ಜೆಸ್ ಫೆರ್ನಾಂಡಿಸಾಕ್ ಸಾಹಿತ್ಯ್ ಅಕಾದೆಮಿ ಪುರಸ್ಕಾರ್
"ಪರಮ್ ಪಿತ್ಯಾಚೊ ನಿಯಮ್ ಆಸಾ/ ಪಾತಕ್ ಕರ್ಚೆ ಪಯ್ಲಿಂ ಕೊಣಾಕ್ / ಖ್ಯಾಸ್ತ್ ಫಾವೊ ಕರ್ಚಿ ನ್ಹಯ್/ ಪರಮ್ ಪಿತ್ಯಾನ್ ಕೆಲ್ಲೊ ನಿಯಮ್ / ಸ್ವತಾ ತಾಣೇಂಯ್ ಮೊಡ್ಚೊ ನ್ಹಯ್"
ಅಸಲ್ಯಾ ಉತ್ರಾಂನಿ ಕಾಳ್ಜಾಕ್ ಹಾತ್ ಘಾಲ್ಚ್ಯಾ ಸಂವೇದನ್ಶೀಳ್ ಕವಿ ಜೆಸ್ ಪೆರ್ನಾಂಡಿಸಾಕ್ ಆಂವ್ದುಂಚೊ ಸಾಹಿತ್ಯ್ ಅಕಾದೆಮಿ ಪುರಸ್ಕಾರ್ ಫಾವೊ ಜಾಲಾ. ತಾಂಚ್ಯಾ ‘ಕಿರ್ವಂಟ್’ ಹ್ಯಾ ಕವಿತಾ ಝೆಲ್ಯಾಕ್ ಹೊ ಪುರಸ್ಕಾರ್ ಲಾಬ್ಲಾ.
6 ಸಪ್ಟೆಂಬರ್ 1941 ಹ್ಯಾ ದಿಸಾ ಪಾಳೊಳೆಚ್ಯಾ ಸೊಭಿತ್ ಸೈಂಭಿಕ್ ವಠಾರಾಂತ್ ಜಲ್ಮಲ್ಲ್ಯಾ ಜೆಸಾನ್ ಇಂಗ್ಲಿಷಾಂತ್ ಬಿಎ ಕರುನ್ ಸ್ಯಾನಿಟರಿ ಇನ್ಸಪೆಕ್ಟರ್ ಕೋರ್ಸ್ ಘೆತ್ಲೊ. ಕೊಂಕಣಿ ಬರೊವ್ಪ್ಯಾಂಚೊ ಎಕ್ವಟ್, ಕೊಂಕಣಿ ಭಾಷಾ ಮಂಡಳ್, ಗೊಂಯ್, ಲೇಖಕ್ ಸಂಘ್ -ಅಸಲ್ಯಾ ಸಂಸ್ಥ್ಯಾಂಚೊ ಜಿವಿತಾ ಕಾಳಾಚೊ ವಾಂಗ್ಡಿ ಆನಿ ಕೊಂಕಣಿ ಚಳುವಳಿಂತ್ಲೊ ಏಕ್ ನಿಷ್ಠಾವಂತ್ ವಾವ್ರಾಡಿ ಆಸಲ್ಲ್ಯಾ ಜೆಸಾನ್, ತಿಯಾತ್ರ್, ಖೆಳ್-ತಿಯಾತ್ರ್, ನಾಟಕಾಂ ಆನಿ ಎಕಾಂಕಿಕಾ ಬರೊವ್ನ್ ಮಾಚಿಯೆರ್ ಹಾಡ್ಲ್ಯಾತ್.
ಕಥಾ, ಕಾದಂಬರಿ ತಾಂಣಿ ಬರಯ್ಲ್ಯಾತ್. ತಾಂಚ್ಯಾ ಸಾಹಿತ್ಯಾಕ್, ಕಥಾ, ಕವಿತಾ, ಮಾಂಡ್ಯಾಗಿತಾಂಕ್, ತಿಯಾತ್ರಾಂಕ್, ನಾಟಕಾಂಕ್ ಇನಾಮಾಂ ಫಾವೊ ಜಾಲ್ಯಾಂತ್. ಕ್ರಿಸ್ತೀ ಧರ್ಮಗೃಂಥಾಚೊ ಅಣ್ಕಾರ್ ಕೆಲ್ಲೊ ಜೆಸ್ ಏಕ್ ಪತ್ರಕಾರ್ ಆನಿ ಚಿತ್ರಕಾರಯ್ ವ್ಹಯ್. ಫಾ. ಥೊಮಾಸ್ ಸ್ಟೀವನ್ಸ್ ಕೊಂಕಣಿ ಕೇಂದ್ರಾಚೊ ತಾಂಕಾಂ ಜೆಜ್ವಿತ್ ಆಂತೊನ್ ಪಿರೇರ್ ಪುರಸ್ಕಾರಯ್ ಫಾವೊ ಜಾಲಾ.
ಪಳೆಂವ್ಕ್ ವಯ್ಲ್ಯಾವಯ್ರ್ ಕೊಮಿಕ್ ಕಸೊ, ಪುಣ್ ಕಾಳ್ಜಾಚಿ ಖರಾಯ್ ಖೋಲ್ ದರ್ಯಾಚಿ, ಗರ್ಭ್ ಕುಡಿಚಿ ವ್ಹಾಂವ್ತಿ ನಿತಳ್, ಶೀತಳ್ ಝರಾಂವಾಚಿ ಆನಿ ತಕ್ಲೆಚಿ ಅಸ್ತವಸ್ತತಾಯ್ ಸೈರಭೈರ್ - ಕವಿಚೊ ಅಸಲ್ಯಾ ಉತ್ರಾಂನಿ ಕಮಲಾಕರ್ ದತ್ತಾರಾಮ್ ಮ್ಹಾಳ್ಶಿನ್ ಆಪ್ಲೆ ಪ್ರಸ್ತಾವನೆಂತ್ ಜೆಸ್ ಫೆರ್ನಾಂಡಿಸಾಕ್ ಮಾನ್ ಕೆಲಾ.
‘ಕಿರ್ವಂಟ್’ ಮ್ಹಳ್ಯಾರ್ ಪುಡ್ವೆಂ ಯಾ ಕಾಪಡ್ ಪೆಂಕ್ಟಾರ್ ಘಟ್ ಉರೊಂಕ್ ಘಾಲ್ಚಿ ಗಾಂಟ್. ಹೆ ಗಾಂಟಿಂತ್ ದುಡು ಲೆಗುನ್ ಗಾಂಟಾವ್ನ್ ದವರ್ಚೊ ಆಸ್ತಾ. ‘ಕಿರ್ವಂಟ್’ ಹ್ಯಾ ಕವಿತಾ ಝೆಲ್ಯಾಕ್ ಜೊ ಮಾನ್ ಫಾವೊ ಜಾಲಾ, ತೊ ಆಪುಣ್ ಎಕ್ಲ್ಯಾಕ್ ನ್ಹಯ್ ಬಗರ್ ಪುರಾಯ್ ಗೊಂಯ್ಚ್ಯಾ ಸಮಾಜಾಕ್ ಅಶೆಂ ಹಾಂವ್ ಮಾನ್ತಾಂ ಮ್ಹಣೊನ್ ಜೆಸಾನ್ ಸಾಂಗ್ಲಾಂ.
ಜೆಸ್ ಫೆರ್ನಾಂಡಿಸಾಚ್ಯೊ ಕವಿತಾ: