ಪ್ರಾದ್ನ್ಯಾ ಕಾಮತಾಕ್ ಅಖಿಲ್ ಭಾರತ್ ಭುರ್ಗ್ಯಾಂಚ್ಯಾ ಕವಿತಾ ಸ್ಪರ್ಧ್ಯಾಂತ್ ಪಯ್ಲೆಂ ಇನಾಮ್
ಕೊಂಕಣಿ ಕವಿತೆಚೆ ಸಮಗ್ರ್ ವಾಡಾವಳಿ ಖಾತೀರ್ ವಾವುರ್ಚೊ ಸಂಸ್ಥೊ ‘ಕವಿತಾ ಟ್ರಸ್ಟ್’ ಹಾಂಣಿ ಹ್ಯಾ ವರ್ಸಾ ಚಲಯಿಲ್ಲ್ಯಾ ದೆ. ಚಾರ್ಲ್ಸ್ ಆನಿ ತೆರೆಜಾ ರೊಡ್ರಿಗಸ್ ಸ್ಮಾರಕ್, ತಿಸ್ರ್ಯಾ ಅಖಿಲ್ ಭಾರತ್ ಭುರ್ಗ್ಯಾಂಚ್ಯಾ ಕವಿತಾ ಸ್ಪರ್ಧ್ಯಾಂತ್ ಗೊಂಯ್ಚ್ಯಾ ಪೊಂಡಾಂತ್ಲ್ಯಾ ದಾದಾ ವೈದ್ಯ ಹೈಸ್ಕೂಲ್ ಹಾಂಗಾಸರ್ ಧಾವೆ ಕ್ಲಾಶಿಂತ್ ಶಿಕ್ಚ್ಯಾ ಪ್ರಾದ್ನ್ಯಾ ಕಾಮತಾಕ್ ಪಯ್ಲೆಂ ಇನಾಮ್ ಫಾವೊ ಜಾಲಾಂ. 2010 ಜನೆರ್ 10 ತಾರಿಕೆರ್ ಬಾರ್ಕೂರ್ ಸೀತಾ ನಂಯ್ಚೆ ತಡಿರ್ ರಿಚರ್ಡ್ ಸೊಜಾಂಗೆಲ್ಯಾ ಮಾಟ್ವಾಂತ್ ಚಲಲ್ಲ್ಯಾ ‘ಕವಿತಾ ಫೆಸ್ತ್’ ಸುವಾಳ್ಯಾ ಸಂದರ್ಭಾರ್ ಮಾನಾಚಿ ಸೈರಿಣ್ ಜಾವ್ನ್ ಆಯಿಲ್ಲ್ಯಾ ಫ್ಲೇವಿಯಾ ಮಥಾಯಸಾನ್ ಹೆಂ ಇನಾಮ್ ಪ್ರಾದ್ನ್ಯಾಕ್ ದಿಲೆಂ.
ಪ್ರಾದ್ನ್ಯಾ ಕಾಮತ್, ಕವಿತಾ ಫೊಂಡೆಕಾರ್, ಪುನೀತಾ ನಾಯ್ಕ್
ಹ್ಯಾ ಸ್ಪರ್ಧ್ಯಾಕ್ 294 ಭುರ್ಗ್ಯಾಂನಿ ಕವಿತಾ ಧಾಡ್ಲ್ಲ್ಯೊ ಆಸೊನ್ ದುಸ್ರೆಂ ಇನಾಮ್ ಗೊಂಯ್ ತೀಸ್ವಾಡಿಚ್ಯಾ ದಯಾನಂದ್ ಹೈಸ್ಕೂಲಾಂತ್ ನೊವೆ ಕ್ಲಾಶಿಂತ್ ಶಿಕ್ಚ್ಯಾ ಕವಿತಾ ಫೊಂಡೆಕಾರಾನ್ ಹಾಜರ್ ಆಸೊನ್ ಘೆತ್ಲೆಂ ತರ್ ಆನಿ ತಿಸ್ರೆಂ ಇನಾಮ್ ಜಿಕ್ಲಲ್ಯಾ ಮಡ್ಗಾಂವ್ ಎಮ್. ಎಂಡ್ ಎನ್. ಹೈಸ್ಕುಲಾಂತ್ ಆಟ್ವೆ ಕ್ಲಾಶಿಂತ್ ಶಿಕ್ಚ್ಯಾ ಪುನೀತಾ ನಾಯ್ಕ್ ಹಿಚೆ ತರ್ಫೆನ್ ಆದ್ಲ್ಯಾ ವರ್ಸಾ ಪಯ್ಲೆಂ ಇನಾಮ್ ಜೊಡ್ಲಲ್ಯಾ ಯುಗಾ ಆಡಾರ್ಕಾರಾನ್ ಘೆತ್ಲೆಂ.
ಪ್ರಾದ್ನ್ಯಾ ಕಾಮತ್, ಮಾನೆಸ್ತಿಣ್ ಫ್ಲೇವಿಯಾ ಮಥಾಯಸಾ ಥಾವ್ನ್ ಇನಾಮ್ ಘೆತಾನಾ
ಕವಿತಾ ಫೊಂಡೆಕಾರ್, ಮಾನೆಸ್ತಿಣ್ ಫ್ಲೇವಿಯಾ ಮಥಾಯಸಾ ಥಾವ್ನ್ ಇನಾಮ್ ಘೆತಾ
ಯುಗಾ ಆಡಾರ್ಕಾರ್, ಪುನೀತಾ ನಾಯ್ಕ್ ಹಿಚೆ ತರ್ಫೆನ್ ಮಾನೆಸ್ತಿಣ್ ಫ್ಲೇವಿಯಾ ಮಥಾಯಸಾ ಥಾವ್ನ್ ಇನಾಮ್ ಘೆತಾ
ಪಯ್ಲೆಂ ಇನಾಮ್ ರುಪಯ್ 2,000, ದುಸ್ರೆಂ ಇನಾಮ್ ರುಪಯ್ 1,000 ಆನಿ ತಿಸ್ರೆಂ ಇನಾಮ್ ಜಾವ್ನ್ ರುಪಯ್ 750 ನಗ್ದೆನ್ ಭುರ್ಗ್ಯಾಂಕ್ ಫಾವೊ ಜಾಲೆ ಮಾತ್ರ್ ನ್ಹಯ್ ಭಾಗ್ ಘೆತ್ಲ್ಲ್ಯಾ ಸಮೆಸ್ತ್ ಭುರ್ಗ್ಯಾಂಕ್ ಸರ್ಟಿಫಿಕೆಟಿ ಕವಿತಾ ಟ್ರಸ್ಟ್ ಧಾಡುನ್ ದಿತಲೆಂ.
ಭುರ್ಗ್ಯಾಂ ಥಂಯ್ ಕೊಂಕಣಿ ಕವಿತೆಚಿ ಅಭಿರೂಚ್ ವಾಡೊಂವ್ಚ್ಯಾ ಇರಾದ್ಯಾನ್ ‘ಕವಿತಾ ಟ್ರಸ್ಟ್’ ಹಾಂಣಿ ತೀನ್ ವರ್ಸಾಂ ಆದಿಂ ಹೊ ಸ್ಪರ್ಧೊ ಸುರು ಕೆಲ್ಲೊ. ಆದ್ಲ್ಯಾ ವರ್ಸಾ ಚಡುಣೆಂ 256 ಭುರ್ಗ್ಯಾಂನಿ ಭಾಗ್ ಘೆತ್ಲ್ಲೊ. ಆದ್ಲ್ಯಾ ವರ್ಸಾ ಪಯ್ಲೆಂ ಇನಾಮ್ ಜೊಡ್ಲ್ಲ್ಯಾ ಯುಗಾ ಆಡಾರ್ಕಾರಾಕ್ ಹ್ಯಾ ವರ್ಸಾ ‘ಕವಿತಾ ಫೆಸ್ತ್’ ಸಂದರ್ಭಾರ್ ಚಲಲ್ಲ್ಯಾ ಬಹುಭಾಷಾ ಕವಿಗೋಷ್ಠಿಂತ್ ಭಾಗ್ ಘೆಂವ್ಚೊ ಆವ್ಕಾಸ್ ಕವಿತಾ ಟ್ರಸ್ಟಾನ್ ಕರುನ್ ದಿಲ್ಲೊ.
‘ಕವಿತಾ ಫೆಸ್ತ್’ ಸುವಾಳ್ಯಾಕ್ ಕನ್ನಡ ಕಥಾಕಾರ್ ತಶೆಂ ಗೀತ್ಕಾರ್ ಜಯಂತ ಕಾಯ್ಕಿಣಿ ಮುಕೆಲ್ ಸೈರೊ ಜಾವ್ನ್ ಆನಿ ಮರಾಠಿ ಫಿಲ್ಮ್ ಸಂಗೀತ್ ನಿರ್ದೇಶಕ್ ಅನಂತ ಅಮ್ಮೆಂಬಳ್, ದುಬಾಯ್ಚೊ ಬಿಸ್ನೆಸ್ ಮನೀಸ್ ಜೋಸೆಫ್ ಮಥಾಯಸ್ ಆನಿ ತಾಚಿ ಪತಿಣ್ ಫ್ಲೇವಿಯಾ ಮಥಾಯಸ್ ಮಾನಾಚಿಂ ಸೈರಿಂ ಜಾವ್ನ್ ಆಯಿಲ್ಲಿಂ.