ಬೊಳಿಯೆಂತ್ಲೆಂ ಕವಿತಾ ಫೆಸ್ತ್ 2012 ಯೆದೊಳ್ ಘಡನಾತಲ್ಲೆಂ ಸಾಹಿತಿಕ್ ಸಂಸಾರಾಂತ್ಲೆಂ ಆಜ್ಯಾಪ್.

ಕವಿತೆಚೆ ನಶೆಂತ್ ಬುಡೊಂಕ್ ಆಶೆತೆಲ್ಯಾಂಕ್ ‘ಕವಿತಾ ಫೆಸ್ತ್ - 2012' ಚ್ಯಾಕಯ್ ವೆಗ್ಳೊ ಆವ್ಕಾಸ್ ಮೆಳೊಂಕ್ ಸಾಧ್ಯಚ್ ನಾ ಮ್ಹಳ್ಳೆಪರಿಂ ಕವಿತಾ ಟ್ರಸ್ಟಾನ್ ಜನೆರ್ 8 ತಾರಿಕೆರ್ ಆಸಾ ಕೆಲ್ಲೆಂ ಹ್ಯಾ ವರ್ಸಾಚೆಂ ಕವಿತಾ ಫೆಸ್ತ್ ರಂಗ್ಲೆಂ. ಪ್ರಕೃತಿಚ್ಯಾ ಉಸ್ಕ್ಯಾರ್ ಘಾಲ್ಲ್ಯಾ ಮೊನ್ನು ಮಾಸ್ಟರಾಂಗೆಲ್ಯಾ ಘರ್ಚ್ಯಾ ಆಂಗ್ಣಾಂತ್ಲ್ಯಾ ಮಾಟ್ವಾಂತ್ ‘ಕವಿತಾ ಫೆಸ್ತ್’ ನವೆ ಹೊಕ್ಲೆಪರಿಂ ಸಜೊನ್ ರಾವಲ್ಲೆಂ ದೆಖೊಂಕ್ ಗೊಂಯ್, ಕರ್ನಾಟಕ, ಕೇರಳ, ಮಂಬಯ್ ತಶೆಂ ವಿದೇಶಾಂ ಥಾವ್ನ್ ಜಾಯ್ತೆ ಕವಿತಾ ರಸಿಕ್ ಆಯಿಲ್ಲೆ. ಭೊಂವ್ತಣಿಚಿ ಸೊಭಾಯ್, ಹಾಜರ್ ಆಸಲ್ಲ್ಯಾಂಚೊ ಉತ್ಸಾಹ್, ಸಂಘಟಕಾಂಚಿ ಹುಮೆದ್ ಆನಿ ಅಸಲ್ಯಾ ವಾತಾವರಣಾಂತ್ ಕೊಂಕಣಿಚ್ಯಾ ಕವಿಂನಿ ವಾರ‍್ಯಾರ್ ಉಪ್ಯೆಂವ್ಕ್ ಸೊಡಲ್ಲಿಂ ಅಪುಟ್, ಅಪ್ರೂಪ್, ರಂಗೀನ್ ಉತ್ರಾಂ ಆನಿ ಹಿಂ ಉತ್ರಾಂ ಕಾನಾಂಚ್ಯಾ ಪಾಳ್ವೆಲಾಗಿಂ ಮೊಡಸ್ತಾನಾಂ ಘಾಲ್ತಾನಾ ಜಾಂವ್ಚಿ ಖುಶಿ - ಹೆಂ ಸಗ್ಳೆಂ ಹ್ಯಾ ಫೆಸ್ತಾ ವರ್ವಿಂ ದಾಧೊಸ್ಕಾಯೆಚಿಂ ಕಾರಣಾಂ ಜಾಂವ್ಕ್ ಪಾವ್ಲಿಂ.

ಹೆಂ ಫೆಸ್ತ್ ಕವಿತಾ ಟ್ರಸ್ಟಾನ್, ಬೆಳ್ಳೆವಿಶನ್ ಆನಿ ಸಾಹಿತ್ಯ ಅಕಾಡೆಮಿಚ್ಯಾ ಸಹಕಾರಾನ್ ಘಡೊವ್ನ್ ಹಾಡಲ್ಲೆಂ ಸಕಾಳಿಂ ಸುರ್ವಾತೆರ್ ಕಟ್ಟಿಂಗೇರಿ ನಾಲ್ಕುಬೀದಿಥಾವ್ನ್ ಮೊನ್ನು ಮಾಸ್ಟರಾಂಗೆಲ್ಯಾ ಆಂಗ್ಣಾ ಪರ‍್ಯಾಂತ್ ಕವಿತಾ ಭಕ್ತಾಂನಿ ಪುರ‍್ಶಾಂವ್ ಕಾಡ್ಲೊ. ಗರ್ನಾಳಿಂಚೊ ನಾದ್ ತಶೆಂ ಪಾರಂಪಾರಿಕ್ ನಾಚಾನ್ ಹ್ಯಾ ಪುರ‍್ಶಾಂವಾಕ್ ವೆಗ್ಳೊಚ್ ರಂಗ್ ದಿಲೊ. ಆಂಗ್ಣಾಕ್ ರಿಗ್ತಾನಾ ಗುರ್ಕಾರ್ ತಶೆಂ ಗುರ್ಕಾರ‍್ನಿನ್ ಭಿತರ ಯೆತಲ್ಯಾಂಕ್ ಪಾನ್-ಫೊಡ್ ಉದ್ಕಾಚೊ ಯೆವ್ಕಾರ್ ದಿಲೊ ಮಾತ್ರ್ ನ್ಹಯ್, ಗೊಡ್-ಉದಕಯ್ ದಿಲೆಂ. ಗೊಡ್ವಿನ್ ಡಿಸೋಜಾ ಆನಿ ಸಾಂಗಾತ್ಯಾಂನಿ ಕವಿತಾ ಟ್ರಸ್ಟಾಚೆಂ ಆಶಯ್ ಗೀತ್ ಗಾಯ್ತಚ್ ಪೆರ್ನಾಂಕಿಲಾಚ್ಯಾ ಅರೆ-ಮರಾಠಿ ಪಂಗ್ಡಾಥಾವ್ನ್ ತೊಣಿಯಾಂಚೊ ನಾಚ್ ಆನಿ ಗಾಣಿಂ ಆಸಲ್ಲಿಂ. ಅಲೆವೂರ‍್ಚ್ಯಾ ಸ್ತ್ರೀಯಾಂಚ್ಯಾ ಪಂಗ್ಡಾನ್ ಚೆಂಡೆ ಖೆಳೊನ್ ಸೈರ‍್ಯಾಂಕ್ ಮರ್ಯಾದ್ ದಿಲಿ ಆನಿ ದೋನಯ್ ಪಂಗ್ಡಾಂಚ್ಯಾ ಗುರ್ಕಾರಾಂಕ್ ತಶೆಂ ಮುಕೆಲ್ಯಾಂಕ್ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ತಾಂದೂಲ್ ತಶೆಂ ನಾರ‍್ಲ್ ದೀವ್ನ್ ಮಾನ್ ಕೆಲೊ.

ಕಾರ್ಯದರ್ಶಿ ಕಿಶೂ ಬಾರ್ಕೂರಾನ್ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ ಮಾತ್ರ್ ನ್ಹಯ್ ಮುಕೆಲ್ ಸೈರ‍್ಯಾಚಿ ವೊಳಕ್ ಕರ್ನ್ ದಿಲಿ. ತ್ಯಾ ಉಪ್ರಾಂತ್ ಕಾರ್ಯಾಚೊ ಉಗ್ತಾವ್ಪಿ ನಾಮ್ಣೆಚೊ ಕವಿ ರಮೇಶ್ ಭಗವಂತ್ ವೆಳುಸ್ಕಾರಾ ಸಾಂಗಾತಾ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್, ಕಾರ್ಯದರ್ಶಿ ಕಿಶೂ ಬಾರ್ಕೂರ್ ಆನಿ ಬೆಳ್ಳೆವಿಶನ್ ವಾಂಗ್ಡಿ ರೊನಾಲ್ಡ್ ಸ್ಯಾಬಿ ಡಿ’ಸೋಜಾ ಹಾಂಣಿ ವಾರ‍್ಯಾರ್ ಗುಲೊಬಾಂಚ್ಯೊ ಪಾಕ್ಳ್ಯೊ ಉಬೊವ್ನ್ ಕಾರ್ಯಾಚೆಂ ಉಗ್ತಾವಣ್ ಕೆಲೆಂ. ಹ್ಯಾ ಎಕಾ ಉಗ್ತಾವಣೆಚ್ಯಾ ಕಾರ್ಯಾಂತ್ ಬಸ್ತಿ ವಾಮನ್ ಶೆಣೈ, ವೊಲ್ಟರ್ ನಂದಳಿಕೆ, ರಮೇಶ್ ಪೈ, ಹೇಮಾಚಾರ್ಯ, ಮ್ಯಾಕ್ಸಿಮ್ ಲೋಬೊ, ವಲ್ಲಿ ವಗ್ಗ, ರೊನ್ಸ್ ಬಂಟ್ವಾಳ್, ಲೀನಾ ರೇಗೊ, ಶ್ರೀಧರ್ ಕಾಮತ್ ಬಾಂಬೊಳ್ಕಾರ್, ಎಚ್ಚೆಮ್ ಪೆರ್ನಾಳ್, ಜೊರ್ಜ್ ಕ್ಯಾಸ್ತೆಲಿನೊ, ರೀನಾ ಕ್ಯಾಸ್ತೆಲಿನೊ, ಡೊ ಎವ್ಜಿನ್ ಡಿಸೋಜಾ, ವಿಲಿಯಮ್ ಪಾಯ್ಸ್, ವಿತೊರಿ ಕಾರ್ಕಳ್, ಎವ್ರೆಲ್ ರೊಡ್ರಿಗಸ್, ಅನಿಲ್ ಆಳ್ವ, ಮೀರಾ ಲೋಬೊ, ಪೀಟರ್ ಪಾವ್ಲ್ ಲೋಬೊ, ರಾಫಾಯೆಲ್ ಆರಾನ್ಹಾ, ಎಲಿಯಾಸ್ ಡಿಸೋಜಾ, ಎಂಡ್ರ್ಯೂ ಎಲ್ ಡಿಕುನ್ಹಾ, ಓಸ್ವಲ್ಡ್ ಎಮ್ ಡಿಸೋಜಾ ಹಾಜರ್ ಆಸೊನ್ ತಾಂಣಿ ಉದ್ಕಾಚೆ ಕಡಾಯೆಂತ್ ಗುಲೊಬಾಂಚ್ಯೊ ಪಾಕ್ಳೊ ಧಲೊಂವ್ಕ್ ಸೊಡ್ಲ್ಯೊ.

ಉಗ್ತಾವಣೆಚ್ಯಾ ಉಲೊವ್ಪಾಂತ್ ‘ಅಸಲೊ ಏಕ್ ಕವಿತೋತ್ಸವ್ ಆಪ್ಣೆಂ ಆಪ್ಲ್ಯಾ ಜಿವಿತಾಂತ್ ಯೆದೊಳ್ ಪಾಸುನ್ ಪಳೆಲ್ಲೊ ನಾ’ ಅಶೆಂ ರಮೇಶ್ ವೆಳುಸ್ಕಾರ್ ಮ್ಹಣಾಲೊ. ಕವಿತೆಚೆ ಚರಿತ್ರೆವಿಶಿಂ ಉಲೊವ್ನ್ ಆದಿಮಾನವ್ ಕಾಳಾ ಪಾಸುನ್ ಗೆಲ್ಲ್ಯಾ ತಾಂಣಿ, ‘ಕವಿತಾ ಮನೀಸ್ ಉಲೊಂವ್ಕ್ ಶಿಕ್ಚೆ ಆದಿಂಚ್ ಆನಿ ರಾನಾಂತ್ ಆಸ್ತಾನಾಂಚ್ ಜಲ್ಮಲ್ಯಾ, ಓಂಕಾರ್ ಜೊ ಆಸಾ, ತೊ ಬೋವ್‍ಶ್ಯಾ ಮನ್ಶಾಂಚಿ ಪಯ್ಲಿ ಕವಿತಾ ಯಾ ನಾಚ್ ಆಸುಂಯೆತಾ ಅಶೆಂ ತಾಂಣಿ ಸಾಂಗ್ಲೆಂ. ಕೊಂಕಣಿ ಕವಿತಾ ಆವಯ್ಚ್ಯಾ ‘ಕುರು ಕುರು ಕಾನಾಂ, ಮ್ಹಶಿ ಗೆಲ್ಯೊ ರಾನಾ’ ಅಸಲ್ಯಾ ಗಾಣಾಂ ಮಾರಿಫಾತ್ ಸುರು ಜಾಲ್ಯೊ ಆಸುಂಯೆತಾತ್. ಜಾನಪದ್ ವಾಪರಲ್ಲ್ಯಾನ್ ಕೊಂಕಣಿ ಕವಿತೆಚೆಂ ಪಂಚಾಂಗ್ ಬಳ್ವಂತ್ ಜಾಲಾಂ. ಆಯ್ಚ್ಯಾ ತರ್ನ್ಯಾ ಕವಿಂಕ್ ಅಸಲಿ ಏಕ್ ಪರಂಪರಾ ಮುಕಾರ್ ವ್ಹರ‍್ಚಿ ಜವಾಬ್ದಾರಿ ಆಸಾ. ಫುಡಾರ್ ಉಜ್ವಲ್ ಆಸಾ ಆನಿ ಹೊ ಉಜ್ವಾಡ್ ಸಮಾಜೆಕ್ ತಶೆಂ ಲೊಕಾಕ್ ಜಾಗೊಂವ್ಕ್ ಕವಿಂನಿ ಉಪೇಗ್ ಕರಿಜಾಯ್’ ಅಶೆಂ ರಮೇಶ್ ವೆಳುಸ್ಕಾರಾನ್ ಉಲೊ ದಿಲೊ.

ಕವಿತಾ ಆನಿ ಚಿತ್ರಕಲಾ: ಅಭಿವ್ಯಕ್ತೆಚಿಂ ದೋನ್ ರುಪಾಂ

ಕವಿತಾ ಆನಿ ಚಿತ್ರಕಲಾ - ಅಭಿವ್ಯಕ್ತೆಚಿಂ ದೋನ್ ರುಪಾಂ ವಿಷಯಾಚೆರ್ ಚಲಲ್ಲ್ಯಾ ಪರಿಸಂವಾದಾಚೆಂ ಸುಂಕಾಣ್ ಸ್ವತಾ ಚಿತ್ರಕಲಾಕಾರ್ ತಶೆಂ ನಾಟಕ್ ದಿಗ್ದರ್ಶಕ್ ಜಾವ್ನಾಸ್ಚ್ಯಾ ಶ್ರೀಧರ್ ಕಾಮತ್ ಬಾಂಬೊಳ್ಕಾರ್ ಹಾಂಣಿ ಘೆತಲ್ಲೆಂ. ರಾಖಿ ಆಮೋನ್ಕಾರ್ ತಶೆಂ ವಿಲಿಯಮ್ ಪಾಯ್ಸಾನ್ ಆಪಾಪ್ಲಿಂ ಪೇಪರಾಂ ಹ್ಯಾವೆಳಾರ್ ಮಾಂಡ್ಲಿಂ. ಕವಿತೆಂತ್ ಯಾ ಚಿತ್ರಕಲೆಂತ್ ಪ್ರಮುಕ್ ಥರಾನ್ ಲಯ್ ಮ್ಹಳ್ಳೊ ಆಸಾ. ದೊನಾಂಯ್ತಿ ಮೆಳ್ಚೆಂ ಸುಖ್ ಆನಿ ಖುಶಿ ವರ್ಣುಂಕ್ ಜಾಯ್ನಾ. ಕಲಾ ತಿ ಕಸಲೀಯ್ ಜಾಂವ್ದಿ, ಜಿವಿತಾಚ್ಯಾ ಅನ್ಭೋಗಾ ಸಾಂಗಾತಾ ತಿ ಮಿಸ್ಳೊನ್ ಆಸ್ತಾ - ಅಶೆಂ ತಾಂಣಿ ಸಾಂಗ್ಲೆಂ ಮಾತ್ರ್ ನ್ಹಯ್, ವಾಕ್ ಸ್ವಾತಂತ್ರ್ಯ್ ಜೆಂ ಆಮ್ಕಾಂ ಆಸಾ, ತೆಂ ಆಮಿ ಹೆರಾಂಚಿಂ ಧಾರ್ಮಿಕ್ ಸಿಂತಿಮೆಂತಾಂ ದುಕೊಂವ್ಚೆಂ ಖಾತೀರ್ ವಾಪರುಂಕ್ ನಜೊ ಮ್ಹಣೊನಯ್ ಉಲೊ ದಿಲೊ.

ತ್ಯಾ ನಂತರ್, ರೋಹನ್ ಆನಿ ಲವೀಟಾ ಮೊಂತೇರೊ, ಅಖಿಲ್ ಭಾರತ್ ಕೊಂಕಣಿ ಕವಿತಾ ವಾಚನ್ ಸ್ಪರ್ಧೊ ಚಲ್ಲೊ. ಪ್ರಾಥಮಿಕ್ ಹಂತಾಂ ಜಿಂ ಗೊಂಯ್ ಆನಿ ಮಂಗ್ಳುರಾಂತ್ ಚಲಲ್ಲಿಂ, ತಾಂತ್ಲ್ಯಾನ್ ವೀಸ್ ಜಣಾಂಕ್ ಫೈನಲ್ಸಾಕ್ ವಿಂಚಲ್ಲೆಂ. ತ್ಯಾ ಪಯ್ಕಿ ಆಟ್ರಾ ಜಣಾಂನಿ ಭಾಗ್ ಘೆತ್ಲೊ. ಹೆ ಸರ್ತೆಕ್ ಫ್ಲೋರಿನ್ ರೊಚ್, ರಾಜಯ್ ಪವಾರ್, ಎಚ್ಚೆಮ್ ಪೆರ್ನಾಲ್, ಎವ್ರೆಲ್ ರೊಡ್ರಿಗಸ್ ಆನಿ ಎಂಡ್ರ್ಯೂ ಎಲ್ ಡಿಕುನ್ಹಾ ವೊರಯ್ಣಾರ್ ಜಾವ್ನ್ ಬಸಲ್ಲೆ. ಇತ್ಲ್ಯಾ ವರ್ಸಾಂನಿ ಯುವಕವಿಗೋಷ್ಟಿ ಚಲ್ತಾಲಿ, ಪುಣ್ ಕೊಂಕಣಿ ಕವಿತಾ ಚಡಿತ್ ಲೊಕಾಮೊಗಾಳ್ ಕರ‍್ಚ್ಯಾ ಉದ್ದೇಶಾನ್ ಹ್ಯಾ ವರ್ಸಾ ಥಾವ್ನ್ ಹಿ ಏಕ್ ಸರ್ತ್ ಆಸಾ ಕೆಲ್ಲ್ಯಾ ವಿಶಿಂ ಮೆಲ್ವಿನ್ ರೊಡ್ರಿಗಸಾನ್ ಸಾಂಗ್ಲೆಂ. ಪಯ್ಲೆಂ ಇನಾಮ್ ಜಾವ್ನ್ ರುಪಯ್ 2500, ಯಾದಸ್ತಿಕಾ ತಶೆಂ ಸರ್ಟಿಫಿಕೆಟ್ ಗೊಂಯ್ಚಾ ಸಿದ್ದಿ ಟಿ ಶೇತ್ ರಾಯ್ಕರ್ ಹಿಕಾ ಫಾವೊ ಜಾಲೆಂ ತರ್, ದುಸ್ರೆಂ ಇನಾಮ್ ಗೊಂಯ್ಚ್ಯಾ ರಿಚಾ ಕಲಂಗೂಟ್ಕಾರ್ ಹಿಣೆಂ ಆಪ್ಣಾಯ್ಲೆಂ. ತಿಕಾ ರುಪಯ್ 2000 ಆನಿ ಯಾದಸ್ತಿಕಾ, ಸರ್ಟಿಫಿಕೆಟ್ ಲಾಭ್ಲಿ ತರ್ ತಿಸ್ರೆಂ ಇನಾಮ್ ಜೆನಿಫರ್ ಕ್ಯಾರಲ್ ಮಿನೇಜಸ್ ಹಿಕಾ ಲಾಭ್ಲೆಂ. ತಿಕಾ ರುಪಯ್ ಏಕ್ ಹಜಾರ್, ಯಾದಸ್ತಿಕಾ ಆನಿ ಸರ್ಟಿಫಿಕೆಟ್ ಲಾಬ್ಲಿ.  

ಬಹುಭಾಷಾ ಕವಿಗೋಷ್ಟಿ

ದೊನ್ಪಾರಾಂ ರಾಂದ್ವಯೆಚ್ಯಾ ಜೆವ್ಣಾಉಪ್ರಾಂತ್ ಬಹುಭಾಷಾ ಕವಿಗೋಷ್ಟಿ ಚಲ್ಲಿ. ಹೆ ಕವಿಗೋಷ್ಟಿಚೆಂ ಅಧ್ಯಕ್ಷಪಣ್ ಕವಿ, ನಾಟಕಕಾರ್ ತಶೆಂ ಲೇಖಕ್ ರಾಜಯ್ ಪವಾರ್ ಹಾಂಣಿ ಘೆತಲ್ಲೆಂ. ಬೋವ್ ಸುಂದರ್ ಆನಿ ಸುರಸ್ ರಿತಿನ್ ಚಲೊನ್ ಗೆಲ್ಲೆ ಕವಿಗೋಷ್ಟಿಂತ್ ಸನ್ನು ಮೊನಿಸ್, ಮಿಲನ್ ವೈಂಗನ್ಕಾರ್, ಶೋಭಾ ಫುಲ್ಕಾರ್, ಪಿ ಜೆ ಕರುಗಳ್ನಡೆ, ಭೊಟಾಮ್ ಬೊಳಿಯೆ, ಡೊ ಎವ್ಜಿನ್ ಡಿಸೋಜಾ, ಮುದ್ದು ಮೂಡುಬೆಳ್ಳೆ, ಬಿ ಎ ಮೊಹಮ್ಮದ್ ಆಲಿ, ಕವಿತಾ ಡಿ ಫೊಂಡೆಕಾರ್ ಆನಿ ಗುರು ಬಾಳಿಗಾ ಹಾಂಣಿ ಭಾಗ್ ಘೆತಲ್ಲೊ.

ಸಾಂಜೆಚ್ಯಾ ಸಮಾರೋಪ್ ಕಾರ್ಯಾಕ್ ಗೊಂಯ್ ವಿಶ್ವವಿದ್ಯಾನಿಲಯಾಂತ್ ಇಂಗ್ಲಿಷ್ ವಿಭಾಗಾಚಿ ಎಸೋಶಿಯೇಟ್ ಪ್ರೊಫೆಸರ್ ಡೊ ಕಿರಣ್ ಬುಡ್ಕುಲೆ ಆಯಿಲ್ಲಿ. ತಿಕಾ ಆನಿ ಮಾನಾಚಿಂ ಸೈರಿಂ ಜಾವ್ನಾಸಲ್ಲ್ಯಾ ರೋಹನ್ ಆನಿ ಲವೀಟಾ ಮೊಂತೇರೊ, ತಶೆಂ ರೆಜಿನಾ ಆನಿ ಬರ್ನಾರ್ಡ್ ಡಿಸೋಜಾ - ಹಾಂಕಾಂ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್ ಆನಿ ಕಾರ್ಯದರ್ಶಿ ಕಿಶೂ ಬಾರ್ಕೂರ್ ಹಾಂಣಿ ವೇದಿಕ್ ಹಾಡ್ಲೆಂ. ಮೆಲ್ವಿನ್ ರೊಡ್ರಿಗಸಾನ್ ಆಪ್ಲ್ಯಾ ಪ್ರಾಸ್ತಾವಿಕ್ ಉಲೊವ್ಪಾಂತ್ ಸೈರ‍್ಯಾಂಚಿ ವೊಳಕ್ ಕರ್ನ್ ದಿಲಿ ಮಾತ್ರ್ ನ್ಹಯ್, ಖಂಯ್ಚ್ಯಾಯ್ ಪ್ರಶಸ್ತೆಂ ಪ್ರಾಸ್, ಅಸಲ್ಯಾ ಕವಿತಾ ಫೆಸ್ತಾಂನಿ ಆಪ್ಣಾಕ್ ವ್ಹರ್ತಿ ಖುಶಿ ಲಾಭ್ತಾ ಮ್ಹಣೊನ್ ಆಯ್ಲೆವಾರ್ ಸಾಹಿತ್ಯ ಅಕಾಡೆಮಿಚಿ ಪ್ರಶಸ್ತಿ ಲಾಭಲ್ಲ್ಯಾಚೊ ಉಲ್ಲೇಕ್ ಕರುನ್ ತೊ ಮ್ಹಣಾಲೊ. ಆಯ್ಚೊ ಕಾಳ್ ಮನಾಂ ಆನಿ ಕಾಳ್ಜಾಂ ಚಡಿತ್ ಮಾಪಾನ್ ಶಿಂದುನ್ ವೆಚೊ ಕಾಳ್. ಅಸಲ್ಯಾ ಕಾಳಾಂತ್ ಕವಿತಾ ಫೆಸ್ತ್ ಉತ್ಸವ್ ಶಿಂದಲ್ಲಿಂ ಮನಾಂ ಆನಿ ಕಾಳ್ಜಾಂ ಶಿಂವ್ಚೆಂ ಪ್ರೇತನ್ ಕರುನ್ ಆಸಾ ಮ್ಹಣೊನ್ ತಾಂಣಿ ಸಾಂಗ್ಲೆಂ. ಸುರ್ವೆಚ್ಯಾ ಕವಿತಾ ಫೆಸ್ತಾಂ ವೆಳಾರ್ ಕಾವ್ಯರಸಿಕಾಂ ಥಾವ್ನ್ ಶೆಳೊ ಪ್ರತಿಸಾದ್ ಲಾಭಲ್ಲೊ ವ್ಹಯ್ ತರೀ, ಆಯ್ಲೆವಾರ್ ಕವಿತಾ ಫೆಸ್ತ್ ನವೆ ಹೊಕ್ಲಪರಿಂ ಸಜೊನ್ ವೆವೆಗ್ಳ್ಯಾ ಮಾಟ್ವಾಂನಿ ರಂಗ್ತಾ ಅಶೆಂ ಮ್ಹಳೆಂ.

ಮುಕೆಲ್ ಸೈರಿಣ್ ಜಾವ್ನ್ ಆಯಿಲ್ಲ್ಯಾ ಕಿರಣ್ ಬುಡ್ಕುಲೆನ್ ಕೊಟ್ಟಾಯಮಾಚೊ ಕೊಂಕಣಿ ಕವಿ ಶಿವಾನಂದ ಶೆಣೈಕ್ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ದೀವ್ನ್ ಮಾನ್ ಕೆಲೊ. ಮೆಲ್ವಿನ್ ರೊಡ್ರಿಗಸಾನ್ ಮಥಾಯಸ್ ಕುಟ್ಮಾವಿಶಿಂ ತಶೆಂ ಹ್ಯಾ ಪುರಸ್ಕಾರಾವಿಶಿಂ ಮ್ಹಾಯೆತ್ ದಿಲಿ. ಎವ್ರೆಲ್ ರೊಡ್ರಿಗಸಾನ್ ಮಾನ್ ಪತ್ರ್ ವಾಚ್ಲೆಂ. ಶಿವಾನಂದ ಶೆಣೈಕ್ ರುಪಯ್ 10,000 ನಗ್ದೆನ್ ತಶೆಂ ಯಾದಸ್ತಿಕಾ ಹ್ಯಾ ಸಂದರ್ಭಾರ್ ಸೈರ‍್ಯಾಂನಿ ದಿಲಿ. ಹ್ಯಾ ವಗ್ತಾ ಉಲಯಿಲ್ಲ್ಯಾ ಶಿವಾನಂದ ಶೆಣೈನ್ ಆಪುನ್ ಸಾಂಡುನ್ ಗೆಲ್ಲೊ ಕೊಂಕಣಿಚೊ ಪೂತ್. ಕವಿತಾ ಟ್ರಸ್ಟಾನ್ ಮ್ಹಜೊ ವಾವ್ರ್ ಮಾಂದುನ್ ಘೆತ್ಲಾ ಮ್ಹಳೆಂ. ಪಯ್ಯನ್ನೂರ್ ರಮೇಶ್ ಪೈ ಆಪ್ಲಾಕ್ ಕೊಂಕಣಿಂತ್ ಬರೊಂವ್ಕ್ ಹುಮೆದ್ ಭರಿನಾತಲ್ಲೊ ತರ್ ಆಪುಣ್ ಹೆ ಗತಿಕ್ ಪಾವ್ತೊನಾ. ತ್ಯಾದೆಕುನ್ ಆಪ್ಣಾಚೊ ಅರ್ಧೊ ಮಾನಾ ತಾಕಾ ಫಾವೊ ಜಾಲ್ಲೊ, ಅಶೆಂ ತಾಂಣಿ ಮ್ಹಳೆಂ.

ರೆಜಿನಾ ಡಿಸೋಜಾ ತಶೆಂ ಬರ್ನಾರ್ಡ್ ಡಿಸೋಜಾನ್ ಚಾರ್ಲ್ಸ್ ಆನಿ ತೆರೆಜಾ ರೊಡ್ರಿಗಸ್ ಸ್ಮಾರಕ್ ಅಖಿಲ್ ಭಾರತ್ ಕೊಂಕಣಿ ಕವಿತಾ ಬರೊಂವ್ಚ್ಯಾ ಸ್ಪರ್ಧ್ಯಾಂತ್ ಜಿಕ್ಲಲ್ಯಾಂಕ್ ಇನಾಮಾಂ ವಾಂಟ್ಲಿಂ. ದುಸ್ರೆಂ ಇನಾಮ್ ಜಿಕ್ಪಿ ಗೊಂಯ್ಚೊ ಡೇನಿಯಲ್ ಪೆರ್ನಾಂಡಿಸ್ ತಶೆಂ ತಿಸ್ರೆಂ ಇನಾಮ್ ಜಿಕ್ಪಿ ಬಜ್ಪೆಚೆಂ ಶಿಫಾನಿ ಡಿಸೋಜಾ ಹ್ಯಾ ವೆಳಾರ್ ಹಾಜರ್ ಆಸಲ್ಲಿಂ. ತಾಂಕಾಂ ರುಪಯ್ 1000 ತಶೆಂ ರುಪಯ್ 750 ನಗ್ದೆನ್, ಯಾದಸ್ತಿಕಾ ತಶೆಂ ಸರ್ಟಿಫಿಕೆಟಿ ದಿಲ್ಯೊ. ಪಯ್ಲೆಂ ಇನಾಮ್ ಜೊಡ್ಪಿ ಅನಿಶಾ ನಾಯ್ಕ್ ಗಾಂವ್ಕಾರ್ ಹ್ಯಾವೆಳಾರ್ ಹಾಜರ್ ನಾತಲ್ಲೆಂ.

ಹ್ಯಾ ಸಂದರ್ಭಾರ್ ಮುಂಬಯ್ಚಿ ಕವಯಿತ್ರಿ ಅರುಣಾ ರಾವ್ ಕುಂದಾಜೆ ಹಿಚ್ಯಾ ‘ಸಾಕ್ಷಾತ್ಕಾರ್’ ಆನಿ ಸನ್ನು ಮೊನಿಸ್ ಹಾಚ್ಯಾ ‘ಆಬೊಲಿಂ’ ಪುಸ್ತಕಾಂಚಿ ಮೊಕ್ಳಿಕ್ ಜಾಲಿ. ಕಿರಣ್ ಬುಡ್ಕುಲೆನ್ ಹಿಂ ಪುಸ್ತಕಾಂ ಲೋಕಾರ್ಪಣ್ ಕರ‍್ಚೆ ಪಯ್ಲೆಂ ಎಂಟನಿ ಬಾರ್ಕೂರಾನ್ ಕವಿಂವಿಶಿಂ ಮ್ಹಾಯೆತ್ ದಿಲಿ. ಸನ್ನು ಮೊನಿಸ್ ಆನಿ ತಾಚೆಂ ಕುಟಮ್ ಹ್ಯಾ ಸಂದರ್ಭಾರ್ ವೇದಿರ್ ಹಾಜರ್ ಆಸಲ್ಲೆಂ.

ಕವಿತೆವಿಶಿಂ ಉಲಯಿಲ್ಲ್ಯಾ ಕಿರಣ್ ಬುಡ್ಕುಲೆನ್ ‘ಮಂತ್ರ್’ ತಶೆಂ ‘ತಂತ್ರ್’ಚೆ ಗೂಣ್ ನವ್ಯಾ ಕವಿಂನಿ ಆಪ್ಣಾಯ್ಜಾಯ್ ಅಶೆಂ ಉಲೊ ದಿಲೊ. ಠರಾವಣ್, ರೂಪಕಾಂ, ಸಂಗೀತ್, ಅರ್ಥ್ ತಶೆಂ ಮೀಟರಾಂನಿ ಮಿಸ್ಳಲ್ಲೆ ಗೂಣ್ ಆಸ್ಲ್ಯಾರ್ ಏಕ್ ಕವಿತಾ ಉತ್ತೀಮ್ ಜಾಂವ್ಕ್ ಸಕ್ತಾ ಅಶೆಂ ತಿಣೆಂ ಅಭಿಪ್ರಾಯ್ ಉಚಾರ್ಲಿ. ಕವಿ, ಫಕತ್ ಬರೊವ್ಪಿ ನ್ಹಯ್, ತೊ ಆಪ್ಲ್ಯಾ ಉತ್ರಾಂನಿ ಆಪ್ಲೆಂ ಬರಪ್ ಸುಂರ್ಗಾರಾಯ್ತಾ ಅಶೇಂಯ್ ತಿಣೆಂ ಸಾಂಗ್ಲೆಂ.

ಹ್ಯಾಚ್ ಸಂದರ್ಭಾರ್ ಸಹಸಂಘಟಕ್ ಜಾವ್ನಾಸಲ್ಲ್ಯಾ ಬೆಳ್ಳೆವಿಶನ್ ಹಾಂಣೀ ಆಯ್ಲೆವಾರ್ ಸಾಹಿತ್ಯ ಅಕಾಡೆಮಿ ಥಾವ್ನ್ ಬಹುಮಾನ್ ಜೊಡಲ್ಲ್ಯಾ ಮೆಲ್ವಿನ್ ರೊಡ್ರಿಗಸಾಕ್ ಮಾನ್ ಕೆಲೊ. ಕಿಶೂ ಬಾರ್ಕೂರಾನ್ ಮಾನ್ ಪತ್ರ್ ವಾಚ್ಲೆಂ. ಉಪ್ರಾಂತ್ ತಾಕಾ ಸೊಲ್ ಪಾಂಗ್ರುನ್ ಮಾನ್ ಕೆಲೊ.

ಬೆಳ್ಳೆ ವಿಶನ್ ತರ್ಫೆನ್ ಗೊಡ್ವಿನ್ ಡಿಸೋಜಾ ಉಲಯ್ಲೊ ಆನಿ ಅಸಲೊ ಏಕ್ ಅಪ್ರೂಪ್ ಆವ್ಕಾಸ್ ದಿಲ್ಲ್ಯಾ ಕವಿತಾ ಟ್ರಸ್ಟಾಚೊ ತಾಣೆ ಉಪ್ಕಾರ್ ಮಾಂದ್ಲೊ. ಬೆಳ್ಳೆವಿಶನಾಚ್ಯಾ ಯೆವ್ಕಾರ್ ಸಮಿತಿ ಸಾಂದೆ ಜಾವ್ನಾಸಲ್ಲ್ಯಾ ಮೀರಾ ಲೋಬೊ ತಶೆಂ ಜೋಸೆಪ್ ಮಾರ್ಟಿಸಾಕ್ ಹ್ಯಾ ಸಂದರ್ಭಾರ್ ಮೆಲ್ವಿನ್ ರೊಡ್ರಿಗಸಾನ್ ಫುಲಾಂ ದೀವ್ನ್ ಉಪ್ಕಾರ್ ಆಟಯ್ಲೆ. ಕಾರ್ಯಾಚೆ ಸುರ‍್ವೆರ್ ಗೊಡ್ವಿನ್ ಡಿಸೋಜಾ ಆನಿ ಪಂಗ್ಡಾನ್ ಕವಿತಾ ಟ್ರಸ್ಟಾಚೆಂ ಆಶಯ್ ಗೀತ್ ಗಾಯಿಲ್ಲೆಂ ತರ್ ನಿಮಾಣೆಂ ವಿತೊರಿ ಕಾರ್ಕಳಾನ್ ಧನ್ಯವಾದ್ ಭೆಟಯ್ಲೆ.

ಸಗ್ಳೆಂ ಕಾರ್ಯೆಂ ಬೋವ್ ಆಪುರ್ಬಾಯೆನ್ ವೆಳಾಚ್ಯಾ ವೊಳ್ಯಾಭಿತರ್ ಆಖ್ಖ್ಯಾ ದಿಸಾ ಚಲೊವ್ನ್ ವೆಲ್ಲಿ ಕೀರ್ತ್ ಎರಿಕ್ ಸೋನ್ಸ್ ಬಾರ್ಕೂರ್ ಹಾಕಾ ವೆತಾ.

ಸಾಂಜೆಚ್ಯಾ ಚಾಯೆ ನಂತರ್ ಕಾಳೊಕ್ ಮಾಂಡ್ತಾ ಮ್ಹಣ್ತಾನಾ ಅಸ್ಸಾಮ್ ರಾಜ್ಯಾ ಥಾವ್ನ್ ಆಯಿಲ್ಲ್ಯಾ ರಣಜಿತ್ ಗೊಗೊಯ್ ಆನಿ ಪಂಗ್ಡಾನ್ ಆಪ್ಲ್ಯಾ ಬಿಹು ಗಾಣಿಂ ತಶೆಂ ನಾಚಾನ್ ಜಮಲ್ಲ್ಯಾ ಲೊಕಾಕ್ ಮಂತ್ರ್ ಮುಗ್ದ್ ಕರ್ನ್ ಸೊಡ್ಲೆಂ. ಕೊಣಾಯ್ಕಿ ಹ್ಯಾ ಸಂದರ್ಭಾರ್ ಭಾಸ್ ಏಕ್ ಆಡ್ಕಳ್ ಮ್ಹಣೊನ್ ಭೊಗುಂಕ್ ನಾ. ಹೆಂ ಸಗ್ಳೆಂ ಕಾರ್ಯೆಂ ಸಾಹಿತ್ಯ ಅಕಾಡೆಮಿ, ನವಿ ಡೆಲ್ಲಿ ಹಾಂಣಿ ಪ್ರಾಯೋಜಿತ್ ಕೆಲ್ಲೆಂ.

ಸಂಘಟಕಾಂನಿ ಸಕಾಳಿಂಚೊ ನಾಸ್ಟೊ, ದೊನ್ಪಾರಾಂಚೆಂ ತಶೆಂ ರಾತ್ಚೆಂ ಮಾಸ್ಳೆಚೆಂ ಜೆವಣ್, ಸಾಂಜೆಚಿ ಚಾಯ್ ಮಾತ್ರ್ ನ್ಹಯ್, ಸುರೆಚಿ ವ್ಯವಸ್ಥಾ ಕೆಲ್ಲಿ. ತಿತ್ಲೆಂಚ್ ನ್ಹಯ್ ಕಯ್ಲೊಳ್ಯೊ, ವೆವೆಗ್ಳ್ಯಾ ನಮುನ್ಯಾಂಚ್ಯೊ ಪಾತಳ್ಯೊ, ಇಟು, ಆಪೆ, ತಸಲಿಂ ವೆವೆಗ್ಳಿಂ ಖಾಣಾಂ ಹ್ಯಾ ಸಂದರ್ಭಾರ್ ಖಾಂವ್ಕ್ ದವರಲ್ಲಿಂ. ಪುಸ್ತಕಾಂಚೆಂ ದುಖಾನಯ್ ಆಸಲ್ಲೆಂ.

ಅಸಲೆಂ ಏಕ್ ಫೆಸ್ತ್ ಸಾಹಿತಿಕ್ ಸಂಸಾರಾಂತ್ ಯೆದೊಳ್ ಕೆದಿಂ ಘಡಲ್ಲೆಂ ನಾ ಮ್ಹಣೊನ್ ಜಾಯ್ತ್ಯಾಂಚಿ ಅಭಿಪ್ರಾಯ್.