ಆಬುಧಾಬಿಂತ್ ಮಿಲಿಯನ್ ದಿರಾಮಾಚೊ ಫೆರ್ಗೊ ಜೊಡುಂಕ್ ಕವಿಂ ಮಧೆಂ ಸ್ಪರ್ಧೊ ಸುರು
 
ಟಿ.ವಿ ಮಾಧ್ಯಮಾಂತ್ ನಾಂವಾಡ್ದಿಕ್ ರಿಯಾಲಿಟಿ ಶೊ `ಮಿಲಿಯನ್ಸ್ ಪೊಯೆಟ್' ಪಾಂಚ್ವೆ ಪಾವ್ಟಿಂ ಅಬುದಾಬಿಂತ್ ಸಾದರ್ ಜಾತೇ ಆಸಾ. ನೊಕ್ ಆವ್ಟ್ ರಿತಿಚ್ಯಾ ಹ್ಯಾ ರಿಯಾಲಿಟಿ ಶೊಚ್ಯಾ ಜಿಕ್ಪ್ಯಾ ಕವಿಕ್ ಪಾಂಚ್ ಮಿಲಿಯನ್ ಧಿರಾಮಾಚೊ ಬಹುಮಾನಾಚೊ ಫೆರ್ಗೊ ಮೆಳ್ತಾ.  ಅರಬ್ ಸಂಸಾರಾಚ್ಯಾ ನಾಂವಾಡ್ದಿಕ್ ವೊರಯ್ಣಾರ್ ಆನಿ ಸಾದರ್ ಕರ್‍ಪ್ಯಾ ಮುಕಾರ್ ಜೀಕ್ ಆಪ್ಣಾಂವ್ಚೊ ಕವಿ ಮುಕ್ಲ್ಯಾ ಎಪ್ರಿಲಾಂತ್ ಮಾಧ್ಯಮಾಚೊ ವ್ಯಕ್ತಿ ಜಾತಲೊ. 
 
ಸ್ಪರ್ಧಿಕ್ `ನಾಬಾಟಿ'  ಕವಿತಾ ಜ್ಯೊ ಸಾಂಪ್ರದಾಯಿಕ್ ಬದ್ದೂನ್ ಕುಳಿಯೆಚೆ ಕವಿ ಸಾದರ್ ಕರ್ತಾತ್. ಹ್ಯೊ ಕವಿತಾ ಸರಾಗ್ ಉಚಾರ್ ಕರ್ಚ್ಯೊ, ಸಾದೆ ರಿತಿಚ್ಯೊ ಜಾವ್ನಾಸಾತ್. ಹ್ಯೊ `ನಾಬಾಟಿ' ಕವಿತಾ, ಆದಿವಾಸಿ ಕುಳಿಯೆಚಿ ಮುಳಾವಿ ಜಾಣ್ವಾಯ್ ನಾಸ್ತಾಂ ಸಮ್ಜೊನ್ ಜಿರೊಂವ್ಕ್ ಕಸ್ಟ್. ಹೊ ಶೋ ಅರ್ಬಿ ಗಾಂವಾಂತ್ `ಅರಬ್ ಐಡಿಯಲ್' ಯಾ `ಸ್ಟಾರ್ ಆಕಾಡಮಿ' ಬರಿಂ ಫಾಮಾದ್ ನಾಂತ್ ತರೀ, ಲ್ಹಾನ್ ಶಿಬಿರಾಂನಿ, ಸಭೆಂನಿ ಫಾಮಾದ್ ಜಾವ್ನಾಸಾತ್. ಗೆಲೆತ್ಯಾ ಮಂಗ್ಳಾರಾ ಅಬುದಾಬಿಚ್ಯಾ `ರಹಾ ಬೀಚ್' ಹೊಟೆಲಾಂತ್ ಜಳ್ಮಿಳ್ಚ್ಯಾ ದಿವ್ಯಾಂನಿ, ಪುಲ್ಚ್ಯಾ ಪುಲಾಂಚ್ಯಾ ರುಪ್ಣ್ಯಾನ್ ಸಜಯಿಲ್ಲೆ ವೆದಿರ್ ಹೊ ಶೋ ಘಡೊನ್ ಆಯ್ಲೊ.  ಸಾಲಾಚ್ಯಾ ಎಕೆ ಕುಶಿನ್ ದಿರ್ದಾಶಾ ನ್ಹೆಸ್ಣಾಚೆಂ ದಾದ್ಲೆ, ಆನ್ಯೆಕೆ ಕುಶಿನ್ ಬಾಯ್ಲಾಂ ಅಬಾಯಾ ನ್ಹೆಸ್ಣಾರ್ ರಸಿಕ್ ಜಾವ್ನ್ ಸೊಬ್ತಾಲಿಂ.
 
ಮಧ್ಯಾ ಪ್ರಾಚ್ಯಾಚ್ಯಾ ಅರಬ್ ಸ್ಪರ್ದಿಕ್ ಕವಿಂಚ್ಯಾ ಕವಿತಾಂನಿ ಮೋಗ್, ಧ್ಯಾನ್ ಆನಿ ಅರ್ಬಿ ಗಾಂವ್ಚ್ಯಾ ಮುಖೆಲ್ಯಾಕ್ ಹೊಗಳ್ಸುಂಚೆ ತಸಲೆ ಠರಾವಣೆಂಚ್ಯೊ ಕವಿತಾ ಸಾದರ್ ಜಾಲ್ಯೊ.
 
ಹೊ ಅರಬ್ ಕವಿ ಸ್ಪರ್ಧೊ ಜಾಯ್ತ್ಯಾ ಗೊಂದೊಳ್ ಆನಿ ದಬಾವಾಚೊ ಜಾವ್ನ್, ಯು.ಎ.ಇ. ಕ್ ಬೋಟ್ ಜೊಕುಂಕ್ ಪಾವ್ಲೊ.  ಹೆ ಗೋಷ್ಟಿಂತ್ ಕವಿಂನಿ ಇಜಿಪ್ಟ್, ಯೆಮನ್, ಲಿಬಿಯಾ, ತುನೇಯ್ಸಿಯಾ ಆನಿ ಸಿರಿಯಾಂತ್ ಜಾಲ್ಲ್ಯಾ ಕ್ರಾಂತಿ ವಯ್ರ್ ಅಪ್ಲೊ ಆವಾಜ್ ಉಟಯ್ಲಾ. 
 
2010 ಇಸ್ವೆಂತ್ ಸೌದಿ ಅರೇಬಿಯಾಚ್ಯಾ ಚಾರ್ ಭುರ್ಗ್ಯಾಂಚಿ ಅವಯ್ ಹಿಸಾ ಹಿಲಾಲ್ ಹಿಕಾ ಇಸ್ಲಾಮಿಕ್ ಕಾನೂನಾ ವಿರೊಧ್ ಠಿಕಾ ಕೆಲ್ಲ್ಯಾಕ್ ಭೆಸ್ಟಾವ್ಣಿ ಮೆಳಲ್ಲಿ. 
 
ಹೆ ರಾತಿಂ ಹರ್ ಕವಿಂನಿ ಆಪ್ಲ್ಯಾ ಕಾವ್ಯಾಳ್ ಕವಿತೆನ್ ಅರಬ್ ಮುಖೆಲ್ಯಾಂಚೆ ಕಾನ್ ಉಗ್ತೆ ಕೆಲೆ.
 
ಅಬ್ದುಲ್ ಆಲ್ ಹಲಾಬಿ ಮ್ಹಳ್ಳ್ಯಾ ಕವಿನ್ ಅಬುದಾಬಿಚೊ ಶೇಕ್ ಮಹಮ್ಮದ್ ಬಿನ್ ಝಾಯೇದಾಚಿ ವಾಖಣಿ ಕೆಲ್ಯಾರ್, ಹೆರ್ ಕವಿಂನಿ ಒಮಾನ್ ಆನಿ ಸೌದಿ ರಾಯ್ ಕುಳ್ವಾರಾಚಿ ವ್ಹಡ್ವಿಕ್ ಗಾಜೈಲಿ.  ಬಾಹ್ರೇನ್‌ಚ್ಯಾ   ಸ್ಪರ್ಧಿಕಾನ್ ಶಿಯಾ ಪಂಗ್ಡಾ ಥಾವ್ನ್ ಬಾಹ್ರೇನಾಂತ್ ಉದೆಲ್ಲ್ಯಾ ಪ್ರತಿಭಟನಾಕ್, ಯು.ಎ.ಇ ಆನಿ ಸೌದಿ ಮುಖೆಲ್ಯಾಂನಿ ಥಂಯ್ಸರ್ ಶಾಂತಿ ಯೇಂವ್ಕ್ ದಿಲ್ಲ್ಯಾ ಸಹಕಾರಾಕ್ ಉಮಾಳ್ಯಾಂನಿ ಅರ್ಗಾಂ ದಿಲಿಂ.
 
ಸೌದಿಚೊ ವಕೀಲ್ ಘಾಜೀ ಹಲ್ ಉತಾಬಿ ಭರ್ವಸೊ, ಸಪ್ಣಾಂ ವಿಶಿಂ ಉಲೈಲ್ಯಾರ್, ಕುವೈಟ್ಚ್ಯಾ ಕವಿಂನಿ ಪ್ರವಾದಿ ಮಹಮ್ಮದಚೆ ಪತಿಣೆಕ್ ಹೊಗಳ್ಸುನ್ ಆನಿ ಡೆನ್ಮಾರ್ಕಾಚ್ಯಾ ವ್ಯಂಗ್ಯ್ ಚಿತ್ರ ಕಲಾಕರಾನ್ ಪ್ರವಾದಿ ಮಹಮ್ಮದಾಕ್ ಅಪ್ಲ್ಯಾ ವ್ಯಂಗ್ ಚಿತ್ರಾಂತ್ ಅಕ್ಮಾನ್ ಕೆಲ್ಲ್ಯಾಚೆಂ ಖಂಡನ್ ಕೆಲೆಂ
 
ಹರ್ ಕವಿ ಅರಬಿಕ್ ಇಸ್ಲಾಮಿಕ್ ಕುಳಿಯೆಚೆ ಜಾಲ್ಲ್ಯಾನ್ ಪಾಶ್ಚಾತೀಕರಣ್ ಆನಿ ಪ್ರಜಾಪ್ರಭುತ್ವಾ ವಿಶಿಂ ಅಪ್ಲಿ ಖಂತ್ ತಾಂಣಿ ಕವಿತಾಂನಿ ಉಚಾರ್ಲಿ.
 
ರಾಜಕೀಯ್ ಮುಕೆಲ್ಯಾಂಕ್ ಪಾಶ್ಚ್ಯಾತ್ ದೇಶಾಂನಿ ವ್ಯಂಗ್ಯ್ ರಿತಿಂನಿ ಪಿಂತ್ರಾಯ್ತಾನಾ, ಹ್ಯಾ ಅರಬ್ ಗಾಂವಾಂತ್ ಮುಖೆಲ್ಯಾಂಕ್ ಮಾನ್ ಆನಿ ಗೌರವಾನ್ ಪರ್ಜಾ ಲೆಕ್ತಾ ಜಾಲ್ಲ್ಯಾನ್, ಸಭಿಕ್ ಮೌನ್ ರಾವೊನ್ ಕಾರ್ಯಾಚಿ ಸೊಬಾಯ್ ಚಾಕ್ತಾಲೆ.
 
ಹ್ಯಾ ಮಿಲಿಯನ್ ಕವಿಚ್ಯಾ ಇನಾಮಾಚೊ ವ್ಹಡ್ ಐವಜಾಂತ್ ಅಬುದಾಬಿ ಶೇಕ್ ಮಹಮ್ಮದಾಚಿ ದೇಣ್ಗಿ ವೀಶೇಸ್ ಆಸಾ. ಹೆ ಕವಿಗೋಷ್ಟಿಚೊ ತೊ ವ್ಹಡ್ ಅಭಿಮಾನಿ. ತಾಚ್ಯಾ ಸಾಮ್ಕಾರ್ 48 ಕವಿಂನಿ ಅಪ್ಲ್ಯಾ ಕವಿತಾಂಚಿ ಹುಮ್ದೆದ್ ಜಾಹಿರ್ ಕೆಲಿ. ಹಾಂತುಂ 24 ಕವಿಂಚಿ ವಿಂಚೊವ್ಣ್ ಜಾವ್ನ್, ವೊರಯ್ಣಾರ್ ತಶೆಂ ಸಭಿಕಾಂಚ್ಯಾ ಎಸ್.ಎಮ್. ಎಸ್ ಮಾರಿಫಾತ್ ನಿಮಾಣೆ ಜಿಕ್ಪ್ಯಾಚಿ ವಿಂಚೊವ್ಣ್ ಜಾತಾ.

-ವರ್ದಿ: ವಿನ್ಸಿ ಪಿಂಟೊ ಆಂಜೆಲೊರ್, ದುಬಾಯ್