ಕನ್ನಡಾಚೊ ಕಾದಂಬರಿಕಾರ್, ಕವಿ, ಕೊಂಕಣಿಚೊ ಈಷ್ಟ್ ಅನಂತ್‌ಮೂರ್ತಿ ಸರ್ ಅಂತರ್‍ಲೊ
ಆಜ್ ಸಕಾಳಿಂಚ್ ಯು. ಆರ್. ಅನಂತಮೂರ್ತಿ ಸರ್-ವಿಶಿಂ ವೊಲ್ಟರ್ ನಂದಳಿಕೆಲಾಗಿಂ ಹಾಂವೆಂ ಪ್ರಸ್ತಾಪ್ ಕಾಡಲ್ಲೊ. ದಿಸಾಕ್ ತೀನ್ ಪಾವ್ಟಿಂ ಡಯಾಲಿಸಿಸ್ ಘೆಂವ್ಚ್ಯಾ ತಾಚ್ಯಾ ಹಟಾವಿಶಿಂ, ಜಿಣ್ಯೆಲಾಗಿಂ ತಾಣೆ ಕರುನ್ ಆಸ್ಚ್ಯಾ ಝುಜಾವಿಶಿಂ ಹಾಂವ್ ಉಲಯಿಲ್ಲೊಂ. ದೊನ್ಪಾರಾಂ ಕೊಂಕಣಿಚ್ಯಾ ಎಕಾ ಕಾಮಾನಿಮ್ತಿಂ ಮ್ಹಜ್ಯಾ ದಾಯ್ಜಿ ದುಬಾಯ್ ಎಕ್ತಾರಾಚ್ಯಾ ಇಷ್ಟಾಂ ಸಾಂಗಾತಾ ಬಳ್ಕುಂಜೆ ವಚೊನ್ ಪಾಟಿಂ ಯೆತಾನಾ ಅನಂತಮೂರ್ತಿ ಸರ್ ಅನಂತಾಂತ್ ಏಕ್ ಜಾಲ್ಲೆವಿಶಿಂ ಟಿವಿಚ್ಯಾ ಪಡ್ದ್ಯಾಚೆರ್ ಖಬರ್ ವಾಚುನ್ ಮನ್ ಖಲ್ಲ್ ಜಾಲೆಂ.
'ಸಂಸ್ಕಾರ' ಆನಿ 'ಅವಸ್ಥೆ' ಕಾದಂಬರಿ ವಾಚುನ್ ವರ್ಸಾಂ ಸಬಾರ್ ಜಾಲ್ಲಿಂ. ಆಯ್ಲೆವಾರ್ ತಾಚೆಂ ಕವಿತೆಚೆಂ ಪುಸ್ತಕ್ ವಾಚ್ಲ್ಯಾ ಉಪ್ರಾಂತ್, ಕಾಂಯ್ ತೀನ್ ಮ್ಹಯ್ನ್ಯಾಂ ಆದಿಂ ತಾಚ್ಯಾ ಪ್ರಬಂಧಾಂಚೆಂ ಪುಸ್ತಕ್ 'ಆಚೀಚೆ' ವಾಚುಂಕ್ ಧರಲ್ಲೆಂ. ಹರ್‍ಯೆಕಾ ವಾಕ್ಯಾಂತ್ ಹಜಾರಾಂನಿ ಪುಸ್ತಕಾಂಚೆಂ ಗಿನ್ಯಾನ್. ಅಸಲೊ ಅನ್ಭೋಗ್ ಮ್ಹಾಕಾ ಜಾಲ್ಲೊ ರವೀಂದ್ರ ಕೆಳೆಕಾರಾಚಿಂ ಪುಸ್ತಕಾಂ ವಾಚ್ತಾನಾ ಮಾತ್ರ್. ಪುಸ್ತಕಾಂತ್ಲೊ, ತಾಚೊ 'ಸಾಂಸ್ಕೃತಿಕ ಬಹುತ್ವ ಮತ್ತು ಸೃಜನಶೀಲತೆ' ಪ್ರಬಂಧ್ ವಾಚುನ್, ಮ್ಹಜಿಂ ಚಿಂತ್ನಾಂ ಕೊಂಕಣಿಚ್ಯಾ ಲಿಪಿ ವಾದಾಚೆರ್ ಘುಂವೊನ್, ಖಂಯ್ಚ್ಯಾನ್ ಘುಂವಲಾಗ್ಲಿಂ ಆನಿ ಖಂಯ್ ಪಾವ್ಲಿಂ ಮ್ಹಳ್ಳೆಂಚ್ ಕಳೊಂಕ್ ನಾ. ಆಖ್ಖೊ ದೀಸ್ ಹ್ಯಾ ಪ್ರಬಂಧಾನ್ ಸೊಡಯಿಲ್ಲ್ಯಾ ವಿಚಾರಾಂನಿ ಇತ್ಲೊ ಬುಡೊನ್ ಗೆಲೊಂಕಿ, ನಿಮಾಣೆಂ ಯು ಆರ್ ಸರಾಕ್ ಎಸ್ಸೆಮ್ಮೆಸ್ ಧಾಡ್ಲೆಂ. ಪಾಂಚ್ ಮಿನುಟಾಂನಿ ತಾಚೆಂ ಫೊನ್ ಆಯ್ಲೆಂ ಆನಿ ಅರ್ಧೊ ಘಂಟೊ ಆಮಿ ಉಲಯ್ಲ್ಯಾಂವ್. ಕೊಂಕಣಿಚ್ಯಾ ಲಿಪಿಚ್ಯೊ ಗಜಾಲಿ ಆಮಿ ತರ್ಕ್ ಕೆಲ್ಯೊ. ತಾಚೊ ಏಕ್ ಪ್ರಬಂಧ್ ಮ್ಹಾಕಾ ಅಶೆಂ ಚಿಂತುಂಕ್ ಕರಿಲಾಗ್ಲೊ ಚಿಂತುನ್ ತಾಕಾ ಖುಶಿ ಜಾಲಿ.
ಸಾಡೆತೀನ್ ವರ್ಸಾಂ ಆದಿಂ ಕವಿತಾ ಟ್ರಸ್ಟಾಚ್ಯಾ ಎಕಾ ಕಾರ್ಯಕ್ರಮಾಕ್ ಆಪಯ್ಜಾಯ್ ಮ್ಹಣೊನ್ ಚಿಂತುನ್, ತಾಚೊ ಜಾಂವಂಯ್ ವಿವೇಕ ಶಾನಭಾಗಾ ಮಾರಿಫಾತ್ ತಾಚೊ ಸಂಪರ್ಕ್ ಹಾಂವೆಂ ಕೆಲ್ಲೊ. ತಾಕಾ ಯೇಂವ್ಕ್ ಮನ್ ಆಸಲ್ಲೆಂ ತರೀ ಭಿಗ್ಡೊನ್ ಗೆಲ್ಲೆ ಭಲಾಯ್ಕೆ ನಿಮ್ತಿಂ ತವಳ್ ಹೆಂ ಸಾಧ್ಯ್ ಜಾಲೆಂನಾ. ಹೆಗ್ಗೋಡುಂತ್ಲ್ಯಾ ಎಕಾ ಸಾಹಿತಿಕ್ ಫೆಸ್ತಾ ಸಂದರ್ಭಾರ್ ತಾಂಚೆ ಸಮೊರ್ ಮ್ಹಜಿ ಕವಿತಾ ಕನ್ನಡಾಂತ್ ತಶೆಂ ಕೊಂಕಣಿಂತ್ ವಾಚ್ಚೆಂ ಭಾಗ್ ಹಾಂವೆಂ ಜೊಡಲ್ಲೆಂ. ಮ್ಹಜಿ ತಾಣೆಂ ಜಾಯ್ತಿ ತೋಖ್ಣಾಯ್ ಕೆಲ್ಲಿ. ವಿವೇಕ್ ಕೆದಳಾ ಸಾಂಗ್ತಾ, ತೆದಳಾ ಖಂಡಿತ್ ತುಜ್ಯಾ ಕಾರ್ಯಕ್ರಮಾಕ್ ಯೆತಲೊಂ ಮ್ಹಣೊನ್ ತಾಣೆ ಮ್ಹಾಕಾ ಭಾಸ್ ದಿಲ್ಲಿ. ಏಕ್ ಪಾವ್ಟಿಂ ಇಂದಿರಾ ಗಾಂಧಿ ಓಪನ್ ಯುನಿವರ್ಸಿಟಿನ್ ಮಾಂಡುನ್ ಹಾಡಲ್ಲೆ ಕವಿಗೋಷ್ಟಿಕ್ ಬೆಂಗ್ಳುರಾಕ್ ತಾಣೆಂ ಮ್ಹಾಕಾ ವೊವ್ಳಿಗ್ ದಿಲ್ಲಿ. ವಿಶ್ವವಿದ್ಯಾಲಯಾಚೊ ತೊ ಸ್ವತಾ ಚೇರ್ ಜಾಲ್ಲೊ ತರೀ, ಮ್ಹಾಕಾ ಫೊನ್ ಕರುನ್ ವೊವ್ಳಿಗ್ ತಾಣೆ ದಿಲ್ಲಿ. ಬೆಂಗ್ಳುರಾಂತ್ ಯು. ಆರ್. ಅನಂತ ಸರ್- ಸಾಂಗಾತಾ ಆಶೀಸ್ ನಂದಿ, ಕಿಶೋರ್‍ ಕುಮಾರಾಚಿ ಧುವ್, ಜಯಂತ ಕಾಯ್ಕಿಣಿ, ವಿವೇಕ ತಶೆಂ ಜಾಯ್ತೆ ಹೆರ್ ಮ್ಹಾ ಮನೀಸ್ ಆಸಲ್ಲೆ. ಮಾಂಚಿಯೆರ್ ಮ್ಹಜೆ ಕವಿತೆಚೊ ಕನ್ನಡ ಅನುವಾದ್ ವಿವೇಕಾನ್ ವಾಚ್ಲೊ. ಉಪ್ರಾಂತ್ ಹಾಂವೆಂ ಕೊಂಕಣಿಂತ್ ಕವಿತಾ ವಾಚಿಜಾಯ್ ಆಸಲ್ಲಿ. ವಾಚುಂಕ್ ಉಟ್ತಾನಾ ಮ್ಹಜೆ ಕವಿತೆಚೆಂ ಪೇಪರ್ ಖಂಯ್ ಪಡೊನ್ ಗೆಲೆಂ ಮ್ಹಳ್ಳೆಂಚ್ ಮ್ಹಾಕಾ ಕಳೊಂಕ್ ನಾ. ತರೀ ಗುಸ್ಪಡ್ನಾಸ್ತಾಂ, ಆನಿ ತೊಂಡಾಚೆರ್ ಕಸಲಿಚ್ ಭಿರಾಂತ್ ಹಾಡಿನಾಸ್ತಾಂ ಹಾಂವೆಂ ಕವಿತಾ ತೊಂಡ್‍ಪಾಠ್ ಸಾಂಗ್ಲಿ. ಹಾಜರ್ ಆಸಲ್ಲೆ ಸಗ್ಳೆ ಹಾಂಕ್ರೆವ್ನ್ ಗೆಲೆ. ಹಾಂವೆ ತೊಂಡ್ ಪಾಠ್ ಸಾಂಗ್ಲಿ ದೆಕುನ್ ಮ್ಹಾಕಾ ಹೊಗಳ್ಸಿಲೆಂ. ಖರಿ ಗಜಾಲ್ ಉಪ್ರಾಂತ್ ಹಾಂವೆಂ ಸಾಂಗ್ತಾನಾ, 'ಹೆಂ ಬರ್‍ಯಾಕ್ ಪಡ್ಲೆಂ' ಮ್ಹಣಾಲೊ ಅನಂತ್ ಸರ್. 'ತುಜೆಂ ಕವಿತಾ ವಾಚ್ಚೆಂ ದೆಣೆಂ ಕಿತೆಂ ಮ್ಹಣೊನ್ ಸಕ್ಡಾಂಕ್ ಕಳ್ಳೆಂ' ಮ್ಹಣಾಲೊ.
ಮ್ಹಾಕಾ 'ರೊಡ್ರಿಗಸ್' ಮ್ಹಣೊನಚ್ ಯುಆರ್ ಆಪಯ್ತಾಲೊ. ವಿವೇಕ್ ತಾಚ್ಯಾ ಘರಾ ಗೆಲ್ಲ್ಯಾವೆಳಾರ್ ಹರ್‍ಯೆಕ್ ಪಾವ್ಟಿಂ 'ತುಜೊ ಮಂಗ್ಳುರ್‍ಚೊ ಕೊಂಕಣಿ ಈಷ್ಟ್ ರೊಡ್ರಿಗಸ್ ಕಸೊ ಆಸಾ?' ಮ್ಹಣೊನ್ ವಿಚಾರ್‍ತಾಲೊ ಮ್ಹಣೊನ್ ವಿವೇಕಾನ್ ಮ್ಹಜೆಲಾಗಿಂ ಸಾಂಗಲ್ಲೆಂ ಆಸಾ. ಲೋಹಿಯಾಚ್ಯಾ ವಿಚಾರಾಂನಿ ತಾಚೆಂ ವ್ಯಕ್ತಿತ್ವ್ ಘಡಲ್ಲೆಂ. ಬದ್ಲಲ್ಲ್ಯಾ ಕಾಳಾಸಾಂಗಾತಾ ಆಪ್ಲ್ಯಾ ವಿಚಾರಾಂಚೊ ವಿಚಾರ್ ತೊ ಕರ್‍ತಾಲೊ. ತ್ಯಾದೆಕುನ್ ವಿವಾದ್ ಉಬ್ಜತಾಲೆ. ಪುಣ್ ಯುಆರ್ ವಿವಾದಾಂತ್ಲ್ಯಾನ್ ವಾಗ್ವಾದ್ ಉಬ್ಜಲ್ಯಾರ್ ಬರೆಂ ಮ್ಹಣೊನ್ ಸಮ್ಜಲ್ಲೊ ಮನೀಸ್.
ವೆವೆಗ್ಳ್ಯಾ ರಾಜಕಾರಣಿಂಕ್ ವೆವೆಗ್ಳ್ಯಾ ಸಂದರ್ಭಾಂನಿ ತಾಣೆ ಸಾಂಗಾತ್ ದಿಲ್ಲೊ - ಯುಡಿಯೂರಪ್ಪಾಕ್ ಲೆಗುನ್. ಕೊಂಕಣಿ ಭಾಶೆಚೆ ಗೋಡಿವಿಶಿಂ ಕೆನ್ನಾಂಯ್ ತಾಕಾ ಆಭಿಮಾನ್ ಆಸಲ್ಲೊ. ದೇಡ್ ವರ್ಸಾಂ ಆದಿಂ ಬೆಂಗ್ಳುರ್ ಪ್ಯಾಲೇಸ್ ಮೈದಾನಾಚೆರ್ ಕವಿಗೋಷ್ಟಿ ಮಾಂಡುನ್ ಹಾಡಲ್ಲ್ಯಾ ಸಂದರ್ಭಾರ್ ಹಾಂವೆಂ ಕವಿತಾ ವಾಚ್ತಾನಾ ಕಂಬಾರಾ ಸಾಂಗಾತಾ ಮುಕ್ಲೆ ಪಂಗ್ತಿರ್ ಬಸೊನ್ ತಾಣೆಂ ತಾಳಿಯೊ ಪೆಟಲ್ಲ್ಯೊ. ಉಪ್ರಾಂತ್ ತೊ ವೆಗಿಂಚ್ ಘರಾ ವೆತಾನಾ, ಎಂಟನಿ ಬಾರ್ಕೂರಾ ಮಾರಿಫಾತ್ ಮ್ಹಜ್ಯಾ ಕವಿತೆಚೆಂ ಪುಸ್ತಕ್ ತಾಕಾ ಹಾಂವೆಂ ಪಾವಯಿಲ್ಲೆಂ.
ಈಮೇಯ್ಲಾಂ ದ್ವಾರಿಂಯ್ ಆಮ್ಚೊ ಸಂಪರ್ಕ್ ಆಸಲ್ಲೊ. ಸುರ್ವೆ ಸುರ್ವೆರ್ ಸ್ವತಾ ತೊ ಈಮೇಯ್ಲಾಂ ಧಾಡ್ತಾಲೊ ತರೀ, ಕ್ರಮೇಣ್ ಆಪ್ಲೊ ಖಾಸ್ಗಿ ಸೆಕ್ರೆಟರಿ ಇಸ್ಮಾಯಿಲಾ ಮಾರಿಫಾತ್ ತೊ ಬರೊಂವ್ಕ್ ಲಾಯ್ತಾಲೊ. ಆಯ್ಲೆವಾರ್ ಮ್ಹಜಿಂ ಈಮೇಯ್ಲಾಂ ವಾಚುನ್, ವಿಜ್ಮಿತ್ ಪಾವೊನ್, ತಾಂತ್ಲ್ಯಾ ವಿಶಯಾಂಚೆರ್ ಕ್ರಮ್ ಘೆಂವ್ಕ್ ಜೊಕ್ತ್ಯಾ ಅಧಿಕಾರಿಂಕ್ ತಿಂ ತಾಣೆಂ ಫೊರ್ವರ್ಡ್ ಕೆಲ್ಲಿಂ. ತೊ ಎಕ್ಲೊ ಝುಜಾರಿ. ಝುಜಾರಿ ಜಾವ್ನಚ್ ನಿಮಾಣೆ ತಾಣೆ ಪ್ರಾಣ್ ಸೊಡ್ಲೊ.
ಮೋದಿ ಪ್ರಧಾನ್ ಮಂತ್ರಿ ಜಾಲೊ ಜಾಲ್ಯಾರ್ ಆಪುಣ್ ಭಾರತ್ ಸೊಡ್ನ್ ಭಾಯ್ರ್ ವೆತಾಂ ಮ್ಹಣೊನ್ ತಾಣೆಂ ಸಾಂಗಲ್ಲೆಂ. ಆತಾಂ ಖರ್‍ಯಾನ್ ಭಾರತ್ ಮಾತ್ರ್ ನ್ಹಯ್, ಸಂಸಾರ್ ಸಾಂಡುನ್ ಗೆಲೊ.ತಾಚ್ಯಾ ಬರ್ಪಾಂ ಮಾರಿಫಾತ್ ಅನಂತ್ ಸರ್ ಉರ್‍ತಾ ಹಾಂತುಂ ದುಬಾವ್ ನಾ. ಪುಣ್ ತೊ ಸಂಸಾರಾಕ್ ಮೆಕ್ಳೊ ಜಾತಾನಾ ಖರ್‍ಯಾನ್ ಆಮ್ಕಾಂ ದೂಕ್ ಭೊಗ್ತಾ.
-ಮೆಲ್ವಿನ್ ರೊಡ್ರಿಗಸ್
कन्नडाचो कादंबरिकार, कवी, कोंकणिचो ईष्ट अनंतमूर्तीसर अंतरलो
आज सकाळींच यु. आर. अनंतमूर्ती सराविशीं वॉल्टर नंदळिकेलागीं हांवें प्रस्ताप काडल्लो. दिसाक तीन पावटींडयालिसिस घेंवच्या ताच्या हटाविशीं, जिणयेलागीं ताणेकरून आसच्या झुजाविशीं हांव उलयिल्लों. दोनपारांकोंकणिच्या एका कामानिमतीं म्हज्या दायजी दुबायएकताराच्या इष्टां सांगाता बळकुंजे वचोन पाटीं येतानाअनंतमूर्ती सर अनंतांत एक जाल्लेविशीं टिविच्यापडद्याचेर खबर वाचून मन खल्ल जालें.
संस्कार आनी अवस्थे कादंबरी वाचून वर्सां सबार जाल्लीं.आयलेवार ताचें कवितेचें पुस्तक वाचल्या उपरांत, कांयतीन म्हयन्यां आदीं ताच्या प्रबंधांचें पुस्तक आचीचेवाचूंक धरल्लें. हरयेका वाक्यांत हजारांनी पुस्तकांचेंगिन्यान. असलो अनभोग म्हाका जाल्लो रवींद्रकेळेकाराचीं पुस्तकां वाचताना मात्र. पुस्तकांतलो, ताचोसांस्कृतिक बहुत्व मत्तु सृजनशीलते प्रबंध वाचून, म्हजींचिंतनां कोंकणिच्या लिपी वादाचेर घुंवोन, खंयच्यानघुंवलागलीं आनी खंय पावलीं म्हळ्ळेंच कळोंक ना.आख्खो दीस ह्या प्रबंधान सोडयिल्ल्या विचारांनी इतलोबुडोन गेलोंकी, निमाणें यु आर सराक एस्सेम्मेस धाडलें.पांच मिनुटांनी ताचें फोन आयलें आनी अरधो घंटो आमीउलयल्यांव. कोंकणिच्या लिपिच्यो गजाली आमी तर्ककेल्यो. ताचो एक प्रबंध म्हाका अशें चिंतूंक करिलागलोचिंतून ताका खुशी जाली.
साडेतीन वर्सां आदीं कविता ट्रस्टाच्या एका कार्यक्रमाकआपयजाय म्हणोन चिंतून, ताचो जांवंय विवेक शानभागामारिफात ताचो संपर्क हांवें केल्लो. ताका येवंक मनआसल्लें तरी भिगडोन गेल्ले भलायके निमतीं तवळ हेंसाध्य जालेंना. हेग्गोडुंतल्या एका साहितीक फेस्तासंदरभार तांचे समोर म्हजी कविता कन्नडांत तशेंकोंकणींत वाचचें भाग हांवें जोडल्लें. म्हजी ताणें जायतीतोखणाय केल्ली. विवेक केदळा सांगता, तेदळा खंडीततुज्या कार्यक्रमाक येतलों म्हणोन ताणे म्हाका भासदिल्ली. एक पावटीं इंदिरा गांधी ओपन युनिवर्सिटीनमांडून हाडल्ले कविगोष्टीक बेंगळुराक ताणें म्हाकावोवळीग दिल्ली. विश्वविद्यालयाचो तो स्वता चेर जाल्लोतरी, म्हाका फोन करून वोवळीग ताणे दिल्ली. बेंगळुरांतयु. आर. अनंत सर- सांगाता आशीस नंदी, किशोरकुमाराची धुव, जयंत कायकिणी, विवेक तशें जायते हेरम्हा मनीस आसल्ले. मांचियेर म्हजे कवितेचो कन्नडअनुवाद विवेकान वाचलो. उपरांत हांवें कोंकणींत कवितावाचिजाय आसल्ली. वाचूंक उटताना म्हजे कवितेचें पेपरखंय पडोन गेलें म्हळ्ळेंच म्हाका कळोंक ना. तरीगुस्पडनास्तां, आनी तोंडाचेर कसलीच भिरांत हाडिनास्तांहांवें कविता तोंडपाठ सांगली. हाजर आसल्ले सगळेहांकरेवन गेले. हांवे तोंड पाठ सांगली देकून म्हाकाहोगळसिलें. खरी गजाल उपरांत हांवें सांगताना, हें बऱ्याकपडलें म्हणालो अनंत सर. तुजें कविता वाचचें देणें कितेंम्हणोन सकडांक कळ्ळें म्हणालो.
म्हाका रोडरिगस म्हणोनच युआर आपयतालो. विवेकताच्या घरा गेल्ल्यावेळार हरयेक पावटीं तुजो मंगळुर्चोकोंकणी ईष्ट रोडरिगस कसो आसा? म्हणोन विचारतालोम्हणोन विवेकान म्हजेलागीं सांगल्लें आसा. लोहियाच्याविचारांनी ताचें व्यक्तित्व घडल्लें. बदलल्ल्याकाळासांगाता आपल्या विचारांचो विचार तो करतालो.त्यादेकून विवाद उबजताले. पुण युआर विवादांतल्यानवागवाद उब्जल्यार बरें म्हणोन समजल्लो मनीस.
वेवेगळ्या राजकारणींक वेवेगळ्या संदरभांनी ताणेसांगात दिल्लो - युडियूरप्पाक लेगून. कोंकणी भाशेचेगोडिविशीं केन्नांय ताका आभिमान आसल्लो. देड वर्सांआदीं बेंगळूर प्यालेस मैदानाचेर कविगोष्टी मांडूनहाडल्ल्या संदरभार हांवें कविता वाचताना कंबारा सांगातामुकले पंगतीर बसोन ताणें ताळियो पेटल्ल्यो. उपरांत तोवेगींच घरा वेताना, एंटनी बारकूरा मारिफात म्हज्याकवितेचें पुस्तक ताका हांवें पावयिल्लें.
ईमेयलां द्वारींय आमचो संपर्क आसल्लो. सुर्वे सुर्वेरस्वता तो ईमेयलां धाडतालो तरी, क्रमेण आपलो खासगीसेकरेटरी इसमायिला मारिफात तो बरोवंक लायतालो.आयलेवार म्हजीं ईमेयलां वाचून, विजमित पावोन,तांतल्या विशयांचेर क्रम घेवंक जोकत्या अधिकारींक तींताणें फोरवर्ड केल्लीं. तो एकलो झुजारी. झुजारी जावनचनिमाणे ताणे प्राण सोडलो.
मोदी प्रधान मंत्री जालो जाल्यार आपुण भारत सोडनभायर वेतां म्हणोन ताणें सांगल्लें. आतां खऱ्यान भारतमात्र न्हय, संसार सांडून गेलो.ताच्या बरपां मारिफातअनंत सर उरता हांतूं दुबाव ना. पुण तो संसाराक मेकळोजाताना खऱ्यान आमकां दूक भोगता.
-मेल्विन रोड्रीगस