ಸಂಪಾದಕೀಯ್:

ಜೆಜುಚ್ಯಾ ವೊಪಾರಿಂಚೊ ನವೊ ಅರ್ಥ್

ಸಾಸ್ವಾ ಭಿಯಾಚೆ ಸಕ್ತೆವಿಶಿಂ, ಪಿಟಾಕ್ ಭರ್ಸುಂಚೆ ಖಮಿರೆಚೆ ತಾಕ್ತೆವಿಶಿಂ ಆಮಿ ಸರ್ವಾಂ ಜಾಣಾಂವ್. ಹ್ಯೊ ವೊಪಾರಿ ಸಾಂಗುನ್ ಜೆಜು ಸ್ವಾಮಿನ್ ಸರ್ಗಾ ರಾಜ್ ಕಿತೆಂ ಮ್ಹಣೊನ್ ಸಾಂಗಲ್ಲೆಂ ಆಮಿ ಜಾಣಾಂವ್.

ತಸಲೆಂ ಸರ್ಗಾರಾಜ್ ಆಪ್ಲ್ಯಾ ಘರಾಂತ್ ರುತಾ ಕೆಲ್ಲ್ಯಾ, ಸ್ವತಾ ಸಾಸಾಂವ್ ಆನಿ ಖಮಿರೆಚಿ ಸಕತ್ ಜಾಲ್ಲ್ಯಾ, ಬಾಬಾಕ್ ಆನಿ ಮಾಂಯ್ಕ್ ಪಾಟಿಂ ಘರಾ ಧಾಡ್ ಮ್ಹಣೊನ್ ಹಾಂಗಾಚೊ ಕವಿ ಜೆಜುಲಾಗಿಂ ಮಾಗ್ತಾ.

ಕಾಂಯ್ ತಿಂ ಗೆಲ್ಯಾ ಉಪ್ರಾಂತ್ ತಾಚೆಂ ಸರ್ಗಾರಾಜ್ ಮಾಯಾಗ್ ಜಾಲಾಂ? ಆತಾಂ ಆಸ್ಚಿಂ ಮನ್ಶಾಂ ತಾಕಾ ಹೆಂ ಸರ್ಗಾರಾಜ್ ದೀಂವ್ಕ್ ಸಕೊಂಕ್ ನಾಂತ್? ಸವಾಲಾಂ ಸಭಾರ್ ಧೊಸುಂಕ್ ಲಾಗ್ಲ್ಯಾಂತ್.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ದೋನ್ ವೊಪಾರಿ

ಶೆತಾಂತ್ ವೊಂಪಲ್ಲೆಂ ಸಾಸ್ವಾ ಭಿಂ
ಆನಿ ಪಿಟಾಕ್ ಭರ್ಶಿಲ್ಲಿ ಖಮಿರ್
ವೊಪಾರಿಂನಿ ಉಗ್ಡಾಪೆಂ ಕೆಲೆಂ ಜೆಜುನ್
ಸರ್ಗಾ ರಾಜ್

ಹಾಂವ್ ಜಾಣಾ ಜೆಜು,
ತೀಸ್ ವರ್ಸಾಂ ಕೆಲ್ಲೆಂಯ್ ಕಿತೆಂ?
ತೆತ್ತೀಸ್ ವರ್ಸಾಂ ಖೆಲ್ಲೆಂಯ್ ಕಿತೆಂ?
ತೂಂಯ್ ಶೆತಾಂತ್ ಘೊಳ್ಳಾಯ್
ತೂಂಯ್ ಕುಜ್ನಾಂತ್ ಖೆಳ್ಳಾಯ್.

ಆತಾಂ ಆಯ್ಕ್ ಮಾಗ್ಣೆಂ ಮ್ಹಜೆಂ

ಶೆತಾಂತ್ ಭಿಂ ವೊಂಪಲ್ಲ್ಯಾ ಬಾಬಾಕ್
ಕುಜ್ನಾಂತ್ ಸನ್ನಾಂ ಕೆಲ್ಲೆ ಮಾಂಯ್ಕ್
ಪಾಟಿಂ ಧಾಢ್ ಮ್ಹಜ್ಯಾ ದಾರಾ
ಉಗಡ್ತಲೆಂ ಘರಾ
ಸರ್ಗಾ ರಾಜ್….

-ಆಂಡ್ರ್ಯೂ ಎಲ್. ಡಿಕುನ್ಹಾ