ಅಖಿಲ್ ಭಾರತ್ ಕೊಂಕಣಿ ಕವಿತಾ ವಾಚನ್ ಸರ್ತ್: ಗೊಂಯಾಂ ಥಾವ್ನ್ ಧಾ ಜಣಾಂಚಿ ವಿಂಚವ್ಣ್
ಕವಿತಾ ಟ್ರಸ್ಟ್ ಹಾಂಣಿ ಮಾಂಡುನ್ ಹಾಡಲ್ಲ್ಯಾ ರೋಹನ್ ಆನಿ ಲವೀಟಾ ಮೊಂತೇರೊ - ಆಖಿಲ್ ಭಾರತ್ ಕೊಂಕಣಿ ಕವಿತಾ ವಾಚನ್ ಸರ್ತೆಚ್ಯಾ ಪ್ರಾಥಮಿಕ್ ಹಂತಾಚೊ ಪಯ್ಲೊ ಕಂತ್ ಹ್ಯಾಚ್ ಒಕ್ಟೋಬರ್ 28 ತಾರಿಕೆರ್ ಗೊಂಯ್ ಮಡ್ಗಾಂವ್ಚ್ಯಾ ಶ್ರೀಮತಿ ಪಾರ್ವತಿಬಾಯಿ ಚೌಗುಳೆ ಕೊಲೆಜ್ ಒಫ್ ಆರ್ಟ್ಸ್ ಎಂಡ್ ಸಾಯನ್ಸ್ ಹಾಂಗಾಸರ್ ಚಲ್ಲೊ. ಗೊಂಯ್ಚ್ಯಾ ವೆವೆಗ್ಳ್ಯಾ ಕೊಲೆಜಿಂ ಥಾವ್ನ್ ಸ್ಪರ್ಧಿಕ್ ಹಾಜರ್ ಆಸೊನ್ ಹ್ಯಾ ಹಂತಾ ಥಾವ್ನ್ ಧಾ ಜಣಾಂಕ್ ಫೈನಲಾಕ್ ವಿಂಚುನ್ ಕಾಡ್ಲೆಂ.
ಸಕಾಳಿಂಚ್ಯಾ ಸಾಡೆ-ಧಾ ಥಾವ್ನ್ ಸಾಡೆಬಾರಾ ಪಾಸುನ್ ಚಲಲ್ಲ್ಯಾ ಹ್ಯಾ ಕೊಂಕಣಿ ಕವಿತಾ ವಾಚನ್ ಸರ್ತೆಂತ್ ಚಡಿತ್ ಸ್ಪರ್ಧಿಕಾಂನಿ ಸ್ವತಾಚ್ಯೊ ಕವಿತಾ ವಾಚ್ಲ್ಯೊ ತರ್, ಥೊಡ್ಯಾಂನಿ ಮ್ಹಾಲ್ಗಡೆ ಕವಿ ರ.ವಿ.ಪಂಡಿತ್ ಧರುನ್ ನವೋದಿತ್ ಕವಿ ರಾಜಯ್ ಪವಾರಾಚ್ಯೊ ಸೈತ್ ಕವಿತಾ ವಾಚ್ಲ್ಯೊ. ವೊರಯ್ಣಾರ್ ಜಾವ್ನ್ ಕೊಂಕಣಿ ಕವಿ ತಶೆಂ ವಿಮರ್ಶಕ್, ಆನಿ ಕಿಟಾಳ್.ಕೊಮ್ ಅಂತರ್‌ಜಾಳಿಚೊ ಸಂಪಾದಕ್ ಎಚ್ಚೆಮ್ ಪೆರ್ನಾಳ್, ಕವಿತಾ ಟ್ರಸ್ಟಾಚೊ ಟ್ರಸ್ಟಿ ತಶೆಂ ಆರ್ಕಿಡ್ ಆರ್ಟ್ಸ್ ಗ್ಯಾಲರಿಚೊ ಮ್ಹಾಲಕ್ ತಶೆಂ ಇಂಗ್ಲಿಷ್ ಲೇಖಕ್ ವಿಲಿಯಮ್ ಪಾಯ್ಸ್, ಸಾಂಗಾತಾಚ್ ಕವಿ ಪರೇಶ್ ಕಾಮತ್ ಹಾಂಣಿ ಧಾ ಜಣಾಂಚಿ ವಿಂಚವ್ಣಿ ಕೆಲಿ.
ಕವಿತಾ ಟ್ರಸ್ಟಾಚೊ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಸುರ್ವೆರ್ ಯೆವ್ಕಾರ್ ಮಾಗೊನ್, ಕವಿತಾ ಟ್ರಸ್ಟಾಚ್ಯಾ ವಾವ್ರಾಚಿ ವೊಳಕ್ ದಿಲಿ ಆನಿ ಹೆ ಸರ್ತೆಚ್ಯಾ ಶೆವೊಟಾವಿಶಿಂ ಆನಿ ನೆಮಾಂ ವಿಶಿಂ ಸಾಂಗ್ಲೆಂ. ಕವಿತಾ ಟ್ರಸ್ಟಿ ತಶೆಂ ಕೊಂಕಣಿ ಲೇಖಕ್ ವಿತೊರಿ ಕಾರ್ಕಳಾನ್ ನಾಂವಾಂ ನೊಂದಾವ್ಣಿ ಕರ್ಚ್ಯಾ ಕಾಮಾಂತ್ ಮಜತ್ ಕೆಲಿ.
ಹ್ಯಾ ಸಂದರ್ಭಾರ್ ಚೌಗುಳೆ ಕೊಲೆಜಿಚ್ಯಾ ಕೊಂಕಣಿ ವಿಭಾಗಾಚೊ ಮುಕೆಲಿ ಡೊ ಗುಣಾಜಿ ದೇಸಾಯಿ, ಲೆಕ್ಚರರ್ ರಾಖಿ ಆಮೋನ್ಕಾರ್ ತಶೆಂ ಕವಯಿತ್ರಿ ನಯನಾ ಆಡಾರ್ಕಾರ್, ಕೊಲೆಜಿಚ್ಯಾ ವಿದ್ಯಾರ್ಥಿಂ ಸಾಂಗಾತಾ ಸ್ಪರ್ಧಿಕಾಂಚ್ಯಾ ಘರ್ಚಿಂ ಥೊಡಿಂ ಹಾಜರ್ ಆಸಲ್ಲಿಂ.
ವಿಂಚುನ್ ಆಯಿಲ್ಲ್ಯಾ ಧಾ ಜಣಾಂಚಿಂ ನಾಂವಾಂ ಹೆಪರಿಂ ಆಸಾತ್:
1. ಟೆಫನಿ ಮರಿಯಾ ಗಾಮಾ
2. ಯುಗಾ ಆಡಾರ್ಕಾರ್
3. ರಿಚಾ ಕಲಂಗೂಟ್ಕಾರ್
4. ಪೂಜಾ ಯಾದವ್
5. ಪೂಜಾ ಪರಬ್
6. ಪೂಜಾ ಮೊರಾಜ್ಕಾರ್
7. ರೇಣುಕಾ ಬಿರ್ಜೆ
8. ಸಿದ್ದಿ ಟಿ. ಶೇಟ್
9. ಶುಭಮ್ ಶಾಬಾ
10. ಪುರುಷೋತ್ತಮ್ ವೆರ್ಲೆಕಾರ್
ಸರ್ತೆ ಉಪ್ರಾಂತ್ ಕವಿ ಪರೇಶ್ ಕಾಮ್ತಿನ್ ಆಪ್ಣಾಚ್ಯೊ ಥೊಡ್ಯೊ ಕವಿತಾ ವಾಚುನ್ ಸಾಂಗ್ಲ್ಯೊ.
ನವೆಂಬರ್ 26 ತಾರಿಕೆರ್ ಮಂಗ್ಳುರ್ ಸಾಂ. ಲುವಿಸ್ ಕೊಲೆಜಿಂತ್ ಹ್ಯಾ ಪ್ರಾಥಮಿಕ್ ಹಂತಾಚೊ ದುಸ್ರೊ ಕಂತ್ ಚಲ್ಚೊ ಆಸೊನ್ ತ್ಯಾವೆಳಾರ್ ಮಂಗ್ಳುರ್ ಥಾವ್ನ್ ಧಾ ಜಣಾಂಚಿ ವಿಂಚವ್ಣಿ ಜಾತಲಿ. ಹ್ಯಾ ಧಾ ಜಣಾಂಕ್ ತಶೆಂ ಗೊಂಯ್ಚ್ಯಾ ಧಾ ಜಣಾಂಕ್, ಅಶೆಂ ಸಾಂಗಾತಾ ವೀಸ್ ಜಣಾಂಕ್, ಜನೆರ್ 8 ತಾರಿಕೆರ್ ಉಡುಪಿ ಮೂಡುಬೆಳ್ಳೆಂತ್ ಚಲ್ಚ್ಯಾ ಕವಿತಾ ಫೆಸ್ತ್ ಸಂದರ್ಭಾರ್ ಫೈನಲಾಂತ್ ಭಾಗ್ ಘೆಂವ್ಕ್ ತಶೆಂ ಇನಾಮಾಂ ಜೊಡುಂಕ್ ಆವ್ಕಾಸ್ ಆಸಾ.