ನೂತನ್ ಸಾಖರ್‌ದಾಂಡೆನ್ ಕೊಂಕಣಿ ಕವಿತಾಂಚೆಂ ದಾಲೆಂ ಗಿರೇಸ್ತ್ ಕೆಲಾಂ
ಕೊಂಕಣಿ ಕವಿತಾಂಚೆಂ ದಾಲೆಂ ಕವಯಿತ್ರಿ ನೂತನ್ ಸಾಖರ್‌ದಾಂಡೆನ್ ಆಪ್ಲ್ಯಾ ಲ್ಹವ್ಪೀಕ್ ಕವಿತಾಂನಿ ಗಿರೇಸ್ತ್ ಕೆಲಾಂ ಅಸೊ ಸೂರ್ ತಿಚ್ಯಾ ಕವಿತಾಂ ಝೆಲ್ಯಾಂ ವಯ್ಲೆ ಸಮೀಕ್ಷೆಚೆ ಕಾರ್ಯಾವಳಿಂತ್ ಸೊಧ್ನಿಬಂಧ್ ವಾಚ್ಪ್ಯಾಂನಿ ಉಕ್ತಾಯ್ಲೊ.
ಸಾಹಿತ್ಯಿಕ್ ಅಸ್ತುರಿ ಅಸ್ಮಿತಾಯ್ ಮಂಚಾನ್ ಪಣ್ಜೆ ಪಾಟ್ಯಾವಯ್ಲೆ ಸೆಂಟ್ರಲ್ ಲೈಬ್ರೆರಿಚ್ಯಾ ಸಭಾಘರಾಂತ್ ಘಡೊವ್ನ್ ಹಾಡಿಲ್ಲ್ಯಾ ನೂತನ್ ಸಾಖರ್‌ದಾಂಡೆ ಹಾಂಚ್ಯಾ 'ಜೀಣ್ ಜಾಲಿ ಕಸ್ತೂರಿ' ಆನಿ 'ಪಾಸ್ವರ್ಡ್' ಹ್ಯಾ ಕವಿತಾಂ ಝೆಲ್ಯಾಂಚ್ಯಾ ಸಮೀಕ್ಷೆಚಿ ಕಾರ್ಯಾವಳ್ ಆಯೋಜಿತ್ ಕೆಲ್ಲಿ. ಹ್ಯಾ ವೆಳಾರ್ ವೈಷ್ಣವಿ ಹೆಗ್ಡೆ, ಬಬನ್ ಭಗತ್ ಆನಿ ಅದಿತಿ ಫಡ್ತೆ ಹಾಂಣಿ ಸೊಧ್ನಿಬಂಧ್ ಸಾದರ್ ಕೆಲೆ. ಮಾಚಿಯೆರ್ ಕವಯಿತ್ರಿ ನೂತನ್ ಸಾಖರ್‌ದಾಂಡೆ, ವೈಷ್ಣವಿ ಹೆಗ್ಡೆ, ಸಾಹಿತ್ಯಿಕ್ ಅಸ್ತುರಿ ಅಸ್ಮಿತಾಯ್ ಮಂಚಾಚಿ ಅಧ್ಯಕ್ಷ್ ನಯನಾ ಆಡಾರ್ಕಾರ್ ಆನಿ ಸರಸ್ವತಿ ನಾಯ್ಕ್ ಹಾಜಿರ್ ಆಸಲ್ಲಿಂ.
ವೈಷ್ಣವಿ ಹೆಗ್ಡೆನ್ 'ಪಾಸ್ವರ್ಡ್' ಕವಿತಾಂ ಝೆಲ್ಯಾಚೆರ್ ಉಲೊವ್ಪ್ ಕೆಲೆಂ. 'ಆದೊಳಿ' ಕವಿತಾ ನಿರ್ಜೀವ್ ವಸ್ತುಚಿ ಭಾವನಾ ಮಾಂಡ್ಪಾಕ್ ಯೆಸಸ್ವಿ ಥಾರ್‍ಲ್ಯಾ. 'ತೊ ಆನಿ ತಿ' ಕವಿತಾ ದಾದ್ಲ್ಯಾ ಆನಿ ಬಾಯ್ಲೆಚೆಂ ವೆಗ್ಳೆಪಣ್ ನ್ಹಯ್ ತರ್ ಸಮಾಜ್ ದಾದ್ಲ್ಯಾಂಕ್ ಆನಿ ಬಾಯ್ಲಾಂಕ್ ಕಸೊ ಪಳಯ್ತಾ ತಾಚೆಂ ಬೇಸ್‌ಬರೆಂ ವಿಶ್ಲೇಷಣ್ ಕೆಲ್ಲ್ಯಾಚೆಂ ಹೆಗ್ಡೆನ್ ಸಾಂಗ್ಲೆಂ.
'ಮ್ಹಾಕಾ ಸುಟಿ ಜಾಯ್' ಹೆ ಕವಿತೆಂತ್ ಕವಿತೆಚೆಂ ಮಿಶ್ಕಿಲ್ ರೂಪ್ ಅನ್ಭವಾಕ್ ಮೆಳ್ತಾ. ಸ್ವತಾ ಪಾಸೂನ್, ಸಮಾಜಾ ಪಾಸೂನ್, ವಿಸವ್ ಮಾಗ್ತಾ ಹಿ ಕವಿತಾ ಕಾಳ್ಜಾಂತ್ ರಿಗ್ಪಿ ಆಸಾ. 'ಪಾಸ್ವರ್ಡ್' ಕವಿತಾಂ ಝೆಲೊ ಮ್ಹಣುನ್ ಪಳಯ್ತಾನಾ ತಾಂತುಂತ್ ಕವಿತಾಂಚೊ ಆಸ್ಪಾವ್ ಕರ್‍ತಾನಾ ಖಂಯಿಂಚ್ ತಡ್‌ಜೋಡ್ ಕೆಲ್ಲಿ ದಿಷ್ಟಿ ಪಡನಾ ಅಶೆಂ ವೈಷ್ಣವಿ ಹೆಗ್ಡೆನ್ ಸಾಂಗ್ಲೆಂ. ನೂತನ್ ಸಾಖರ್‌ದಾಂಡೆಚ್ಯೊ ಕವಿತಾ ಸರಳತಾಯೆನ್ ಆಯ್ಲ್ಯಾತ್ ಆನಿ ತ್ಯೊ ವಾಚ್ತಕೂಚ್ ಕಾಳ್ಜಾಕ್ ಥಾಕಾಯ್ ದಿವ್ಪಿ ಆಸಾತ್. 'ಪಾಸ್ವರ್ಡ್' ಹೆ ಕವಿತೆಂತ್ ಆಮಿ ಭಾಯ್ಲ್ಯಾ ಸಂವ್ಸಾರಾಕ್ ವಳ್ಖುಂಕ್ ಲಾಗ್ಲ್ಯಾತ್ ತಿತ್ಲಿಂ ಆಮಿ ಆಮ್ಚ್ಯಾ ಜಗಾಕ್ ವಿಸರ್‍ತಾತ್ ಕಾಂಯ್ ಕಿತೆಂ? ಪಾಲಕ್ ಆನಿ ಭುರ್ಗ್ಯಾಂ ಮದಿಂ ಜಿ ಪೊಕ್ಳಿ ನಿರ್ಮಾಣ್ ಜಾಲ್ಯಾ ತಿ ಹೆ ಕವಿತೆಂತ್ಲ್ಯಾನ್ ಜಾಣ್ವತಾ ಅಶೆಂ ತಿಣೆಂ ಸಾಂಗ್ಲೆಂ.
ಆಮಿ ಖೂಬ್‌ಶೆ ವಿಶಯ್ ಸಹಜತಾಯೆನ್ ಘೆತಾತ್ ತಾಚೆವಿಶಿಂ ಕವಯಿತ್ರಿನ್ ಖೊಲಾಯೆನ್, ಮಿಸ್ಕಿಲತಾಯೆನ್ ಆನಿ ನಿರಾಗಸ್ತೆನ್ ಬರಯಿಲ್ಲ್ಯಾಚೆಂ ತಾಂಣಿ ಮುಖಾರ್ ಮ್ಹಣ್ಲೆಂ.
ಹ್ಯಾ ವೆಳಾರ್ ಪತ್ರಕಾರ್ ಬಬನ್ ಭಗತ್ ಆನಿ ಆದಿತಿ ಫಡ್ತೆ ಹಾಂಣಿ ಬರಯಿಲ್ಲೆ ಸೊಧ್ನಿಬಂಧ್ ನಯನಾ ಆಡಾರ್ಕಾರಾನ್ ಸಾದರ್ ಕೆಲೆ. 'ಜೀಣ್ ಜಾಲಿ ಕಸ್ತೂರಿ' ಆನಿ 'ಪಾಸ್ವರ್ಡ್' ಕವಿತಾ ಝೆಲ್ಯಾಂಚೆರ್ ಬರಯಿಲ್ಲ್ಯಾ ಸೊಧ್‍ನಿಬಂಧಾಂತ್ ಬಬನ್ ಭಗತ್ ಮ್ಹಣ್ಟಾ: ಜೀಣ್ ಜಾಲಿ ಕಸ್ತೂರಿ ಹಾಂತುತ್ ಕಸಲೀಂಚ್ ಪ್ರಚಾರಿಕರಣಾಂ ಆನಿ ಆಕ್ರಸ್ತಾಳೆಪಣಾಂ ಆಮ್ಕಾಂ ದಿಸನಾಂತ್. ಶಾಂತ್ ಪಾವ್ಲಾಂನಿ ಮ್ಹೊವಾಳ್ ಉತ್ರಾಂನಿ ಹಾಂತುತ್ಲ್ಯೊ ಕವಿತಾ ವೆಗ್ಳ್ಯಾಚ್ ಜಗಾಂತ್ ಘೆವ್ನ್ ವತಾತ್. ಕವಯಿತ್ರಿ ಮನೀಸ್ ಜಾತಿಂತ್ಲಿಂ ಧೊಂಗಾಂಪೊಂಗಾಂ ಕವಿತೆಂತ್ ಮಾಂಡ್ತಾ. ಘೊವ್ ಬಾಯ್ಲ್ ಹಾಂಚೆ ಮದ್ಲೊ ತಾಣ್ ತಣಾವ್, ಸಾಮಾಜಿಕ್ ಆಶಯಾಂಚ್ಯೊ ಭಾವೂಕ್ ಕರ್‍ಪಿ ಸ ಕವಿತಾ ಹ್ಯಾ ಕವಿತಾ ಝೆಲ್ಯಾಂತ್ ಆಯ್ಲ್ಯಾತ್. ಜೆ ಸಹಜತಾಯೆನ್ ಜೀಣ್ ಜಾಲಿ ಕಸ್ತೂರಿ ಹಾಂತುಂತ್ ಕವಿತಾ ಆಯ್ಲ್ಯಾತ್ ತ್ಯಾಚ್ ಸಹಜತಾಯೆನ್ ಪಾಸ್ವರ್ಡ್ ಕವಿತಾ ಝೆಲ್ಯಾಂತ್ ಆಯಿಲ್ಲ್ಯೊ ದಿಷ್ಟಿ ಪಡನಾತ್. ಎಕಾ ತರೆಚೊ ರೂಕ್ಷಪಣಾ ಪಾಸ್ವರ್ಡ್ ಕವಿತಾ ಝೆಲ್ಯಾಂತ್ ದಿಸ್ತಾ. ಶಾಂತ್‌ಪಣಾನ್ ವ್ಹಾವ್ಪಿ ಉದ್ಕಾ ಭಾಶೆನ್ ವ್ಹಾವ್ಪಿ ಲ್ಹವ್ಪೀಕ್ ಅಶ್ಯೊ ಕವಿತಾ ಹಾಂತುಂತ್ ಆಸಾತ್.
ಆಪ್ಣಾಲ್ಯಾ ಕವಿತಾಂಚೊ ಉತ್ಕರ್ಷ್ ಜಾತಾ ಕಾಯ್ ನಾ ತೆ ಸಮೀಕ್ಷಾ ಕೆಲೆ ಬಗರ್ ಸಮ್ಜನಾ ಅಶೆಂ ಮತ್ ನೂತನ್ ಸಾಖರ್‌ದಾಂಡೆನ್ ಮಾಂಡ್ಲೆಂ. ಕವಿತೆಚೊ ಪ್ರವಾಸ್ ಖಂಯ್ ಪಾವ್ಲಾ ತೊ ಸಮೀಕ್ಷೆಂತ್ಲ್ಯಾನ್ ಹೊಲ್ಮತಾ ನಾಜಾಲ್ಯಾರ್ ಕವಿತಾಂಚಿ ತೊಖ್ಣಾಯ್ ಆಯ್ಕುನ್ ಆಮಿ ಖುಶ್ ಜಾವ್ನ್ ವೊಗಿ ಬಸ್ತಾತ್. ಚುಕೊ ದಾಖೊಂವ್ಕ್ ಕಾಂಯ್ ನಾಕಾ ಹೆಂ ದಡ್ಪಣ್ ಸಮೀಕ್ಷಾಕಾಂಚೆರ್ ಯೆತಾ. ಆಯ್ಚಿ ಪಿಳ್ಗಿ ಹೆಂ ದಡ್ಪಣ್ ದವರಿನಾ ಅಶೆಂ ಸಾಖರ್‌ದಾಂಡೆನ್ ಮುಖಾರ್ ಸಾಂಗ್ಲೆಂ. ಆಪ್ಣಾಲ್ಯಾ ಕವಿತಾಂನಿ ನವೆ ವಿಶಯ್ ಹಾಡ್ಪಾಚೆಂ ಯತ್ನ್ ಚಾಲು ಆಸಾ ಅಶೆಂ ತಿಣೆಂ ಸಾಂಗ್ಲೆಂ.
ಕಾರ್ಯಾವಳಿಚೆಂ ಸೂತ್ರಸಂಚಾಲನ್ ಸರಸ್ವತಿ ನಾಯಕಾನ್ ಕೆಲೆಂ. ನಯನಾ ಆಡಾರ್ಕಾರಾನ್ ಯೆವ್ಕಾರ್ ದಿಲೊ.
-'ಸುನಾಪರಾಂತ್' ದಿಸಾಳ್ಯಾಚೆ ಕುರ್ಪೆನ್.
नूतन साखरदांडेन कोंकणी कवितांचें दालें गिरेस्त केलां
कोंकणी कवितांचें दालें कवयित्री नूतन साखरदांडेन आपल्या ल्हवपीक कवितांनी गिरेस्त केलां असो सूर तिच्या कवितां झेल्यां वयले समीक्षेचे कारयावळींत सोधनिबंध वाचप्यांनी उक्तायलो.
साहित्यिक अस्तुरी अस्मिताय मंचान पणजे पाटयावयले सेंट्रल लैबरेरिच्या सभाघरांत घडोवन हाडिल्ल्या नूतन साखरदांडे हांच्या जीण जाली कस्तूरी आनी पासवर्ड ह्या कवितां झेल्यांच्या समीक्षेची कार्यावळ आयोजीत केल्ली. ह्या वेळार वैषणवी हेगडे, बबन भगत आनी अदिती फडते हांणी सोधनिबंध सादर केले. माचियेर कवयित्री नूतन साखरदांडे, वैषणवी हेगडे, साहित्यिक अस्तुरी अस्मिताय मंचाची अध्यक्ष नयना आडारकार आनी सरस्वती नायक हाजीर आसल्लीं.
वैषणवी हेगडेन पासवर्ड कवितां झेल्याचेर उलोवप केलें. आदोळी कविता निर्जीव वस्तुची भावना मांडपाक येसस्वी थारल्या. तो आनी ती कविता दादल्या आनी बायलेचें वेगळेपण न्हय तर समाज दादल्यांक आनी बायलांक कसो पळयता ताचें बेसबरें विशलेषण केल्ल्याचें हेगडेन सांगलें.
म्हाका सुटी जाय हे कवितेंत कवितेचें मिश्कील रूप अनभवाक मेळता. स्वता पासून, समाजा पासून, विसव मागता ही कविता काळजांत रिगपी आसा. पासवर्ड कवितां झेलो म्हणून पळयताना तांतूंत कवितांचो आसपाव करताना खंयींच तडजोड केल्ली दिषटी पडना अशें वैषणवी हेगडेन सांगलें. नूतन साखरदांडेच्यो कविता सरळतायेन आयल्यात आनी त्यो वाचतकूच काळजाक थाकाय दिवपी आसात. पासवर्ड हे कवितेंत आमी भायल्या संवसाराक वळखूंक लागल्यात तितलीं आमी आमच्या जगाक विसरतात कांय कितें? पालक आनी भुरग्यां मदीं जी पोकळी निर्माण जाल्या ती हे कवितेंतल्यान जाणवता अशें तिणें सांगलें.
आमी खूबशे विशय सहजतायेन घेतात ताचेविशीं कवयित्रीन खोलायेन, मिसकिलतायेन आनी निरागस्तेन बरयिल्ल्याचें तांणी मुखार म्हणलें.
ह्या वेळार पत्रकार बबन भगत आनी आदिती फडते हांणी बरयिल्ले सोधनिबंध नयना आडारकारान सादर केले. जीण जाली कस्तूरी आनी पासवर्ड कविता झेल्यांचेर बरयिल्ल्या सोधनिबंधांत बबन भगत म्हणटा: जीण जाली कस्तूरी हांतूत कसलींच प्रचारिकरणां आनी आक्रस्ताळेपणां आमकां दिसनांत. शांत पावलांनी म्होवाळ उतरांनी हांतुतल्यो कविता वेगळ्याच जगांत घेवन वतात. कवयित्री मनीस जातिंतलीं धोंगांपोंगां कवितेंत मांडता. घोव बायल हांचे मदलो ताण तणाव, सामाजीक आशयांच्यो भावूक करपी स कविता ह्या कविता झेल्यांत आयल्यात. जे सहजतायेन जीण जाली कस्तूरी हांतूंत कविता आयल्यात त्याच सहजतायेन पासवर्ड कविता झेल्यांत आयिल्ल्यो दिषटी पडनात. एका तरेचो रूक्षपणा पासवर्ड कविता झेल्यांत दिस्ता. शांतपणान व्हावपी उदका भाशेन व्हावपी ल्हवपीक अश्यो कविता हांतूंत आसात.
आपणाल्या कवितांचो उत्कर्ष जाता काय ना ते समीक्षा केले बगर समजना अशें मत नूतन साखरदांडेन मांडलें. कवितेचो प्रवास खंय पावला तो समीक्षेंतल्यान होलमता नाजाल्यार कवितांची तोखणाय आयकून आमी खुश जावन वोगी बसतात. चुको दाखोवंक कांय नाका हें दडपण समीक्षाकांचेर येता. आयची पिळगी हें दडपण दवरिना अशें साखरदांडेन मुखार सांगलें. आपणाल्या कवितांनी नवे विशय हाडपाचें यत्न चालू आसा अशें तिणें सांगलें.
कारयावळिचें सूत्रसंचालन सरस्वती नायकान केलें. नयना आडारकारान येवकार दिलो.
-सुनापरांत दिसाळ्याचे कुरपेन.