ಸಂಪಾದಕೀಯ್:
ಸಮಗ್ರ್ ಸ್ವಚ್ಛ್ ಅಭಿಯಾನಾಕ್ ಉಲೊ
ಸ್ವಚ್ಛ್ ಭಾರತ್ ಅಭಿಯಾನ್ ನಿಜಾಯ್ಕಿ ಉತ್ತೀಮ್. ಏಕ್ ಜಾಗೃತಿ ಹಾಡ್ಚೆಂ ಅಭಿಯಾನ್. ಪುಣ್ ಹ್ಯಾ ಅಭಿಯಾನಾಚ್ಯಾ ನಾಂವಾರ್ ಜಾತಾತ್ ತಿಂ ಅತರ್ವಣಾಂ ಪಳೆತಾನಾ ಹಾಸುಂಕ್ ಯೆತಾ, ಉಸ್ತುರೆಂ ಯೆತಾ. ರಾಜಕೀಯ್ ವ್ಯಕ್ತಿಂಚೆ ವೇಸ್ ಹಾಂಗಾ ಉಗ್ತೆ ದಿಸ್ತಾತ್. ತಾಂಚೆ ಖೆಳ್ ಉಗ್ತ್ಯಾನ್ ಪಳೆಂವ್ಕ್ ಮೆಳ್ತಾತ್. ಹಾಚೆರ್ ಬೋಟ್ ಜೊಕುನ್ ಜಾಗೃತಿ ಹಾಡ್ಚೆಂ ಪ್ರೇತನ್ ಹೆ ಕವಿತೆದ್ವಾರಿಂ ಸಿಜ್ಯೆಸ್ ತಾಕೊಡೆನ್ ಕೆಲಾಂ.
ಮಾಗೀರ್ ನಿತಳಾಯ್ ಮ್ಹಳ್ಯಾರ್ ಫಕತ್ ಕೊಯ್ರಾಚಿ ನ್ಹಯ್. ಆಮ್ಚ್ಯಾ ಕಾಳ್ಜಾಂತ್ಲೆಂ, ಆಮ್ಚೆ ಮತಿಂತ್ಲೆಂ ಮ್ಹೆಳೆಂ ಸೈತ್ ನಿತಳ್ ಕರ್‍ಚೆವಿಶಿಂ ಆಮಿ ಆಮ್ಚಿ ನದರ್ ಘುಂವ್ಡಾಯ್ಜಾಯ್. ತಶೆಂ ಕೆಲೆಂ ಜಾಲ್ಯಾರ್ ತೆಂ ಏಕ್ ಸಮಗ್ರ್ ಸ್ವಚ್ಛ್ ಅಭಿಯಾನ್ ಥಾರ್‍ತಲೆಂ.
ಜನೆರ್ ಮ್ಹಯ್ನ್ಯಾಂತ್ ಬಾರ್ಕೂರಾಂತ್ ಚಲಲ್ಲ್ಯಾ ಕವಿತಾ ಫೆಸ್ತ್ ಸಂದರ್ಭಾರ್ ಸಿಜ್ಯೆಸಾನ್ ವಾಚಲ್ಲಿ ಕವಿತಾ ಹಿ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕೋಯ್ರ್!
ಹೆಣೆ ಗೆಲ್ಯಾರಿ ಕೋಯ್ರ್
ತೆಣೆ ಗೆಲ್ಯಾರಿ ಕೋಯ್ರ್
ಭಾಯ್ರ್ ಭಿತರ್ ಕೋಯ್ರ್ ಪಳೆವ್ನ್
ಲೋಕ್ ಸೈರ್ ಭೈರ್!
ಬಸ್ಸಾರ್ ಗೆಲ್ಯಾರಿ ಕೋಯ್ರ್
ರೈಲಾರ್ ಗೆಲ್ಯಾರಿ ಕೋಯ್ರ್
ರಸ್ತ್ಯಾ ಬಗ್ಲೆರ್ ಕೋಯ್ರ್
ದರ್ಯಾ ವೆಳೆರೀ ಕೋಯ್ರ್
ಸುಟಾಗಾರ್, ಬುಟಾಗಾರ್ ಆಯ್ಲೆ
ಚೂಡಿದಾರ್, ಮೀಡಿಯಾಗಾರ್ ಪಾವ್ಲೆ
ಘಾಲಾ ಕೋಯ್ರ್, ಝಾಡಾ ಕೋಯ್ರ್
ಕಾಡಾ ಫೊಟೊ ವಯ್ರ್, ವಯ್ರ್!
ಆಫಿಸಾಂತ್ಲೊ ಕೋಯ್ರ್ ಹಾಡುನ್
ರಸ್ತ್ಯಾ ಮಧೆಂ ಶಿಂಪ್ಡಾಯಾ
ನವೆ ನವೆ ಝಾಡು ಘೆವ್ನ್
ಸೆಲ್ಫಿ ಫೊಟೊ ಕಾಡಯಾ!
ಮಾಲಾ, ಲೀಲಾ, ಶಶಿಕಲಾ
ಕಚ್ರೊ, ಕಸ್ತಾಳ್ ಭಾಯ್ರ್ ಘಾಲಾ
ಈರಣ್ಣ, ಫಕೀರಣ್ಣ, ಹುಚ್ಚೇಗೌಡ
ಝಾಡು ಧರುನ್ ಫೊಟೊ ಕಾಡಾ!
ಅಮರ್, ಅಕ್ಬರ್, ಆಂತೊನಿ
ಪೂರ್ಣಿಮಾ, ಫಾತಿಮಾ, ನಂದಿನಿ
ಝಾಡಾ ಝಾಡಾ, ಕೋಯ್ರ್ ಝಾಡಾ
ಪೊಟೊ ಕಾಡುನ್ ಮೀಡಿಯಾಕ್ ಧಾಡಾ!
ಶಾರೂಕ್, ಅಮೀರ್, ಸಲ್ಮಾನ್
ದೀಪಿಕಾ, ಸೊನಾಕ್ಶಿ, ಕಾತ್ರಿನ್
ಅರ್ಧೆಂ ನ್ಹೆಸುನ್ ಝಾಡ್ತಾಂ ಕೋಯ್ರ್
ಲೋಕ್ ಚೊಯ್ತಾ ಸಕಯ್ಲ್ ಥಾವ್ನ್ ವಯ್ರ್!
ಮಿ೦ಗೆಲಾಮಾ, ಪಾಸ್ಕಿನ್ ಬಾಯೆ
ತುಮ್ಗೆರ್ ಪುಣಿ ಕೋಯ್ರ್ ಆಸಾಯೆ?
ನೊವ್ರೊ ಬಾಬ್ ಕೋಯ್ರ್ ಝಾಡುಂ
ಹೊಕಾಲ್ ಬಾಯ್ ಸೆಲ್ಫಿ ಕಾಡುಂ!
ಆಲ್ಲಿ, ಮಿಲ್ಲಿ, ಸೆರ್ಪಿನಾ
ಕೋಯ್ರ್ ಖಂಯ್ ಆಸಾ ದೆಲ್ಫಿನಾ?
ಸೆಲ್ಲಿಚೊ ಕೋಯ್ರ್ ದಿಸನಾ
ಜಿಲ್ಲಿಚ್ಯಾ ಹಿತ್ಲಾಂತ್ ಪುಣಿ ಉಡೊವ್ನಾ?
ಇಂತ್ರು, ಲಾದ್ರು, ಪಾಸ್ಕಲಾ
ಬಾಯ್ಲಾಂಕ್ ಘೆವ್ನ್ ಯೆಯಾಗಾ
ಝಾಡು ಘೆವ್ನ್ ಝಾಡ್ತಾಂ ಝಾಡ್ತಾಂ
ಲುಂಗಿ ಡಾನ್ಸ್ ನಾಚಾಗಾ!
ಮಂತ್ರಿ ಆಯ್ಲೊ ವಾಟ್ ಸೊಡಾ
ಕಾರಾ ಡಿಕ್ಕಿಂತ್ಲೊ ಝಾಡು ಕಾಡಾ
ಮಾರ್ಗಾ ದೆಗೆರ್ ಕಚ್ರೊ ಝಾಡಾ
ಫೇಸ್ ಬುಕಾರ್ ಫೊಟೊ ಧಾಡಾ!
ವಿಗಾರ್, ಕಾಜಿತೊರ್ ಆನಿ ಮಿರೊಣ್
ಚಾಮಾದೊರ್ ಘೆವ್ನ್ ಆಯ್ಲೊ ಸಾರೊಣ್
ಝಾಡಾ ಝಾಡಾ ಕೋಯ್ರ್ ಝಾಡಾ
ನಾ ತರ್ ವಚುನ್ ಕಾಟಾಂತ್ ಪಡಾ!
ಸುಟಾಗಾರಾಂಕ್, ಪೊಟಾಗಾರಾಂಕ್
ಕೋಯ್ರ್ ಕಸೊ ದಿಸ್ತಾ?
ಫೊಟೊ ಖಾತಿರ್ ಝಾಡ್ತಾತ್ ಪಳೆವ್ನ್
ಲೋಕ್ ಖೂಬ್ ಹಾಸ್ತಾ!
ಝಾಡು ಘೆವ್ನ್ ಕಾರಾಂನಿ ಆಯ್ಲೆ
ಕೆಮರಾ ಮುಕಾರ್ ಹಾಸಲಾಗ್ಲೆ
ಕೋಯ್ರ್ ಘಾಲುನ್ ಫೊಟೊ ಕಾಡ್ಲೆ
ಟೀವಿಂಕ್ ಧಾಡುನ್ ಸಂತೊಸ್ ಪಾವ್ಲೆ.
ಫೊಟೊಕ್ ಮುಸ್ಕರ್ ದಾಕಯ್ತಲ್ಯಾಂನೊ
ತಕ್ಲೆಂತ್ ತುಮ್ಚಾ ಭರ್ಲಾ ಕೋಯ್ರ್
ಸಂಸಾರಾಕ್ ಫಟಯ್ತಲ್ಯಾಂನೊ
ತುಮಿ ಜಾಲ್ಯಾತ್ ಸೈರ್ ಭೈರ್!
ಮುಕೆಲ್ಯಾಂನೊ, ಫುಡಾರ್‍ಯಾಂನೊ
ಕರ್ನ್ಯಾಂನಿ ಜಾಗೃತಿ ಹಾಡಾ
ಕೋಮುವಾದ್, ಜಾತಿವಾದ್
ಪಯ್ಲೆಂ ಝಾಡುನ್ ಕಾಡಾ!
ಜಾತಿ ಜಾತಿಂ ಮದೆಂ
ರಾಗ್, ದ್ವೇಶ್, ಮೊಸೊರ್
ಧರ್ಮಾ ಧರ್ಮಾಂ ಮಧೆಂ
ರಗ್ತಾವ್ಹಾಳ್, ಕಾಳ್ಜಾಂ ಕಿಸ್ಪರ್!
ಭೃಷ್ಟಾಚಾರ್, ಅತ್ಯಾಚಾರ್, ಶೋಶಣ್
ಪಯ್ಲೆಂ ನಿತಳ್ ಕರಾ
ಕೊಯ್ರಾವಿಶಿಂ ಪುರೊ ಭಾಶಣ್
ದೇಶಾಕ್ ಫುಡೆಂ ವ್ಹರಾ!
ಜಾತ್ ಕಾತ್ ಧರ್ಮ್ ಮ್ಹಳ್ಳೊ
ಕೋಯ್ರ್ ಪಡ್ಲಾ ರಾಸ್ ರಾಸ್
ಧರ್ಮಾಕ್ ಆನಿ ಸಂಸ್ಕ್ರತಿಕ್ ಲಾಗುನ್
ಕಾಳ್ಜಾಂ ಜಾಲ್ಯಾಂತ್ ಭೆಸಾಂ ಭೆಸ್!
ಸ್ವಚ್ಛ್ ಭಾರತ್ ನಿತಳ್ ಭಾರತ್
ವಾಟೆ ನಾಟಕ್ ಪುರೊ
ಕಾಳ್ಜಾ ಕೋಯ್ರ್ ಭಾಯ್ರ್ ಕಾಡ್ಲ್ಯಾರ್
ಭಾರತ್ ನಿತಳ್ ಉರೊಂ!
ಅಶೆಂಚ್ ತುಮಿ ನಾಟಕ್ ಕೆಲ್ಯಾರ್
ಲೋಕ್ ತುಮ್ಕಾಂ ಫಾತ್ರಾಯ್ತಲೊ
ಆಂಗ್ ವಸ್ತುರ್ ವೋಡ್ನ್ ಕಾಡುನ್
ಕೊಯ್ರಾ ರಾಶಿಂತ್ ಬುಡಯ್ತಲೊ!
- ಸಿಜ್ಯೆಸ್ ತಾಕೊಡೆ
संपादकीय:
समग्र स्वच्छ अभियानाक उलो
स्वच्छ भारत अभियान निजायकी उत्तीम. एक जागृती हाडचें अभियान. पूण ह्या अभियानाच्या नांवार जातात तीं अतर्वणां पळेताना हासूंक येता, उस्तुरें येता. राजकीय व्यक्तिंचे वेस हांगा उगते दिसतात. तांचे खेळ उगत्यान पळेवंक मेळतात. हाचेर बोट जोकून जागृती हाडचें प्रेतन हे कवितेद्वारीं सिज्येस ताकोडेन केलां.
मागीर नितळाय म्हळ्यार फकत कोयराची न्हय. आमच्या काळजांतलें, आमचे मतिंतलें म्हेळें सैत नितळ करचेविशीं आमी आमची नदर घुंवडायजाय. तशें केलें जाल्यार तें एक समग्र स्वच्छ अभियान थारतलें.
जानेर म्ह्यन्यांत बारकूरांत चलल्ल्या कविता फेस्त संदर्भार सिज्येसान वाचल्ली कविता ही.
-मेल्विन रोड्रीगस
कविता:
कोयर!
हेणे गेल्यारी कोयर
तेणे गेल्यारी कोयर
भायर भितर कोयर पळेवन
लोक सैर भैर!
बस्सार गेल्यारी कोयर
रैलार गेल्यारी कोयर
रस्त्या बगलेर कोयर
दर्या वेळेरी कोयर
सुटागार, बुटागार आयले
चूडिदार, मीडियागार पावले
घाला कोयर, झाडा कोयर
काडा फोटो वयर, वयर!
आफिसांतलो कोयर हाडून
रस्त्या मधें शिंपडाया
नवे नवे झाडू घेवन
सेलफी फोटो काडया!
माला, लीला, शशिकला
कचरो, कस्ताळ भायर घाला
ईरण्ण, फकीरण्ण, हुच्चेगौड
झाडू धरून फोटो काडा!
अमर, अकबर, आंतोनी
पूर्णिमा, फातिमा, नंदिनी
झाडा झाडा, कोयर झाडा
फोटो काडून मीडियाक धाडा!
शारूक, अमीर, सल्मान
दीपिका, सोनाकशी, कात्रीन
अर्धें न्हेसून झाडतां कोयर
लोक चोयता सकयल थावन वयर!
मिंगेलामा, पास्कीन बाये
तुमगेर पुणी कोयर आसाये?
नोवरो बाब कोयर झाडूं
होकाल बाय सेलफी काडूं!
आल्ली, मिल्ली, सेरपिना
कोयर खंय आसा देलफिना?
सेल्लिचो कोयर दिसना
जिल्लिच्या हितलांत पुणी उडोवना?
इंतरू, लादरू, पास्कला
बायलांक घेवन येयागा
झाडू घेवन झाडतां झाडतां
लुंगी डान्स नाचागा!
मंत्री आयलो वाट सोडा
कारा डिक्किंतलो झाडू काडा
मार्गा देगेर कचरो झाडा
फेस बुकार फोटो धाडा!
विगार, काजितोर आनी मिरोण
चामादोर घेवन आयलो सारोण
झाडा झाडा कोयर झाडा
ना तर वचून काटांत पडा!
सुटागारांक, पोटागारांक
कोयर कसो दिसता?
फोटो खातीर झाडतात पळेवन
लोक खूब हासता!
झाडू घेवन कारांनी आयले
केमरा मुकार हासलागले
कोयर घालून फोटो काडले
टीवींक धाडून संतोस पावले.
फोटोक मुस्कर दाकयतल्यांनो
तकलेंत तुमचा भरला कोयर
संसाराक फटयतल्यांनो
तुमी जाल्यात सैर भैर!
मुकेल्यांनो, फुडाऱ्यांनो
करन्यांनी जागृती हाडा
कोमुवाद, जातिवाद
पयलें झाडून काडा!
जाती जातीं मदें
राग, द्वेश, मोसोर
धर्मा धर्मां मधें
रगताव्हाळ, काळजां किस्पर!
भृष्टाचार, अत्याचार, शोशण
पयलें नितळ करा
कोयराविशीं पुरो भाशण
देशाक फुडें व्हरा!
जात कात धर्म म्हळ्ळो
कोयर पडला रास रास
धर्माक आनी संस्कृतीक लागून
काळजां जाल्यांत भेसां भेस!
स्वच्छ भारत नितळ भारत
वाटे नाटक पुरो
काळजा कोयर भायर काडल्यार
भारत नितळ उरों!
अशेंच तुमी नाटक केल्यार
लोक तुमकां फात्रायतलो
आंग वस्तुर वोडन काडून
कोयरा राशींत बुडयतलो!
- सिज्येस ताकोडे