Kavita Khobro

ಎಮ್. ಪಿ. ರೊಡ್ರಿಗಸ್ ಹಾಂಕಾಂ ಕವಿತಾ ಟ್ರಸ್ಟಾಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್

ಎಮ್. ಪಿ. ರೊಡ್ರಿಗಸ್ ಹಾಂಕಾಂ ಕವಿತಾ ಟ್ರಸ್ಟಾಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್
 
ಕವಿತಾ ಟ್ರಸ್ಟಾನ್ ದಿಂವ್ಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ - 2015 ಅನುವಾದ್‌ಕಾರ್ ತಶೆಂಚ್ ಕವಿ ಎಮ್. ಪಿ. ರೊಡ್ರಿಗಸ್ ಹಾಂಕಾಂ ಫಾವೊ ಜಾಲಾ. ಹೊ ಪುರಸ್ಕಾರ್ ರುಪಯ್ ಧಾ ಹಜಾರ್, ಯಾದಿಸ್ತಿಕಾ ತಶೆಂಚ್ ಪ್ರಮಾಣ್ ಪತ್ರ್ ಆಟಾಪ್ತಾ. ದುಬಾಯ್ಚ್ಯಾ ಮೆರಿಟ್ ಫ್ರೈಟ್ ಸಿಸ್ಟಮ್ಸ್ ಹಾಚೊ ಆಡಳ್ತ್ಯಾ ನಿರ್ದೇಶಕ್ ಜೋಸೆಫ್ ಮಥಾಯಸ್ ಹಾಂಣಿ ತಾಂಚ್ಯಾ ಕುಟ್ಮಾಚ್ಯಾ ನಾಂವಾರ್ ದಿಂವ್ಚೊ ಹೊ ಪುರಸ್ಕಾರ್, 2016 ಜನೆರ್ 10 ತಾರಿಕೆರ್ ಮಂಗ್ಳುರ್ ಶಕ್ತಿನಗರಾಂತ್ ಆಸ್ಚ್ಯಾ ವಿಶ್ವ ಕೊಂಕಣಿ ಕೇಂದ್ರಾಂತ್ ಚಲ್ಚ್ಯಾ ಧಾವ್ಯಾ 'ಕವಿತಾ ಫೆಸ್ತ್' ಸಂದರ್ಭಾರ್ ತಾಂಕಾಂ ದಿತಲೆ. ಸಭಾರ್ ವರ್ಸಾಂ ದುಬಾಯ್ ಶೆರಾಂತ್ ವಸ್ತಿ ಕರುನ್, ಆತಾಂ ಮಂಗ್ಳುರಾಂತ್ ಆಪ್ಲಿ ನಿವೃತ್ತ್ ಜಿಣಿ ಜಿಯೆವ್ನ್ ಆಸ್ಚ್ಯಾ ತಾಂಕಾಂ ಹಾಚ್ಯಾ ಆದಿಂ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ ಥಾವ್ನ್ ತಾಂಚ್ಯಾ 'ರುಮ್ಡಿ ಫುಲಾಂ' ಪುಸ್ತಕಾಕ್ ಅತ್ಯುತ್ತಮ್ ಕವಿತಾ ಪುಸ್ತಕ್ ಪುರಸ್ಕಾರ್ ಫಾವೊ ಜಾಲಾ.

ಕವಿ ಎಮ್. ಪಿ. ರೊಡ್ರಿಗಸಾಚಿಂ ಕವಿತಾಂ ವಾಚ್ತಾನಾ ವರಕವಿ ಲುವಿಸ್ ಮಸ್ಕರೇಞಾನ್ ದಾಕೊವ್ನ್ ದಿಲ್ಲ್ಯಾ ಕವಿತ್ವಾಚ್ಯಾ ಗುಪೀತ್ ನಂದನಾವನಾಂತ್ ಪಾಸಾಯೊ ಮಾರ್‍ಚೊ ಅನ್ಭೊಗ್ ಜಾತಾ.  ತಾಚ್ಯಾ ಕವಿತೆಂನಿ ಸಬ್ದಾಂನಿ ಉಬ್ಜಾಂವ್ಚೊ ನಾದ್, ಲಯ್, ಸಂಗೀತ್ ಆಸಾ. ಪ್ರಾಸ್ ಕಸಲ್ಯಾಚ್ ತ್ರಾಸಾವಿಣೆಂ ಕವಿತೆಚೊ ಅರ್ಥ್ ಸಾಂಗುಂಕ್ ಕವಿಚ್ಯಾ ಮನಾ ಥಾವ್ನ್ ತಾಣೆ ಪಿಂತ್ರಾಂವ್ಚ್ಯಾ ರೂಪಕಾಂಕ್ ಸಾಂಗಾತ್ ದೀಂವ್ಕ್ ದೆಂವುನ್ ಆಯಿಲ್ಲ್ಯಾಪರಿಂ ಅನ್ಭೊಗ್ ಜಾತಾ.  ಥೊಡ್ಯೊ ಕವಿತಾ ಎಕಾಚ್ ರುಪಾಚ್ಯಾ ಪಾಕ್ಳ್ಯಾಂಚ್ಯಾ ಫುಲಾಂಚಿ ಸೊಭಾಯ್ ಭೊಗಲ್ಲೊ ಅನ್ಭೊಗ್ ದಿತಾತ್ ತರ್, ಹೆರ್ ಥೊಡ್ಯಾ ಕವಿತೆಂನಿ ನವ್ಯ್ ಕವಿತೆಂನಿ ದಿಸ್ಚೆ ಸಂಕೀರ್‍ಣ್ ವಿಶಯ್ ಸಯ್ತ್ ಕವಿಚೆ ಪ್ರತಿಭೆಕ್ ಖುಶೆನ್ ಖಾಲ್ ಜಾವ್ನ್ ಕವಿಚ್ಯಾ ಶೃಂಗಾರಾಚ್ಯಾ ಉತ್ರಾಂ ಅಧೀನ್ ಜಾಲ್ಲ್ಯಾಪರಿಂ ದಿಸ್ತಾತ್. ತಾಚಿಂ ಕವಿತಾಂ ಆಯ್ಚ್ಯಾ ನವ್ಯ್ ಕವಿತೆಂಪರಿಂ ವೈಯುಕ್ತಿಕ್ ಅನ್ಭೊಗಾಕ್ ಚಡ್ ಮಹತ್ವ್ ದೀನಾಸ್ತಾಂ ಸಮಾಜಿಕ್ ಜಿಣಿಯೆಕ್ ಚಡ್ ಮಹತ್ವ್ ದಿತಾತ್.

ಅಶೆಂ ಮ್ಹಣ್ತಾನಾ ಸಮಾಜ್ ವೆಕ್ತಿಚೆರ್ ಕಸಲೊ ಪ್ರಭಾವ್ ಘಾಲ್ತಾ ಮ್ಹಣ್ಚ್ಯಾ ಚಿಂತ್ಪಾಥಾವ್ನ್ ವೆಗ್ಳೆಪಣ್ ದಾಕೊವ್ನ್ ವೆಕ್ತಿಕ್ ಸಮಾಜಾಚೊ ಆನಿ ಹೆ ಸೃಶ್ಟೆಚೊ ವಾಂಟೊ ಜಾವ್ನ್ ಕವಿನ್ ಪಳೆಂವ್ಚೆಂ ದಿಸ್ತಾ.  ನವ್ಯ್ ಕವಿತೆಂಚ್ಯಾ ಲೊಟಾಂತ್ ಆಜೂನೀ ಎಮ್. ಪಿ. ರೊಡ್ರಿಗ್ಸಾ ಥಾವ್ನ್ ವ್ಹಾಳ್ಚಿಂ ಶಾಂತ್ ಲ್ಹಾರಾಂ ಕೊಂಕ್ಣಿ ಕವಿತೆಚ್ಯಾ ಸಾಗೊರಾಕ್ ಚಡಿತ್ ಸೊಭಾಯ್ ದಿತಾತ್. ಎಮ್. ಪಿ. ರೊಡ್ರಿಗ್ಸಾನ್ ಕೊಂಕ್ಣಿ ಕವಿತೆಚ್ಯಾ ಸಾಗೊರಾಂತ್ ವ್ಹಾಳಯಿಲ್ಲ್ಯಾ ಸೊಭಾಯೆಚ್ಯಾ ಶಾಂತ್ ಲ್ಹಾರಾಂ ಖಾತೀರ್ ಆನಿ ಕೊಂಕ್ಣಿ ಕವಿತೆಚ್ಯಾ ಸುರ್ವಿಲ್ಯಾ ವಾಡಾವಳಿಚ್ಯಾ ರಂಗಾಂಕ್ ಸಾಂಬಾಳುನ್ ವೆಲ್ಲ್ಯಾ ಖಾತಿರ್, ತಾಚಿ ಕಲಾ ಆನಿ ವಾವ್ರ್ ವೊಳ್ಕುನ್ ಕವಿತಾ ಟ್ರಸ್ಟ್  ಹ್ಯಾ ಕವಿಕ್ ಮಾನ್ ಕರ್‍ತಾ.

ಕವಿಚಿ ವೊಳಕ್:

ಎಮ್.ಪಿ. ರೊಡ್ರಿಗಸ್ ಮ್ಹಳ್ಳಾ ಲಿಖ್ಣೆ ನಾಂವಾನ್ ಸಭಾರಾಂಕ್ ವೊಳ್ಕಿಚೊ ಮಾನೆಸ್ತ್ ಮರಿಯಾಣ್ ಪಾವ್ಲ್ ಲುದ್ರಿಗ್ 1946 ಇಸ್ವೆಚ್ಯಾ ಜುಲಾಯ್ 6 ತಾರಿಕೆರ್ ಗುರ್ಪುರ್‍ಚ್ಯಾ ಕೌಡುರಾಂತ್ ಜಲ್ಮಲೊ. ಮಾನೆಸ್ತ್ ಜುವಾಂವ್ ವಿಲಿಯಮ್ ಆನಿ ಮಾನೆಸ್ತಿಣ್ ಬೆನೆದಿಕ್ತಾ ಲುದ್ರಿಗ್ ಹಾಂಚ್ಯಾ ಸಾತ್ ಜಣಾಂ ಭುರ್ಗ್ಯಾಂ ಪಯ್ಕಿ ತೊ ಚವ್ತೊ. ಸಾಗ್ವೆಳೆಗಾರಾಂಚ್ಯಾ ಕುಟ್ಮಾಂತ್ ಜಲ್ಮಲ್ಲೊ ಹೊ ಲೇಖಕ್ ಸೃಷ್ಠೆಚೊ ಪ್ರೇಮಿ.

ಸುರ್ವಿಲೆಂ ಶಿಕಪ್ ಗಾಂವಾಂತ್ ಸಂಪಯ್ತಚ್ ಮುಂಬಯ್ ವಿಶ್ವವಿದ್ಯಾಲಯಾ ಥಾವ್ನ್ ಅರ್ಥ ಶಾಸ್ತ್ರಾಂತ್ ಸನದ್ ತಾಣೆ ಜೊಡ್ಲಿ. ಸಾತ್ ವರ್ಸಾಂ ಭರ್ ಮುಂಬಂಯ್ತ್ ನವ್ಕರಿ ಕರುನ್ ಆಸ್ತಾನಾ ಕಿರೆಂ ಗಾಂವ್ಚ್ಯಾ ಜಾಸಿಂತಾ ಡಿ’ಕೋಸ್ತಾ ಲಾಗಿಂ ಲಗಿನ್ ಆನಿ ಲಗ್ನಾ ಜಿವಿತಾಂತ್ ತೆಗಾಂ ಭುರ್ಗಿಂ – ಜೇನ್, ಜೊನಾಥನ್ ಆನಿ ಜೊಸ್ಲಿನ್.

ಬರೊ ಫುಡಾರ್ ಸೊಧುನ್ 1979 ಇಸ್ವೆಂತ್ ದುಬಾಯ್ ಗಾಂವಾಕ್ ಪಯ್ಣ್ ಆನಿ ಥಂಯ್ಚ್ಯಾ ಫಾಮಾದ್ ದುಬಾಯ್ ಆಲ್ಯೂಮಿನಿಯಮ್ ಕಂಪೆನಿಂತ್ ತೀಸ್ ವರ್ಸಾಂಚ್ಯಾ ವಾವ್ರಾ ಉಪ್ರಾಂತ್ ನಿವೃತ್ ಜಾವ್ನ್ ಆತಾಂ ಸ ವರ್ಸಾಂ ದರ್ಯಾಂ ಮಾಯ್ ಗಾಂವಾಂತ್ ವಸ್ತಿ ಕರುನ್ ಆಸಾ.

ತರ್ನೆ ಪ್ರಾಯೆರ್ ಥಾವ್ನ್ ಕೊಂಕ್ಣಿ ಸಂಗೀತಾಂತ್ ಆನಿ ಸಾಹಿತ್ಯಾಂತ್ ಅಭಿರುಚ್ ಆಸ್ಲಲ್ಯಾ ಲೇಖಕಾಕ್ ದೆ.ಸಿರಿವಂತಾನ್ ಲಿಖುಂಕ್ ಉತ್ತೇಜನ್ ದಿಲೆಂ, ದೆ. ಮೊನ್ಸಿಞೊರ್ ಸಿಲಾ ಮಿನೇಜಾನ್ ಕವಿತೆಚೊ ಪಾಠ್ ಶಿಕಯ್ಲೊ ಆನಿ  ದೆ.ಯಾಜಕ್ ಜೆ.ಎಸ್.ಟಿ. ಲುದ್ರಿಗ್ ಬಾಪಾನ್ ಸಂಗೀತಾಂತ್ ಮಾರ್ಗದರ್ಶನ್ ದಿಲೆಂ.

'ಕಾಣಿಕ್’, ’ಪಯ್ಣಾರಿ’, ’ದಿವೊ’ ’ಸೆವಕ್’ ಆನಿ ಹೆರ್ ಪತ್ರಾಂನಿ ತಾಚಿಂ ಸಾಮಾಜಿಕ್ ಆನಿ ವೈಚಾರಿಕ್ ಲೇಖನಾಂ ತಶೆಂಚ್ ಮಟ್ವ್ಯೊ ಕಾಣಿಯೊ ಪ್ರಕಟ್ ಜಾಲ್ಯಾತ್. ಭಕ್ತಿಕ್ ಗಿತಾಂ ಆನಿ ಸಂದರ್ಭಾಂಕ್ ಸರಿ ಜಾವ್ನ್ ಥೊಡಿಂ ಪದಾಂ ಘಡುನ್ ತಾಣೆ ತಾಳೆ ಬಸಯ್ಲ್ಯಾತ್. ಕೊಂಕ್ಣಿ ಸಂಗೀತ್ ಪಂಗ್ಡಾಂಕ್ ತಾಣೆ ತರ್ಬೆತಿ ದಿಲ್ಯಾ ಆನಿ ಗಾಯಾನ್ ಸ್ಪರ್ಧ್ಯಾಂನಿ ವೊರಯ್ಣಾರ್ ಜಾವ್ನ್ ಸೆವಾ ದಿಲ್ಯಾ. ದೆ. ಜೆರೊಮ್ ಡಿ’ಸೋಜಾಚ್ಯಾ ಗಾಯಾನ್ ಪಂಗ್ಡಾಂತ್ ಆಕಾಶ್‌ವಾಣಿ ಮುಂಬಯ್ ಆನಿ ಎಚ್.ಎಮ್.ವಿ. ಧ್ವನಿ ಮುದ್ರಣ್ ಸಂಸ್ಥ್ಯಾಂತ್ ಧ್ವನಿ-ಮುದ್ರಿತ್ ಜಾಲ್ಲ್ಯಾ ಪದಾಂನಿ ತಾಣೆ ತಾಳೊ ಮೆಳಯ್ಲಾ. ಆಕಾಶ್‍ವಾಣಿ ಮಂಗ್ಳುರ್ ಕೇಂದ್ರಾದ್ವಾರಿಂ ತಾಚೆಂ ಉಲೊವ್ಪ್ ಪ್ರಸಾರ್ ಜಾಲಾಂ.

’ಕಾಂಟ್ಯಾಂಚೊ ಖುರಿಸ್’ ಆನಿ ’ನಿಮಾಣಿ ಆಶಾ’ ಪುಸ್ತಕಾ ರುಪಾರ್ ಆನಿ ’ಮೊಗಾಚಿ ಧಾಂವ್’ ಸಾಂಕ್ಳೆ ರುಪಾರ್ ಪರ್ಗಟ್ ಜಾಲ್ಲ್ಯೊ ತಾಚ್ಯೊ ಅನುವಾದಿತ್ ಕಾದಂಬರಿ. ಕವಿತಾ ಪ್ರಕಾಶನಾನ್ ಪ್ರಗಟ್ ಕೆಲ್ಲ್ಯಾ ತಾಚ್ಯಾ ’ರುಮ್ಡಿ ಫುಲಾಂ’ ಕವಿತಾ ಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ ಥಾವ್ನ್ ಪುರಸ್ಕಾರ್ ಲಾಭ್ಲಾ. ವೆಗಿಂಚ್ ತಾಚೆಂ ದುಸ್ರೆಂ ಕವಿತಾ ಪುಸ್ತಕ್ ’ರಸ್ತ್ಯಾ ದೆಗೆಚಿಂ ಫುಲಾಂ’ ಉಜ್ವಾಡ್ ದೆಖ್ಚ್ಯಾರ್ ಆಸಾ.

ಕೊಂಕಣಿ ಕವಿತೆಚ್ಯಾ ಸಮಗ್ರ್ ವಾಡಾವಳಿ ಖಾತೀರ್ ವಾವುರ್‍ಚ್ಯಾ ಕವಿತಾ ಟ್ರಸ್ಟಾನ್ ಹೊ ಪುರಸ್ಕಾರ್ ಹ್ಯಾ ಆದಿಂ ಸಾತ್ ಜಣಾಂಕ್ ಫಾವೊ ಕೆಲಾ. ತಾಂಚಿಂ ನಾಂವಾಂ ಹೆಪರಿಂ ಆಸ್ತಾತ್; ಅರುಣಾ ರಾವ್ ಕುಂದಾಜೆ, ಮುಂಬಯ್ (2008), ಲಿಯೊ ಡಿಸೋಜಾ (ಕಾವ್ಯದಾಸ್) ಮಂಗ್ಳುರ್ (2009), ಕಾಶಿನಾಥ್ ಶಾಂಭಾ ಲೊಲಿಯೆಂಕಾರ್, ಗೊಂಯ್ (2010), ಪಿ.ಎನ್. ಶಿವಾನಂದ ಶೆಣೈ, ಕೊಚ್ಚಿ (2011), ರಾಜಯ್ ಪವಾರ್, ಗೊಂಯ್ (2012), ಯೂಸುಫ್ ಅ. ಶೇಖ್, ಗೊಂಯ್ (2013), ಇಕ್ಬಾಲ್ ಸಯೀದಿ, ಭಟ್ಕಳ್ (2014).


एम. पी. रोड्रीगस हांकां कविता ट्रस्टाचो मथायस कुटम कविता पुरस्कार

कविता ट्रस्टान दिंवचो मथायस कुटम कविता पुरस्कार - २०१५ अनुवादकार तशेंच कवी एम. पी. रोड्रीगस हांकां फावो जाला. हो पुरस्कार रुपय धा हजार, यादिस्तिका तशेंच प्रमाण पत्र आटापता. दुबायच्या मेरिट फ्रैट सिस्टम्स हाचो आडळत्या निर्देशक जोसेफ मथायस हांणी तांच्या कुटमाच्या नांवार दिंवचो हो पुरस्कार, २०१६ जनेर १० तारिकेर मंगळूर शक्तिनगरांत आसच्या विश्व कोंकणी केंद्रांत चलच्या धाव्या 'कविता फेस्त' संदर्भार तांकां दितले. सभार वर्सां दुबाय शेरांत वस्ती करून, आतां मंगळुरांत आपली निवृत्त जिणी जियेवन आसच्या तांकां हाच्या आदीं कर्नाटक कोंकणी साहित्य अकाडेमी थावन तांच्या 'रुमडी फुलां' पुस्तकाक अत्युत्तम कविता पुस्तक पुरस्कार फावो जाला.

कवी एम. पी. रोड्रीगसाचीं कवितां वाचताना वरकवी लुविस मस्करेञान दाकोवन दिल्ल्या कवित्वाचा गुपीत नंदनावनांत पासायो मारचो अनभोग जाता. ताच्या कवितेंनी सब्दांनी उबजांवचो नाद, लय, संगीत आसा. प्रास कसलयाच त्रासाविणें कवितेचो अर्थ सांगूंक कविच्या मना थावन ताणे पिंत्रांवच्या रूपकांक सांगात दीवंक देंवून आयिल्ल्यापरीं अनभोग जाता. थोड्यो कविता एकाच रुपाच्या पाकळ्यांच्या फुलांची सोभाय भोगल्लो अनभोग दितात तर, हेर थोड्या कवितेंनी नव्य कवितेंनी दिसचे संकीर्ण विशय सयत कविचे प्रतिभेक खुशेन खाल जावन कविच्या शृंगाराच्या उत्रां अधीन जाल्ल्यापरीं दिसतात. ताचीं कवितां आयच्या नव्य कवितेंपरीं वैयुक्तीक अनभोगाक चड महत्व दीनासतां समाजीक जिणियेक चड महत्व दितात.

अशें म्हणताना समाज वेक्तिचेर कसलो प्रभाव घालता म्हणच्या चिंतपाथावन वेगळेपण दाकोवन वेक्तीक समाजाचो आनी हे सृश्टेचो वांटो जावन कवीन पळेंवचें दिसता. नव्य कवितेंच्या लोटांत आजूनी एम. पी. रोड्रिगसा थावन व्हाळचीं शांत ल्हारां कोंकणी कवितेच्या सागोराक चडीत सोभाय दितात. एम. पी. रोड्रिगसान कोंकणी कवितेच्या सागोरांत व्हाळयिल्ल्या सोभायेच्या शांत ल्हारां खातीर आनी कोंकणी कवितेच्या सुर्विल्या वाडावळिच्या रंगांक सांबाळून वेल्ल्या खातीर, ताची कला आनी वावर वोळकून कविता ट्रस्ट ह्या कविक मान करता.

कविची वोळक:

एम.पी. रोड्रीगस म्हळ्ळा लिखणे नांवान सभारांक वोळकिचो मानेस्त मरियाण पावल लुद्रिग १९४६ इसवेच्या जुलाय ६ तारिकेर गुरपुरच्या कौडुरांत जल्मलो. मानेस्त जुवांव विलियम आनी मानेस्तिण बेनेदिक्ता लुद्रिग हांच्या सात जणां भुरग्यां पयकी तो चवतो. सागवेळेगारांच्या कुटमांत जल्मल्लो हो लेखक सृष्टेचो प्रेमी.

सुर्विलें शिकप गांवांत संपयतच मुंबय विश्वविद्यालया थावन अर्थ शास्त्रांत सनद ताणे जोडली. सात वर्सां भर मुंबंयत नवकरी करून आसताना किरें गांवच्या जासिंता डी'कोसता लागीं लगीन आनी लग्ना जिवितांत तेगां भुरगीं - जेन, जोनाथन आनी जोसलीन.

बरो फुडार सोधून १९७९ इस्वेंत दुबाय गांवाक पयण आनी थंयच्या फामाद दुबाय आल्यूमिनियम कंपेनींत तीस वर्सांच्या वावरा उपरांत निवृत जावन आतां स वर्सां दऱ्यां माय गांवांत वस्ती करून आसा.

तरने प्रायेर थावन कोंकणी संगीतांत आनी साहित्यांत अभिरूच आसलल्या लेखकाक सिरिवंतान लिखूंक उत्तेजन दिलें, मोन्सिञोर सिला मिनेजान कवितेचो पाठ शिकयलो आनी याजक जे.एस.टी. लुद्रिग बापान संगीतांत मार्गदर्शन दिलें.

'काणीक', 'पयणारी', 'दिवो' 'सेवक' आनी हेर पत्रांनी ताचीं सामाजीक आनी वैचारीक लेखनां तशेंच मटव्यो काणियो प्रकट जाल्यात. भक्तीक गितां आनी संदर्भांक सरी जावन थोडीं पदां घडून ताणे ताळे बसयल्यात. कोंकणी संगीत पंगडांक ताणे तरबेती दिल्या आनी गायान स्परध्यांनी वोरयणार जावन सेवा दिल्या. जेरोम डीसोजाच्या गायान पंगडांत आकाशवाणी मुंबय आनी एच.एम.वी. ध्वनी मुद्रण संस्थ्यांत ध्वनी-मुद्रीत जाल्ल्या पदांनी ताणे ताळो मेळयला. आकाशवाणी मंगळूर केंद्रादवारीं ताचें उलोवप प्रसार जालां.

'कांट्यांचो खुरीस' आनी 'निमाणी आशा' पुस्तका रुपार आनी 'मोगाची धांव' सांकळे रुपार परगट जाल्ल्यो ताच्यो अनुवादीत कादंबरी. कविता प्रकाशनान प्रगट केल्ल्या ताच्या 'रुमडी फुलां' कविता पुस्तकाक कर्नाटक कोंकणी साहित्य अकाडेमी थावन पुरस्कार लाभला. वेगींच ताचें दुसरें कविता पुस्तक 'रस्त्या देगेचीं फुलां' उजवाड देखच्यार आसा.

कोंकणी कवितेच्या समग्र वाडावळी खातीर वावुरच्या कविता ट्रस्टान हो पुरस्कार ह्या आदीं सात जणांक फावो केला. तांचीं नांवां हेपरीं आसतात; अरुणा राव कुंदाजे, मुंबय (२००८), लियो डिसोजा (काव्यदास) मंगळूर (२००९), काशिनाथ शांभा लोलियेंकार, गोंय (२०१०), पी.एन. शिवानंद शेणै, कोचची (२०११), राजय पवार, गोंय (२०१२), यूसुफ अ. शेख, गोंय (२०१३), इकबाल सयीदी, भटकळ (२०१४)


Comment on this article

  • Ivan Walder & Fly, Mangalore

    Sat, Dec 19 2015

    Congratulations sir. Every word which comes out of you is precious and we know, no one can beat you when it comes to nature.

    DisAgree Agree Reply

  • Ajit Kumar, Mangalore

    Sat, Dec 19 2015

    I have known Mr.M P Rodrigues for quite some time. he is such a humble, humane down to earth person, I came to know his poetic abilities only through today's article by Daijiworld. I know he is a brave fighter and I wish him all the best!Thank you Kavita Trust for choosing him for the annual award.

    DisAgree Agree Reply

  • Renny Lobo (nee Rodrigues), Gurpur Kaikamba/ Abu Dhabi

    Sat, Dec 19 2015

    I am thrilled that my dear brother Paulu dattu is chosen for the Kavita Trust Mathias Family Poetry Award. Man of few words, an ideal son to my late parents, and a wonderful brother that I would love to have given another life. Dear Pallattu, on behalf of my family (Merlyn, myself, Melissa/Roshan & Giselle) congratulations to you.

    DisAgree Agree Reply

  • Dr.Henry Fernandes, Rosario, MANGALORE

    Sat, Dec 19 2015

    CONGRATULATIONS, mr M.Paul Rodrigues on kavita konkani poetry award ion. we wish many more laurels come in the future.May god grant you good health and long life to inspire our young budding konkany writers. Dr Henry dr Meera and children dr Hermina and shawn. coopervile Rosario, mangalore

    DisAgree Agree Reply

  • Melvin Peres, Kaikamba (Bendore)

    Sat, Dec 19 2015

    PORBHIN THUKA PALLU DATTU!!! FUDEIN SORV BOREN MAGTHAN!!!BORI BHOLAIKI, SOMADHAN THUMCHEN ZANV!!! KAVITHA SADANCH VHALON URON KAWDOORANTHLYA VHALA BORI!!!!

    DisAgree Agree Reply

  • Gilbert Martis, Pernal/Dubai

    Sat, Dec 19 2015

    Congratulations dear Paul Bavoji. May the Lord keep you in good health. Wish you and your family Happy Christmas and New Year.

    DisAgree Agree Reply

  • Alwin & Jacintha Lobo, Bendoorwell

    Sat, Dec 19 2015

    Dear Paul Dattoo Congratulations to you for achieving Kavita Trust Award. Truly you deserve the best. Best wishes from: Alwin ,Jessy , Anston & Vania

    DisAgree Agree Reply


Title : ಎಮ್. ಪಿ. ರೊಡ್ರಿಗಸ್ ಹಾಂಕಾಂ ಕವಿತಾ ಟ್ರಸ್ಟಾಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್

Please fill in the form below with your feedback/ suggestions .

Fields marked with * are necessary



Disclaimer : Please write your correct name and email address. Kindly do not post any personal, abusive, defamatory, infringing, obscene, indecent, discriminatory or unlawful or similar comments. kavitaa.com/konkanipoetry.com will not be responsible for any defamatory message posted under this article.

Please note that sending false messages to insult, defame, intimidate, mislead or deceive people or to intentionally cause public disorder is punishable under law. It is obligatory on kavitaa.com / konkanipoetry.com to provide the IP address and other details of senders of such comments, to the authority concerned upon request.

Hence, sending offensive comments using kavitaa.com / konkanipoetry.com will be purely at your own risk, and in no way will kavitaa.com / konkanipoetry.com be held responsible.