ಮುಂಬಯಾಂತ್ ಕಥಾಪಾಠ್ ಆನಿ ಕೊಂಕ್ಣಿ ಕವಿಸಮ್ಮೇಳ್
ಪ್ರಗತಿಶೀಲ್ ಕೊಂಕ್ಣಿ ಬರಯ್ಣಾರಾಂಚ್ಯಾ ಎಕ್ತಾರಾಚ್ಯಾ ಮುಖೇಲ್‌ಪಣಾಖಾಲ್ ಕೊಂಕ್ಣಿ ಮಟ್ವ್ಯಾ ಕಾಣಿಯಾಂಚೆರ್ ಆದೇಸಾಚೆಂ ಅಧ್ಯಯನ್ ಕಾಮಾಸಾಳ್, ಹ್ಯಾಚ್ ಫೆಬ್ರೆರಾಚೆ 14 ತಾರಿಕೆರ್, ಮೀರಾ ರೋಡ್ ಫಿರ್ಗಜೆಚ್ಯಾ ಸಭಾಸಾಲಾಂತ್ ಮಾಂಡುನ್ ಹಾಡ್ಲೆಂ.
ಕಾಮಾಸಾಳಾಚೆಂ ಉಗ್ತಾವಣ್ ಕರುನ್ ಮಾ|ಜೋಕಿಮ್ ರೊಡ್ರಿಗಸ್ ಮ್ಹಣಾಲೊ; "ಮ್ಹಜ್ಯಾ ಮಿಸಾಂವಾಕ್ ಲಾಗುನ್ ಹಾಂವ್ ಸಂಸಾರಾಚ್ಯಾ ವೆವೆಗ್ಳ್ಯಾ ದೇಶಾಂನಿ ಭೊಂವ್ಲಾಂ, ವೆವೆಗ್ಳ್ಯೊ ಭಾಸೊ ಉಲಯ್ಲಾಂ ತರ್‌ಯೀ, ಮ್ಹಜ್ಯಾ ಕಾಳ್ಜಾಂತ್ಲಿ ಭಾಸ್ ಆಜೂನ್ ಕೊಂಕಣಿ ಆನಿ ತಿ ಮರಾಪಾಸುನ್ ಮ್ಹಜಿ ಆವಯ್‌ಭಾಸ್ ಜಾವ್ನ್ ಉರ್‍ತಲಿ"
ಸ್ವಾಗತ್ ಉತ್ರಾಂನಿ, ಪ್ರಗತಿಶೀಲ್ ಕೊಂಕ್ಣಿ ಎಕ್ತಾರಾಚ್ಯಾ ಮುಂಬಯ್ ಪಂಗ್ಡಾಚೊ ಮುಖೆಲ್ ಸಂಯೋಜಕ್ ಜೋಯ್ ಪಾಲಡ್ಕಾ "ಬದ್ಲುನ್ ಯೆಂವ್ಚೆ ಪರಿಗತೆಂತ್ ಆನಿ ಫಕತ್ ತೆ ಬದ್ಲಾವಣೆಕ್ ದೆಖೊನ್ ಬಸ್ಚೆಪ್ರಾಸ್, ಎಕ್ವಟಿತ್ ಜಾವ್ನ್ ಕೊಂಕ್ಣಿ ಕಾಮಾಚೊ ಇರಾದೊ ತಶೆಂಚ್ ಮಿಸಾಂವ್ ಹಾತಿಂ ಘೆತ್ಲೆಂ ತರ್, ತಸಲೊ ವಾವ್ರ್ ಕೊಂಕ್ಣಿ ಸಾಹಿತ್ಯಾಕ್ ಉಪ್ಕಾರ್‍ತಲೊ" ಮ್ಹಣಾಲೊ.
ಪ್ರಮುಖ್ ಉಲವ್ಪಿ ಜಾವ್ನ್ ಆಯಿಲ್ಲ್ಯಾ ಡಾ|ಎಡ್ವರ್ಡ್ ನಜ್ರೆತಾಚಿ ವೊಳಕ್ ವಲ್ಲಿ ಕ್ವಾಡ್ರಸಾನ್ ಕರುನ್ ದಿತಚ್, ಡಾ|ನಜ್ರೆತಾನ್ ’ಹಾಂವ್ ಮಟ್ವ್ಯೊ ಕಥಾ ಕಶ್ಯೊ ಬರಯ್ತಾಂ’ ಮ್ಹಳ್ಳ್ಯಾ ವಿಷಯಾಚೆರ್ ಸವಿಸ್ತಾರ್ ರಿತಿನ್ ಆಪ್ಲಿ ಜಾಣ್ವಾಯ್ ಆನಿ ಮಾಹೆತ್ ವಾಂಟುನ್ ಘೆತ್ಲಿ.
ಉಪ್ರಾಂತ್ ನೆರಿ ನಜ್ರೆತಾನ್ ವಲ್ಲಿ ಕ್ವಾಡ್ರಸಾಚ್ಯಾ ಕಾಣಿಯಾಂಚ್ಯಾ ವಾವ್ರಾಚಿ ವೊಳಕ್ ಕರುನ್ ದಿಲಿ ಆನಿ ’ಸಾಹಿತ್ಯ್ ಮ್ಹಳ್ಯಾರ್ ಕಿತೆಂ, ಮಟ್ವ್ಯೊ ಕಾಣಿಯೊಂ ತಾಂತ್ರಿಕ್ ರಿತಿನ್ ಕಶ್ಯೊ ಆಸುಂಕ್ ಜಾಯ್, ಮಟ್ವ್ಯಾ ಕಾಣಿಯಾಂಚೆ ವರ್ಗ್, ಪ್ರಕಾರ್ ವಿಶ್ಯಾಂತ್ ಸವಿಸ್ತಾರ್ ಜಾಣ್ವಾಯ್ ಆಟಾಪ್ಚೆಂ ಅಧ್ಯಯನ್ ವಲ್ಲಿ ಕ್ವಾಡ್ರಸಾನ್ ಚಲವ್ನ್ ವೆಲೆಂ. ಹ್ಯಾ ಅಧ್ಯಯನಾ ಖಾತಿರ್ ಹಿಂದಿಂತ್ಲಿ ’ನಮಕ್ ಕ ದರೊಗಾ (ಮುನ್ಶಿ ಪ್ರೇಮ್‌ಚಂದಾಚಿ ಮಟ್ವಿ ಕಥಾ)’, ಇಂಗ್ಲಿಶಾಂತ್ಲಿ ’ದ ಬೆಟ್ (ಆಂಟೊನಿ ಚೆಕೋಫಾಚಿ ಮಟ್ವಿ ಕಥಾ)’ ತಶೆಂಚ್ ಕಾನಡಿಚಿ ’ಕೊನೆಯ ಗಿರಾಕಿ (ನಿರಂಜನಾಚಿ ಮಟ್ವಿ ಕಥಾ)’ ವಿಂಚ್ಲ್ಯೊ ತಶೆಂಚ್ ಹ್ಯಾ ಕಾಣಿಯಾಂನಿ ಸಾಹಿತಿಕ್ ತಶೆಂಚ್ ಸಾಮಾಜಿಕ್ ಶೆತಾಂತ್ ಉಟಯಿಲ್ಲ್ಯಾ ಚಿಂತ್ಪಾಚೆರ್ ಆರ್ಸೊ ಧರ್‍ಲೊ.
ತ್ಯಾ ಉಪ್ರಾಂತ್ಲ್ಯಾ ಸಂವಾದಾಂತ್ ಅನಂತ್ ಅಮ್ಮೆಂಬಳ್, ಜೋಯ್ ಪಾಲಡ್ಕಾ, ಗ್ರೆಗೊರಿ ನಿಡ್ಡೋಡಿ ಆನಿ ಹಿಲರಿ ಡಿ’ಸಿಲ್ವಾ ಹಾಂಣಿ ಭಾಗ್ ಘೆತ್ಲೊ. ದಿವೊ ಪತ್ರಾಚೊ ಸಂಪಾದಕ್ ಮಾನೆಸ್ತ್ ಲೊರೆನ್ಸ್ ಕುವೆಲ್ಹೊ, ಆನಿ ಮಾನೆಸ್ತಿಣ್ ಸುಜಾನಾ ಕುವೆಲ್ಹೊ, ಹ್ಯಾರಿಬೋಯ್, ಆನ್ಸಿ ಪಾಲಡ್ಕಾ, ಲಾರೆನ್ಸ್ ಡಿ’ಸೋಜ ಕಮಾನಿ, ಜೋನ್ ಕ್ರಾಸ್ತಾಸವೆಂ ಲಗ್ಬಗ್ ಚಾಳೀಸ್ ಜಣಾಂನಿ ವಾಂಟೊ ಘೆತ್ಲೊ.
ಹಿಲರಿ ಡಿ’ಸಿಲ್ವಾನ್ ಉಪ್ಕಾರ್ ಬಾವುಡ್ಲೊ.
ಕವಿಸಮ್ಮೇಳ್ (ಕವಿಸಂವಾದ್ ಆನಿ ಜೆ.ಬಿ.ಸಿಕ್ವೇರಾ ಸ್ಮಾರಕ್ ಕವಿತಾಸ್ಪರ್ಧೊ)
ಕೊಂಕಣಿ ಭಾಶಾ ಮಂಡಳ್ ಆನಿ ಪ್ರಗತಿಶೀಲ್ ಕೊಂಕ್ಣಿ ಬರಯ್ಣಾರಾಂಚ್ಯಾ ಎಕ್ತಾರಾಚ್ಯಾ ಜೋಡ್ ಆಶ್ರಯಾಖಾಲ್ ದೊನ್ಪಾರಾಂ ಉಪ್ರಾಂತ್ಲ್ಯಾ ಕಾರ್ಯಾಂತ್, ಡೆಲಿಶಾ ಡಿ’ಸೋಜಾಚ್ಯಾ ಸಂಗೀತಾಂತ್ ’ಕೊಂಕ್ಣಿ ಆಮ್ಚಿ ಮಾಂಯ್, ಕೊಂಕ್ಣಿ ಆಮ್ಕಾಂ ಜಾಯ್’ ಮ್ಹಳ್ಳೆಂ ಅಪುರ್ಭಾಯೆಚ್ಯಾ ಪದಾನ್ ಲೆವಿನ್ ಫೆರ್ನಾಂಡಿಸ್ ಆನಿ ಲಿರೋನ್ ಫೆರ್ನಾಂಡಿಸ್ ಹಾಣಿಂ ಸುರ್ವಾತ್ ಕೆಲಿ.
ಕವಿಸಮ್ಮೇಳಾಚೆಂ ಉಗ್ತಾವಣ್ ಕರುನ್ ಮಾ|ಮೆಲ್ವಿನ್ ಡಿ’ಕುನ್ಹಾನ್ - ಜಶೆಂ ರಿಲೇ ಖೆಳಾಂತ್ ಸರ್ವ್ ಸಾಂದ್ಯಾಂನಿ ಏಕ್ ಬೇಟನ್ ಎಕ್ಲ್ಯಾ ಥಾವ್ನ್ ದುಸ್ರ್ಯಾಕ್ ಪಾಶಾರ್ ಕರುನ್ ಆಸ್ಚೆಪರಿಂ, ಆಮಿ ಸಯ್ತ್ ಆಮ್ಚ್ಯಾ ಮುಕ್ಲೆ ಪಿಳ್ಗೆಕ್ ಹಿ ಕೊಂಕ್ಣಿ ಭಾಸ್, ಜಿ ಆಮ್ಚಿ ಮಾಯ್‌ಭಾಸ್ ಪಾವಂವ್ಚಿ ವ್ಹಡ್ ಜವಾಬ್ದಾರಿ ಘೆಜಾಯ್. ದೆಕುನ್ ಖಂಯ್ಚರ್ ಕೊಂಕ್ಣಿ ಚಟುವಟಿಕೊ ಜಾತಾತ್, ತಾಕಾ ಪುರ್ತೊ ಪಾಟಿಂಬೊ ದೀಂವ್ಕ್ ಲೊಕಾಂಕ್ ಉಲೊ ದಿಲೊ.
ಡೆಸ್ಮಂಡ್ ಸಲ್ಡಾನ್ಹಾ ಆನಿ ಡೆಲಿಶಾ ಡಿ’ಸೋಜಾ ಹಾಣಿಂ ಆಪುರ್ಬಾಯೆಚಿಂ ಕೊಂಕ್ಣಿ ಪದಾಂ ಗಾಯ್ಲಿಂ.
ಕೊಂ.ಭಾ.ಮಂ. ಅಧ್ಯಕ್ಷ್ ಮಾನೆಸ್ತ್ ಜೋನ್ ಡಿ’ಸಿಲ್ವಾನ್ ಸ್ವಾಗತ್ ಮಾಗುನ್ ಜೆ.ಬಿ.ಸಿಕ್ವೇರಾಚಿ ಸವಿಸ್ತಾರ್ ವೊಳಕ್ ಕರುನ್ ದಿತಚ್, ಹಿಲರಿ ಡಿ’ಸಿಲ್ವಾನ್ ಕವಿತಾಶೆತಾಂತ್ ವಲ್ಲಿ ಕ್ವಾಡ್ರಸಾನ್ ಕೆಲ್ಲ್ಯಾ ವಾವ್ರಾಚಿ ಸವಿಸ್ತಾರ್ ವೊಳಕ್ ದಿಲಿ. ವಲ್ಲಿ ಕ್ವಾಡ್ರಸಾನ್ ಸಂವಾದಿತ್ ಜಾಂವ್ಕ್ ಆಸ್ಚ್ಯಾ ಕವಿ ಆನ್ಸಿ ಪಾಲಡ್ಕಾಚಿ ವೊಳಕ್ ಕರುನ್ ದಿಲಿ ತಶೆಂಚ್ ತಾಚೆಲಾಗಿಂ ಸವಿಸ್ತಾರ್ ರಿತಿನ್ ಸಂವಾದ್ ಚಲವ್ನ್ ವೆಲೊ.
ಸಂವಾದ್ ಚಲುನ್ ಆಸ್ಚೆಪರಿಂಚ್ ಜೆ.ಬಿ.ಸಿಕ್ವೇರಾ ಸ್ಮಾರಕ್ ಕವಿತಾಸ್ಪರ್ಧ್ಯಾಂತ್ ಭಾಗ್ ಘೆತ್‌ಲ್ಲ್ಯಾ ಕವಿಂನಿ ಆಪಾಪ್ಲಿಂ ಕವಿತಾ ವಾಚ್ಲಿಂ. ಆನಿ ಹ್ಯಾ ಸ್ಪರ್ಧ್ಯಾಂತ್ ಜಿಕ್ಲೆಲ್ಯಾಂಕ್ ಇನಾಮಾಂ ವಾಂಟ್ಲಿಂ:
ಪಯ್ಲೆಂ ಇನಾಮ್ (3000 ನಗದ್ ಆನಿ ಬೂಕ್): ನೆರಿ ನಜ್ರೆತ್ ತಾಕೊಡೆ
ದುಸ್ರೆಂ ಇನಾಮ್ (2000 ನಗದ್ ಆನಿ ಬೂಕ್): ಅಶೋಕ್ ಡಾಯಸ್ ಬೈಂದೂರ್
ತಿಸ್ರೆಂ ಇನಾಮ್ (1000 ನಗದ್ ಆನಿ ಬೂಕ್): ಪ್ರಸನ್ನ ನಿಡ್ಡೋಡಿ
ಭುಜ್ವಣೆಚೆಂ ಇನಾಮ್ (ಬೂಕ್): ಲೆವಿನ್ ಫೆರ್ನಾಂಡಿಸ್
’ಕಾವ್ಯ’, ’ಭಾಸ್’, ’ಪ್ರಸ್ತುತಿ’ ಆನಿ ’ಸೃಜನಶೀಲತಾ’ ಮ್ಹಳ್ಳ್ಯಾ ಚ್ಯಾರ್ ಪ್ರಕಾರಾಂನಿ ಹ್ಯಾ ಕವಿತಾಸ್ಪರ್ಧ್ಯಾಚಿ ವೊರವ್ಣಿ ಕೆಲ್ಲ್ಯಾ ಆನ್ಸಿ ಪಾಲಡ್ಕಾ, ವಲ್ಲಿ ಕ್ವಾಡ್ರಸಾ ಸವೆಂ ತಿಸ್ರೊ ವೊರಯ್ಣಾರ್ ಜಾವ್ನಾಸ್‌ಲ್ಲ್ಯಾ ಅನಂತ್ ಅಮೆಂಬಳಾನ್ ಸ್ಪರ್ಧ್ಯಾಂತ್ ಆಯಿಲ್ಲ್ಯಾ ಕವಿತೆಂಚಿ ವಾಖಣ್ಣಿ ಕೆಲಿ.
ಮುಖೆಲ್ ಸಯ್ರೊ ಜಾವ್ನ್ ಮಂಗ್ಳುರ್ ಥಾವ್ನ್ ಆಯಿಲ್ಲೊ ಡಾ|ಎಡ್ವರ್ಡ್ ನಜ್ರೆತಾನ್ ಆಪ್ಲ್ಯಾ ಉಲವ್ಪಾಂತ್ ಕೊಂಕ್ಣಿ ಸಾಹಿತ್ಯಾಚೊ ವಾವ್ರ್ ಕರುಂಕ್ ಸೂಕ್ತ್ ಸಂಧರ್ಭ್ ಆಸ್ಚೆ ಭೋವ್ ಉಣೆಂ ಜಾಲ್ಲ್ಯಾ ಹ್ಯಾ ಕಾಳಾರ್, ಕೊಂಕ್ಣಿ ಮೋಗಿಂನಿ ಕೊಂಕ್ಣಿ ಉರ್ಬಾ ಕೆದಿಂಚ್ ನಿಂವನಾತಲ್ಲೆ ಬರಿ ಪಳೆವ್ನ್ ಘೆಂವ್ಕ್ ಜಾಯ್, ಆನಿ ತೊ ವಾವ್ರ್ ಕರ್‍ತಲ್ಯಾಂಕ್ ಜೊಕ್ತೊ ಪಾಟಿಂಬೊ ದೀಜಾಯ್. ಖೊಡಿ ಚಡ್ ಮೆಳ್ತಾತ್ ಮ್ಹಣುನ್ ಕಾಳಿಜ್ ಲ್ಹಾನ್ ಕರ್ನ್ ಬಸ್ಚ್ಯಾಕಯ್, ಚಡಿತ್ ಪ್ರೇರಿತ್ ಜಾಂವ್ಚ್ಯೊ ವಾಟೊ ಸೊಧುಂಕ್ ಜಾಯ್ ಆನಿ ಹೆಂ ಕಾಮ್ ತಿತ್ಲೆಂ ಸಲೀಸ್ ನ್ಹಯ್. ಜಶೆಂ ಮಂಗ್ಳುರಾಂತ್ ಜಾತಾ ತಶೆಂಚ್ ಮುಂಬಯಾಂತ್ ಸಯ್ತ್ ಕೊಂಕ್ಣಿ ವಾವ್ರ್ ಕರ್‍ತಲ್ಯಾಂನಿ ಎಕಾಮೆಕಾ ಸ್ಪಂದನ್ ಕರ್ನ್, ಎಕಾಮೆಕಾ ಆಧಾರ್ ದೀವ್ನ್ ಕೊಂಕ್ಣೆಚ್ಯಾ ಬರೆಪಣಾಚೊ ಶೆವೊಟ್ ದವರ್ನ್ ವಾವ್ರ್ ಕೆಲೊ ತರ್, ತಸಲೊ ವಾವ್ರ್ ಕೊಂಕ್ಣೆಚ್ಯೆ ಉದರ್ಗತೆಕ್ ಉಪ್ಕಾರ್‍ತಾ ಮ್ಹಣಾಲೊ.
ಜೋಯ್ ಪಾಲಡ್ಕಾನ್ ಹಿಂ ದೊನೀಂ ಕಾರ್ಯಿಂ ಚಲವ್ನ್ ವೆಲಿಂ.
- ಭಾತ್ಮಿ
मुंबयांत कथापाठ आनी कोंकणी कविसम्मेळ
प्रगतिशील कोंकणी बरयणारांच्या एक्ताराच्या मुखेलपणाखाल कोंकणी मटव्या काणियांचेर आदेसाचें अध्ययन कामासाळ, ह्याच फेबरेराचे १४ तारिकेर, मीरा रोड फिर्गजेच्या सभासालांत मांडून हाडलें.
कामासाळाचें उग्तावण करून मा|जोकीम रोड्रिगस म्हणालो; "म्हज्या मिसांवाक लागून हांव संसाराच्या वेवेगळ्या देशांनी भोंवलां, वेवेगळ्यो भासो उलयलां तरयी, म्हज्या काळजांतली भास आजून कोंकणी आनी ती मरापासून म्हजी आवयभास जावन ऊरतली"
स्वागत उत्रांनी, प्रगतिशील कोंकणी एक्ताराच्या मुंबय पंगडाचो मुखेल संयोजक जोय पालडका "बदलून येंवचे परिगतेंत आनी फकत ते बदलावणेक देखोन बसचेपरास, एकवटीत जावन कोंकणी कामाचो इरादो तशेंच मिसांव हातीं घेतलें तर, तसलो वावर कोंकणी साहित्याक उपकारतलो" म्हणालो.
प्रमूख उलवपी जावन आयिल्ल्या डा|एडवर्ड नज्रेताची वोळक वल्ली क्वाड्रसान करून दितच, डा|नज्रेतान ’हांव मटव्यो कथा कश्यो बरयतां’ म्हळ्ळ्या विषयाचेर सविसतार रितीन आपली जाण्वाय आनी माहेत वांटून घेतली.
उपरांत नेरी नज्रेतान वल्ली क्वाड्रसाच्या काणियांच्या वावराची वोळक करून दिली आनी ’साहित्य म्हळ्यार कितें, मटव्यो काणियों तांत्रीक रितीन कश्यो आसुंक जाय, मटव्या काणियांचे वर्ग, प्रकार विश्यांत सविसतार जाण्वाय आटापचें अध्ययन वल्ली क्वाड्रसान चलवन वेलें. ह्या अध्ययना खातीर हिंदिंतली ’नमक क दरोगा (मुनशी प्रेमचंदाची मटवी कथा)’, इंगलिशांतली ’द बेट (आंटोनी चेकोफाची मटवी कथा)’ तशेंच कानडिची ’कोनेय गिराकी (निरंजनाची मटवी कथा)’ विंचल्यो तशेंच ह्या काणियांनी साहितीक तशेंच सामाजीक शेतांत उटयिल्ल्या चिंत्पाचेर आर्सो धरलो.
त्या उपरांतल्या संवादांत अनंत अम्मेंबळ, जोय पालडका, ग्रेगोरी निड्डोडी आनी हिलरी डी’सिलवा हांणी भाग घेतलो. दिवो पत्राचो संपादक मानेसत लोरेन्स कुवेल्हो, आनी मानेसतीण सुजाना कुवेल्हो, ह्यारिबोय, आन्सी पालडका, लारेन्स डी’सोज कमानी, जोन क्रासतासवें लगबग चाळीस जणांनी वांटो घेतलो.
हिलरी डी’सिलवान उपकार बावुडलो.
कविसम्मेळ (कविसंवाद आनी जे.बी.सिकवेरा स्मारक कवितास्पर्धो)
कोंकणी भाशा मंडळ आनी प्रगतिशील कोंकणी बरयणारांच्या एक्ताराच्या जोड आश्रयाखाल दोनपारां उपरांतल्या काऱ्यांत, डेलिशा डी’सोजाच्या संगीतांत ’कोंकणी आमची मांय, कोंकणी आमकां जाय’ म्हळ्ळें अपुर्भायेच्या पदान लेवीन फेर्नांडीस आनी लिरोन फेर्नांडीस हाणीं सुर्वात केली.
कविसम्मेळाचें उग्तावण करून मा|मेलवीन डी’कुन्हान - जशें रिले खेळांत सर्व सांद्यांनी एक बेटन एकल्या थावन दूसऱ्याक पाशार करून आसचेपरीं, आमी सयत आमच्या मुकले पिळगेक ही कोंकणी भास, जी आमची मायभास पावंवची व्हड जवाब्दारी घेजाय. देकून खंयचर कोंकणी चटुवटिको जातात, ताका पुर्तो पाटिंबो दीवंक लोकांक उलो दिलो.
डेस्मंड सलडान्हा आनी डेलिशा डी’सोजा हाणीं आपुरबायेचीं कोंकणी पदां गायलीं.
कों.भा.मं. अध्यक्ष मानेसत जोन डी’सिलवान स्वागत मागून जे.बी.सिकवेराची सविसतार वोळक करून दितच, हिलरी डी’सिलवान कविताशेतांत वल्ली क्वाड्रसान केल्ल्या वावराची सविसतार वोळक दिली. वल्ली क्वाड्रसान संवादीत जावंक आसच्या कवी आन्सी पालडकाची वोळक करून दिली तशेंच ताचेलागीं सविसतार रितीन संवाद चलवन वेलो.
संवाद चलून आसचेपरिंच जे.बी.सिकवेरा स्मारक कवितास्पर्ध्यांत भाग घेतल्ल्या कविंनी आपापलीं कविता वाचलीं. आनी ह्या स्पर्ध्यांत जिकलेल्यांक इनामां वांटलीं:
पयलें इनाम (३००० नगद आनी बूक): नेरी नज्रेत ताकोडे
दुस्रें इनाम (२००० नगद आनी बूक): अशोक डायस बैंदूर
तिस्रें इनाम (१००० नगद आनी बूक): प्रसन्न निड्डोडी
भुज्वणेचें इनाम (बूक): लेवीन फेर्नांडीस
’काव्य’, ’भास’, ’प्रसतुती’ आनी ’सृजनशीलता’ म्हळ्ळ्या च्यार प्रकारांनी ह्या कवितास्पर्ध्याची वोरवणी केल्ल्या आन्सी पालडका, वल्ली क्वाड्रसा सवें तिस्रो वोरयणार जावनासल्ल्या अनंत अमेंबळान स्पर्ध्यांत आयिल्ल्या कवितेंची वाखण्णी केली.
मुखेल सयरो जावन मंगळूर थावन आयिल्लो डा| एडवर्ड नज्रेतान आपल्या उलोवपांत कोंकणी साहित्याचो वावर करुंक सूक्त संधर्भ आसचे भोव उणें जाल्ल्या ह्या काळार, कोंकणी मोगिंनी कोंकणी उरबा केदिंच निंवनातल्ले बरी पळेवन घेवंक जाय, आनी तो वावर करतल्यांक जोक्तो पाटिंबो दीजाय. खोडी चड मेळतात म्हणून काळीज ल्हान कर्न बसच्याकय, चडीत प्रेरीत जांवच्यो वाटो सोधुंक जाय आनी हें काम तितलें सलीस न्हय. जशें मंगळुरांत जाता तशेंच मुंबयांत सयत कोंकणी वावर करतल्यांनी एकामेका स्पंदन कर्न, एकामेका आधार दीवन कोंकणेच्या बरेपणाचो शेवोट दवर्न वावर केलो तर, तसलो वावर कोंकणेच्ये उदर्गतेक उपकारता म्हणालो.
जोय पालड्कान हीं दोनीं काऱ्यीं चलवन वेलीं.
- भात्मी