Kavita Kular

ಮುಯಾಂಚಿ ಕವಿತಾ

ಸಂಪಾದಕೀಯ್:

ಆಮ್ಚ್ಯಾ ಭೊಂವಾರಾಂತ್ ವಾವ್ರಾಕ್ ಲಾಗಲ್ಲ್ಯೊ ಕಾಮೆಲಿ ಮುಯೊ

ಹ್ಯಾ ಸಂಸಾರಾಂತ್ ಖಂಯ್ಚೀಯ್ ವಸ್ತ್ ನಿರ್ಜೀವ್ ಯಾ ಪರ್ಕಿ ಜಾವ್ನ್ ಆಸುಂಕ್ ಸಾಧ್ಯ್ ನಾ. ಆಮಿ ಕೆದಳಾ ತಾಂಚೆಲಾಗಿಂ ಉಲೊಂವ್ಕ್ ಲಾಗ್ತಾಂವ್, ತಾಂಕಾಂ ಸಮ್ಜುಂಕ್ ಸಕ್ತಾಂವ್, ತಾಂಕಾಂ ಆಪ್ಡುನ್ ಪೊಟ್ಲುನ್ ಧರ್‍ತಾಂವ್, ತವಳ್ ತಾಂಚಿ ಭಾಸ್, ತಾಂಚಿಂ ಸಪ್ನಾಂ ಆಮ್ಕಾಂ ಉಗ್ತಿಂ ಜಾತಾತ್.

ತಶೆಂಚ್ ಜಾಲಾಂ ಹೆ ಕವಿತೆಂತ್. ಮುಯೊ ಏಕ್ ನಿಮಿತ್ತ್ ಮಾತ್ರ್. ಏಕ್ ರೂಪಕ್ ಮಾತ್ರ್. ಮುಯೊ, ಕಾಂಯ್ ಕಾಮೆಲಿ ಲೋಕ್ ಆಸುಂಯೆತಾ. ಮುಯೊ, ಕಾಂಯ್ ದಲಿತ್ ಸಮುದಾಯ್ ಆಸುಂಯೆತಾ. ತಾಂಚಿ ಹಾಲ್-ಚಾಲ್, ತಾಂಚೆ ಕಷ್ಟ್-ಸಂಕಷ್ಟ್ ಆಮಿ ಕೆನ್ನಾಂ ಸಮ್ಜುಂಕ್ ಸಕ್ತಾಂವ್, ತವಳ್ ಆಮ್ಚ್ಯಾ ದೊಳ್ಯಾಂತ್ಲ್ಯಾನ್ ದುಕಾಂ ಫುಟ್ತಲಿಂ.

ಪರೇಶ್ ನರೇಂದ್ರ ಕಾಮತಾಚ್ಯಾ ನವ್ಯಾ ಕಾವ್ಯ ಪುಸ್ತಕಾಂತ್ಲಿ ಹಿ ವಿಂಚವ್ಣ್ ಹಿ. ಪುಸ್ತಕಾಚೆಂ ನಾಂವ್ 'ಚಿತ್ರಲಿಪಿ'.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

 

 

 

 

 

 

ಮುಯಾಂಚಿ ಕವಿತಾ

ಸಪ್ನಾಂತ್ ಯೆತಾತ್ ಮುಯೊ ಮ್ಹಜ್ಯಾ
ಆನಿ ಮ್ಹಜಿಂ ಚಿಂತ್ನಾಂ ಮುಯೆತಾತ್...

ಮುಯೊ ಯೆತಾತ್
ಮುಯೊ ವತಾತ್-
ಮದೀಂಚ್ ಹಾಂಸ್ತಾತ್
ಮದೀಂಚ್ ಥಾಮೂನ್ ಎಕಾಮೆಕಾಂಚೊ
ಉಮೊ ಘೆತಾತ್.

ಹಾಂವ್ ಚಿಂತ್ತಾಂ-
ಖಂಯ್ಚ್ಯಾನ್ ಯೆತಾತ್ ಕಾಂಯ್ ಹ್ಯೊ
ಖಂಯ್ ವತಾತ್ ಕಾಂಯ್ ಹ್ಯೊ
ಕಿತೆಂ ಸಾಂಗುಂಕ್ ಸೊದ್ತಾತ್ ಕಾಂಯ್ ಹ್ಯೊ
ಕಿತೆಂ ಉಲೊಂವ್ಕ್ ಸೊದ್ತಾತ್ ಕಾಂಯ್ ಹ್ಯೊ
ಕೊಣಾಚೊ ಮೋಗ್ ಕರ್‍ತಾತ್ ಕಾಂಯ್ ಹ್ಯೊ
ಮುಯೊ!

ಮೆರೆವಯ್ಲ್ಯಾನ್
ಸವ್ಕಾಸಾಯೆನ್ ಚಲ್ಪಿ ಮುಯಾಂಚಿಂ
ಹಿಂ ಕಾಳಿಂ ಕಾಳಿಂ ಪಾವ್ಲಾಂ ಹಾಂವ್ ಪಳೆತಾಂ
ಮುಯಾಂಚ್ಯಾ ಪಾವ್ಲಾಂನಿ ಹಾಂವೂಯ್
ಲ್ಹವೂ ಲ್ಹವೂ ತಾಂಚ್ಯಾ ಸಾಂಗಾತಾನ್ ಚಲುಂಕ್ ಲಾಗ್ತಾಂ
ಮುಯಾಂಚಿ ಮೊನೆಳಿಚಿ ಭಾಸ್
ಕಾಳೀಜ್‌ಪಿಶಿಂ ಸಪ್ನಾಂ,
ಹಾಂವ್ ಸಮ್ಜುಂಕ್ ಸೊದ್ತಾಂ
ಮ್ಹಜ್ಯಾ ಉತ್ರಾಂನಿ ಉಕ್ತಾಂವ್ಕ್ ಸೊದ್ತಾಂ
ಮ್ಹಜೆಕಡೆನ್ ಏಕ್ ಸಾರ್ಕ್ಯೊ ಪಳೇತ್ ಪಳೇತ್
ಬಾರೀಕ್ ದೊಳೆ ಕರೀತ್
ಹಾಂಸ್ತಾತ್ ಮುಯೊ
ಆನಿ ಹಾಂಸ್ತಾಂ-ಹಾಂಸ್ತಾಂ ಅಚ್ಕೀತ್
ತಾಂಚೆ ದೊಳೆ ಭರುನ್ ಯೆತಾತ್
ಘಳ್ ಕರುನ್ ತಾಂಚ್ಯಾ ದೊಳ್ಯಾಂತ್ಲ್ಯಾನ್
ಗಳೂಂಕ್ ಲಾಗ್ತಾತ್ ದುಕಾಂ...

ಮ್ಹಜಿ ನ್ಹೀದ್ ಖಳ್ಟಾ-
ಮುಯಾಂಚ್ಯಾ ದೊಳ್ಯಾಂತ್ಲ್ಯಾನ್
ಗಳ್ಟಾತ್ ದುಕಾಂ
ಗಳ್ಟಾಂ ಗಳ್ಟಾಂ ಜಾಯ್ತ್ ರಾವ್ತಾತ್ ವ್ಹಡ್ ವ್ಹಡ್
ಪೃಥ್ವಿಚ್ಯಾ ಆಕಾರಾಯೆದಿಂ ವ್ಹಡ್ ವ್ಹಡ್
ಗದ್ ಗದ್ ಹಾಲ್ಪಾಕ್ ಲಾಗ್ತಾ
ಮ್ಹಜೆ ಹಾತ್-ಪಾಂಯ್ ಗಳ್ಸಣ್ಪಾಕ್ ಲಾಗ್ತಾ
ಮ್ಹಜ್ಯಾ ಕಾಳ್ಜಾಚೆಂ ಉದಕ್ ಉದಕ್ ಜಾತಾ

ಖಂಯ್ಚ್ಯಾನ್ ತರೀ
ಅಚಳಯ್ ರೀಗ್ ಕಾಡೀತ್
ಮ್ಹಜ್ಯಾ ಸಪ್ನಾಂತ್ ಯೆತಾತ್ ಮುಯೊ;
ಕಚ್ಚ್ ಕರೂನ್
ಆಪ್ಲೆಂ ಕಾಳೀಜ್ ತೊಡೂನ್ ದೀತ್
ಮ್ಹಣ್ಟಾತ್ ಮ್ಹಾಕಾ
ಆಮ್ಚ್ಯಾ ಸಾಂಗಾತಾಕ್ ಯೋ!

-ಪರೇಶ್ ನರೇಂದ್ರ ಕಾಮತ್


संपादकीय:

आमच्या भोंवारांत वावराक लागल्ल्यो कामेली मुयो

ह्या संसारांत खंयचीय वस्त निर्जीव या परकी जावन आसूंक साध्य ना. आमी केदळा तांचेलागीं उलोवंक लागतांव, तांकां समजूंक सक्तांव, तांकां आपडून पोटलून धरतांव, तवळ तांची भास, तांचीं सपनां आमकां उगतीं जातात.

तशेंच जालां हे कवितेंत. मुयो एक निमित्त मात्र. एक रूपक मात्र. मुयो, कांय कामेली लोक आसुंयेता. मुयो, कांय दलित समुदाय आसुंयेता. तांची हाल-चाल, तांचे कष्ट-संकष्ट आमी केन्नां समजूंक सक्तांव, तवळ आमच्या दोळ्यांतल्यान दुकां फुटतलीं.

परेश नरेंद्र कामताच्या नव्या काव्य पुस्तकांतली ही विंचवण ही. पुस्तकाचें नांव 'चित्रलिपी'.

-मेल्विन रोड्रीगस

कविता:

मुयांची कविता

सपनांत येतात मुयो म्हज्या
आनी म्हजीं चिंतनां मुयेतात...

मुयो येतात
मुयो वतात-
मदींच हांसतात
मदींच थामून एकामेकांचो
उमो घेतात.

हांव चिंततां-
खंयच्यान येतात कांय ह्यो
खंय वतात कांय ह्यो
कितें सांगूंक सोदतात कांय ह्यो
कितें उलोवंक सोदतात कांय ह्यो
कोणाचो मोग करतात कांय ह्यो
मुयो!

मेरेवयल्यान
सवकासायेन चलपी मुयांचीं
हीं काळीं काळीं पावलां हांव पळेतां
मुयांच्या पावलांनी हांवूय
ल्हवू ल्हवू तांच्या सांगातान चलूंक लागतां
मुयांची मोनेळिची भास
काळीजपिशीं सपनां,
हांव समजूंक सोदतां
म्हज्या उतरांनी उक्तावंक सोदतां
म्हजेकडेन एक सारक्यो पळेत पळेत
बारीक दोळे करीत
हांसतात मुयो
आनी हांसतां-हांसतां अचकीत
तांचे दोळे भरून येतात
घळ करून तांच्या दोळ्यांतल्यान
गळूंक लागतात दुकां...

म्हजी न्हीद खळटा-
मुयांच्या दोळ्यांतल्यान
गळटात दुकां
गळटां गळटां जायत रावतात व्हड व्हड
पृथविच्या आकारायेदीं व्हड व्हड
गद गद हालपाक लागता
म्हजे हात-पांय गळसणपाक लागता
म्हज्या काळजाचें उदक उदक जाता

खंयच्यान तरी
अचळय रीग काडीत
म्हज्या सपनांत येतात मुयो;
कच्च करून
आपलें काळीज तोडून दीत
म्हणटात म्हाका
आमच्या सांगाताक यो!

-परेश नरेंद्र कामत


Comment on this article

  • Andrew L D Cunha,

    Fri, Mar 6 2015

    ಮುಯೆಂಚಿಂ ದುಕಾಂ ಮುಯಾಂವರ್ನಿಂ ವ್ಹಡ್. ತಿಂ ಕಿತ್ಲಿಂ ವ್ಹಡ್ ವ್ಹಡ್ ಜಾಲ್ಯಾರೀ ಲೊಕಾ ದೊಳ್ಯಾಂಕ್ ದಿಸಾನಾಂತ್ ತೆಂಯ್ ಸತ್. ಕವಿತಾ ವಾಚ್ತಾನಾ ಮ್ಹಜ್ಯಾ ಕಾಳ್ಜಾಚೆಂಯ್ ಉದಕ್ ಉದಕ್ ಜಾಲೆಂ. ಮೆಲ್ವಿನ್ ರೊಡ್ರಿಗ್ಸಾಚಾ ಮೆಲ್ವಿನಾಚಾ "ಹಾರಿ ಹಾರಿ" ಕವಿತೆಚೊ ಉಡಾಸ್ ಜಿವೊ ಜಾಲೊ. ಅಸಲ್ಯೊ ಕವಿತಾ ಜಾಯ್ ಮುಯಾಂಚಿಂ ದುಕಾಂ ಪಳೆಂವ್ಚ್ಯಾ ಖಾತಿರ್ ದೊಳ್ಯಾಂಚಿಂ ಖೊವ್ಳ್ಯಾಂ ನಿಕ್ಳಾಂವ್ಕ್. ಕವಿಕ್ ಉಲ್ಲಾಸ್!

    DisAgree Agree Reply


Title : ಮುಯಾಂಚಿ ಕವಿತಾ

Please fill in the form below with your feedback/ suggestions .

Fields marked with * are necessary



Disclaimer : Please write your correct name and email address. Kindly do not post any personal, abusive, defamatory, infringing, obscene, indecent, discriminatory or unlawful or similar comments. kavitaa.com/konkanipoetry.com will not be responsible for any defamatory message posted under this article.

Please note that sending false messages to insult, defame, intimidate, mislead or deceive people or to intentionally cause public disorder is punishable under law. It is obligatory on kavitaa.com / konkanipoetry.com to provide the IP address and other details of senders of such comments, to the authority concerned upon request.

Hence, sending offensive comments using kavitaa.com / konkanipoetry.com will be purely at your own risk, and in no way will kavitaa.com / konkanipoetry.com be held responsible.


 A  B  C  D  E  F  G  H  I  J  K  L  M
 
 N  O  P  Q  R  S  T  U  V  W  X  Y  Z