Kavita Kular

ವೊಲ್ತೆರ್

ಸಂಪಾದಕೀಯ್:

ಮರಣ್ ಹಾಡ್ಚೆಂ ಇಜಿಚೇರ್ ಆನಿ ಇಜಿಚೆರಾನ್ ಹಾಡ್ಚಿ ಭಿರಾಂತ್

ವೊಲ್ತೆರ್ ಮ್ಹಳ್ಯಾರ್ ಇಜಿಚೇರ್. ಕವಿಚ್ಯಾ ಘರಾ ಏಕ್ ವೊಲ್ತೆರ್ ಆಸಾ. ಹೆಂ ವೊಲ್ತೆರ್ ತಾಚೆರ್ ಬಸಲ್ಲ್ಯಾಂಕ್ ಕ್ರಮೇಣ್ ಮರಣ್ ಹಾಡ್ತಾ. ವೊಲ್ತೆರ್ ಮರಣ್ ಹಾಡ್ತಾ ಯಾ ತಾಚೆರ್ ಬಸ್ಪಿ ಮನ್ಶಾಂಕ್ ಮರ್‍ಣಾಚಿ ಪ್ರಾಯ್ ಭರ್‍ತಾ - ಹೆಂ ಚಿಂತಿಜಾಯ್ ಜಾಲ್ಲೆಂ ಸವಾಲ್! ಪುಣ್ ಅಸಲಿಂ ಸವಾಲಾಂ ಕವಿಚೆ ಮತಿಕ್ ವಚನಾಂತ್. ಬದ್ಲಾ ವೊಲ್ತೆರ್ ಮರಣ್ ಹಾಡ್ತಾ ಮ್ಹಳ್ಳಿ ಗಜಾಲ್ ತಾಚೆ ಮತಿಂತ್ ಘುಸೊನ್ ಗೆಲ್ಯಾ ಆನಿ ತೊ ಎಕಾ ನಿಚೆವಾಕ್ ಆಯ್ಲಾ - ವೊಲ್ತೆರ್ ಮರಣ್ ಹಾಡ್ತಾ!

ಹಾಂತುಂ ಥಾವ್ನ್ ಭಿರಾಂತ್ ಉಬ್ಜತಾ. ಜಿವಿತ್ ಸಗ್ಳೆಂ ಆಕಾಂತಾಚೆಂ ಜಾತಾ. ವೊಲ್ತೆರಚ್ ವಿಕುನ್ ಸೊಡ್ಚೆಂ ಮನ್ ತೊ ಕರ್‍ತಾ. ಪುಣ್ ಕೊಣಾಕ್ ವಿಕ್ತಲೊ ತೊ? ತುಮ್ಗೆರ್ ಕೊಣೀ ನಾಕಾ ಜಾಲ್ಲೊ ಮನೀಸ್ ಆಸಾ ಕಾಂಯ್ ತೊ ವಿಚಾರ್‍ತಾ! ಮಾರ್ಮಿಕ್ ಸವಾಲ್. ಆಪ್ಣಾಚೆಂ ಭ್ಯೆಂ ಸಗ್ಳೆಂ ಮನ್ಶಾಕುಳಾಕ್ ವಿಸ್ತಾರಾಂವ್ಚಿ ಥರ್ಥರಾಂವ್ಚಿ ಗಜಾಲ್. ಎಕಾ ಬೊಮಾಚ್ಯಾಕಿ ಚಡಿತ್ ತಾಕತ್ ಹ್ಯಾ ಸವಾಲಾಕ್ ಆಸಾ!

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

 

 

 

 

 

 

ವೊಲ್ತೆರ್

ಮ್ಹಜ್ಯಾ ಘರಾಂತ್ ಏಕ್ ಪೊರ್‍ಣೆಂ ವೊಲ್ತೆರ್ ಆಸಾ
ಪಯ್ಲಿಂ ಮ್ಹಜೊ ಪಣ್ಜೊ ತ್ಯಾ ವೊಲ್ತೆರಾರ್ ಬಸ್ತಾಲೊ
ಏಕ್ ದೀಸ್ ತೊ ತ್ಯಾ ವೊಲ್ತೆರಾರ್ ಬಶಿಲ್ಲೆ ಕಡೆನ್ ಮೆಲೊ
ಮಾಗೀರ್ ಮ್ಹಜೊ ಆಜೊ ವೊಲ್ತೆರಾರ್ ಬಸ್ತಾಲೊ
ತೋಯ್ ಬಿ ಏಕ್ ದೀಸ್ ತಸೊಚ್ ಮೆಲೊ
ಮಾಗೀರ್ ತ್ಯಾ ರಿಕಾಮ್ಯಾ ವೊಲ್ತೆರಾರ್
ಮ್ಹಜೊ ಬಾಪುಯ್ ಬಸುಂಕ್ ಲಾಗ್ಲೊ
ತೋಯ್ ಬಿ ಅಚ್ಕಿತ್ ಮೆಲೊ
ವೊಲ್ತೆರಾಚೆರೂಚ್
ಹ್ಯಾ ವೊಲ್ತೆರಾಚೊ ಮ್ಹಾಕಾ ಆತಾಂ ಭಂಯ್ ದಿಸ್ತಾ
ಹಾಂವ್ ತ್ಯಾ ವೊಲ್ತೆರಾರ್ ಕೆನ್ನಾಂಚ್ ಬಸನಾ

ಪುಣ್ ಕಾಂಯ್ ದಿಸಾಂ ಪಯ್ಲಿಂ ಪಳೆತ್ ಜಾಲ್ಯಾರ್
ಮ್ಹಜೊ ಪೂತ್ ತ್ಯಾ ವೊಲ್ತೆರಾರ್ ಬಸ್ಲಾ
ಹಾಂವೆಂ ತಾಚ್ಯಾ ಕಾನ್ಸುಲಾರ್ ಏಕ್ ದಿಲೆಂ
ಆನಿ ವೊಲ್ತೆರ್ ದೊಡುನ್ ದವರ್‍ಲೆಂ

ಪುಣ್ ಹಾಂವ್ ನಾ-ಸೊ ಪಳೆವ್ನ್
ತೊ ಲ್ಹವೂಚ್ ವೊಲ್ತೆರಾರ್ ಬಸ್ತಾ
ಆತಾಂ ಹ್ಯಾ ವೊಲ್ತೆರಾಚೆಂ ಹಾಂವ್ ಕಿತೆಂ ಕರುಂ?
ತುಮ್ಕಾಂ ಬಿ ಜಾಯ್ ವೊಲ್ತೆರ್?
ತುಮ್ಗೆರ್ ಬಿ ಆಸಾ ಕೊಣ್ ಜಾಣ್ಟೊ ಮನೀಸ್
ನಾಕಾ ಆಶಿಲ್ಲೊ?

-ಅರುಣ್ ಸಾಖರ್‌ದಾಂಡೆ

 

संपादकीय:

मरण हाडचें इजिचेर आनी इजिचेरान हाडची भिरांत

वोल्तेर म्हळ्यार इजिचेर. कविच्या घरा एक वोल्तेर आसा. हें वोल्तेर ताचेर बसल्ल्यांक क्रमेण मरण हाडता. वोल्तेर मरण हाडता या ताचेर बसपी मनशांक मर‍णाची प्राय भर‍ता - हें चिंतिजाय जाल्लें सवाल! पूण असलीं सवालां कविचे मतीक वचनांत. बदला वोल्तेर मरण हाडता म्हळ्ळी गजाल ताचे मतिंत घुसोन गेल्या आनी तो एका निचेवाक आयला - वोल्तेर मरण हाडता!

हांतूं थावन भिरांत उबजता. जिवीत सगळें आकांताचें जाता. वोल्तेरच विकून सोडचें मन तो कर‍ता. पूण कोणाक विकतलो तो? तुमगेर कोणी नाका जाल्लो मनीस आसा कांय तो विचार‍ता! मार्मीक सवाल. आपणाचें भ्यें सगळें मनशाकुळाक विस्तारांवची थर्थरांवची गजाल. एका बोमाच्याकी चडीत ताकत ह्या सवालाक आसा!

-मेल्विन रोड्रीगस

कविता:

वोल्तेर

म्हज्या घरांत एक पोर‍णें वोल्तेर आसा
पयलीं म्हजो पणजो त्या वोल्तेरार बसतालो
एक दीस तो त्या वोल्तेरार बशिल्ले कडेन मेलो
मागीर म्हजो आजो वोल्तेरार बसतालो
तोय बी एक दीस तसोच मेलो
मागीर त्या रिकाम्या वोल्तेरार
म्हजो बापूय बसुंक लागलो
तोय बी अचकीत मेलो
वोल्तेराचेरूच
ह्या वोल्तेराचो म्हाका आतां भंय दिसता
हांव त्या वोल्तेरार केन्नांच बसना

पूण कांय दिसां पयलीं पळेत जाल्यार
म्हजो पूत त्या वोल्तेरार बसला
हांवें ताच्या कान्सुलार एक दिलें
आनी वोल्तेर दोडून दवर‍लें

पूण हांव ना-सो पळेवन
तो ल्हवूच वोल्तेरार बसता
आतां ह्या वोल्तेराचें हांव कितें करूं?
तुमकां बी जाय वोल्तेर?
तुमगेर बी आसा कोण जाणटो मनीस
नाका आशिल्लो?

-अरूण साखर‌दांडे



Title : ವೊಲ್ತೆರ್

Please fill in the form below with your feedback/ suggestions .

Fields marked with * are necessary



Disclaimer : Please write your correct name and email address. Kindly do not post any personal, abusive, defamatory, infringing, obscene, indecent, discriminatory or unlawful or similar comments. kavitaa.com/konkanipoetry.com will not be responsible for any defamatory message posted under this article.

Please note that sending false messages to insult, defame, intimidate, mislead or deceive people or to intentionally cause public disorder is punishable under law. It is obligatory on kavitaa.com / konkanipoetry.com to provide the IP address and other details of senders of such comments, to the authority concerned upon request.

Hence, sending offensive comments using kavitaa.com / konkanipoetry.com will be purely at your own risk, and in no way will kavitaa.com / konkanipoetry.com be held responsible.


 A  B  C  D  E  F  G  H  I  J  K  L  M
 
 N  O  P  Q  R  S  T  U  V  W  X  Y  Z