ನಾಮ್ಣೆಚೊ ಹಿಂದಿ ಕವಿ ಕೇದಾರ್ನಾಥ್ ಸಿಂಘಾಕ್ ಜ್ಞಾನಪೀಠ್ ಭೆಟಯ್ಲಿ
ನಾಮ್ಣೆಚೊ ಹಿಂದಿ ಕವಿ ಕೇದಾರ್ನಾಥ್ ಸಿಂಘಾಕ್, ತಾಂಣಿ ಭಾರತಾಚ್ಯಾ ಸಾಹಿತ್ಯಾಕ್ ದಿಲ್ಲಿ ಮಹತ್ವಾಚಿ ದೇಣ್ಗಿ ಮಾಂದುನ್ ಘೆವ್ನ್, ಭಾರತಾಚೊ ಅಧ್ಯಕ್ಷ್ ಪ್ರಣವ್ ಮುಖರ್ಜಿನ್ ನವೆಂಬರಾಚೆ 10 ತಾರಿಕೆರ್ ಸೊಮಾರಾ ದಿಸಾ 49ವೊ ಜ್ಞಾನಪೀಠ್ ಪುರಸ್ಕಾರ್ ಭೆಟೊವ್ನ್ ಮಾನ್ ಕೆಲೊ.
ಹ್ಯಾ ಸಂದರ್ಭಾರ್ ಉಲಯಿಲ್ಲ್ಯಾ ಮುಖರ್ಜಿನ್, "ಕೇದಾರ್ನಾಥ್ ಸಿಂಘಾನ್ ಪ್ರಾಸ್ ಆನಿ ಗೀತಾಂನಿ ಮೊಳಲ್ಲಿಂ, ನಿಜಾಯ್ ತಶೆಂ ಫ್ಯಾಂಟಸಿಚ್ಯಾ ಸಂಸಾರಾಂತ್ಲಿಂ ಅಧ್ಬುತ್ ರಚ್ಣಾಂ ಆಪ್ಲ್ಯಾ ಕಾವ್ಯದ್ವಾರಿಂ ಆಮ್ಕಾಂ ದಿಲ್ಯಾಂತ್. ಆಧುನಿಕತೆಚ್ಯಾ ಸಂಸಾರಾಂತ್ಲ್ಯಾ ಪ್ರತಿಮಾಂಕ್ ಆಪ್ಣಾಯಿಲ್ಲೊ ಮನೀಸ್ ನ್ಹಯ್ ತೊ. ಪುಣ್ ತಶೆಂ ಕರ್ತಾನಾ ಪಾರಂಪಾರಿಕ್ ಗಾಂವ್ಚ್ಯಾ ಸಮುದಾಯಾಂಚ್ಯಾ ಸತಾಂಕ್ ಗೊಪಾಂತ್ ಘೆತಲ್ಲೊ ಕವಿ. ಅಶೆಂ ಕರುನ್ ಜಿವಿತ್ ಮ್ಹಳ್ಳೆಂ ತಾಣೆಂ ಬೋವ್ ಸಂತೊಸಾನ್ ಆಚರಣ್ ಕೆಲಾಂ"
ಜ್ಞಾನಪೀಠ್ ಪುರಸ್ಕಾರ್ ಸಾಹು ಶಾಂತಿ ಪ್ರಸಾದ್ ಜೈನ್ ಆನಿ ರಮಾ ಜೈನ್ ಜೊಡ್ಯಾನ್ ಸ್ಥಾಪನ್ ಕೆಲ್ಲೆಂ. ಭಾರತಾಚ್ಯಾ ಲೇಖಕಾಂನಿ ಭಾರತೀಯ್ ಸಾಹಿತ್ಯಾಕ್ ದಿಲ್ಲಿ ಕಾಣಿಕ್ ಮಾಂದುನ್ ಘೆಂವ್ಚೆಂ ಬೋವ್ ಆಪುರ್ಬಾಯೆಚೆಂ ಕಾಮ್ ಕರುನ್ ಆಸಾ.
1934 ಇಸ್ವೆಂತ್ ಉತ್ತರ್ ಪ್ರದೇಶಾಂತ್ಲ್ಯಾ ಬಲಿಯಾಂತ್ ಜಲ್ಮಲ್ಲ್ಯಾ ಸಿಂಘಾನ್ 'ಅಭಿ ಭಿಲ್ಕುಲ್ ಅಭಿ', 'ಜಮೀನ್ ಪಕ್ ರಹೀ ಹೈ', 'ಯಹಾಂ ಸೆ ದೇಖೊ', 'ಬಾಘ್', 'ಆಕಾಲ್ ಮೆಂ ಸಾರಸ್', 'ಉತ್ತರ್ ಕಬೀರ್ ಔರ್ ಅನ್ಯ್ ಕವಿತಾಯೆಂ', 'ತಾಲ್ಸ್ತಾಯ್ ಔರ್ ಸಾಯ್ಕಲ್' - ಕವಿತೆಚಿಂ ಪುಸ್ತಕಾಂ ಪರ್ಗಟ್ ಕೆಲ್ಯಾಂತ್. ಹ್ಯಾಭಾಯ್ರ್ ಸಂಪಾದಿತ್ ಕೃತಿಯೊ, ಪ್ರಬಂಧಾಂಚಿಂ ಪುಸ್ತಕಾಂ ತಾಣೆಂ ಲಿಖ್ಲ್ಯಾಂತ್. ತಾಚ್ಯೊ ಕವಿತಾ ಭಾರತೀಯ್ ಭಾಸಾಂನಿ ಮಾತ್ರ್ ನ್ಹಯ್ ಇಂಗ್ಲಿಷ್, ಸ್ಪಾನಿಶ್, ರುಶಿಯನ್, ಜರ್ಮನ್, ಹಂಗೇರಿಯನ್ ಭಾಸಾಂನೀಂಯ್ ಪರ್ಗಟ್ ಜಾಲ್ಯಾಂತ್.
ಕೇದಾರ್ನಾಥ್ ಸಿಂಘಾಕ್ ಮೈಥಿಲಿಶರಣ್ ಗುಪ್ತ್ ಸಮ್ಮಾನ್, ಕುಮಾರನ್ ಆಶಾನ್ ಪುರಸ್ಕಾರ್, ಜೀವನ್ ಭಾರತಿ ಸಮ್ಮಾನ್, ದಿನಕರ್ ಪುರಸ್ಕಾರ್, ಸಾಹಿತ್ಯ್ ಅಕಾದೆಮಿ ಪುರಸ್ಕಾರ್, ವ್ಯಾಸ್ ಸಮ್ಮಾನ್ - ಅಶೆಂ ವೆವೆಗ್ಳೆ ಪುರಸ್ಕಾರ್ ಫಾವೊ ಜಾಲ್ಯಾತ್.
ಕೇದಾರ್ನಾಥ್ ಸಿಂಘ್ ಹಿಂದಿಚೊ ಧಾ-ವೊ ಲೇಖಕ್ ಜಾಕಾ ಹೊ ಪುರಸ್ಕಾರ್ ಫಾವೊ ಜಾಂವ್ಚೊ. ಹ್ಯಾ ಆದಿಂ ಸುಮಿತ್ರಾ ನಂದನ್ ಪಂತ್, ರಾಮ್ಧಾರಿ ಸಿಂಘ್ ದಿನ್ಕರ್, ಸಚಿದಾನಂದ ವಾತ್ಸ್ಯಾಯನ್, ಮಹಾದೇವಿ ವರ್ಮಾ, ನರೇಶ್ ಮೆಹ್ತಾ, ನಿರ್ಮಲ್ ವರ್ಮಾ, ಕುಂವರ್ ನಾರಾಯನ್, ಅಮರ್ ಕಾಂತ್ ಆನಿ ಶ್ರೀ ಲಾಲ್ ಶುಕ್ಲಾ ಹಾಂಕಾಂ ಹೊ ಪುರಸ್ಕಾರ್ ಲಾಭಲ್ಲೊ.
नामणेचो हिंदी कवी केदारनाथ सिंघाक भारताच्या अध्यक्षान ज्ञानपीठ भेटयली
नामणेचो हिंदी कवी केदारनाथ सिंघाक, तांणी भारताच्या साहित्याक दिल्ली महत्वाची देणगी मांदून घेवन, भारताचो अध्यक्ष प्रणव मुखर्जिन नवेंबराचे १० तारिकेर सोमारा दिसा ४९वो ज्ञानपीठ पुरस्कार भेटोवन मान केलो.
ह्या संदरभार उलयिल्ल्या मुखर्जिन, "केदारनाथ सिंघान प्रास आनी गीतांनी मोळल्लीं, निजाय तशें फ्यांटसिच्या संसारांतलीं अधबूत रचणां आपल्या काव्यद्वारीं आमकां दिल्यांत. आधुनिकतेच्या संसारांतल्या प्रतिमांक आपणायिल्लो मनीस न्हय तो. पुण तशें करताना पारंपारीक गांवच्या समुदायांच्या सतांक गोपांत घेतल्लो कवी. अशें करून जिवित म्हळ्ळें ताणें बोव संतोसान आचरण केलां"
ज्ञानपीठ पुरस्कार साहू शांती प्रसाद जैन आनी रमा जैन जोड्यान स्थापन केल्लें. भारताच्या लेखकांनी भारतीय साहित्याक दिल्ली काणीक मांदून घेंवचें बोव आपुरबायेचें काम करून आसा.
१९३४ इस्वेंत उत्तर प्रदेशांतल्या बलियांत जल्मल्ल्या सिंघान अभी भिलकुल अभी, जमीन पक रही है, यहां से देखो, बाघ, आकाल में सारस, उत्तर कबीर और अन्य कवितायें, तालस्ताय और सायकल - कवितेचीं पुस्तकां परगट केल्यांत. ह्याभायर संपादीत कृतियो, प्रबंधांचीं पुस्तकां ताणें लिखल्यांत. ताच्यो कविता भारतीय भासांनी मात्र न्हय इंगलिष, स्पानीश, रुशियन, जर्मन, हंगेरियन भासांनींय परगट जाल्यांत.
केदारनाथ सिंघाक मैथिलिशरण गुप्त सम्मान, कुमारन आशान पुरस्कार, जीवन भारती सम्मान, दिनकर पुरस्कार, साहित्य अकादेमी पुरस्कार, व्यास सम्मान - अशें वेवेगळे पुरस्कार फावो जाल्यात.
केदारनाथ सिंघ हिंदीचो धा-वो लेखक जाका हो पुरस्कार फावो जांवचो. ह्या आदीं सुमित्रा नंदन पंत, रामधारी सिंघ दिनकर, सचिदानंद वात्स्यायन, महादेवी वर्मा, नरेश मेहता, निर्मल वर्मा, कुंवर नारायन, अमर कांत आनी श्री लाल शुकला हांकां हो पुरस्कार लाभल्लो.