ಕವಿತಾ ಟ್ರಸ್ಟಾಚ್ಯಾ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರಾ ಖಾತೀರ್ ರಾಜಯ್ ಪವಾರಾಚಿ ವಿಂಚವ್ಣ್

ಕವಿತಾ ಟ್ರಸ್ಟಾನ್ ದಿಂವ್ಚ್ಯಾ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರಾ ಖಾತೀರ್ ಗೊಂಯ್ಚೊ ಕವಿ ರಾಜಯ್ ಪವಾರಾಚಿ ವಿಂಚವ್ಣಿ ಜಾಲ್ಯಾ.

ಹೊ ಪುರಸ್ಕಾರ್ ರು. 10,000 ನಗ್ದೆನ್, ಯಾದಸ್ತಿಕಾ ತಶೆಂ ಮಾನ್-ಪತ್ರ್ ಆಟಾಪ್ತಾ. ಹೊ ಪುರಸ್ಕಾರ್ ಜನವರಿ 13, 2013 ತಾರಿಕೆರ್ ಬಂಟ್ವಾಳ್ಚ್ಯಾ ತುಂಬೆ ಹಾಂಗಾಸರ್ ಜಾಂವ್ಕ್ ಆಸ್ಚ್ಯಾ ಕವಿತಾ ಫೆಸ್ತ್ ಸಂದರ್ಭಾರ್ ದಿತಲೆ.

ದುಬಾಯ್ಚ್ಯಾ ಮೆರಿಟ್ ಫ್ರೈಟ್ ಸಿಸ್ಟಮ್ಸ್ ಹಾಚೊ ಮ್ಯಾನೇಜಿಂಗ್ ಡೈರೆಕ್ಟರ್ ಜೋಸೆಫ್ ಮಥಾಯಸಾನ್ ಆಪ್ಲ್ಯಾ ಕುಟ್ಮಾಚ್ಯಾ ನಾಂವಾರ್ ದಿಂವ್ಚೊ ಹೊ ಪುರಸ್ಕಾರ್, ಕೊಂಕಣಿ ಕವಿತೆ ಖಾತೀರ್ ಮಹತ್ವಾಚಿ ದೇಣ್ಗಿ ದಿಲ್ಲೆ ವ್ಯಕ್ತಿಕ್ ಫಾವೊ ಜಾತಾ. ಹ್ಯಾ ಆದಿಂ ಹೊ ಪುರಸ್ಕಾರ್ ಅರುಣಾ ರಾವ್ ಕುಂದಾಜೆ, ಮುಂಬಯ್ (2008), ಕಾವ್ಯದಾಸ್, ಮಂಗ್ಳುರ್ (2009), ಕಾಶಿನಾಥ್ ಶಾಂಭಾ ಲೊಲಿಯೆಂಕಾರ್, ಗೊಂಯ್ (2010) ಆನಿ ಶಿವಾನಂದ ಶೆಣೈ, ಕೇರಳ (2011) ಹಾಂಕಾಂ ಫಾವೊ ಜಾಲಾ.

ಪಯ್ಲೆ ಪಾವ್ಟಿಂ ಕೊಂಕಣಿ ಕಾವ್ಯಾಕ್ ಸಂಬಂಧ್ ಜಾಲ್ಲ್ಯಾ ವಿಶಯಾಚೆರ್ ಮಹಾಪ್ರಬಂಧ್ ಬರೊವ್ನ್ ಗೊಂಯ್ ವಿಶ್ವವಿದ್ಯಾನಿಲಯಾ ಥಾವ್ನ್ 2012 ವರ್ಸಾ ಪಿ.ಎಚ್.ಡಿ. ಸನದ್ ಜೊಡಲ್ಲೊ ಮಹತ್ವಾಚೊ ವಿಶಯ್ ಲೆಕಾಕ್ ಘೆವ್ನ್ ಹ್ಯಾ ಪುರಸ್ಕಾರಾ ಖಾತೀರ್ ರಾಜಯಾಚಿ ವಿಂಚವ್ಣ್ ಜಾಲ್ಯಾ. ‘ಕೊಂಕಣಿ ಕವಿತೆಂತ್ ಗೊಂಯ್ಚೆಂ ಸಮಾಜ್‍ದರ್ಶನ್: 1960 ಥಾವ್ನ್ 1990 ಮೆರೆನ್ ಉಜ್ವಾಡಾ ಆಯಿಲ್ಲ್ಯಾದೇವನಾಗರಿಂತ್ಲ್ಯಾ ಕೊಂಕಣಿ ಕವಿತಾಂಚ್ಯಾ ಸಂದರ್ಭಾಂತ್’ - ಹೊ ತಾಚ್ಯಾ ಮಹಾಪ್ರಬಂಧಾಚೊ ವಿಷಯ್ ಆಸಲ್ಲೊ.

ಹ್ಯಾ ಶಿವಾಯ್ ಯು.ಜಿ.ಸಿ. ಖಾತೀರ್ ‘ರ.ವಿ. ಪಂಡಿತಾಚಿ ಕವಿತಾ: ಏಕ್ ವಿಮರ್ಶಾತ್ಮಕ್ ನದರ್’ ವಿಷಯಾಚೆರ್ ತಾಣೆಂ ಸಾನ್-ಸಂಸೊದಾಚೊ ಪ್ರೊಜೆಕ್ಟ್ ಕೆಲಾ. ಗೋವಾ ಬೋರ್ಡ್ ತಶೆಂ ಗೊಂಯ್ ವಿಶ್ವವಿದ್ಯಾನಿಲಯಾಚ್ಯಾ ಪಾಠ್ಯಪುಸ್ತಕಾಂನಿ ತಾಚ್ಯೊ ಕವಿತಾ ಆಟಾಪುನ್ ಆಸಾತ್.

1995 ವರ್ಸಾ ‘ಪಾವ್ಸ್ ಫುಲಾಂ’ ನಾಂವಾಚೆಂ ತಾಚೆಂ ಕವಿತಾ ಪುಸ್ತಕ್ ಪರ್ಗಟ್ ಜಾಲಾಂ. ಹ್ಯಾ ಪುಸ್ತಕಾ ಖಾತೀರ್ 1996 ವರ್ಸಾ ಕೊಂಕಣಿ ಭಾಷಾ ಮಂಡಳ್, ಗೊಂಯ್ ಹಾಂಚೆ ಥಾವ್ನ್ ತಾಕಾ ಸಾಹಿತ್ಯ್ ಪುರಸ್ಕಾರ್ ಲಾಭ್ಲಾ. ತಾಚ್ಯೊ ಕವಿತಾ ‘ಸಮಕಾಳೀನ್ ಭಾರತೀಯ್ ಸಾಹಿತ್ಯ್’, ‘20ವ್ಯಾ ಶೆಕ್ಡ್ಯಾಚ್ಯೊ ಕೊಂಕಣಿ ಕವಿತಾ’, ‘ಪಂಜಾಬಿ ಭಾಶೆಂತ್ ಭಾರತೀಯ್ ಕವಿತಾ’ ಹ್ಯಾ ಆನಿ ಹೆರ್ ಸಂಕಲನಾಂನಿ ಪರ್ಗಟ್ ಜಾಲ್ಯಾತ್.

ಕೊಂಕಣಿಂತ್ ಗಝಲ್ ಪ್ರಕಾರ್ ಫಾಮಾದ್ ಕರುಂಕ್ ರಾಜಯಾಚೆಂ ಚಡೀತ್ ಯೋಗದಾನ್ ಆಸಾ. ಹ್ಯಾ ಖಾತೀರ್ ತಾಚೊ ‘ರಂಗ್‌ವೇದಿ’ ಸಂಸ್ಥೊ ವಾವುರ‍್ತಾ.

2011 ವರ್ಸಾ ಬಿಂಬ್ ಪ್ರಕಾಶನಾದ್ವಾರಿಂ ಶಂಕರ್ ಭಂಡಾರಿ ಸಾಹಿತ್ಯ್ ಪುರಸ್ಕಾರ್ ತಾಕಾ ಲಾಭ್ಲಾ. ಬಾರಾವ್ಯಾ ಯುವ ಕೊಂಕಣಿ ಸಾಹಿತ್ಯ್ ಸಮ್ಮೇಳನಾವೆಳಾರ್ ರಾಜಯಾಕ್ ‘ಯುವ ಸಾಹಿತ್ಯ್ ಪುರಸ್ಕಾರ್’ ದೀವ್ನ್ ಮಾನ್ ಕೆಲಾ.

ಕೊಲ್ಕತ್ತಾಚ್ಯಾ ಭಾರತೀಯ್ ಭಾಷಾ ಪರಿಶದೆ ಥಾವ್ನ್ ‘ಸಾಹಿತ್ಯ್ ಪುರಸ್ಕಾರ್ - 2009' ತಾಕಾ ಲಾಭ್ಲಾ. ಅಸಲೊ ಏಕ್ ರಾಷ್ಟ್ರೀಯ್ ಪುರಸ್ಕಾರ್ ಪರಿಶದೆಚ್ಯಾ 32 ವರ್ಸಾಂಚೆ ಚರಿತ್ರೆಂತ್ ಎಕಾ ಕೊಂಕಣಿ ಮನ್ಶಾಕ್ ಪಯ್ಲೆ ಪಾವ್ಟಿಂ ಮೆಳ್ಚೊ.

ಕವಿತಾ ನ್ಹಯ್ ಆಸ್ತಾಂ ರಾಜಯಾನ್ ಯೆದೊಳ್ ಸ ನಾಟಕಾಂ ಬರಯ್ಲ್ಯಾಂತ್ ಆನಿ ಹ್ಯಾ ನಾಟಕಾಂಚಿಂ ಶೆಂಭರಾಂನಿ ಪ್ರದರ್ಶನಾಂ ಚಲ್ಲ್ಯಾಂತ್. ಕೊಂಕಣಿ ಭಾಸ್ ಆನಿ ಸಾಹಿತ್ಯಾಚೆರ್ ಜಾಯ್ತ್ಯಾ ವಿಚಾರ್-ಸಾತ್ಯಾಂನಿ ತಾಣೆಂ ಪ್ರಬಂಧ್ ಸಾದರ್ ಕೆಲ್ಯಾತ್.

• ಕವಿತಾ ಪುರಸ್ಕಾರಾವಿಶಿಂ ಚಡೀತ್ ಜಾಣಾ ಜಾಂವ್ಕ್ ಹಾಂಗಾ ಚಿಚಾಯಾ
• Listen to Rajay Pawar's Poetry Recitation