Kavita Khobro

ಅಕಾಡೆಮಿಚ್ಯಾ ಮೊನೆಪಣಾ ವಿರೋಧ್ ಮೆಲ್ವಿನ್ ರೊಡ್ರಿಗಸ್ ಥಾವ್ನ್ ಪ್ರತಿಭಟನಾಚೆಂ ಪತ್ರ್

ಸಾಹಿತ್ಯ ಅಕಾಡೆಮಿಚ್ಯಾ ಮೊನೆಪಣಾ ವಿರೋಧ್ ಮೆಲ್ವಿನ್ ರೊಡ್ರಿಗಸ್ ಥಾವ್ನ್ ಪ್ರತಿಭಟನಾಚೆಂ ಪತ್ರ್

ಸ್ಮಾರ್ಟ್ ಸಿಟಿಂಚೊ ಕಾಳ್ ಆಯ್ಚೊ. ಆಮ್ಚೆಂ ಶಹರ್ ಕಶೆಂ ಆಸಜಾಯ್ ಮ್ಹಳ್ಳೆವಿಶಿಂ ಆಮ್ಚೊ ದಿಷ್ಟಾವೊ ಶಹರಾಚ್ಯಾ ಮುಕೆಲ್ಯಾಂನಿ ವಿಚಾರಲ್ಲೊ. ಖರ್‍ಯಾನ್ ಸಾಂಗ್ಚೆಂ ತರ್, ಮ್ಹಾಕಾ ಬಾಂದ್ಪಾಂ ನಾಕಾತ್, ರಸ್ತ್ಯಾವಯ್ಲ್ಯಾನ್ ರಸ್ತೆ ನಾಕಾತ್, ಮ್ಹಾಕಾ ಮ್ಹಜೆಂ ಶಹರ್ ಶಾಂತೆಚೆಂ, ಮಾಯಾಮೊಗಾಚೆಂ ಜಾವ್ನ್ ಪರಿವರ್ತನ್ ಕರ್‍ಚ್ಯಾಕ್ ಗರ್ಜೆಚಿ ಬಳ್ವಂತ್ ವೆವಸ್ಥಾ ಜಾಯ್. ಶಾಂತಿ ನಾತಲ್ಲ್ಯಾ, ಸದಾಂನೀತ್ ಝಗ್ಡಿಂ, ಖುನಿಯೊ ಜಾಂವ್ಚ್ಯಾ, ಭುಕೆಕ್ ಖಾಂವ್ಚ್ಯಾ ಖಾಣಾಚಿ ವಾಟ್ಲಿ ವೋಡ್ನ್ ಕಾಡ್ಚ್ಯಾ, ಮೊಗಾಚ್ಯಾ ಮನ್ಶಾಂ ಸಾಂಗಾತಾ ಭೊಂವಾರಾಂತ್ಲೆಂ ವಾರೆಂ ಸೆಂವ್ಚ್ಯಾಕ್ ಆಡ್ಖಳಿ ಘಾಲ್ಚ್ಯಾ ಶಹರಾಂತ್ ಚಲುಂಕಚ್ ಥರ್ಥರ್‍ಚ್ಯಾ ಹ್ಯಾ ಕಾಳಾರ್, ಹೆ ಸಿಟಿಚ್ಯಾ ಖಂಯ್ಚ್ಯಾ ರಸ್ತ್ಯಾರ್ ಹಾಂವ್ ಪಾಸಾಯೊ ಮಾರುಂ?

 

ಕಲಬುರ್ಗಿಚಿ ಖುನಿ ಜಾಂವ್, ದಾದ್ರಿಚೆಂ ಘಟನ್ ಜಾಂವ್ ಆನಿ ಆತಾಂ ಕುಲಕರ್ಣಿಚೆರ್ ಜಾಲ್ಲೊ ಹಲ್ಲೊ ಜಾಂವ್, ಸಾದ್ಯಾ ಮನ್ಶಾಕ್ ಲೆಗುನ್ ಥರ್ಥರಾಯ್ತಾ. ಯೆದೊಳ್ ಬಳ್ವಂತ್ ಮ್ಹಣುನ್ ನಾಂವಾಡಲ್ಲೆಂ ಪೆನ್ನ್ ಲೆಗುನ್ ಕಾಂಪ್ಚೆ ಸ್ಥಿತೆಕ್ ಪಾವ್ಲಾಂ. ದೇಶಾಚೊ ಮುಖೆಲಿ ಮೊನೆಪಣ್ ಘೊಟುನ್ ನಿದ್ಲಾ. ಪುಣ್ ಸಾಹಿತ್ಯ ಅಕಾಡೆಮಿ ತಸಲಿ ಸಂಸ್ಥಾ, ಜೆರಾಲ್ ಸಭಾ ಆಪಯ್ತಾ ಪರ್‍ಯಾಂತ್ ಕಿತೆಂಚ್ ಕರುಂಕ್ ಜಾಯ್ನಾ ಮ್ಹಣ್ ಹಾತ್ ಬಾಂಧುನ್ ಬಸಲ್ಲೆಂ ಮ್ಹಜೆ ತಸಲ್ಯಾ ಬರೊವ್ಪ್ಯಾಂಕ್ ವಿಜ್ಮಿತ್ ಕರಯ್ತಾ. ಅಸಲ್ಯೊ ಸಭಾ ಆಪೊಂವ್ಕ್ ಗಳಾಯ್ ಕಿತ್ಯಾ? ಯೆದೊಳ್ ಕೆದಳಾಕಿ ಅಸಲಿ ಸಭಾ ಆಪೊವ್ನ್, ಬರೊವ್ಪ್ಯಾಂಚ್ಯಾ ಹಕ್ಕಾಂವಿಶಿಂ, ದೇಶಾಂತ್ ಮಾತ್ರ್ ನ್ಹಯ್ ಆಖ್ಖ್ಯಾ ಸಂಸಾರಾಕ್ ಕಳೊಂವ್ಚೆಬರಿ ಪ್ರತಿಭಟನ್ ಆನಿ ತಾಚ್ಯಾಕೀ ವ್ಹರ್‍ತೆ ರಿತಿನ್ ಲೊಕಾಮಧೆಂ ಜಾಗ್ ಹಾಡ್ಯೆತಿ. ಲೇಖಕಾಂಕ್ ಆಸ್ಚೆ ತಾಂಕಿಚಿ ವೊಳಕ್ ರಾಜಕೀ, ದುಡ್ವಾದಿಕ್ ಸಕತ್ ಬಳಾಧಿಕ್ ಮ್ಹಣ್ ಹರ್ಧೆಂ ಬಡೊವ್ನ್ ಉಲೊಂವ್ಚ್ಯಾ ವ್ಯಕ್ತಿಂಕ್ ದಿವ್ಯೆತಿ. ಪುಣ್ ತಶೆಂ ಜಾಲೆಂನಾ. ಸಾಹಿತ್ಯ ಅಕಾಡೆಮಿ ಖಂಯ್ ಪುಣಿ, ರಾಜಕೀ ದಲ್ಲಾಳಿಂಚ್ಯಾ ದಾವ್ಲೆಂಕ್ ಬಲಿ ಜಾಲ್ಯಾ ಕೊಣ್ಣಾ ಮ್ಹಳ್ಳಿ ಭಿರಾಂತ್ ಧೊಸ್ತಾ. ತ್ಯಾ ದೆಕುನ್ ಸಾಹಿತ್ಯ ಅಕಾಡೆಮಿಚಿ ಪ್ರಶಸ್ತಿ ಜೊಡಲ್ಲ್ಯಾ ಜಾಯ್ತ್ಯಾ ಬರೊವ್ಪ್ಯಾಂನಿ, ಸಾಹಿತಿಂನಿ ತಾಂಚಿ ಪ್ರಶಸ್ತಿ ಅಕಾಡೆಮಿಕ್ ಪಾಟಿಂ ದಿಲ್ಯಾ.

ಹಾಂವೆಂ ದೋನ್ ಸಂದರ್ಭಾಂನಿ ಮ್ಹಾಕಾ ವೆಯುಕ್ತಿಕ್ ಥರಾನ್ ತಶೆಂ ಮ್ಹಜ್ಯಾ ಕವಿತಾ ಟ್ರಸ್ಟ್ ಸಂಸ್ಥ್ಯಾಖಾತೀರ್ ಆಯಿಲ್ಲೆಂ ವ್ಹಡ್ ಮಾಪಾಚೆಂ ದಾನ್ ಸ್ವೀಕಾರ್ ಕರಿನಾಸ್ತಾಂ ಇನ್ಕಾರ್ ಕೆಲ್ಲೆಂ ಆಸಾ. ಹೆಂ ಹಾಂವ್ ಸಾಂಗುಂಕ್ ಆಶೆತಾಂ ಕಿತ್ಯಾಕ್ ಮ್ಹಳ್ಯಾರ್ ಹಾಂವ್ ಮ್ಹಜಿಂಚ್ ಮ್ಹಳ್ಳಿಂ ಧೋರಣಾಂ ಆಸ್ಚೊ ಮನೀಸ್. ಮ್ಹಜ್ಯಾ ಧೋರಣಾಂಕ್ ಆಡ್ ವೆಚೆಂ ಹಾಂವ್ ಕೆನ್ನಾಂಯ್ ಪಸಂದ್ ಕರಿನಾ. ಸಾಹಿತ್ಯ ಅಕಾಡೆಮಿಚಿ ಪ್ರಶಸ್ತಿ ಪಾಟಿಂ ದಿಲ್ಲ್ಯಾಂತ್ ಲೇಖಕಾಂಚೆಂ, ಸಮಾಜಾಚೆಂ ಬರೆಪಣ್ ಜಾತಾ ಜಾಲ್ಯಾರ್ ತಶೆಂ ಕರುಂಕ್ ಹಾಂವ್ ಪಾಟಿಂ ಸರನಾ. ಕೊಂಕಣಿ ಭಾಷೆಚ್ಯಾ ಸಾಹಿತ್ಯಾ ಖಾತೀರ್ ಪ್ರಶಸ್ತಿ ಜೊಡಲ್ಲ್ಯಾಂಚಿ ಜಮಾತ್ ಹ್ಯಾಚ್ ಒಕ್ಟೋಬರ್ 14 ತಾರಿಕೆರ್ ಗೊಂಯಾಂತ್ ಆಪಯ್ಲ್ಯಾ. ಮ್ಹಾಕಾಯ್ ಆಪೊವ್ಣೆಂ ಧಾಡ್ಲಾಂ. ಥಂಯ್ಸರ್ ಮ್ಹಾಕಾ ವಚುಂಕ್ ಜಾಂವ್ಚೆಂನಾ ತರೀ ತ್ಯೆ ಸಭೆಂತ್ ಕಿತೆಂ ನಿರ್ಧಾರ್ ಜಾತಾ ತೊ ಮಾನ್ಯ್ ಕರ್‍ಚ್ಯಾಂತ್ ಹಾಂವ್ ಪಾಟಿಂ ಸರ್‍ಚೊನಾ.

ತಶೆಂ ಮ್ಹಣುನ್ ಯೆದೊಳ್ ಪಾಸುನ್ ಹಾಂವ್ ವೊಗೊಚ್ ಬಸ್ಲಾಂ ಮ್ಹಣ್ ಚಿಂತ್ಚೇಂಯ್ ನಾಕಾ. ಯೆದೊಳಚ್ ಹಾಂವೆಂ ಮ್ಹಜೆಂ ಪತ್ರ್ ಸಾಹಿತ್ಯ ಅಕಾಡೆಮಿಚೊ ಅಧ್ಯಕ್ಷ್ ವಿಶ್ವನಾಥ ಪ್ರಸಾದ್ ತಿವಾರಿಕ್ ಬರಯ್ಲಾಂ ಆನಿ ಅಕಾಡೆಮಿಚ್ಯಾ ಮೊನೆಪಣಾ ವಿರೋಧ್ ಪ್ರತಿಭಟನ್ ದಾಕಯ್ಲಾಂ. ತ್ಯಾ ಪತ್ರಾಚಿ ಪ್ರತಿ ಹಾಂಗಾಸರ್ ಲಗ್ತಿ ಕೆಲ್ಯಾ.

ಆಮ್ಚ್ಯಾ ದೇಶಾಂತ್ ಆನಿ ಪ್ರತ್ಯೇಕ್ ಥರಾನ್ ಮ್ಹಜ್ಯಾ ಗಾಂವಾಂತ್ ಶಾಂತೆಚೆಂ ವಾತಾವರಣ್ ನಿರ್ಮಾಣ್ ಜಾಂವ್ ಆನಿ ಲೇಖಕಾಂನಿ ಖಂಯ್ಚ್ಯಾಯ್ ವೊಜ್ಯಾ ಪೊಂದಾ ಚೆಂಚುನ್ ವೆಚಿ ಪರಿಸ್ಥಿತಿ ಉದೆನಾ ಜಾಂವ್.

-ಮೆಲ್ವಿನ್ ರೊಡ್ರಿಗಸ್
'ಪ್ರಕೃತಿಚೊ ಪಾಸ್' ಕೊಂಕಣಿ ಕವಿತಾ ಸಂಗ್ರಹಾ ಖಾತೀರ್ 2011 ವರ್ಸಾ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಜೊಡಲ್ಲೊ ಕವಿ.
ಅಧ್ಯಕ್ಷ್: ಕವಿತಾ ಟ್ರಸ್ಟ್

403, Venus Prime
Kadri Kambla Road
Pinto Lane, Kadri Kambla Road
Bijai, Mangalore - 575004

 


साहित्य अकाडेमिच्या मोनेपणा विरोध मेल्विन रोड्रीगस थावन प्रतिभटनाचें पत्र

स्मार्ट सिटिंचो काळ आयचो. आमचें शहर कशें आसजाय म्हळ्ळेविशीं म्हजो दिष्टावो शहराच्या मुकेल्यांनी विचारल्लो. खऱ्यान सांगचें तर, म्हाका बांदपां नाकात, रस्त्यावयल्यान रस्ते नाकात, म्हाका म्हजें शहर शांतेचें, मायामोगाचें जावन परिवर्तन करच्याक गरजेची बळवंत वेवस्था जाय. शांती नातल्ल्या, सदांनीत झगडीं, खुनियो जांवच्या, भुकेक खांवच्या खाणाची वाटली वोडन काडच्या, मोगाच्या मनशां सांगाता भोंवारांतलें वारें सेंवच्याक आडखळी घालच्या शहरांत चलुंकच थर्थरच्या ह्या काळार, हे सिटिच्या खंयच्या रस्त्यार हांव पासायो मारूं?

 

कलबुर्गिची खुनी जांव, दाद्रीचें घटन जांव आनी आतां कुलकर्णिचेर जाल्लो हल्लो जांव, साद्या मनशाक लेगून थर्थरायता. येदोळ बळवंत म्हणून नांवाडल्लें पेन्न लेगून कांपचे स्थितेक पावलां. देशाचो मुखेली मोनेपण घोटून निदला. पुण् साहित्य अकाडेमी तसली संस्था, जेराल सभा आपयता पर्यांत कितेंच करूंक जायना म्हण हात बांधून बसल्लें म्हजे तसल्या बरोवप्यांक विजमित करयता. असल्यो सभा आपोवंक गळाय कित्या? येदोळ केदळाकी असली सभा आपोवन, बरोवप्यांच्या हक्कांविशीं, देशांत मात्र न्हय आख्ख्या संसाराक कळोंवचेबरी प्रतिभटन आनी ताच्याकी व्हरते रितीन लोकामधें जाग हाडयेती. लेखकांक आसचे तांकिची वोळक राजकी, दुडवादीक सकत बळाधीक म्हण हर्धें बडोवन उलोंवच्या व्यक्तींक दिव्येती. पुण तशें जालेंना. साहित्य अकाडेमी खंय पुणी, राजकी दल्लाळिंच्या दावलेंक बली जाल्या कोण्णा म्हळ्ळी भिरांत धोसता. त्या देकून साहित्य अकाडेमिची प्रशस्ती जोडल्ल्या जायत्या बरोवप्यांनी, साहितिंनी तांची प्रशस्ती अकाडेमीक फाटीं दिल्या.

हांवें दोन संदर्भांनी म्हाका वेयुक्तीक थरान तशें म्हज्या कविता ट्रस्ट संस्थ्याखातीर आयिल्लें व्हड मापाचें दान स्वीकार करिनासतां इनकार केल्लें आसा. हें हांव सांगूंक आशेतां कित्याक म्हळ्यार हांव म्हजींच म्हळ्ळीं धोरणां आसचो मनीस. म्हज्या धोरणांक आड वेचें हांव केन्नांय पसंद करिना. साहित्य अकाडेमिची प्रशस्ती पाटीं दिल्ल्यांत लेखकांचें, समाजाचें बरेपण जाता जाल्यार तशें करूंक हांव पाटीं सरना. कोंकणी भाषेच्या साहित्या खातीर प्रशस्ती जोडल्ल्यांची जमात ह्याच ऑक्टोबर १४ तारिकेर गोंयांत आपयल्या. म्हाकाय आपोवणें धाडलां. थंयसर म्हाका वचूंक जांवचेंना तरी त्ये सभेंत कितें निर्धार जाता तो मान्य करच्यांत हांव फाटीं सरचोना.

तशें म्हणून येदोळ पासून हांव वोगोच बसलां म्हण चिंतचेंय नाका. येदोळच हांवें म्हजें पत्र साहित्य अकाडेमिचो अध्यक्ष विश्वनाथ प्रसाद तिवारीक बरयलां आनी अकाडेमिच्या मोनेपणा विरोध प्रतिभटन दाकयलां. त्या पत्राची प्रती हांगासर लगती केल्या.

आमच्या देशांत आनी प्रत्येक थरान म्हज्या गांवांत शांतेचें वातावरण निर्माण जांव आनी लेखकांनी खंयच्याय वोज्या पोंदा चेंचून वेची परिस्थिती उदेना जांव.

-मेल्विन रोड्रीगस
'प्रकृतिचो पास' कोंकणी कविता संग्रहा खातीर २०११ वर्सा साहित्य अकाडेमी प्रशस्ती जोडल्लो कवी.
अध्यक्ष: कविता ट्रस्ट

403, Venus Prime
Kadri Kambla Road
Pinto Lane, Kadri Kambla Road
Bijai, Mangalore - 575004




Title : ಅಕಾಡೆಮಿಚ್ಯಾ ಮೊನೆಪಣಾ ವಿರೋಧ್ ಮೆಲ್ವಿನ್ ರೊಡ್ರಿಗಸ್ ಥಾವ್ನ್ ಪ್ರತಿಭಟನಾಚೆಂ ಪತ್ರ್

Please fill in the form below with your feedback/ suggestions .

Fields marked with * are necessary



Disclaimer : Please write your correct name and email address. Kindly do not post any personal, abusive, defamatory, infringing, obscene, indecent, discriminatory or unlawful or similar comments. kavitaa.com/konkanipoetry.com will not be responsible for any defamatory message posted under this article.

Please note that sending false messages to insult, defame, intimidate, mislead or deceive people or to intentionally cause public disorder is punishable under law. It is obligatory on kavitaa.com / konkanipoetry.com to provide the IP address and other details of senders of such comments, to the authority concerned upon request.

Hence, sending offensive comments using kavitaa.com / konkanipoetry.com will be purely at your own risk, and in no way will kavitaa.com / konkanipoetry.com be held responsible.