ಕವಿತಾ ಟ್ರಸ್ಟಾಚ್ಯಾ ಕವಿತಾ ಬರೊಂವ್ಚೆ ಸರ್ತೆಂತ್ ಗೊಂಯ್ಚೆಂ ರೊಶೆಲ್ ದಿನಿಜ್ ಪಯ್ಲೆಂ

ಕವಿತಾ ಟ್ರಸ್ಟಾನ್ ಚಲಯಿಲ್ಲ್ಯಾ ದೆವಾಧಿನ್ ಚಾರ್ಲ್ಸ್ ಆನಿ ತೆರೆಜಾ ರೊಡ್ರಿಗಸ್ ಸ್ಮಾರಕ್ ಸ-ವ್ಯಾ ಅಖಿಲ್ ಭಾರತ್ ಕೊಂಕಣಿ ಕವಿತಾ ಬರೊಂವ್ಚೆ ಸರ್ತೆಂತ್ ಗೊಂಯ್ಚ್ಯಾ ಸಾಲ್ಸೆಟಿಚ್ಯಾ ಸೈಂಟ್ ಜೂಡ್ಸ್ ಹೈಸ್ಕೂಲಾಂತ್ ನೊವ್ಯಾ ಕ್ಲಾಶಿಂತ್ ಶಿಕ್ಚ್ಯಾ ರೊಶೆಲ್ ದಿನಿಜಾಕ್ ಪಯ್ಲೆಂ ಇನಾಮ್ ಫಾವೊ ಜಾಲಾಂ. ತಾಣೆಂ ಬರಯಿಲ್ಲ್ಯಾ ‘ಸಪಣ್’ ಕವಿತೆಕ್ ರುಪಯ್ 2000 ನಗ್ದೆನ್, ಯಾದಸ್ತಿಕಾ ತಶೆಂ ಪ್ರಮಾಣ್-ಪತ್ರ್ ಫಾವೊ ಜಾತಲೆಂ. ಹೆಂ ಇನಾಮ್ ಜನೆರ್ 13, 2013 ತಾರಿಕೆರ್ ಬಂಟ್ವಾಳ್ ತುಂಬೆಂತ್ ಜಾಂವ್ಕ್ ಆಸ್ಚ್ಯಾ ‘ಕವಿತಾ ಫೆಸ್ತ್’ ಸಂದರ್ಭಾರ್ ತಾಕಾ ದಿತಲೆ.

ದುಸ್ರೆಂ ಇನಾಮ್ ಗೊಂಯ್ಚ್ಯಾ ವಾಸ್ಕೊಂತ್ಲ್ಯಾ ಸೈಂಟ್ ಜೋಸೆಫ್ಸ್ ಇನ್‌ಸ್ಟಿಟ್ಯೂಟ್ ಶಾಳೆಂತ್ ನೊವೆಂತ್ ಶಿಕ್ಚ್ಯಾ ಕನಕಾ ಆತ್ಮರಾಮ್ ನಾರ್ವೆಕಾರಾನ್ ಬರಯಿಲ್ಲ್ಯಾ ‘ಮೋಗ್’ ಕವಿತೆಕ್ ಫಾವೊ ಜಾಲಾಂ ತರ್, ತಿಸ್ರೆಂ ಇನಾಮ್ ಮಂಗ್ಳುರ್ ಲಾಗ್ಸಾರ‍್ಚ್ಯಾ ಬಜ್ಪೆ ಸೈಂಟ್ ಜೋಸೆಫ್ಸ್ ಪಿ.ಯು. ಕೊಲೆಜಿಂತ್ ಧಾವೆ ಕ್ಲಾಶಿಂತ್ ಶಿಕ್ಚ್ಯಾ ಸ್ಟೀವನ್ ಡಿ’ಸೋಜಾನ್ ಬರಯಿಲ್ಲೆ ‘ಉದೆಂವ್ಚೊ ಸುರ್ಯೊ’ ಕವಿತೆಕ್ ಫಾವೊ ಜಾಲಾಂ. ದುಸ್ರೆಂ ಇನಾಮ್ ರುಪಯ್ 1000, ಯಾದಸ್ತಿಕಾ ಆನಿ ಪ್ರಮಾಣ್ ಪತ್ರ್ ಆಟಾಪ್ತಾ ತರ್, ತಿಸ್ರೆಂ ಇನಾಮ್ ಜಾವ್ನ್ ರುಪಯ್ 750, ಯಾದಸ್ತಿಕಾ ಆನಿ ಪ್ರಮಾಣ್ ಪತ್ರ್ ದಿತಲೆ.

ರೊಶೆಲ್ ದಿನಿಜ್, ಕನಕ ಆತ್ಮರಾಮ್ ನಾರ್ವೆಕಾರ್, ಸ್ಟೀವನ್ ಡಿ’ಸೋಜಾ
रोशेल दिनीज, कनका आत्मराम नार्वेकार, स्टीवन डि’सोजा

ಹೆ ಸರ್ತೆಂತ್ ಗೊಂಯ್, ಕರ್ನಾಟಕ ತಶೆಂ ಕೇರಳಾಚ್ಯಾ 178 ವಿದ್ಯಾರ್ಥಿಂನಿ ಭಾಗ್ ಘೆತಲ್ಲೊ. ವೊರಯ್ಣಾರ್ ಜಾವ್ನ್ ವಿಕ್ಟರ್ ಮಥಾಯಸ್, ಎವ್ರೆಲ್ ರೊಡ್ರಿಗಸ್ ತಶೆಂ ಮೆಲ್ವಿನ್ ರೊಡ್ರಿಗಸಾನ್ ಹಿ ವಿಂಚವ್ಣಿ ಕೆಲ್ಯಾ. ವೊರವ್ಣಿ ಕರ‍್ತಲ್ಯಾಂನಿ ಭುರ್ಗ್ಯಾಂಚಿ ಪ್ರಾಯ್ ಆನಿ ತಾಂಣಿ ಕವಿತೆ ಖಾತೀರ್ ವಿಂಚಲ್ಲೊ ವಿಷಯ್ ಮತಿಂತ್ ಘೆವ್ನ್ ಪಯ್ಲೆಂ ಚಡುಣೆಂ ಧಾ ಕವಿತಾಂಚಿ ವಿಂಚವ್ಣಿ ಕೆಲ್ಲಿ. ಉಪ್ರಾಂತ್ ಹ್ಯಾ ಸಕ್ಕಡ್ ವಿದ್ಯಾರ್ಥಿಂಲಾಗಿಂ ಫೊನಾಚೆರ್ ಸಂಭಾಷಣ್ ಚಲೊವ್ನ್, ನಿಮಾಣೆಂ ತೆಗಾಂಕ್ ಇನಾಮಾಂ ಖಾತೀರ್ ವಿಂಚುನ್ ಕಾಡ್ಲಾಂ.

ಹಿ ಸರ್ತ್ ಕವಿ ಮೆಲ್ವಿನ್ ರೊಡ್ರಿಗಸಾಚ್ಯಾ ಆವಯ್ ಬಾಪಾಯ್ಚ್ಯಾ ನಾಂವಾರ್ ಚಲ್ತಾ. ಭಾಗ್ ಘೆಂವ್ಚ್ಯಾ ಹರ‍್ಯೆಕಾ ಭುರ್ಗ್ಯಾಕ್ ಕವಿತಾ ಟ್ರಸ್ಟ್, ಪ್ರಮಾಣ್ ಪತ್ರ್ ಧಾಡುನ್ ದಿತಾ.

ಸಪಣ್

ಕಾಂಯ್ ಬರೆಂ ಸಪಣ್ ಮ್ಹಜೆಂ
ಕಾಂಯ್ ಬರೆಂ ಸಪಣ್ ಮ್ಹಜೆಂ

ಚಂದ್ರಿಮಾಚೆರ್ ಘರ್ ಬಾಂದ್ಪಾಚೆಂ ಸಪಣ್ ಮ್ಹಜೆಂ
ಉದ್ಕಾಚೆರ್ ಚಲ್ಪಾಚೆಂ ಸಪಣ್ ಮ್ಹಜೆಂ

ದೆವಾಲಾಗಿಂ ಉಲೊವ್ಪಾಚೆಂ ಸಪಣ್ ಮ್ಹಜೆಂ

ಕಾಂಯ್ ಬರೆಂ ಸಪಣ್ ಮ್ಹಜೆಂ
ಕಾಂಯ್ ಬರೆಂ ಸಪಣ್ ಮ್ಹಜೆಂ

ನೆಕೆತ್ರಾಂಚೆ ಧೊಲ್ ಧೊಲ್ಪಾಚೆಂ ಸಪಣ್ ಮ್ಹಜೆಂ
ಸವ್ಣೆಂ ಜಾವ್ನ್ ಮಳ್ಬಾಂತ್ ಉಡ್ಪಾಚೆಂ ಸಪಣ್ ಮ್ಹಜೆಂ
ಮನ್ಶಾಚೆಂ ದುಖ್ ಕಾಡುನ್ ಉಡೊವ್ಪಾಚೆಂ ಸಪಣ್ ಮ್ಹಜೆಂ

ಕಾಂಯ್ ಬರೆಂ ಸಪಣ್ ಮ್ಹಜೆಂ
ಕಾಂಯ್ ಬರೆಂ ಸಪಣ್ ಮ್ಹಜೆಂ

ಮೋಗ್

ಕಳೆನ್ ಕಳಿ
     ಜಾಯೆಚಿ

ಫುಲಾನ್ ಫುಲ್
     ಗುಲಾಬಾಚೆಂ

ಫಳಾಂತ್ ಫಳ್
     ಆಂಬ್ಯಾಚೆಂ

ಪಾನಾಂತ್ ಪಾನ್
     ಕೆಂಳ್ಬ್ಯಾಚೆಂ

ಝಾಡಾನ್ ಝಾಡ್
     ಮಾಡಾಚೆಂ

ದೊಂಗ್ರಾಂತ್ ದೊಂಗರ್
     ಹಿಮಾಲಯಾಚೊ

ಕೃಪೆಂತ್ ಕೃಪಾ
     ದೆವಾಚಿ

ಮೊಗಾಂತ್ ಮೋಗ್
     ಆವಯ್ಚೊ ಆನಿ ಬಾಪಾಯ್ಚೊ

ಉದೆಂವ್ಚೊ ಸುರ್ಯೊ

ಕಾಳೊಕ್ ಕರ್ಗವ್ನ್
ಸಕಾಳಿಂಚ್ಯಾ ವೆಳಾರ್ ಉದೆವ್ನ್
ತಾಂಬ್ಡ್ಯಾ ರಂಗಾರ್ ಪರ್ಜಳೊನ್
ಸರ್ವ್ ಲೊಕಾಕ್ ಬರೊ ದೀಸ್ ಮಾಗ್ತಾ

ಸುರ್ಯಾಚ್ಯಾ ಕಿರಣಾಕ್
ಕರ್ಗಲ್ಲೊ ಧೋವ್
ಝಡ್ಲೆ ಥೆಂಬೆ ಥೆಂಬೆ
ಮೊತಿಯಾಂಬರಿ

ಫುಲಾಂಚ್ಯಾ ವಯ್ರ್
ಶಿಂಪ್ಡಲ್ಲೆ ಥೆಂಬೆ ದಿಸ್ತಾಲೆ
ಮೊತಿಯಾಂಬರಿ

ಸುರ್ಯಾಚ್ಯಾ ಕಿರಣಾಕ್
ಝಾಡಾರ್ ಫುಲಾಂ
ಹಾಸೊನ್ ಹಾಸೊನ್ ಫುಲ್ಲಿಂ

ಸುರ್ಯೊ ಉದೆಂವ್ಚ್ಯಾ ವೆಳಾರ್
ಇಗರ್ಜೆಚ್ಯೊ
ಘಾಂಟಿ ವ್ಹಾಜ್ಲ್ಯೊ
ರೂಕ್ ಝಾಡಾಂಚ್ಯಾ ಖೊಲ್ಯಾಂ
ಮಧೆಂ ಚಿಲಿಪಿಲಿ ಗಾಯಾನ್
ಆಯ್ಕತಚ್ ನಾಚ್ಲೆಂ
ಮನ್ಶಾಂಚೆಂ ಕಾಳೀಜ್

ಸಕಾಳಿಂಚ್ಯಾ ರಥಾರ್
ಬಸ್ಲಾ ಸುರ್ಯೊ
ಸಾಂಜೆಚ್ಯಾ ವೆಳಾರ್
ರಥಾ ಥಾವ್ನ್ ದೆಂವೊನ್
ವಿಶ್ರಾಂತ್ ಘೆತಾ ಸುರ್ಯೊ