ಜನೆರ್ 16: ಮಡ್ಗಾವಾಂತ್ ಅಸ್ಮಿತಾಯ್ ದಿಸಾ ಕವಿಗೋಷ್ಟಿ, ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್
ರವೀಂದ್ರ ಭವನ್ ಆನಿ ಶ್ರೀಮತಿ ಪಾರ್ವತಿಬಾಯ್ ಚೌಗುಳೆ ಮಹಾವಿದ್ಯಾಲಯ್ ಹಾಂಣಿ ಸಾಂಗಾತಾ ಮೆಳೊನ್ ಹ್ಯಾಚ್ ಜನೆರ್ 16, 2012 ತಾರಿಕೆರ್ ಕೊಲೆಜಿಚ್ಯಾ ಸಭಾಂಗಣಾಂತ್ ಅಸ್ಮಿತಾಯ್ ದೀಸ್ ಘಡೊವ್ನ್ ಹಾಡಲ್ಲೊ. ಮಂಗ್ಳುರ್ಚೊ, ಸಾಹಿತ್ಯ್ ಅಕಾಡೆಮಿ ಪ್ರಶಸ್ತಿ ವಿಜೇತ್ ಕವಿ ಮೆಲ್ವಿನ್ ರೊಡ್ರಿಗಸ್ ಹೆ ಕವಿಗೋಷ್ಟಿಕ್ ಅಧ್ಯಕ್ಷ್ ಮ್ಹಣೊನ್ ಬಸಲ್ಲೊ.
ಸುರ್ವೆರ್ ರವೀಂದ್ರ ಭವನಾಚೊ ಉಪಾಧ್ಯಕ್ಷ್ ಶ್ರೀಧರ್ ಕಾಮತಾನ್ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ ತರ್, ಕೊಲೆಜಿಚ್ಯಾ ಕೊಂಕಣಿ ವಿಭಾಗಾಚೊ ಮುಕೆಲಿ ಡೊ ಗುಣಾಜಿ ದೇಸಾಯಿ ಹಾಂಣಿ ಸಯ್ರ್ಯಾಂಚಿ ತಶೆಂ ಕವಿಂಚಿ ವೊಳಕ್ ಕರುನ್ ದಿಲಿ.
ದೊನ್ಪಾರಾಂ 3.30 ಥಾವ್ನ್ 4:00 ವೊರಾಂ ಪಾಸುನ್ ತರ್ನೆ ಹಾವೆಸ್ ತರ್ನೆ ಉತ್ಫರ್ಕೆ ನಾಂವಾಖಾಲ್ ಚಲಲ್ಲೆ ಕವಿಗೋಷ್ಟಿಂತ್ ಗೊಂಯ್ಚ್ಯಾ ಕಾಂಯ್ ಯುವಕವಿಂನಿ ಚಲಿ ಭುರ್ಗೆಂ ವಾಂಚಯಾತ್ ಹ್ಯಾ ಸಂಕಲ್ಪನಾಚೆರ್ ಬರಯಿಲ್ಲ್ಯೊ ಕವಿತಾ ಸಾದರ್ ಕೆಲ್ಯೊ.
ಉಪ್ರಾಂತ್ ಫಾಮಾದ್ ಮರಾಠಿ ತಶೆಂ ಕೊಂಕಣೀ ಕವಿಂಚಿ ಖಾಶೆಲಿ ಕಾವ್ಯ ಮೈಫಿಲ್ ಚಲ್ಲಿ. ಮೆಲ್ವಿನ್ ರೊಡ್ರಿಗಸ್ ಹೆ ಗೋಷ್ಟಿಚೊ ಅಧ್ಯಕ್ಷ್ ಆಸಲ್ಲೊ. ಕವಿಗೋಷ್ಟಿಂತ್ ನಿಲ್ಬಾ ಖಾಂಡೇಕಾರ್, ಮಹೇಶ್ ಪಾರ್ಕರ್, ರಾಜಯ್ ಪವಾರ್, ಗ್ವಾದಲೂಪ್ ಡಾಯಸ್, ಪಂಡರಿನಾಥ್ ಲೊಟ್ಲಿಕಾರ್, ರಾಧಾ ಭಾವೆ, ಅಶೋಕ್ ಬೋರ್ಕರ್, ರೇಖಾ ಮಿರಾಜ್ಕಾರ್, ರಮೇಶ್ ವಂಸಕರ್ ಆನಿ ಪಾಂಡುರಂಗ್ ಗಾಂವ್ಕಾರ್ ಹಾಂಣಿ ತಾಂತಾಂಚ್ಯೊ ಮರಾಠಿ ತಶೆಂ ಕೊಂಕಣಿ ಕವಿತಾ ವಾಚ್ಲ್ಯೊ.