ನವೆಂಬರ್ 29 ಚ್ಯಾನ್ ಬಾಕಿಬಾಬ್ ಜಲ್ಮಶತಾಬ್ದಿ ವರ್ಸಾಕ್ ಸುರ್ವಾತ್
ಕವಿಶ್ರೇಷ್ಠ್ ಬಾ. ಭ. ಬೋರ್ಕರ್ ಉರ್ಫ್ ಬಾಕಿಬಾಬ್ ಬೋರ್ಕರಾಚ್ಯಾ ಜಲ್ಮಶತಾಬ್ದಿ ವರ್ಸಾಚಿ ಸುರ್ವಾತ್ ಹ್ಯಾಚ್ ನವೆಂಬರ್ 29 ಕ್ ಜ್ಯೇಷ್ಠ್ ಕವಿ ಮಂಗೇಶ್ ಪಾಡ್ಗಾಂವ್ಕಾರ್ , ಜ್ಯೇಷ್ಠ್ ಸಾಹಿತಿ ರವೀಂದ್ರ ಕೆಳೆಕಾರ್ ಆನಿ ಜ್ಯೇಷ್ಠ್ ಕವಿ ಗ್ರೇಸ್ ಹಾಂಚೆ ಉಪಸ್ಥಿತಿಂತ್ ಜಾತಲಿ.
29
ಆನಿ 30 ನವೆಂಬ್ರಾಚ್ಯಾ ದೋನ್ ದಿಸಾಂನಿ ಜಲ್ಮಶತಾಬ್ದಿ ವರ್ಸಾಚೊ ಉಗ್ತಾವಣ್ ಸುವಾಳೊ ಮಡ್ಗಾಂವ್ಚ್ಯಾ ರವೀಂದ್ರ ಭವನಾಂತ್ ಜಾತಲೊ. ಕಲಾ ಆನಿ ಸಂಸ್ಕೃತಿ ಖಾತೆಂ ತಶೆಂಚ್ ಬಾ. ಭ. ಬೋರ್ಕರ್ ಜಲ್ಮಶತಾಬ್ದಿ ಸಮಿತಿಚ್ಯಾ ಜೋಡ್ ಪಾಲ್ವಾನ್ ಬಾಕಿಬಾಬಾಂಚೆಂ ಜಲ್ಮಶತಾಬ್ದಿ ವರಸ್ ಮನಾಯ್ತಲೆ.
ದೋನ್ ದಿಸಾಂಚೆ ಉಗ್ತಾವಣೆಚೆ ಕಾರ್ಯಾವಳಿಕ್ ಪಾಡ್ಗಾಂವ್ಕಾರ್, ರವೀಂದ್ರಬಾಬ್ ಆನಿ ಗ್ರೇಸಾ ಸಯ್ತ್ ಜ್ಯೇಷ್ಠ್ ಸಾಹಿತಿ ಮಧು ಮಂಗೇಶ್ ಕರ್ಣಿಕ್, ಗಾಯಕ್ ಅಜಿತ್ ಕಡ್ಕಡೆ, ಕನ್ನಡ ಸಾಹಿತಿ ಜಯಂತ ಕಾಯ್ಕಿಣಿ ಹಾಜರ್ ಆಸ್ತಲೆ.
29
ತಾರಿಕೆರ್ ಸಕಾಳಿಂ 9.30 ವೊರಾಂಚೆರ್ ಪುಸ್ತಕ್ ಪ್ರದರ್ಶನ್ ತಶೆಂಚ್ ಬಾಕಿಬಾಬಾಚ್ಯಾ ತಸ್ವಿರೆಂಚೆಂ ಆನಿ ವಸ್ತು ಸಂಗ್ರಹಾಚ್ಯಾ ಪ್ರದರ್ಶನಾಚೆಂ ಉಗ್ತಾವಣ್ ಜಾತಲೆಂ. 10 ತಾರಿಕೆರ್ 11.30 ವೊರಾಂಚೆರ್ ‘ಕವಿಶ್ರೇಷ್ಠ್ ಬಾಕಿಬಾಬ್’ ಹೆ ಕಾರ್ಯಾವಳಿಂತ್ ಬಾ.ಭ. ಬೋರ್ಕರಾಂಚ್ಯಾ ಜಿವಿತಾಚೆರ್ ಆಧಾರಿತ್ ಚಲಚಿತ್ರಾಂ ದಾಖಯ್ತಲೆ. ಹೆಚ್ ಕಾರ್ಯಾವಳಿಂತ್ ಬಾಕಿಬಾಬಾಂಚ್ಯಾ ಕವಿತಾಂಚೆಂ ವಾಚನ್ ಆನಿ ಗಿತಾಂಚೆಂ ಸಾದರೀಕರಣ್ ಜಾತಲೆಂ. ದೊನ್ಪಾರಾಂ 12 ವೊರಾಂಚೆರ್ ಉಗ್ತಾವಣ್ ಸುವಾಳೊ ಜಾತಲೊ. ರವೀಂದ್ರಬಾಬ್ ಆನಿ ಪಾಡ್ಗಾಂವ್ಕಾರ್ ಬಾಕಿಬಾಬ್ ಜಲ್ಮಶತಾಬ್ದಿ ವರ್ಸಾಚ್ಯಾ ಸುವಾಳ್ಯಾಚೆಂ ಉಗ್ತಾವಣ್ ಕರ್ತಲೆ. ಮಧು ಮಂಗೇಶ್ ಕರ್ಣಿಕ್ ಹ್ಯಾ ವೆಳಾರ್ ಹಾಜರ್ ಆಸ್ತಲೆ. ಕಾರ್ಯಾವಳಿಚೊ ಯೆಜ್ಮಾನಿ ಜಾವ್ನ್ ಮುಖೆಲ್ ಮಂತ್ರಿ ದಿಗಂಬರ್ ಕಾಮತ್ ಕಾರ್ಯೆಂ ಸೊಭಯ್ತಲೆ.
ದೊನ್ಪಾರಾಂ 3 ಥಾವ್ನ್ 4.25 ಪರ್ಯಾಂತ್ ‘ಪೊಯೆಟ್ ಸ್ಪೀಕಿಂಗ್’ ಹಿ ಕವಿಂಚಿ ಮನೋಗತ್ ವ್ಯಕ್ತ್ ಕರ್ಚಿ ಕಾರ್ಯಾವಳ್ ಜಾತಲಿ. ತಾಂತುನ್ ಕವಿ ಗ್ರೇಸ್ (ಮರಾಠಿ), ಜಯಂತ ಕಾಯ್ಕಿಣಿ (ಕನ್ನಡ), ಡೊ ಸುಕ್ರೀತಾ ಪೊಲ್ ಕುಮಾರ್ (ಇಂಗ್ಲಿಷ್) ಆನಿ ರಮೇಶ ವೆಳುಸ್ಕಾರ್ (ಕೊಂಕಣಿ) ಹೆ ಕವಿ ವಾಂಟೊ ಘೆತಲೆ.
ತ್ಯಾ ಉಪ್ರಾಂತ್ ‘ಅಂತರ್ ಭಾರತೀಯ್ ಕವಿತಾ’ ಹ್ಯಾ ವಿಷಯಾಚೆರ್ ಪರಿಸಂವಾದ್ ಜಾತಲೊ. ಜಾಂತುನ್ ಕೆ. ಸಚ್ಚಿದಾನಂದ್, ಮಂಗಲೇಶ್ ಡಬ್ರಾಲ್ ಆನಿ ಡೊ. ಕಿರಣ್ ಬುಡ್ಕುಲೆ ವಾಂಟೊ ಘೆತಲಿಂ. ಡೊ. ವಿ ಬಾ ಪ್ರಭುದೇಸಾಯಿ ಅಧ್ಯಕ್ಷ್ ಆಸ್ತಲೆ. ತ್ಯಾ ಉಪ್ರಾಂತ್ ಸಾಂಜೆಚ್ಯಾ 6.30 ವೊರಾಂಚೆರ್ ಪಂಡಿತ್ ಅಜಿತ್ ಕಡ್ಕಡೆಚ್ಯಾ ಗಾಯಾನಾಂಚಿ ಕಾರ್ಯಾವಳ್ ಜಾತಲಿ.
ಸೊಮಾರ್ 30 ತಾರಿಕೆರ್ ಸಕಾಳಿಂ 10 ವೊರಾಂಚೆರ್ ‘ಯಾದಿಂತ್ಲೆ ಬಾಕಿಬಾಬ್’ ಹಿ ಬಾಕಿಬಾಬಾಚಿಂ ವೆವೆಗ್ಳಿಂ ತಾಸಾಂ ಉಗ್ತಿಂ ಕರ್ಚಿ ಕಾರ್ಯಾವಳ್ ಜಾತಲಿ. ನಾಗೇಶ್ ಕರ್ಮಲಿ, ಶ್ರೀರಾಮ್ ಕಾಮತ್ ಆನಿ ಹೀರಾಲಾಲ್ ಕಾಮತ್ ತಾಂತುಂ ವಾಂಟೊ ಘೆತಲೆ. ಸುರೇಶ್ ಅಮೋಣ್ಕಾರ್ ಕಾರ್ಯಾವಳಿಚೆ ಅಧ್ಯಕ್ಷ್ ಆಸ್ತಲೆ.
11.45
ಥಾವ್ನ್ 1.25 ಪರ್ಯಾಂತ್ ‘ಬಾ. ಭ. ಬೋರ್ಕರಾಚಿ ಕವಿತಾ’ ಹ್ಯಾ ವಾಂಟ್ಯಾಂತ್ ಅನಂತ್ ಅಮ್ಮೆಂಬಳ್ (ಬೋರ್ಕರಾಚ್ಯಾ ಕವಿತೆಂತ್ಲೆಂ ಸಂಗೀತ್), ಡೊ ಸೋಮನಾಥ ಕೋಮರ್ಪಂತ್ (ಬೋರ್ಕರಾಚ್ಯಾ ಕವಿತೆಂತ್ಲೆಂ ಸೈಂಭ್) ಆನಿ ನರೇಂದ್ರ ಬೊಡ್ಕೆ (ಬೋರ್ಕರಾಚ್ಯಾ ಕವಿತೆಂತ್ ಪಾಶ್ಚಾತ್ಯ್ ಕವಿಂಚೊ ಪ್ರಭಾವ್) ಹ್ಯಾ ವಿಷಯಾಚೆರ್ ಉಲೊವ್ಪ್ ಕರ್ತಲೆ. ಪುಂಡಲೀಕ್ ನಾಯ್ಕ್ ಅಧ್ಯಕ್ಷ್ ಆಸ್ತಲೆ.
ದೊನ್ಪಾರಾಂ 3 ಥಾವ್ನ್ 4 ಹ್ಯಾ ವೆಳಾರ್ ಸಮಾರೋಪ್ ಸುವಾಳೊ ಜಾತಲೊ. ಸಮಾರೋಪಾಕ್ ಜ್ಯೇಷ್ಠಿ ಉರ್ದು ಶಾಯರ್ ಶೀನ್ ಕಾಫ್ ನಿಝಾಮ್ ಹಾಜರ್ ಆಸ್ತಲೆ. ಸಮಿತೆಚೆ ಅಧ್ಯಕ್ಷ್ ದತ್ತಾ ದಾಮೋದರ್ ನಾಯಕ್ ಅಧ್ಯಕ್ಷ್ ಆಸ್ತಲೆ.
-ಭಾತ್ಮಿ