ಸಂಪಾದಕೀಯ್:

ವೊಜ್ಯಾಚ್ಯಾ ನಾಂವಾರ್ ಹಾಸ್ಯಾಚೆಂ ಜೆವಣ್

ಸಿಜ್ಯೆಸ್ ತಾಕೊಡೆ ಆಪ್ಲ್ಯಾ ಹಾಸ್ಯ್ ಕವಿತಾಂಕ್, ಬರ್ಪಾಂಕ್ ನಾಂವ್ ವೆಲ್ಲೊ ಬರಯ್ಣಾರ್. ಹಾಂಗಾಸರ್ ರೊಸಾಚ್ಯಾ ಮಾಟ್ವಾಂತ್ ಜಾಂವ್ಚಿ ಗೊವ್ಜಿ, ಗಮ್ಮತ್, ಕಾರಸ್ತಾನಾಂ ಸಗ್ಳಿಂ ಸುಂದರ್ ಸಲೀಸ್ ಸಮ್ಜೊಂಚೆಪರಿಂ ಕಾವ್ಯಾಳ್ ರುಪಾನ್ ಸಾದರ್ ಕೆಲ್ಯಾಂತ್.

ಕೆದಳಾಯ್ ಗಂಭೀರ್ ಕವಿತಾ ವಾಚುನ್ ಆಸ್ಚ್ಯಾಂಕ್ ಹಾಂಗಾಸರ್ ಫಕತ್ ಹಾಸ್ಯಾಚ್ಯಾ ನಾಂವಾರ್ ಕವಿತಾ ಆಮಿ ದಿಲ್ಯಾ. ತರಿಪುಣ್ ನಿಮಾಣ್ಯಾ ಕಡ್ವ್ಯಾಂತ್ ಗರ್ಜೆಚೊ ಚಿಮ್ಟೊ ಆಸಾಚ್!

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ವೊಜಿಂ

ರೊಜಿಬಾಯೆಚ್ಯಾ ರೊಸಾ ಕಾರ್ಯಾಕ್
ವೊಜಿಂ ಆಯ್ಲಿಂ ರಾಸ್ ರಾಸ್
ಬೆಂಡಾ ವ್ಹಾಜ್ಪಾರ್ ಆಯ್ಲೆ ದಾಯ್ಜಿ
ಲುಂಗಿ ಉಕ್ಲುನ್ ನಾಚ್ ನಾಚ್!

ದುಜಾಮಾಚೊ ದುಕೊರ್ ಆಯ್ಲಾ
ಬೊಸ್ತ್ಯಾಮಾಚೊ ಬೊಕ್ರೊ ಪಾವ್ಲಾ
ಕಾಸ್ಮಿರಾಮಾನ್ ಕೊಂಬೊ ಧಾಡ್ಲಾ
ತಲ್ಕಾಂ ಪಳೆವ್ನ್ ಪಾಕ್ಯಾರ್ ಚಡ್ಲಾ!

ಗುಸ್ತಿನಾಮಾಚೊ ಘಡಾಯ್ ಪಾವ್ಲಾ
ಬಾಬಿಯಾಮಾಚಿಂ ಬಿಂಬ್ಲಿಂ ಆಯ್ಲ್ಯಾಂತ್
ಶಾಬಿಯಾಮಾನ್ ಬೊಟಾಟೆ ಧಾಡ್ಲ್ಯಾತ್
ಆಬುಟಾಮಾನ್ ಆಂಬಾಡೆ ಹಾಡ್ಲ್ಯಾತ್!

ಕಾಲೆಸ್ತಾಮಾಚೊ ಕಾಜ್ಚೊ ಸೊರೊ
ಇಂತ್ರಾಮಾಚೊ ಇಂದಾ ಸೊರೊ
ಆಲೆಸಾಮಾಚೊ ಆಣ್ಸಾಂ ಸೊರೊ
ಚೆಂಬಾಂತ್ ವೊತ್ ಗಾ ಪುರೊ ಪುರೊ!

ಕಾತ್ತು ಬಾಯೆಚೆ ವ್ಹಡ್ಲೆ ಕುವಾಳೆ
ನೊತ್ತುಬಾಯೆಚೆ ಧಾಕ್ಟೆ ಆವಾಳೆ
ಲೆತ್ತಿ ಬಾಯೆಚೆಂ ಲೊಣ್ಚೆಂ ಪಳೆ
ಮೆಟ್ಟಿಬಾಯೆಚಿಂ ವಾಂಯ್ಗಿಂ ಅಳೆ!

ಮಿಂಗೆಲಾಮಾಚಿ ಲಾಂಬ್ ಮಿರ್ಸಾಂಗ್
ಆಚ್ಚಾಮಾಚಿ ಚಿಂಚೆ ಆಮ್ಸಾಣ್
ಪಿಯಾದಾಮಾಚೆ ಗೊಣಿ ಪಿಯಾವ್
ಇನಾಸಾಮಾಚೆಂ ವ್ಹಡ್ಲೆಂ ಬುಯಾಂವ್!

ನೆಲ್ಲಿ ಆಕಯ್ಚೆ ಶೆಂಭರ್ ನಾರ್ಲ್
ಕಿಟ್ಟಿಬಾಯೆಚೆ ಪನ್ನಾಸ್ ಕೀರ್ಲ್
ಲಿಲ್ಲಿ ಬಾಯೆಚಿ ಪೊಟ್ಟು ಲೊಸುಣ್
ಪಾಲ್ಲಿಬಾಯೆಚಿ ಭಾಜಿ ಹಿಮ್ಸಾಣ್

ಬೆನ್ನಿಬಾಯೆಚಿಂ ಪಂಚ್ವೀಸ್ ಬೊಬ್ಳಿಂ
ವಿನ್ನಿಬಾಯೆಚಿಂ ಪಾಂತ್ತೀಸ್ ಪಡ್ವಳಿಂ
ಬೆನ್ನಾಬಾಚಿಂ ಜುಣ್ಕಾಟ್ ಬೆಂಡಾಂ
ಜೆನ್ನಾಬಾಚಿಂ ಪಿಕಿಂ ಭಿಂರ್ಡಾಂ!

ಫುಂಕಾರೇ ಫುಂಕಾ ತುಂರ್ಬೆತ್ ಫುಂಕಾ
ಕಾಜ್ಚೊ ವೊತುನ್ ದಿತಾ ಪೊಕಾ
ನಾಚಾಗೊ ನಾಚಾ, ಬಾಯ್ಲಾ ನಾಚಾ
ಮಾಟ್ವಾ ಭಾಯ್ರ್ ಖೆಳೊಂಕ್ ವಚಾ!

ಘರ್ಚೊ ಯಜ್ಮಾನ್ ಮಾಳ್ಯಾರ್ ಚಡ್ಲಾ
ಬುಯಾಂವ್ ಘೆವ್ನ್ ಸಕಯ್ಲ್ ಉಡ್ಲಾ
ಖಟ್ಲ್ಯಾ ಪಂದಾ ಕೋಣ್ ನಿದ್ಲಾ?
ಹೊಕ್ಲೆಚೊ ಮಾವ್ಳೊ ಪಿಯೆವ್ನ್ ಪಡ್ಲಾ!

ಜೆರ್ಮಿಯಾಬಾ ಉಡಯ್ ಗರ್ನಾಳ್
ಬೊತ್ಲಿ ಪೂರಾ ಲಿಪಯ್ ಗುಡಾಂತ್
ಪಾದ್ರ್ಯಾಬ್ ಆಯ್ಲೊ ಬೆಸಾಂವ್ ಮಾಗಾ
ಗುರ್ಕಾರಾಮಾ ಆಮೊರಿ ಮ್ಹಣ್ ಗಾ!

ಶೇಲೆ ಸೆಲ್ಲಿ ಭಾಯ್ರ್ ಯೇಗೊ
ಸಾಬು ತುವಾಲೊ ಪಾದ್ರ್ಯಾಬಾಕ್ ದೀಗೊ
ತಾಂಬ್ಡೆಂ ವೊತುಂಕ್ ಬಾಬಾಕ್ ಸಾಂಗ್ ಗೊ
ಉದಕ್, ಸೊಡಾ, ಕಾಂಯ್ ನಾಕಾ ಗೊ!

-ಸಿಜ್ಯೆಸ್, ತಾಕೊಡೆ