ಸಂಪಾದಕೀಯ್:

ಸುಣಿಂ ಘೊಂಕಿನಾತ್ಲ್ಯಾರ್ ಥೊಡ್ಯಾಂಕ್ ನೀದ್ ಪಡನಾ

ಘೊಂಕ್ಚ್ಯಾ ಸುಣ್ಯಾಂಚೆಂ ತೊಂಡ್ ಧಾಂಪಂವ್ಕ್ ಹಾಡಾಂ ಉಡೊಂವ್ಚಿ ಸವಯ್ ಸಭಾರಾಂಕ್ ಆಸಾ. ಸುಣಿಂ ಹಾಡಾಂ ಚಿಂವೊನ್ ಆಸ್ತಾನಾ,  ದಾರಾಂ ಫೊಡುನ್ ತಿಜೋರಿಂತ್ಲೆಂ ಭಾಂಗರ್ ಚೊರುಂಕ್ ಹಾಂಕಾಂ ಬರ್‍ಯಾನ್ ಕಳಿತ್ ಆಸಾ. ಅಸಲ್ಯಾ ಮನ್ಶಾಂ ಪಯ್ಕಿ ದೇಶಾಚೆ ಮ್ಹಾನ್ ಮನೀಸ್ ಮಾತ್ರ್ ನ್ಹಯ್, ಆಮ್ಚ್ಯಾ ಕೊಂಕಣಿ ಸಮಾಜಾಂತ್ಲೆ ಮಾತ್ಯಾಕ್ ಮುಂಡಾಸ್ ಖೊವಯಿಲ್ಲೆ ಮನೀಸಯ್ ಆಸಾತ್. ತಾಂಕಾಂ ಕೊಣಾಚಿಂ ತೊಂಡಾಂ ಕಶಿಂ ಬಂಧ್ ಕರಯ್ಜಾಯ್ ತೆಂ ಬರ್‍ಯಾನ್ ಕಳಿತ್ ಆಸಾ.

ಮೀಡಿಯಾಕ್ ಜಾಯ್ರಾತಾಂ ದೀವ್ನ್ ಆಮ್ಚೆ ರಾಜಕೀಯ್ ಫುಡಾರಿ ಕಸಲೀಯ್ ಖಬರ್ ಘುಂವ್ಡಾಯ್ತಾತ್. ತಶೆಂಚ್ ಸಾನ್ ಸಾನ್ ಸಮುದಾಯಾಂನಿ ಸಯ್ತ್ ಘಡ್ತಾ. ನಿಮಾಣೆಂ ಆಮಿ ಖಂಯ್ ಪಾವ್ತಾಂವ್ ಮ್ಹಳ್ಯಾರ್ ಆಮ್ಚ್ಯಾ ಆಂಗಾಕ್ ಪಾಪೊ ಲಾಬ್ಚೊನಾ, ತೊಂಡಾಕ್ ಕೊಪೊ ಮೆಳ್ಚೊನಾ ಆನಿ ರಾವುಂಕ್ ಥಾರೊ ಉರ್‍ಚೊನಾ.

ಎಂಡ್ರ್ಯೂನ್ ಏಕ್ ಜ್ವಲಂತ್ ವಿಶಯ್ ಹಾಂಗಾಸರ್ ಆಪ್ಲೆ ಕವಿತೆದ್ವಾರಿಂ ಮಾಂಡ್ಲಾ.  ತುಮ್ಚಿಂ ತೊಂಡಾಂ ಉಗ್ತಿಂ ಕರಾ. ಉಲಯಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ನೀದ್ ಆನಿ ಸುಣಿಂ
 
ಪೋಯ್ರ್
ರಾತ್ ಸಗ್ಳಿ ಘೊಂಕ್ಲಿಂ ಸುಣಿಂ
ಹಿಚೆ ನಿದೆಕ್ ಜಾಲೆಂ ಭಂಗ್
ಸುಣ್ಯಾಂಕ್ ಹಿಣ್ಸಿಲೆಂ ಸರ್ಸರಿತ್!
 
ಕಾಲ್
ಸಗ್ಳೆ ರಾತಿಂ ಸುಣಿಂ ಘೊಂಕ್ಲಿಂಚ್ ನಾಂತ್
ಫಾಂತ್ಯಾರಚ್ ದಿತಾತ್ ಭಾಂಗ್!
 
ಜಾಗ್ ಜಾವ್ನ್ ಪಳೆತಾನಾ...
ಮೀಡಿಯಾಕ್ 'ಎಡಾಂ' ಖಾವವ್ನ್
ತೊಂಡಾಂ ಧಾಂಪಯಿಲ್ಲೆಪರಿಂ-
ಆಂಗ್ಣಾಂತ್ ಸಗ್ಳ್ಯಾನ್ ಪಿಟೊ ಹಾಡಾಂ
ಸುಣಿಂ ಖುಶೆನ್ ಲೆಂವ್ತಾತ್ ಸೊಂಡಾಂ
ಫೊಡಲ್ಲಿಂ ದಾರಾಂ, ಉಗ್ತಿಂ ಕುಡಾಂ...
 
ಕವಿನ್ ಸಾಂಗಲ್ಲೆಂ ಕಿತ್ಲೆಂ ಸತ್!
ಪೊತ್ಯಾಂತ್ ಹಾಡಾಂ ವ್ಹರ್‍ತೆಲ್ಯಾಂಕ್
ಘೊಂಕ್ಚ್ಯಾ ಸುಣ್ಯಾಂಚಿ ನಾ ಭಿರಾಂತ್
 
ಆತಾಂ...
ಸುಣಿಂ ಘೊಂಕಿನಾತ್ಲ್ಯಾರ್
ಹಿ ನಿದನಾ!
 
* ಆಂಡ್ರ್ಯೂ ಎಲ್ ಡಿಕೂನ್ಹಾ
 

संपादकीय:

सुणीं घोंकिनातल्यार थोड्यांक नीद पडना

घोंकच्या सुण्यांचें तोंड धांपवंक हाडां उडोंवची सवय सभारांक आसा. सुणीं हाडां चिंवोन आसताना, दारां फोडून तिजोरिंतलें भांगर चोरूंक हांकां बऱ्यान कळीत आसा. असल्या मनशां पयकी देशाचे म्हान मनीस मात्र न्हय, आमच्या कोंकणी समाजांतले मात्याक मुंडास खोवयिल्ले मनीसय आसात. तांकां कोणाचीं तोंडां कशीं बंध करयजाय तें बऱ्यान कळीत आसा.

मीडियाक जायरातां दीवन आमचे राजकीय फुडारी कसलीय खबर घुंवडायतात. तशेंच सान सान समुदायांनी सयत घडता. निमाणें आमी खंय पावतांव म्हळ्यार आमच्या आंगाक पापो लाभचोना, तोंडाक कोपो मेळचोना आनी रावूंक थारो उरचोना.

एंडऱ्यून एक ज्वलंत विशय हांगासर आपले कवितेद्वारीं मांडला. तुमचीं तोंडां उगतीं करा. उलया.

-मेल्विन रोड्रीगस

कविता:

नीद आनी सुणीं

पोयर
रात सगळी घोंकलीं सुणीं
हिचे निदेक जालें भंग
सुण्यांक हिणसिलें सरसरीत!

काल
सगळे रातीं सुणीं घोंकलींच नांत
फांत्यारच दितात भांग!

जाग जावन पळेताना...
मीडियाक 'एडां' खाववन
तोंडां धांपयिल्लेपरीं-
आंगणांत सगळ्यान पिटो हाडां
सुणीं खुशेन लेंवतात सोंडां
फोडल्लीं दारां, उगतीं कुडां...

कवीन सांगल्लें कितलें सत!
पोत्यांत हाडां व्हरतेल्यांक
घोंकच्या सुण्यांची ना भिरांत

आतां...
सुणीं घोंकिनातल्यार
ही निदना!

* आंडऱ्यू एल डिकूनहा