲಾಗ್ಲ್ಯಾ.
 
ಕಿತೆಂ ಜಾಲೆಂ ತ್ಯಾ ದೀಸ್, ಕಿತೆಂ ಉಲಯ್ಲೊ ತೊ

1) ವಾಟ್ಲಿ, ಹಾರ್ ಆನಿ ತಿ...
 
ತಾಂಬ್ಶಿ ಸಾಂಜ್.
ಏಕ್ ಪತಿಣ್ ಆಪ್ಲ್ಯಾ ಪತಿಕ್ ರಾಕೊನ್ ಆಸಾ...
ಪತಿ ಪಯ್ಸ್ ಗೆಲಾ, ಮೊತಿಯಾಂಚೊ ಹಾರ್ ಹಾಡುಂಕ್..
ಪತಿಣ್ ವಾಟ್ಲೆ ಮುಕಾರ್...
 
ಘರಾಂತ್ ಪತಿ ನಾ, ಪತಿನ್ ಹಾಡಿಜಾಯ್ ಜಾಲ್ಲೊ ಹಾರ್‌ಯ್ ನಾ.
ಶಿತಾಂತ್ ಮೀಟ್ ನಾ.
 
ದೊಳ್ಯಾ ಖಾಂಚಿಂತ್ಲಿಂ ಥೊಡಿಂ ದುಕಾಂ...
ಅಕಸ್ಮಾತ್ ವಾಟ್ಲೆಂತ್ ಪಡ್ತಾತ್.
ಆನಿ ಶಿತಾಕ್ ಮಿಟಾಚಿ ಗರಜ್ ನಾ.
 
ಘರಾ ಮುಲ್ಯಾಂತ್ಲೊ ದಿವೊ ಪಾಲ್ವೊನ್ ಆಸಾ...
ಶಿತಾ ವಾಟ್ಲಿಯ್ ಖಾಲಿ ಜಾಲ್ಯಾ...
ವಾಟ್ಲೆಂತ್ ಉರ್‍ಲಾಂ ಫಕತ್ ಕಡಿಯೆಚೆಂ ಪಾತಳ್ಶೆಂ ಪದರ್.
 
ತಿ ತಾಚೆರ್ ಏಕ್ ಚಿತಾರ್ ಸುಟಯ್ತಾ.
ಮೊತಿಯಾಂಚ್ಯಾ ನೆಕ್ಲೆಸಾಚೆಂ ಚಿತಾರ್.
ಜೊ ಹಾರ್ ಹಾಡುಂಕ್ ತಿಚೊ ಪತಿ ಗೆಲಾ ತ್ಯಾ ಹಾರಾಚೆಂ ಚಿತಾರ್.
 
ಭಿತರ್ ಕುಜ್ನಾಂತ್ ಮೊಡ್ಕಿ ರಾಂದ್ನಿರ್..
ಮೊಡ್ಕೆ ಭಿತರ್ಲಿ ಪೇಜ್ ಆನಿಕ್‌ಯ್ ಶಿಜೊನ್ ಆಸಾ..
 
ಘರಾ ಮುಲ್ಯಾಂತ್ಲೊ ದಿವೊ ಪಾಲ್ವಾತಾ...
ಕಿತೆಂಗೀ ಚಿಂತುನ್ ತಿ ಪರತ್ ದಿವ್ಯಾ ಕಡೆ ಧಾಂವ್ತಾ.
ದಿವ್ಯಾಚಿ ವಾತ್ ನವ್ಯಾನ್ ದವರ್‍ತಾ
ಆನಿ
ತೆಲಾಂತ್ ಬುಡಯ್ತಾ.
ಏಕ್ ಕಡಕ್ ಉಜ್ಯಾ ಕಾಡಿ ಪೆಟವ್ನ್...
ದಿವ್ಯಾಕ್ ಲಾಯ್ತಾ.
ಉಜೊ ಎದೋಸೊ.
ಆನಿ ದಿವೊ ತೇಲ್ ವೊಡ್ತಾ...
ಹಾಲೊನ್ ಧಲೊನ್ ವ್ಹಳೂ ವಾಡ್ತಾ...
ಏಕ್..ದೋನ್ ಖಿಣಾಂ...
ಆತಾಂ ನಿಟ್ಟ್ ರಾವ್ತಾ ಆನಿಂ ವಾರ್‍ಯಾ ಸಂಗಿಂ ಖೆಳ್ತಾ...
ಆನಿಂ ವ್ಹಾಳ್ಚ್ಯಾ ವಾರ್‍ಯಾಕ್ ಸವಾಲ್ ಘಾಲ್ತಾ....
 
ಯೆ ವಾರ್‍ಯಾ, ಯೆ ಆತಾಂ ಆನಿ ತಾಕತ್ ಆಸಾ ತರ್...
ಮ್ಹಾಕಾ ಪಾಲ್ವಯ್.

2) ಥೊಡ್ಯೊ ಟಿಪ್ಪಣಿ....ಥೊಡೆ ಕಮೆಂಟ್... 
 
ಕವಿತಾ ಮ್ಹಳ್ಯಾರ್ ಕಿತೆಂ ಮ್ಹಣ್ ತುಮಿ ವಿಚಾರ್ತಾತ್...  ಹಾಚಿ ಜವಾಬ್ 'ಜಿಣಿಂ ಮ್ಹಳ್ಯಾರ್ ಕಿತೆಂ' ಮ್ಹಣ್ಚ್ಯಾ ಬರಿಂಚ್...! ನಾ ಜಿಣ್ಯೆಚೊ ಅರ್ಥ್ ಸಮ್ಜಾಲೊ, ನಾ ಕವಿತೆಕ್ ಏಕ್ ವ್ಯಾಖ್ಯಾನ್ ಮೆಳ್ಳೆಂ...!

ಖತ್ಕತ್ಚೆ ಮೊಡ್ಕೆಬರಿ ಕವಿತಾ...

ಜೆನ್ನಾ ವೇಳ್ ಯೆತಾ, ತೆದ್ನಾಂ ಧಾಂಪ್ಣೆಂ ಉಕಲ್ನ್ ತರೀ ಭಾಯ್ರ್ ಯೆತಾಚ್...!!

ಕವಿ ಆನಿ ಕಥಾ ಬರಯ್ಣಾರಾಂ ಮಧ್ಲೊ ತಫಾವತ್: ಕಥಾಕಾರ್ ಆಪ್ಣಾಕ್ ಕಿತೆಂ ಸಾಂಗುಂಕ್ ಆಸಾ, ತೆಂ ಶೀದಾ ಸಾಂಗ್ತಾ, ವಿಸ್ತಾರುನ್. ಕವಿ ಮಾತ್ರ್ ಆಪ್ಣಾಕ್ ಕಿತೆಂ ಸಾಗುಂಕ್ ಆಸಾ ತೆಂ ಥೊಡ್ಯಾಚ್ ಉತ್ರಾಂನಿ ಸಾಂಗ್ತಾ. ತಿ ಲೊಕಾಂಕ್ ದಿತಾ ಆನಿ ಆಪ್ಲೆ ಕವಿತಾ ಪಾಟ್ಲ್ಯಾನ್ ಲಿಪೊನ್ ರಾವ್ತಾ ಆನಿ ಲೋಕ್ ಕಿತೆಂ ಮ್ಹಣ್ತಾತ್ ಹೆಂ ಚೊವುನ್ ರಾವ್ತಾ...!!!

ಕವಿನ್ ಜೆನ್ನಾಂ ಆಪ್ಲಿಂ ಭೊಗ್ಣಾಂ ಕಾಗ್ದಾರ್ ದಫನ್ ಕೆಲಿಂ, ತೆದ್ನಾಂ ಥಂಯ್ ಏಕ್ ಕವಿತಾ ಆಪ್ಲೆ ದೊಳೆ ಉಘಡ್ತಾ. 

ದಿವೊ ಜಳ್ತಾ ತರ್ ಉಜ್ವಾಡ್ ಜಾತಾ. ಕಾಳಿಜ್ ಜಳ್ತಾ ತರ್ ಫಕತ್ ಧುಂವರ್ ಕಿತ್ಯಾಕ್?

-ಎಂಟನಿ ಬಾರ್ಕೂರ್