ಬಂಟ್ವಾಳ್ ಆಗ್ರಾರಾಂತ್ ಕವಿಗೋಶ್ಟಿ: ಕವಿ ಪಂಚು ಬಂಟ್ವಾಳಾಲಾಗಿಂ ಸಂವಾದ್
ಹ್ಯಾಚ್ ಸಪ್ಟೆಂಬರ್ 20 ತಾರಿಕೆರ್, ಪ್ರಗತಿಶೀಲ್ ಕೊಂಕ್ಣಿ ಲೇಖಕಾಂಚ್ಯಾ ಎಕ್ತಾರಾನ್ ಬಂಟ್ವಾಳ್ ಆಗ್ರಾರಾಂತ್ ಕವಿ 'ಜಿಯೋ ಡಿ’ಸಿಲ್ವಾ’ ಚ್ಯಾ ಘರ್ಚ್ಯಾ ಆಂಗ್ಣಾಂತ್ ಕೊಂಕ್ಣಿ ಕವಿತಾಗೋಶ್ಟಿ ಆನಿ ಕವಿ ಸಂವಾದ್ ಚಲೊವ್ನ್ ವೆಲೊ, ಕಾಣ್ಯೆಗಾರ್ ತಶೆಂಚ್ ಕವಿ ಫ್ರಾನ್ಸಿಸ್ ಸಲ್ಡಾನ್ಹಾ (ಪಂಚು ಬಂಟ್ವಾಳ್) ಸವೆಂ ಆಪುರ್ಬಾಯೆಚೊ ಕವಿತಾ ಸಂವಾದ್ ಚಲ್ಲೊ ತರ್, ಕವಿಗೋಶ್ಟಿಚೆಂ ಅಧ್ಯಕ್ಷ್ಪಣ್ ವಿಲ್ಸನ್ ಕಟೀಲಾನ್ ಘೆತಲ್ಲೆಂ.
ಸಾಂಜೆಚ್ಯಾ ಕಾರ್ಯಾಚೆ ಸುರ್ವಾತೆರ್ ಯೆವ್ಕಾರ್ ಮಾಗ್ತಾಸ್ತಾಂ, ಪ್ರಗತಿಶೀಲ್ ಕೊಂಕ್ಣಿ ಬರವ್ಪ್ಯಾಂಚೊ ಎಕ್ತಾರ್, ಹಾಚಿ ಗರ್ಜ್, ಆನಿ ದಿಶ್ಟಾವ್ಯಾವಿಶಿಂ ಮಟ್ವ್ಯಾನ್ ಉಲ್ಲೇಕ್ ಕರುನ್, ಎಕ್ತಾರಾಚೊ ಮುಖೆಲಿ ಸಮಿತಿಚೊ ಸಾಂದೊ ಜಿಯೋ ಆಗ್ರಾರಾನ್ ಎಕ್ತಾರಾಚ್ಯಾ ಫುಡಾರಾಂತ್ ಕೊಂಕ್ಣೆಂತ್ ನವೆಂ, ಭಲಾಯ್ಕೆಭರಿತ್, ಪ್ರಗತಿಶೀಲ್ ಚಿಂತಪ್ ಗರ್ಜ್ ಆಸಾ ಮ್ಹಳೆಂ. ಕವಿ ಪಂಚು ಬಂಟ್ವಾಳಾಚಿ ಮಟ್ವ್ಯಾನ್ ವೊಳಕ್ ಕರುನ್, ತಾಕಾ ತಶೆಂಚ್ ಕವಿತಾಗೋಶ್ಟಿಚೊ ಅಧ್ಯಕ್ಷ್ ವಿಲ್ಸನ್ ಕಟೀಲಾಕ್ ವೇದಿಕ್ ಆಪವ್ನ್, ಫುಲಾಂಚೆ ತುರೆ ದೀವ್ನ್ ಯೆವ್ಕಾರ್ ಮಾಗ್ಲೊ. ಹ್ಯಾ ಸಂದರ್ಭಾರ್ ಹಾಜರ್ ಆಸಲ್ಲ್ಯಾ ಮ್ಹಾಲ್ಘಡಿ ಕವಯತ್ರಿ ಗ್ಲೇಡಿಸ್ ರೇಗೊ ಆನಿ ತಶೆಂಚ್ 'ನಮಾನ್ ಬಾಳೊಕ್ ಜೆಜು' ಸಂಪಾದಕ್ ಫಾ. ಸ್ಟೀಫನ್ ಪಿರೇರಾ ಹಾಂಕಾಂಯ್ ಫುಲಾಂ ತುರೆ ದಿಲೆ.
ಕೊಂಕ್ಣಿ ಕವಿತಾ, ಕವಿತಾ-ಭೊಂವಾರ್, ತಶೆಂಚ್ ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಕೊಂಕ್ಣಿ ಕವಿತಾಶೆತಾಂತ್ ಆಯಿಲ್ಲಿ ಬದ್ಲಾವಣ್ ಪಂಚು ಬಂಟ್ವಾಳಾನ್ ಸಂವಾದಾ ವೆಳಾರ್ ಆಪ್ಲ್ಯಾಚ್ ಅನ್ಭೊಗಾ ಮುಕಾಂತ್ರ್ ಹಾಜರ್ ಆಸಲ್ಲ್ಯಾ ಮುಕಾರ್ ಉಗ್ಡಾಪೆಂ ಕೆಲಿ. ಆಪ್ಲ್ಯಾ ಉಲವ್ಪಾಂತ್ ಪಂಚು ಬಂಟ್ವಾಳಾನ್ ಕೊಂಕ್ಣಿ ಕವಿತೆಕ್ ಲೊಕಾಮೊಗಾಳ್ ಕರುಂಕ್ ಸಭಾರಾಂನಿ ಕರ್ಚ್ಯಾ ವಾವ್ರಾವಿಶಿಂ, ಪ್ರತ್ಯೇಕ್ ಜಾವ್ನ್ ಕವಿತಾ ಟ್ರಸ್ಟ್ (ಮೆಲ್ವಿನ್ ಲುದ್ರಿಕ್) ಹಾಂಚೊ ಉಲ್ಲೇಕ್ ಕರುನ್, ಆಪ್ಣಾಕ್ ಕೊಂಕ್ಣಿ ಕವಿತಾ ಬರಂವ್ಕ್ ಮೆಲ್ವಿನ್ ರೊಡ್ರಿಗಸ್, ತಶೆಂಚ್ ಮಟ್ವ್ಯೊ ಕಾಣ್ಯೊ ಬರಂವ್ಕ್ ಕೆವಿನ್ ಡಿ’ಮೆಲ್ಲೊಚೆಂ ಪ್ರೇರಣ್ ಆನಿ ಮಾರ್ಗ್ದರ್ಶನ್ ಕಾರಣ್ ಮ್ಹಣ್ ಸಾಂಗ್ಲೆಂ.
ವಿಲ್ಸನ್ ಕಟೀಲಾನ್ ಆಪುರ್ಭಾಯೆಚೆ ರಿತಿನ್ ಹಿ ಕವಿಗೋಶ್ಟಿ ಚಲವ್ನ್ ವ್ಹರ್ತಾನಾ, ಹರ್ಯೆಕಾ ಕವಿಚಿ ವೊಳಕ್ ಆಪ್ಲೆಚ್ ಶೈಲೆರ್ ಕವಿತೆರುಪಾರ್ ದೀವ್ನ್, ಹಾಜರ್ ಆಸ್ಲೆಲ್ಯಾ ಸರ್ವಾಂಚೆಂ ಮನ್ ಜಿಕ್ಲೆಂ. ರೊಬರ್ಟ್ ಫೆರ್ನಾಂಡಿಸ್ ಆಗ್ರಾರ್, ಆಲ್ವಿ ದಾಂತಿಸ್ ಪೆರ್ನಾಲ್, ಫೆಲ್ಸಿ ಲೋಬೊ ದೆರೆಬೈಲ್, ಹಿಲರಿ ಲೋಬೊ ಆಗ್ರಾರ್, ನವೀನ್ ಪಿರೇರಾ ಸುರತ್ಕಲ್, ಗಿಲ್ಬರ್ಟ್ ಮಿನೇಜಸ್ ಆಗ್ರಾರ್, ಗ್ಲೇಡಿಸ್ ರೇಗೊ, ಜಿಯೋ ಆಗ್ರಾರ್, ಜೊಸ್ಸಿ ಪಿಂಟೊ ಕಿನ್ನಿಗೋಳಿ, ಆಲ್ಫೋನ್ಸೊ ಮೆಂಡೊನ್ಸಾ ಪಾಂಗ್ಳಾ, ದಯಾ ವಿಕ್ಟರ್ ಲೋಬೊ, ಎಚ್ಚೆಮ್ ಪೆರ್ನಾಲ್, ಜೋಯೆರ್ ನೊರೊನ್ಹಾ, ಆಂಡ್ರು ಎಲ್. ಡಿ’ಕುನ್ಹಾ, ಗ್ರಿಶ್ಮಾ ವೇಗಸ್ ಮೊಡಂಕಾಪ್, ವಲ್ಲಿ ಕ್ವಾಡ್ರಸ್, ಪಂಚು ಬಂಟ್ವಾಳ್, ಆಲ್ವಿನ್ ಆಗ್ರಾರ್, ಆನಿ ವಿಲ್ಸನ್ ಕಟೀಲ್ ಹಾಣಿಂ ಆಪಾಪ್ಲ್ಯೊ ಕವಿತಾ ವಾಚ್ಲ್ಯೊ.
ಕವಿತಾಗೋಶ್ಟಿಂತ್ ಸಾಮಾಜಿಕ್ ವಿಶಯಾಂಕ್ ಮಹತ್ವ್ ದಿಲ್ಲ್ಯೊ ಕವಿತಾ ಆಸಲ್ಲ್ಯೊ. ಚಡ್ತಾವ್ ಕವಿತಾ ’ಯೆತ್ತಿನಹೊಳೆ’ ವಯ್ರ್ ಆಸಲ್ಲ್ಯೊ ತರ್, ಹೆರ್ ಕವಿತಾ ಮೋಗ್, ದುಬ್ಳಿಕಾಯ್, ದೂಖ್, ಆನಿ ಹೆರ್ ಪ್ರಕಾರಾಚ್ಯೊ ಆಸಲ್ಲ್ಯೊ.
ಕವಿತಾಗೋಶ್ಟಿ ಮಾಂಡುನ್ ಹಾಡಲ್ಲ್ಯಾಚೆರ್ ಪ್ರತಿಕ್ರಿಯಾ ದೀವ್ನ್ ಫಾ. ಸ್ಟೀಫನ್ ಪಿರೇರಾ, ಆಂಡ್ರು ಎಲ್. ಡಿ’ಕುನ್ಹಾ ಆನಿ ರೊನಾಲ್ಡ್ ಸಿಕ್ವೇರಾ (ಸಿಕೇರಾಮ್, ಸುರತ್ಕಲ್) ಹಾಂಣಿ ಶಾಭಾಸ್ಕಿ ಪಾಟವ್ನ್, ಫುಡ್ಲ್ಯಾ ದಿಸಾಂನಿ ತವಳ್ತವಳ್ ಕವಿತಾಗೋಶ್ಟಿ ಚಲವ್ನ್ ವ್ಹರುಂಕ್, ತಶೆಂಚ್ ಸಾಮಾಜಿಕ್ ವಿಶಯಾಂಚೆರ್ ಚಡಿತ್ ಮಹತ್ವ್ ದಿಂವ್ಚೆವಿಶಿಂ ಗುಮಾನ್ ವ್ಹರುಂಕ್ ಸಲ್ಹಾ ದಿಲಿ.
ಪ್ರಗತಿಶೀಲ್ ಕೊಂಕ್ಣಿ ಬರವ್ಪ್ಯಾಚ್ಯಾ ಎಕ್ತಾರಾಚೊ ಮುಖೆಲಿ ಸಮಿತಿಚೊ ಸಾಂದೊ ವಲ್ಲಿ ಕ್ವಾಡ್ರಸಾನ್ ಉಪ್ಕಾರ್ ಆಟಯ್ಲೊ. ಲಗ್ಬಗ್ 45 ಜಣ್ ಹ್ಯಾವೆಳಾರ್ ಹಾಜರ್ ಆಸಲ್ಲೆ.
ಭಾತ್ಮಿ ಆನಿ ತಸ್ವೀರ್ಯೊ: ಆಲ್ಫೋನ್ಸೊ ಮೆಂಡೊನ್ಸಾ, ಪಾಂಗ್ಳಾ
बंटवाळ आग्रारांत कविगोश्टी: कवी पंचु बंटवाळालागीं संवाद
ह्याच सप्टेंबर २० तारिकेर, प्रगतिशील कोंकणी लेखकांच्या एक्तारान बंटवाळ आग्रारांत कवी 'जियो डी'सिलवा' च्या घरच्या आंगणांत कोंकणी कवितागोश्टी आनी कवी संवाद चलोवन वेलो, काण्येगार तशेंच कवी फ्रान्सिस सल्डान्हा (पंचु बंटवाळ) सवें आपुरबायेचो कविता संवाद चल्लो तर, कविगोश्टिचें अध्यक्षपण विल्सन कटीलान घेतल्लें.
सांजेच्या काऱ्याचे सुर्वातेर येवकार मागतास्तां, प्रगतिशील कोंकणी बरवप्यांचो एकतार, हाची गर्ज, आनी दिश्टावयाविशीं मटव्यान उल्लेक करून, एकताराचो मुखेली समितिचो सांदो जियो आगरारान एकताराच्या फुडारांत कोंकणेंत नवें, भलायकेभरीत, प्रगतिशील चिंतप गर्ज आसा म्हळें. कवी पंचु बंटवाळाची मटव्यान वोळक करून, ताका तशेंच कवितागोश्टिचो अध्यक्ष विल्सन कटीलाक वेदीक आपवन, फुलांचे तुरे दीवन येवकार मागलो. ह्या संदरभार हाजर आसल्ल्या म्हालघडी कवयत्री ग्लेडिस रेगो आनी तशेंच 'नमान बाळोक जेजू' संपादक फा. स्टीफन पिरेरा हांकांय फुलां तुरे दिले.
कोंकणी कविता, कविता-भोंवार, तशेंच पाटल्या थोड्या वर्सांनी कोंकणी कविताशेतांत आयिल्ली बदलावण पंचु बंटवाळान संवादा वेळार आपल्याच अनभोगा मुकांत्र हाजर आसल्ल्या मुकार उगडापें केली. आपल्या उलवपांत पंचु बंटवाळान कोंकणी कवितेक लोकामोगाळ करूंक सभारांनी करच्या वावराविशीं, प्रत्येक जावन कविता ट्रस्ट (मेलविन लुद्रीक) हांचो उल्लेक करून, आपणाक कोंकणी कविता बरवंक ಮೆಲ್ವಿನ್ रोडरिगस, तशेंच मटव्यो काणयो बरवंक केविन डी'मेल्लोचें प्रेरण आनी मार्गदर्शन कारण म्हण सांगलें.
विल्सन कटीलान आपुरभायेचे रितीन ही कविगोश्टी चलवन व्हरताना, हरयेका कविची वोळक आपलेच शैलेर कवितेरुपार दीवन, हाजर आसलेल्या सरवांचें मन जिकलें. रोबर्ट फेर्नांडिस आगरार, आलवी दांतिस पेरनाल, फेल्सी लोबो देरेबैल, हिलरी लोबो आगरार, नवीन पिरेरा सुरत्कल, गिलबर्ट मिनेजस आगरार, ग्लेडिस रेगो, जियो आगरार, जोस्सी पिंटो किननिगोळी, आलफोन्सो मेंडोन्सा पांगळा, दया विकटर लोबो, एच्चेम पेरनाल, जोयेर नोरोन्हा, आंडरू एल. डी'कुन्हा, ग्रिशमा वेगस मोडंकाप, वल्ली क्वाड्रस, पंचु बंटवाळ, ऑल्विन आग्रार, आनी विल्सन कटील हाणीं आपापल्यो कविता वाचल्यो.
कविता गोश्टींत सामाजीक विशयांक महत्व दिल्ल्यो कविता आसल्ल्यो. चडताव कविता 'येत्तिनाहोळे' वयर आसल्ल्यो तर, हेर कविता मोग, दुबळीकाय, दूख, आनी हेर प्रकाराच्यो आसल्ल्यो.
कवितागोश्टी मांडून हाडल्ल्याचेर प्रतिक्रिया दीवन फा. स्टीफन पिरेरा, आंडरू एल. डी'कुन्हा आनी रोनालड सिकवेरा (सिकेराम, सुरत्कल) हांणी शाभासकी पाटवन, फुडल्या दिसांनी तवळतवळ कवितागोश्टी चलवन व्हरूंक, तशेंच सामाजीक विशयांचेर चडीत महत्व दिंवचेविशीं गुमान व्हरूंक सल्हा दिली.
प्रगतिशील कोंकणी बरवप्याच्या एकताराचो मुखेली समितिचो सांदो वल्ली क्वाड्रसान उपकार आटयलो. लगबग ४५ जण ह्यावेळार हाजर आसल्ले.
भात्मी आनी तस्वीऱ्यो : आल्फोन्सो मेंडोन्सा, पांगळा