ನೂತನ್ ಸಾಖರ್ದಾಂಡೆಚ್ಯಾ ‘ಪಾಸ್ವರ್ಡ್’ ಕಾವ್ಯಸಂಗ್ರಹಾಕ್ ಡೊ. ಟಿ.ಎಮ್.ಎ. ಫೌಂಡೇಶನ್ ಪುರಸ್ಕಾರ್
ಹ್ಯಾ ವರ್ಸಾಚೊ ಡೊ. ಟಿ. ಎಮ್. ಎ. ಪೈ ಫೌಂಡೇಶನ್ ಅತ್ಯುತ್ತಮ್ ಪುಸ್ತಕ್ ಪುರಸ್ಕಾರ್ ಗೊಂಯ್ಚಿ ನಾಮ್ಣೆಚಿ ಕವಯಿತ್ರಿ ನೂತನ್ ಸಾಖರ್ದಾಂಡೆ ಹಿಚ್ಯಾ ‘ಪಾಸ್ವರ್ಡ್’ ಹ್ಯಾ ಪುಸ್ತಕಾ ಖಾತೀರ್ ಫಾವೊ ಜಾಲಾ. ‘ಜೀಣ್ ಜಾಲಿ ಕಸ್ತೂರಿ’, ತಸಲಿಂ ಕಾವ್ಯಪುಸ್ತಕಾಂ ಬರೊವ್ನ್ ಯೆದೊಳಚ್ ಲೊಕಾಮೊಗಾಳ್ ಜಾಲ್ಲ್ಯಾ ತಿಕಾ 2013 ಮಾರ್ಚ್ ಮ್ಹಯ್ನ್ಯಾಂತ್ ಜಾಂವ್ಕ್ ಆಸ್ಚ್ಯಾ ಎಕಾ ಸುವಾಳ್ಯಾ ವೆಳಾರ್ ಹೊ ಪುರಸ್ಕಾರ್ ಮಣಿಪಾಲಾಂತ್ ಭೆಟಯ್ತಲೆ.
ಗೊಂಯ್ಚ್ಯಾ ಮಾಪ್ಶಾಂತ್ ಪಂಜಾಬ್ ನ್ಯಾಶನಲ್ ಬ್ಯಾಂಕಾಂತ್ ವಾವುರ್ನ್ ಆಸ್ಚ್ಯಾ ತಿಣೆಂ ಅರ್ಥ್ಶಾಸ್ತ್ರಾಂತ್ ಆನಿ ಮನಶಾಸ್ತ್ರಾಂತ್ ಬಿ.ಎ. ಸನದ್ ಆಪ್ಣಾಯ್ಲ್ಯಾ. ಗೊಂಯ್ ಕೊಂಕಣಿ ಅಕಾಡೆಮಿ, ಗೊಂಯ್ ಕೊಂಕಣಿ ಭಾಷಾ ಮಂಡಲ್ ಹಾಂಚೊ ಪುರಸ್ಕಾರ್ ತಿಕಾ ಲಾಭ್ಲಾ. ಲಕ್ನೋ ಶೆರಾಂತ್ ಕವಿತಾ ಸಮ್ಮೇಳನಾಂತ್ ವಾಚನ್ ಕೆಲ್ಲಿ ತಿಚಿ ಏಕ್ ಕವಿತಾ, ಭಾರತಾಚ್ಯಾ ಸರ್ವಯ್ ಅಧಿಕೃತ್ ಭಾಸಾಂನಿ ಅನುವಾದ್ ಜಾವ್ನ್ ಆಕಾಶವಾಣಿ ದ್ವಾರಿಂ ಪ್ರಸಾರ್ ಜಾಲ್ಯಾ. ತಿಚ್ಯೊ ಜಾಯ್ತ್ಯೊ ಹೆರ್ ಕವಿತಾ, ಭಾರತಾಚ್ಯಾ ಹೆರ್ ಭಾಸಾಂನಿ ತರ್ಜುಮೊ ಜಾವ್ನ್ ಪರ್ಗಟ್ ಜಾಲ್ಯಾತ್. ಅಖಿಲ್ ಭಾರತ್ ಕವಯಿತ್ರಿಂಚೆ ಪರಿಶದೆ ಥಾವ್ನ್ ತಿಚ್ಯಾ ‘ಜೀಣ್ ಜಾಲಿ ಕಸ್ತೂರಿ’ ಪುಸ್ತಕಾ ಖಾತೀರ್ ಪುರಸ್ಕಾರ್ ಫಾವೊ ಜಾಲಾ.
ಕೊಂಕಣಿ ಸಾಹಿತ್ಯ ಶೆತಾಂತ್ ಉರ್ಬೆನ್ ಭಾಗ್ ಘೆವ್ಪಿ ನೂತನ್ ಸಾಖರ್ದಾಂಡೆಚೊ ಪತಿ ಅರುಣ್ ಸಾಖರ್ದಾಂಡೆ ಸೈತ್ ನಾಂವ್ ವಸ್ತೆ ಕವಿ. ತಾಂಕಾಂ ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್ ಫಾವೊ ಜಾಲಾ.
नूतन साखरदांडेच्या ‘पासवर्ड’ काव्यसंग्रहाक डो. टी.एम.ए. फौंडेशन पुरस्कार
ह्या वर्साचो डो. टी. एम. ए. पै फौंडेशन अत्युत्तम पुस्तक पुरस्कार गोंयची नामणेची कवयित्री नूतन साखरदांडे हिच्या ‘पासवर्ड’ ह्या पुस्तका खातीर फावो जाला. ‘जीण जाली कस्तूरी’, तसलीं काव्यपुस्तकां बरोवन येदोळच लोकामोगाळ जाल्ल्या तिका २०१३ मार्च म्हयन्यांत जावंक आसच्या एका सुवाळ्या वेळार हो पुरस्कार मणिपालांत भेटयतले.
गोंयच्या मापशांत पंजाब नॅशनल बॅंकांत वावूर्न आसच्या तिणें अर्थशास्त्रांत आनी मनशास्त्रांत बी.ए. सनद आपणायल्या. गोंय कोंकणी अकाडेमी, गोंय कोंकणी भाषा मंडल हांचो पुरस्कार तिका लाभला. लक्नो शेरांत कविता सम्मेळनांत वाचन केल्ली तिची एक कविता, भारताच्या सर्वय अधिकृत भासांनी अनुवाद जावन आकाशवाणी द्वारीं प्रसार जाल्या. तिच्यो जायत्यो हेर कविता, भारताच्या हेर भासांनी तर्जुमो जावन पर्गट जाल्यात. अखिल भारत कवयित्रिंचे परिशदे थावन तिच्या ‘जीण जाली कस्तूरी’ पुस्तका खातीर पुरस्कार फावो जाला.
कोंकणी साहित्य शेतांत उरबेन भाग घेवपी नूतन साखरदांडेचो पती अरूण साखरदांडे सैत नांव वस्ते कवी. तांकां साहित्य अकाडेमिचो पुरस्कार फावो जाला.
