ಅಖಿಲ್ ಭಾರತ್ ಕೊಂಕಣಿ ಕವಿತಾ ವಾಚನ್ ಸರ್ತ್: ಉಡುಪಿಂತ್ ಸಾತ್ ಜಣಾಂಕ್ ವಿಂಚ್ಲೆಂ
ಕವಿತಾ ಟ್ರಸ್ಟಾನ್ ಚಲೊಂವ್ಚೊ ರೋಹನ್ ಆನಿ ಲವೀಟಾ ಮೊಂತೇರೊ, III ಅಖಿಲ್ ಭಾರತ್ ಕೊಂಕಣಿ ಕವಿತಾ ವಾಚನ್ ಸರ್ತೆಚೊ ಉಡುಪಿ ಪಾಂವ್ಡೊ ಹ್ಯಾಚ್ ಸಪ್ಟೆಂಬರ್ 22 ತಾರಿಕೆರ್, ಆಯ್ತಾರಾ ಉಡುಪಿ ದುಖಿ ಸಾಯ್ಬಿಣಿಚೆ ಇಗರ್ಜೆಚ್ಯಾ ಸಭಾಸಾಲಾಂತ್ ಚಲ್ಲೊ. ವೀಸ್ ಜಣ್ ಭಾಗ್ ಘೆತಲ್ಲ್ಯಾ ಹ್ಯೆ ಸರ್ತಿಂತ್, ಸಾತ್ ಜಣಾಂಕ್ ಫೈನಲ್ಸಾ ಖಾತೀರ್ ವಿಂಚುನ್ ಕಾಡ್ಲೆಂ.
ವಿಂಚವ್ಣೆಚೆ ಪಾಂವ್ಡೆ ಹ್ಯಾ ಆದಿಂ ಮಂಗ್ಳುರ್, ಪಣಜಿ ಆನಿ ಮಡ್ಗಾವಾಂತ್ ಚಲಲ್ಲೆ ಆಸೊನ್, ಆತಾಂಚಿಂ ಸಾತ್ ಜಣಾಂ ಧರುನ್ ಜುಮ್ಲಾ ಸತ್ತೀಸ್ ಜಣಾಂಕ್ ಫೈನಲ್ಸಾ ಖಾತೀರ್ ವಿಂಚುನ್ ಕಾಡ್ಲಾಂ. ಫೈನಲ್ಸ್ ಜನೆರ್ 12, 2014 ತಾರಿಕೆರ್ ಮಂಗ್ಳುರ್ ಟೌನ್ ಹೊಲಾಂತ್ ಚಲ್ಚ್ಯಾ ಕವಿತಾ ಫೆಸ್ತ್ ಸಂದರ್ಭಾರ್ ಚಲ್ತಲೆಂ.
ಉಡುಪಿ ವಿಂಚವ್ಣೆ ಖಾತೀರ್ ಭಟ್ಕಳ್, ಕುಂದಾಪುರ್, ಬಾರ್ಕೂರ್, ಬ್ರಹ್ಮಾವರ್, ಕೊಳಾಲ್‌ಗಿರಿ, ತಾಕೊಡೆ, ಕಟಪಾಡಿ ಥಾವ್ನ್ ಯುವಜಣಾಂ ಹಾಜರ್ ಆಸಲ್ಲಿಂ. ಸರ್ತೆ ವೆಳಾರ್ ಖಂಯ್ಚ್ಯಾಯ್ ಕವಿಚಿ ಕವಿತಾ ವಾಚುಂಕ್ ತಾಂಕಾಂ ಆವ್ಕಾಸ್ ಆಸಲ್ಲೊ. ವಾಚ್ಚಿ ಕವಿತಾ ದೇಡ್ ಥಾವ್ನ್ ತೀನ್ ಮಿನುಟಾಂಚಿ ಜಾಂವ್ಕ್ ಜಾಯ್ ಮ್ಹಣೊನ್ ನಿಯಮ್ ಆಸಲ್ಲೆಂ. ಹ್ಯೆ ಸರ್ತೆ ಖಾತೀರ್ ಪಂದ್ರಾ ಥಾವ್ನ್ ತೀಸ್ ವರ್ಸಾಂ ಪರ್‍ಯಾಂತ್ಲ್ಯಾ ಯುವಜಣಾಂನಿ ಭಾಗ್ ಘೆವ್ಯೆತ್ ಆಸಲ್ಲೊ.
ಸುರ್‍ವೆರ್ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಸರ್ವಾಂಕ್ ಯೆವ್ಕಾರ್ ಮಾಗೊನ್, ಕವಿತಾ ಟ್ರಸ್ಟಾಚ್ಯಾ ಶೆವೊಟಾಚೊ ತಶೆಂ ಕಾರ್ಯಕ್ರಮಾಂಚೊ ವಿವರ್ ದಿಲೊ. ಸರ್ತೆಂಚ್ಯಾ ನೆಮಾಂಚೀಯ್ ತಾಂಣಿ ಝಳಕ್ ದಿಲಿ. ಭಾಗ್ ಘೆತಲ್ಲ್ಯಾ ಸರ್ವಾಂಕ್ ಕೊಂಕಣಿ ಕವಿತೆಚಿಂ ಪುಸ್ತಕಾಂ ವಾಂಟ್ಲಿಂ.
ವೊರಯ್ಣಾರ್ ಜಾವ್ನ್ ಟ್ರಸ್ಟಿ ಕಿಶೂ ಬಾರ್ಕೂರ್, ವಿಲಿಯಮ್ ಪಾಯ್ಸ್ ಆನಿ ಎಂಡ್ರ್ಯೂ ಎಲ್. ಡಿಕುನ್ಹಾ ಹಾಜರ್ ಆಸಲ್ಲೆ. ಟ್ರಸ್ಟಿ ವಿತೊರಿ ಕಾರ್ಕೊಳ್ ಆನಿ ಕವಿ ಎರಿಕ್ ಸೋನ್ಸ್ ಹಾಂಣಿ ಸಹಕಾರ್ ದಿಲ್ಲೊ. ಹ್ಯಾ ಸಂದರ್ಭಾರ್ ಕವಿ ಕ್ಲೋಡಿ ಬ್ರಹ್ಮಾವರ್ ಹಾಜರ್ ಆಸಲ್ಲೊ.
ಫೈನಲ್ಸಾ ಖಾತೀರ್ ವಿಂಚುನ್ ಆಯಿಲ್ಲ್ಯಾಂಚಿಂ ನಾಂವಾಂ ಹ್ಯೆಪರಿಂ ಆಸಾತ್:
ಎಲ್‌ಸ್ಟನ್ ಡಿಸೋಜಾ, ಬಾರ್ಕೂರ್; ನಝೀಫ್ ಮನೆಗಾರ್, ಭಟ್ಕಳ್; ಮೊಹಮ್ಮದ್ ಯಾಖೂಬ್ ಕೋಲ, ಭಟ್ಕಳ್; ಲವೀಟಾ ಪಿಂಟೊ ಕುಂದಾಪುರ್; ನೌಫಿಲ್ ದಾಮೂದಿ, ಭಟ್ಕಳ್; ಅಖೀಫ್ ಮನೆಗಾರ್, ಭಟ್ಕಳ್ ಆನಿ ಕ್ಲೆಮೆಂಟ್ ಫೆರ್ನಾಂಡಿಸ್, ತಾಕೊಡೆ.
अखिल भारत कोंकणी कविता वाचन सर्त: उडुपींत सात जणांक विंचलें
कविता ट्रस्टान चलोंवचो रोहन आनी लवीट मोंतेरो, III अखिल भारत कोंकणी कविता वाचन सर्तेचो उडुपी पांवडो ह्याच सप्टेंबर २२ तारिकेर, आयतारा उडुपी दुखी सायबिणिचे इगर्जेच्या सभासालांत चल्लो. वीस जण भाग घेतल्ल्या ह्ये सरतींत, सात जणांक फैनल्सा खातीर विंचून काडलें.
विंचवणेचे पांवडे ह्या आदीं मंगळूर, पणजी आनी मडगावांत चलल्ले आसोन, आतांचीं सात जणां धरून जुमला सत्तीस जणांक फैनल्सा खातीर विंचून काडलां. फैनल्स जनेर १२, २०१४ तारिकेर मंगळूर टौन हॉलांत चलच्या कविता फेस्त संदर्भार चलतलें.
उडुपी विंचवणे खातीर भटकळ, कुंदापूर, बार्कूर, ब्रह्मावर, कोळालगिरी, ताकोडे, कटपाडी थावन युवजणां हाजर आसल्लीं. सर्ते वेळार खंयच्याय कविची कविता वाचुंक तांकां आवकास आसल्लो. वाच्ची कविता देड थावन तीन मिनुटांची जावंक जाय म्हणोन नियम आसल्लें. ह्ये सर्ते खातीर पंद्रा थावन तीस वर्सां परयांतल्या युवजणांनी भाग घेव्येत आसल्लो.
सुरवेर कविता ट्रस्ट अध्यक्ष मेल्विन रोड्रिगसान सर्वांक येवकार मागोन, कविता ट्रस्टाच्या शेवोटाचो तशें कार्यक्रमांचो विवर दिलो. सर्तेंच्या नेमांचीय तांणी झळक दिली. भाग घेतल्ल्या सर्वांक कोंकणी कवितेचीं पुस्तकां वांटलीं.
वोरयणार जावन ट्रस्टी किशू बार्कूर, विलियम पायस आनी एंडऱ्यू एल. डिकुन्हा हाजर आसल्ले. ट्रस्टी वितोरी कार्कोळ आनी कवी एरीक सोन्स हांणी सहकार दिल्लो. ह्या संदर्भार कवी क्लॉडी ब्रह्मावर हाजर आसल्लो.
फैनल्सा खातीर विंचून आयिल्ल्यांचीं नांवां ह्येपरीं आसात:
एलस्टन डिसोजा, बार्कूर; नझीफ मनेगार, भटकळ; मोहम्मद याखूब कोला, भटकळ; लवीटा पिंटो, कुंदापूर; नौफील दामूदी, भटकळ; अखीफ मनेगार, भटकळ आनी क्लेमेंट फेर्नांडीस, ताकोडे.