‘ಪೊಯೆಟಿಕ್ ಜಸ್ಟಿಸ್’ ಕಾವ್ಯಾಳ್ ಧೋರಣಾಚ್ಯಾಕ್ಯ್ ‘ಕವಿ ಸಮಯಾ’ ಚೊ ಅರ್ಥ್ ವಿಶಾಲ್
ಕವಿ, ಪಿಸೊ ಆನಿ ಮೊಗಿಕ್ ಎಕೆಚ್ ಮೆಳಿಂತ್ ಮೆಳಯ್ತಾ ಶೇಕ್ಸ್ಪಿಯರ್. ದೆಕುನ್ಚ್ ಕವಿಚ್ಯಾ ಹರ್ಯೆಕಾ ಉತ್ರಾಂತ್ ಸತ್ ಸೊಧುನ್ ವೆಚೆಂ ಸಾರ್ಕೆಂ ನ್ಹಯ್. ಸತ್ ಉಗ್ಡಾಪೆಂ ಕರ್ಚೆಂ ಕಾಮ್ ಪ್ರೊಫೆತಾಂಚೆಂ, ಕವಿಚೆಂ ನ್ಹಯ್. ತಶೆಂ ಮ್ಹಣ್ ಕವಿ ಸತ್ ಉಗ್ಡಾಪೆಂ ಕರ್ನಾ ಮ್ಹಣ್ ನ್ಹಯ್. ಫ್ರೆಂಚ್ ಕ್ರಾಂತೆ ವೆಳಾರ್ ಖ್ಯಾತ್ ಇಂಗ್ಲಿಷ್ ಕವಿ ಶೆಲ್ಲಿಚ್ಯೊ ಕವಿತಾ ಚಡಿತ್ ಚರ್ಚಿತ್ ಜಲ್ಲ್ಯೊ. ಕನ್ನಡಾಂತ್ ಸಿದ್ದಲಿಂಗಯ್ಯಾಚ್ಯಾ ‘ಹೊಲೆಮಾದಿಗರ ಹಾಡು’ ಉಪ್ರಾಂತ್ ದಲಿತ್ ಚಳುವಳ್ ವ್ಯವಸ್ಥಿತ್ ರುಪಾನ್ ಚಲೊಂಕ್ ಸುರು ಜಾಲಿ. (ಆಜ್ ತಸಲಿ ಚಳುವಳ್ ಕರ್ನಾಟಕಾಂತ್ ಶೆಳೆವ್ನ್ ಗೆಲ್ಯಾ. ತೊ ವಿಷಯ್ ವೆಗ್ಳೊ)
ಸತ್ ಉಗ್ಡಾಪೆಂ ಕರ್ಚೆಂ ಕವಿಚೆಂ ಪ್ರಮುಖ್ ಕಾಮ್ ನ್ಹಯ್. ಜಲ್ಮಾನ್ ಕವಿ ಕೆದ್ನಾಂಯ್ ಆಪ್ಲ್ಯಾ ಉಮಾಳ್ಯಾಂಕ್ ಭಾಯ್ಲ್ಯಾ ಸಂಸ್ರಾನ್ ಪ್ರಭಾವ್ ಘಾಲಾ ಆಸ್ಯೆತ್. ಪುಣ್ ಪಯ್ಲ್ಯಾನ್ ಪಯ್ಲೆಂ ಕವಿಚ್ಯಾ ಉಮಾಳ್ಯಾಂಚೊ ವ್ಹಾಳೊ ಏಕ್ ಕವಿತಾ ಆಟಾಪ್ತಾ. ಕೃತಕ್ ಕವಿ ಮಾತ್ರ್ ಉಮಾಳ್ಯಾಂಚ್ಯಾಕ್ಯ್ ಚಡ್ ಸಮಾಜ್ ಕ್ರಾಂತಿ ಕರುಂಕ್ ಭಾಯ್ರ್ ಸರ್ತಾ. ತಸಲ್ಯಾಂಚ್ಯೊ ಕವಿತಾ ದಾಡ್ಡೆತಾತ್. ತಿತ್ಲೆಂ ಮ್ಹಳ್ಯಾ ಉಪ್ರಾಂತ್ ಕವಿಚ್ಯಾ ಉಮಾಳ್ಯಾಂನಿ ‘ಕವಿ ಸಮಯ್’ ಮ್ಹಳ್ಯಾರ್ ಕಿತೆಂ? ಕವಿ ಸಮಯ್ ಮ್ಹಳ್ಯಾರ್ ಕವಿಕ್ ಮೆಳ್ಳ್ಯಾ ತಿ ಸ್ವಾಭಾವಿಕ್ ಪರ್ವಣ್ಗಿ - ಲೀಸೆನ್ಸ್. ತ್ಯಾವಿಶಿಂ ಕೊಣೇಂಯ್ ತರ್ಕ್ ಕರುಂಕ್ ಸಾಧ್ಯ್ ನಾ. ‘ಚಂದ್ರ್ ಉದೆವ್ನ್ ಯೆತಾನಾ ನೈದಿಲೆ ಮ್ಹಳ್ಳೆಂ ಫುಲ್ ಫುಲ್ತಾ’ ಮ್ಹಣ್ ಕವಿ ಸಾಂಗ್ತಾ ತರ್ ತೆಂ ಸತ್ ಯಾ ಫಟ್ ಮ್ಹಣ್ ಸೊಧುನ್ ವಚೊಂಕ್ ಜಾಯ್ನಾ ವಾ ಚಂದ್ರಾಕ್ ಆನಿ ತ್ಯಾ ಫುಲಾಕ್ ಕಸಲೊ ಸಂಬಂಧ್ ಮ್ಹಳ್ಳೆ ತರ್ಕ್ ಕರುಂಕ್ ಸಾಧ್ಯ್ ನಾ. ಕವಿಚೆಂ ‘ಅಮೂಲ್ಯ್’ ಕಲ್ಪನ್ ತೆಂ. ಉದ್ಕಾಂತ್ ಆಸೊನ್ಯ್ ದುರ್ಯೋಧನ ಕಠಿಣ್ ಘಾಮೆಲೊ ಮ್ಹಣ್ ರನ್ನ ಸಾಂಗ್ತಾ. ಅರೆ! ಉದ್ಕಾಂತ್ ಆಸೊನ್ಯ್ ಎಕಾ ಮನ್ಶಾನ್ ಘಾಮೆಂವ್ಕ್ ಸಾಧ್ಯ್ಗಿ ಮ್ಹಳ್ಳೆಂ ಸವಾಲ್ ಸ್ವಾಭಾವಿಕ್ ವ್ಹಯ್. ಪುಣ್ ತಸಲೆಂ ಸವಾಲ್ ವಿಚಾರ್ಚೆಂ ಕವಿಚ್ಯಾ ಒಟ್ಟಾರೆ ಅಭಿವ್ಯಕ್ತೆಕ್ ಅರ್ಥ್ ಕರಿನಾತ್ಲ್ಲ್ಯಾಂನಿ ಮಾತ್ರ್.
‘ಹೇಯ್ ತುಮಿ ತಾರಾಂನೊ, ಚಂದ್ರೆಮಾಚ್ಯಾ ಪೊರಾಂನೊ’ (ಫ್ರೆಡ್ ಕುಮಾರ್, ಕುಚ್ಚಿಕಾಡು)
- ಹಿ ವೋಳ್ ವಾಚ್ತಾನಾ ಸಹಜ್ ಹಾಸೊ ಯೆತಾತ್. ಅಗಾಧ್ ವ್ಹಡ್ ತಾರಾಂಕ್ ಯೆದೆಶ್ಯಾ ಚಂದ್ರೆಮಾಚಿಂ ಭುರ್ಗಿಂ ಮ್ಹಣ್ ಕವಿ ವೊಲಾಯ್ತಾ. ಹಾಚ್ಯಾಕ್ಯ್ ವ್ಹರ್ತೊ ವಿಪರ್ಯಾಸ್ ಆಸಾ? ಕವಿಕ್ ಮಾತ್ರ್ ತಿ ಪರ್ವಣ್ಗಿ ಮೆಳ್ಳ್ಯಾ.
ಮೊಗಾನ್ ತುಜ್ಯೊ ವೊಂಟಿಯೊ ಭರ್ತಿತ್... / ದಿಷ್ಟಿನ್ಚ್ ಸಾಳ್ಕಾಂ ಫುಲ್ತಿತ್.... / ಹಾಶ್ಯಾನಿಂಚ್ ಲ್ಹಾರಾಂ ಉಟ್ತಿತ್... (ಜೊಸ್ಸಿ ಪಿಂಟೊ ಕಿನ್ನಿಗೋಳಿ)
ಹೆಂ ಕಶೆಂ ಸಾಧ್ಯ್? ಚೆಡ್ವಾಚ್ಯಾ ಮೊಗಾ ನಿಮ್ತಿಂ ಜರ್ ವೊಂಟಿಯೊ ಭರ್ತಿತ್, ಬಾಯ್ಲಾಂನಿ ದುಧಾಚೆಂ ಬರೆಂ ಬಿಸ್ನೆಸ್ ಕರ್ಯೆತ್. ದಿಷ್ಟಿನ್ ಸಾಳ್ಕಾಂ ಫುಲ್ತಿತ್ ತರ್ ಗಾಂವ್ಭರ್ ಸಾಳ್ಕಾಂಚ್ ಸಾಳ್ಕಾಂ! ಹಾಸ್ತಾನಾಂಚ್ ಲ್ಹಾರಾಂ ಉಟ್ಲ್ಯಾರ್ ಆಂಗಣ್ ಸಗ್ಳೆಂ ದರ್ಯೊ ದರ್ಯೊ!
ಮೊಳಾಬ್ ರಾಯ್, ಧರಣ್ ರಾಣಿ / ಬಸ್ಕೆ ಉಬೆಕ್ ಖಡಪ್ ಕಡತ್ (ಆಂಡ್ರ್ಯೂ ಎಲ್ ಡಿಕೂನ್ಹಾ)
ಕಸಲೆ ಆಕ್ಲಾಸ್! ಖಡ್ಪಾಚೆರ್ ಬಸ್ತಾನಾ ಖಡಪ್ ಕಡೊನ್ ಉದಕ್ ಜಾಂವ್ಚಿ ಸ್ಥಿತಿ ಮಾತ್ಶಿ ಕಲ್ಪನ್ ಕರಾ.
ಅಸಲೋಚ್ ಪ್ರಯೋಗ್ ಕನ್ನಡ ಕವಿ ಚಂದ್ರಶೇಖರ ಕಂಬಾರ ಕರ್ತಾ:
ಸೂರ್ಯ ಕರಗಿ ನೀರಾಗಿ ನಾಡಿ ಒಳಗ ಹರದಾನು (ಹೇಳತಾನ ಕೇಳ)
ಏಕ್ ಸವಾಲ್ ಉಟ್ತಾ:
ಒಟ್ಟಾರೆ ಕಸಲೊಗಿ ಪ್ರಯೋಗ್, ಕಿತೆಂ ಕಿತೆಂಗಿ ಕಲ್ಪನ್ ಕರ್ನ್ ಕವಿನ್ ಆಪುಣ್ ‘ಕವಿ ಸಮಯ್’ ವಾಪರ್ತಾಂ ಮ್ಹಣ್ ಸಾಂಗೊಂಕ್ ಜಾತಾ? ಕವಿಕ್ ಏಕ್ ಜವಾಬ್ದಾರಿ ಮ್ಹಳ್ಳಿ ನಾ?
ಸವಾಲ್ ವಾಜ್ಬಿ. ಆಕೇರಿಕ್ ‘ಕವಿ ಸಮಯ್’ ಮ್ಹಳ್ಯಾರ್ ಆಮ್ಕೊ ಪ್ರಯೋಗ್ ಮ್ಹಣ್ ಸಾಂಗ್ಚೆ ಕಷ್ಟ್ ಕವಿಚೆ ಅಭಿವ್ಯಕ್ತೆಕ್ ಏಕ್ ಕಲ್ಪನ್ ಸಹಜ್ ಜಾವ್ನ್ ಉದೆತಾ ಆನಿ ತೆಂ ನಾಸ್ತಾಂ ಕವಿತಾ ಅಪೂರ್ಣ್ ತರ್ ಬೋವ್ಶ್ಯಾ ಕವಿನ್ ತೊ ಪ್ರಯೋಗ್ ಕೆಲ್ಲ್ಯಾಂತ್ ಚೂಕ್ ನಾ - ತೊ ಪ್ರಯೋಗ್ ಕಿತ್ಲೊ ಅಸಾಧ್ಯ್ ಮ್ಹಣ್ ದಿಸ್ಲ್ಯಾರಿ; ಒಟ್ಟಾರೆ ಅಭಿವ್ಯಕ್ತಿ ಪಳೆತಾನಾ ಮಾತ್ರ್ ಅಸಹಜ್ ಕಸೊ ಮಾತ್ರ್ ದಿಸೊಂಕ್ ನಜೊ.
ಇಂಗ್ಲಿಷಾಚ್ಯಾ ಠಿoeಣiಛಿ poetic justice ಆನಿ ಕವಿ ಸಮಯಾಕ್ ಥೊಡೊ ತಾಳ್ ಪಡ್ತಾ ತರಿ ಪೊಯೆಟಿಕ್ ಜಸ್ಟಿಸ್ ಮ್ಹಳ್ಯಾರ್ ಬರೆಂ ಕೆಲ್ಲ್ಯಾಕ್ ಬರೊ ಪ್ರತಿಫಳ್ ಮೆಳಜಾಯ್ ಆನಿ ವಾಯ್ಟ್ ಕೆಲ್ಲ್ಯಾಕ್ ಶಿಕ್ಷಾ ಜಾಯ್ಜಾಯಿಚ್ ಮ್ಹಳ್ಳೆಂ ಏಕ್ ಕಾವ್ಯಾಳ್ ಧೋರಣ್! ಕವಿ ಸಮಯ್ ತಾಚ್ಯಾಕ್ಯ್ ಚಡಿತ್ ವಿಶಾಲ್.
-ಮೆಲ್ವಿನ್ ಪಿಂಟೊ, ನೀರುಡೆ
(‘ಮಿತ್ರ್’ ಸಾತೊಳ್ಯಾಚೆರ್ ಜ್ಯೂನ್ 1, 2008 ತಾರಿಕೆರ್ ಪರ್ಗಟ್ ಜಾಲ್ಲ್ಯಾ ‘ರಸಾಯನ್’ ಅಂಕಣಾಂತ್ಲೆಂ ಬರಪ್)
|
