ಸಂಪಾದಕೀಯ್:

ಯಾದಿಂನಿ ಫಿಚಾರ್ ಕೆಲ್ಲಿಂ ಮೊಗಾಳ್ ಘಡಿತಾಂ

ಥೊಡ್ಯಾ ದಿಸಾಂ ಆದಿಂ ಕವಿತಾ ಟ್ರಸ್ಟ್ ತಶೆಂ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚ್ಯಾ ಜೋಡ್ ಆಸ್ರ್ಯಾಖಾಲ್ ಮುಂಬಯ್ ಮೀರಾ ರೋಡಾರ್ ಆಸ್ಚ್ಯಾ ಸಾ ಜುಜೆ ಇಗರ್ಜೆಚ್ಯಾ ಸಭಾಸಾಲಾಂತ್ ಕವಿತಾ ಕಾಮಾಸಾಳ್ ಹಾಂವೆಂ ಚಲೊವ್ನ್ ವೆಲ್ಲೆಂ. ಆಖ್ಖ್ಯಾ ದಿಸಾಚ್ಯಾ ಕಾರ್ಯಾಂತ್ ಕವಿಗೋಷ್ಠಿ, ವಿಚಾರ್ ಸಾತೆಂ ತಶೆಂ ಸಾಂಸ್ಕೄತಿಕ್ ಕಾರ್ಯಾವಳ್ ಆಸಲ್ಲಿ.  ತ್ಯಾ ಸಂದರ್ಭಾರ್ ಫಿರ್ಗಜೆಚೊ ವಿಗಾರ್ ಫಾ ಡೊಮಿನಿಕ್ ವಾಜ್ ಆನಿ ತಾಚ್ಯಾ ಸಹಾಯಕಾನ್ ವಿಲ್ಫಿ ರೆಬಿಂಬಸಾಚೆಂ ಏಕ್ ಪ್ರೇಮ್ ಗೀತ್ ಆಂಗಾರ್ ಲೋಬ್ ಆಸೊನ್, ನಾಚುನ್, ಗಾಯ್ಲೆಂ. 

ಜೊ. ಸಿ. ಸಿದ್ದಕಟ್ಟೆ ತ್ಯಾಚ್ ಕಾರ್ಮೆಲಿತ್ ಒಡ್ದಿಚೊ ಮನೀಸ್. ಆಪುರ್ಬಾಯೆಚೊ ಕವಿ. ತಾಣೇಂಯ್ ಹಾಂಗಾಸರ್ ಏಕ್ ಪ್ರೇಮ್ ಗೀತ್ ಮೊನ್ಯಾಂನಿ ನಾಚುನ್ ಯಾ ರಡೊನ್  ಮ್ಹಳ್ಳೆಬರಿ ದಿಲಾಂ.  ಕವಿತೆಂತ್ಲಿ ಠರಾವಣ್ ಆನಿ ತೊ ಲಿಖಲ್ಲ್ಯಾ ಮನ್ಶಾಚಿ ಪದ್ವಿ ಮನಾಂತ್ ಧರ್‍ಲ್ಯಾರ್ ಎಕಾ ಕವಿಚ್ಯಾ ಸ್ವಾತಂತ್ರ್ಯಾವಿಶಿಂ ನಾನಾಂತಿಂ ಸವಾಲಾಂ ಧೊಸುಂಕ್ ಲಾಗ್ತಿತ್.  ತೆಂ ಚಿಂತುಂಕ್ ತುಮ್ಕಾಂಚ್ ಸೊಡ್ತಾಂ. 

ಮಾಗೀರ್ ಹೆ ಕವಿತೆಚಿ ಠರಾವಣ್ ಎಕ್ದಮ್ ಮೊಗಾಳ್. ಪೊಕ್ರಿ. ಮೊಗಾಂತ್ಲೆ ಹುಳ್ವುಳೆ, ಕಳ್ವಳೆ ಧಾರಾಳ್ ಹಾಂಗಾಸರ್.  ಪುಣ್ ತ್ಯೊ ಆಜ್ ಯಾದಿ ಮಾತ್ರ್ ಜಾವ್ನ್ ಉರ್‍ಲ್ಯಾತ್.  ತ್ಯೊ ಮನಾಂತ್ ಘೆವ್ನ್ ಹೊ ಮನೀಸ್ ಫುಡಾರಾಚಿಂ ಸಪ್ಣಾಂ ಬಾಂಧುಂಕ್ ವಚನಾ. ಆಜ್ ತಾಚಿಂ ಸಪ್ಣಾಂ ವೆಗ್ಳಿಂಚ್....

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಯಾದ್ ಆಸಾಮೂಗೊ!

ತುಂವೀ ಪಯ್ಸ್
ಹಾಂವೀ ಪಯ್ಸ್
ರಚ್ಯಾಂ ಗಾಂಚ್
ಯಾದಿನಿಂಚ್
ಮಧುರ್ ಯಾದಿನಿಂಚ್!
 
ಆಮಿಂ ದೊಗಾಂಯ್ ಸಂಗಿಂ
ಪಾಂಯ್ ವಾಟೇನ್ ಚಮ್ಕೊನ್
ಫೆಸ್ತಾ ಸಾಂತೆಕ್ ಗೆಲ್ಲ್ಯಾಂವ್
ಯಾದ್ ಆಸಾಮೂಗೊ
ಚಲೊನ್ ಚಲೊನ್ ಥಕೊನ್
ಪಾಂಯ್ ದುಖಿನ್ ರಡ್ತಾನಾ
ಪಾಂಯ್ ದಾಂಬ್ಲೆ ಹ್ಯಾ ಪಾಪಿಯಾನ್
ಯಾದ್ ಆಸಾಮೂಗೊ
 
ಬಾವ್ಲೆಕ್ ಗೊರ್‍ಯೆ ಆಪುರ್‍ಬಾಯೆನ್
ಕಾಪಡ್-ಭಾಜು ನ್ಹೆಸವ್ನ್
ಲಗಿನ್ ಕೆಲ್ಲೆಂ ಗಡ್ದಾನ್
ಯಾದ್ ಆಸಾಮೂಗೊ
ಯೆದ್ದಿ ಲಾಂಬ್ ಪಾಂತಿ ಸೊಭಿತ್
ಖಬ್ರೆವಿಣೆಂ ತುಂ ಕಾತರ್‍ನ್ ಯೆತಾನಾ
ಉಪಾಸ್ ಕೆಲ್ಲೊಗೊ ಹ್ಯಾ ಪಡ್ಪಶ್ಯಾನ್
ಯಾದ್ ಆಸಾಮೂಗೊ
 
ಜಾಂಬ್ಳಾಂ ಗುಡ್ಯಾರ್ ತಾನೆಕ್ ಮ್ಹಣ್
ಉದಕೀ ಖಂಯ್ ಮೆಳನಾಸ್ತಾಂ
ಕೆಂಪಿ ಗಾಯ್ಚೆ ಬೋಂಬ್ ಪಿಳ್‌ಲ್ಲೆ
ಯಾದ್ ಆಸಾಮೂಗೊ
ಚಾಂಪ್ಯಾ ವನಾ ಪೊಂತಾರ್
ತಳ್ಯಾಂತ್ ತುಕಾ ನ್ಹಾಂವ್ಚಿ ಆಶಾ
ಪಾರೊ ರಾವಜೆ ಪಡ್ಲೆಂ ಹ್ಯಾ ಅನ್ನಾಡ್ಯಾನ್
ಯಾದ್ ಆಸಾಮೂಗೊ
 
ವ್ಹಡ್ ಜಾಲೆಂಯ್ ಖಂಯ್‌ಗೊ ತುಂ
ಸಯ್ರಿಕ್ ಲಾಗ್ಲಿ ಪಾಟಾಪಾಟ್
ಪಾಟ್ಲ್ಯಾ ದಾರಾನ್ ನಿಕಳ್ಳೊಂ ಹಾಂವ್
ಯಾದ್ ಆಸಾಮೂಗೊ
ನವ್ರೊ ಹಾತ್ ಮುಡ್ಡಿತಾನಾ
ಆಂಗಾರ್ ಮ್ಹಜ್ಯಾ ಹುಂಬ್ಲೆಗೊ
ಫಿರ್‍ಗಾಲೊಂ,"ತುಜೆಂ ಬರೆಂ ಜಾಂವ್"
ಯಾದ್ ಆಸತ್‌ಮೂಗೊ!

-ಜೊ.ಸಿ.ಸಿದ್ಧಕಟ್ಟೆ