ತಾಂಬ್ಡ್ಯಾ ದೊಳ್ಯಾಂಚೊ ಆಶಾವಾದಿ: 'ಕಟ್‌ಪುತ್ಳಿ' ಪುಸ್ತಕಾಚೆರ್ ಏಕ್ ಭಾರ್ಕಾಯೆಚಿ ನದರ್

ತಾಂಬ್ಡ್ಯಾ ದೊಳ್ಯಾಂಚೊ ಆಶಾವಾದಿ: 'ಕಟ್‌ಪುತ್ಳಿ' ಪುಸ್ತಕಾಚೆರ್ ಏಕ್ ಭಾರ್ಕಾಯೆಚಿ ನದರ್

-ಆಂಡ್ರ್ಯೂ ಎಲ್. ಡಿ'ಕೂನ್ಹಾ

ಆಪ್ಲೆ ಕವಿತೆಕ್ ಏಕ್ ಹಾತೆರ್ ಕರ್‍ನ್ ಘೆವ್ನ್ ಸಮಾಜೆಚ್ಯಾ ಆಂಗಾಂ ಆಂಗಾಂಕ್ ಥಾಪುಡ್ನ್, ಬಡವ್ನ್ ಸಮಾಜೆಚೆ ಪೊಕೊಳಾಯೆಚೊ ಆವಾಜ್ ವಾಚ್ಪ್ಯಾಚ್ಯಾ ಕಾನಾಂಕ್ ಪಾವಂವ್ಚೆಂ, ಸಮಾಜೆಚ್ಯಾ ಅಸ್ಲಿಯತೆಚಿ ವೊಳಕ್ ಕರ್‍ನ್ ದಿಂವ್ಚೆಂ ಪ್ರೇತನ್ ಕರ್‍ನ್ ಆಸಾ 'ಕಟ್‌ಪುತ್ಳಿ'ಚೊ ಕವಿ ವಲ್ಲಿ ಕ್ವಾಡ್ರಸ್. ಸಮಾಜಿಕ್ ಅನ್ಯಾಯ್, ಪೊಕ್ಳೆಪಣ್, ಹಿಪೊಕ್ರೆಸಿ ಸೊಸುಂಕ್ ಜಾಯ್ನಾಸ್ತಾನಾ ಕಳ್ವಳೊನ್ ಉಚಾಂಬಳ್ ಜಾಲ್ಲೊ ಕವಿಚ್ 'ಕಟ್‌ಪುತ್ಳಿ'ಂತ್ಲ್ಯಾ ಚಡಾವತ್ ಕವಿತೆಂನಿ ದಿಶ್ಟಿಕ್ ಪಡ್ತಾ.

ಆಶಾಚ್ ನಿರಾಶೆಚೆಂ ಮೂಳ್ ಕಾರಣ್. 'ಕಟ್‌ಪುತ್ಳಿ' ಕವಿತೆಂತ್ಲೊ ನಾಯಕ್ ಆಪ್ಲ್ಯಾ ಕ್ರೋಧಿತ್ ಚಿಂತ್ಪಾ ವರ್‍ವಿಂ ನಿರಾಶಿ ಆನಿ ಉದ್ರೇಕಿತ್ ದಿಸ್ತಾ ತರೀ ಸೊಸ್ಣಿಕಾಯೆನ್ ಕವಿತೆಂತ್ಲೆ ವೆಕ್ತಿಕ್ ಸಮ್ಜೊಂಚೆಂ ಪ್ರೇತನ್ ಕೆಲ್ಯಾರ್ ದೊಳೆ ತಾಂಬ್ಡೆ ಜಾಲ್ಲೊ ಏಕ್ ಖರೊ ಆಶಾವಾದಿ ಮನಿಸ್ ದೊಳ್ಯಾಂ ಸಾಮ್ಖಾರ್ ಯೆತಾ.

'ಕಟ್‌ಪುತ್ಳಿ'ಚೊ ಕವಿ ಏಕ್ ಆಶಾವಾದಿ. ಕವಿಕ್ ಪ್ರೇರಿತ್ ಕರ್‍ಚಿ ಸಮಾಜ್ ವೆಗ್ಳಿ. ಕವಿನ್ ಆಶೆಂವ್ಚಿ ಸಮಾಜ್ ವೆಗ್ಳಿಚ್. ಕವಿಚೊ ಶೆವೊಟ್ ಕವಿತೆಂನಿ ಸ್ಪಶ್ಟ್ ದಿಸ್ತಾ. ಹ್ಯಾ ಸಂಸಾರಾಂತ್ ಕಳೆ ಫುಲಂವ್ಚೊ ಶೆವೊಟ್ ಹೊ. ಸಂಸಾರಾಂತ್ ಸುವಾದ್ ವಾಂಟ್ಚೊ ಶೆವೊಟ್. 'ಉಗ್ತ್ಯಾ ಬಜಾರಾಂತ್ ಏಕ್ ವಿಕ್ರೊ' ಕವಿತೆಚೆ ಸುರ್‍ವೆರ್ ಕವಿ ಹೊಚ್ ಶೆವೊಟ್ ಉಚಾರ್‍ನ್ ಸಾಂಗ್ತಾ:

ಹ್ಯಾ ಭುಮಿ ವೈಕುಂಟಾಂತ್
ಏಕ್ ಮೂಟ್ ಮಾತಿ
ಚಾರ್ ಥೆಂಬೆ ಉದಕ್
ಇತ್ಲೆಂಚ್ ಆಶೆಲ್ಲೊಂ
ಸಪ್ಣಾಚೆಂ ಏಕ್ ಭಿಂ ಲಾಂವ್ಕ್
ದೋನ್ ಸೊಭಿತ್ ಕಳೆ ಫುಲಂವ್ಕ್
ಚ್ಯಾರ್ ಜಣಾಂಕ್ ಸುವಾದ್ ದೀಂವ್ಕ್

ಖರೊ ಆಶಾವಾದ್ ಹೊ. ಪುಣ್ ಭುಮಿ ವೈಕುಂಟ್ ಮ್ಹಣ್ ಮರ್‍ಯಾದ್ ದಿಂವ್ಚ್ಯಾ ಹ್ಯಾ ಕನಿಶ್ಟ್ ಆನಿ ಆನಿಶ್ಟ್ ಸಂಸಾರಾಂತ್ ಮನ್ಶಾಪಣಾಚೊ ದುಕೊಳ್ ಪಡ್ತಾನಾ, ಹೆಣೆ ತೆಣೆ ಜುದಾಸ್, ಪಿಲಾತ್, ಖುರಿಸ್‌ಚ್ ದಿಸ್ತಾನಾ ಭುಮಿವೈಂಕುಟ್ ರಚ್‌ಲ್ಲ್ಯಾ ದೆವಾಕ್‌ಚ್ ದುರ್‍ಸೊನ್ ಹೆ ಕವಿತೆಚೊ ನಾಯಕ್ ಕಂಗಾಲ್ ಜಾತಾ. "ತುಜ್ಯಾ ಭುಮಿವೈಂಕುಟಾಂತ್ ಹಾಂವೆ ಸಪ್ಣಾಂಚೆಂ ಭಿಂ ವೊಂಪ್ಚೆಪರಿಂಚ್ ನಾ" ಮ್ಹಣ್ ಕರ್ಗತಾ. "ದುಕೊಳ್" ಕವಿತೆಚೊ ವೆಕ್ತಿ ಅಕ್ಲಾಸ್‌ಚ್ ಸೊಡ್ತಾ. ಪರತ್ ಮೊಯ್ಜೆಪರಿಂ ಹ್ಯಾ ಸಂಸಾರಾಂತ್ ಪಡ್‌ಲ್ಲ್ಯಾ ಮನ್ಶಾಪಣಾಚ್ಯಾ ದುಕೊಳಾವಿಶಿಂ ದೆವಾಲಾಗಿಂ ಆಪ್ಲೆ ಕಳ್ವಳೆ ಸಾಂಗ್ತಾ:

ಖರ್‍ಕಟ್ಯಾ ವೊತಾಂತ್ ಫುಲ್ಚೆ ಬೊಂಗೆ
ಆಬ್ಲೆಸ್ಪಣಾಚೆ ಭೃಮರ್ ಚಿಂವ್ತಾತ್
ಝಾಡಾಂನಿ ಕಳೆ ಫುಲ್ತಾನಾಂಚ್ ಯೆವುನ್
ಫಾಂಟ್ಯಾಸವೆಂ ತಾಕಾ ಲುಂವ್ತಾತ್

ಹಾಂಗಾಯ್ ನಿರಾಶಾ ಉಟೊನ್ ದಿಸ್ತಾ ತರೀ ಖರ್‍ಕಟ್ಯಾ ವೊತಾಂತ್ ಫುಲ್ಚ್ಯಾ ಬೊಂಗ್ಯಾಚಿ ಏಕ್ ಊಂಚ್ ಪ್ರತಿಮಾ ಉಬಿ ಕರ್‍ನ್ ಕವಿನ್ ಆಪ್ಲ್ಯಾ ವಿಚಾರಾಂಕ್ ಬಂಡಾಯ್ ಚಿಂತ್ಪಾಚೊ ರಂಗ್ ದಿಲಾ. ಖರ್ಕಟ್ಯಾ ವೊತಾಚೆ ಧಾವೆಕ್ ಕರ್‍ಪನಾಸ್ತಾಂ, ಆಪ್ಲೆಂ ಪಾಚ್ವೆಂಪಣ್ ಹೊಗ್ಡಾಯ್ನಾಸ್ತಾಂ ಬೊಂಗೆ ಫುಲೊಂಕ್ ಸಕ್ತಾತ್. ಪುಣ್ ಮತ್ಲಬಿ ಸಂಸಾರಾಚೆ ಆಬ್ಲೆಸಿ ಭೃಮರ್ ಹ್ಯಾ ಬೊಂಗ್ಯಾಂಕ್ ಫುಲೊನ್ ರಾವೊಂಕ್ ಸೊಡಿನಾಂತ್. ಕೊಣ್ ಹೆ ಭೃಮರ್? ಬಂಡ್ವಾಳ್‌ಶಾಹಿ ಆನಿ ಶೋಶಿತ್ ವರ್‍ಗಾಕ್ ದೊಳ್ಯಾಂ ಹುಜ್ರಿಂ ಹಾಡುಂಕ್ ಕವಿನ್ ವಿಂಚ್‌ಲ್ಲಿಂ ಉತ್ರಾಂ ಆನಿ ಪ್ರತಿಮಾ ಕವಿಚಿ ಶಾತಿ ದಾಕಯ್ತಾತ್.

ಮನ್ಶಾಪಣಾಚೊ ಸುವಾದ್ ಪ್ರಸಾರ್‍ಚೊ ಏಕ್ ನಿತಿಚೊ ಸಂಸಾರ್ ಆಸಾ ಕರುಂಕ್ ಕವಿ ಝುಜ್ ಮಾಂಡುನ್ ಆಸಾ. 'ಕಟ್'ಪುತ್ಳಿ'ಂತ್ಲಿಂ ಕವಿತಾಂ ಹ್ಯಾ ಝುಜಾಚೊ ತಾಳೊಚ್ ಸಹೃದಯಿಂಚ್ಯಾ ಕಾಳ್ಜಾ ಮನಾಕ್ ಆಪ್ಟತಾತ್. ಕವಿತಾಂ ಹ್ಯಾ ಝುಜಾಚಿಂ ಅಸ್ತ್ರಾಂ ಜಾವ್ನ್ ಝುಜ್ತಾತ್. ಥೊಡಿಂ ಕವಿತಾಂ ವ್ಯಂಗ್ಯ್ ಉತ್ರಾಂಚ್ಯೊ ಚಾಟಿಯೊ ಜಾವ್ನ್ ಸರ್‍ಸರೀತ್ ವ್ಹಾಜಯ್ತಾತ್ ತರ್, ಥೊಡಿಂ ಕವಿತಾಂ ಧಾರಿಂಚಿಂ ಉತ್ರಾಂ ಘೆವ್ನ್ ತಲ್ವಾರ್ ಜಾವ್ನ್ ಮಾರ್‍ತಾತ್. ಕವಿಚೆಂ ಹೆಂ ಝುಜ್ ಉಲ್ಟೆಂ ಮ್ಹಣ್ ತಾಚೆರ್ ಉಪ್ರಾಟ್ಲೆಲ್ಯಾಂಕ್ "ಯೆಯಾ ಮ್ಹಜಿ ನೀತ್ ಕರಾ...ಕಾಳಿಜ್ ಮ್ಹಜೆಂ ಚಿರುನ್ ಸೊಡಾ" ಮ್ಹಣ್ ಉಗ್ತ್ಯಾನ್ ಉಲೊ ದಿಂವ್ಚೆಂ ಧೈರ್ ತೊ ಘೆತಾ.

ಸಮಾಜೆ ಥಂಯ್ ಕವಿಚೆಂ ಚಿಂತಪ್ ಕವಿನ್ ಸಮಾಜೆ ಥಾವ್ನ್ ಜೊಡ್‌ಲ್ಲ್ಯಾ ಅನ್ಭೊಗಾಚೆರ್ ಹೊಂದೊನ್ ಆಸ್ತಾ. ಆದರ್‍ಶ್ ಸಮಾಜ್ ಆಶೆಂವ್ಚಾ ಕವಿಕ್ ಹೆಣೆ ತೆಣೆ ಸರ್‍ಕಸ್, ಬಜಾರ್ ದಿಸ್ತಾನಾ ಸೊಸುಂಕ್ ಜಾಯ್ನಾ. ದೆಕುನ್ ತೊ ಸಮಾಜೆಚೆಂ ವಿಡಂಬನ್ ಕರ್‍ತಾ. ಸರ್ಕಸ್ ಕವಿತೆಂತ್ಲೆಂ ವಿಡಂಬನ್ ಪಳೆಯಾ:

ಥೊಡೆ ಧಾಂವ್ತಾತ್
ಆನಿ ಥೊಡೆ ಧಾಂವ್ಡಾಯ್ತಾತ್
ಹಸ್ತಿಕ್ ಕದೆಲಾರ್
ಮಾಂಕ್ಡಾಕ್ ಸಾಯ್ಕಲಾರ್
ಚಡಯ್ಲಾ, ಉಡಯ್ಲಾ, ಪಡಯ್ಲಾ
ಜಾದುಗಾರ್ ಪಳೆ ಜಾದುಚಿ ಬೊಡಿ ಘೆವುನ್
ಉಲಯ್ತಾ, ಫುಲಯ್ತಾ, ಫಟಯ್ತಾ, ಬಾನಾಯ್ತಾ
ಎಕ್ಲೊ ನವೆಂ ಕಲ್ಸಾಂವ್ ದಾಕಯ್ತಾ
ಎಕ್ಲೊ ಉಗ್ತೊ ಕುಲೊ ಲಿಪಯ್ತಾ
ಲೋಕ್ ಸಗ್ಳೊ ತಾಳಿಯೊ ಪೆಟ್ತಾ

ಹ್ಯಾ ಸರ್‍ಕಸಾಂತ್ ಕವಿಕ್ ಸೊಸುಂಕ್ ಜಾಯ್ನಾತ್‌ಲ್ಲಿ ಸಂಗತ್ "ಲೊಕಾಂನಿ ತಾಳಿಯೊ ಪೆಟ್ಚಿ". ಹೆರಾಂಚೆ ಕಶ್ಟ್ ಏಕ್ ತಮಾಸೊ ಜಾವ್ನ್ ಘೆವ್ನ್ ಪ್ರೇಕ್ಶಕ್ ಜಾವ್ನ್ ಜಿಯೆಂವ್ಚ್ಯಾ ಲೊಕಾಚ್ಯಾ ಅಶೀರ್ ಮನೋಭಾವಾಚಿ ದಾಕ್ಶೆಣ್ ನಾಸ್ತಾಂ ನಿಂದಾ ಕೆಲ್ಯಾ ಕವಿನ್.

ವಲ್ಲಿಚಿಂ "ಆಮಿ ನಿದ್‌ಲ್ಲ್ಯಾಂವ್', 'ಉಗ್ತ್ಯಾ ಬಜಾರಾಂತ್ ಏಕ್ ವಿಕ್ರೊ', 'ಕೊಂಕ್ಣಿ ಬರವ್ಪಿ', 'ಆತಾಂ ಕೋಣ್ ನಾ', 'ಹಾಂವ್ ಹಾಂವ್ ನ್ಹಯ್' - ಅಸಲಿಂ ಕವಿತಾಂ ವಾಚ್ತಾನಾ ಕವಿನ್ ಆಪ್ಲ್ಯಾ ಕವಿತಾಂ ಮುಖಾಂತ್ರ್ ಸಮಾಜ್ ಬದ್ಲುಂಚಿ ಜವಾಬ್ದಾರಿ ಆಪ್ಲ್ಯಾ ಮಾತ್ಯಾರ್ ಘೆತ್ಲ್ಯಾಗಾಯ್ ಮ್ಹಣ್ ದುಬಾವ್ ಭೊಗ್ತಾ. ಹೆ ಜವಾಬ್ದಾರೆಚ್ಯಾ ಭೊರಾನ್ ಕೊಣ್ಣಾ ಥೊಡ್ಯಾ ಕವಿತೆಂನಿ ವಾಚ್ಪ್ಯಾಕ್ ಸುಖಾಳ್ ಅನ್ಘೊಗ್ ದಿಂವ್ಚ್ಯಾ ಕವಿತೆಚ್ಯಾ ಮೂಳ್ ಜವಾಬ್ದಾರೆ ಥಂಯ್ ಕವಿಚೆಂ ಧ್ಯಾನ್ ಇಲ್ಲೆಂ ಇಲ್ಲೆಂ ಚುಕ್ಲಾಂ. ದಾಖ್ಲ್ಯಾಕ್ 'ನವೆಂ ವರಸ್', 'ಹಾಂವ್ ಮೊರಾನಾ', 'ಯೇ ಜೆಜು ತುಂ ಯೆ'. ಅಸಲ್ಯಾ ಕವಿತೆಂನಿ ಕವಿಚೆಂ ಎಕೆಚ್ ಧಾರಿಚೆಂ ಚಿಂತಪ್ ಆನಿ ಕವಿನ್ ಮಾಂಡ್‌ಲ್ಲೆಂ ರಾಜಾಂವ್ ಚಡ್ ಝಳ್ಕತಾ. ನಿತಿವಂತ್ ಮನ್ಶಾಕ್ ನಿರ್ಮಾಣ್ ಕರ್‍ಚೊ ಸಾಹಿತ್ಯಾಚೊ ಆನಿ ಕಾವ್ಯಾಚೊ ಉದ್ದೇಶ್ ಮ್ಹಣ್ ಶಿಕವ್ಣ್ ದಿಲ್ಲ್ಯಾ ಸಾಹಿತ್ಯಾಚೊ ಮೂಳ್ ವಿಚಾರ್‌ವಂತ್ ಪ್ಲೇಟೊಚೆಂ ಚಿಂತಪ್ ಕವಿನ್ ಆಪ್ಣಾಯಿಲ್ಲ್ಯಾಪರಿಂ ಭೊಗ್ತಾ. ಆಪ್ಲ್ಯಾ ಕಾವ್ಯಾಥಾವ್ನ್ ಜಿಣ್ಯೆಚೆರ್, ಸಮಾಜೆಚೆರ್ ನೈತಿಕ್ ಪರಿಣಾಮ್ ಘಾಲ್ಚೆಂ ಖೂಬ್ ಪ್ರೇತನ್ ಕವಿನ್ ಕೆಲಾಂ. ಪ್ಲೇಟೊವರ್‍ನಿಂ ಚಡ್ ಕಾವ್ಯಾ ವಿಶಿಂ ವಿಚಾರ್ ಮಾಂಡ್‌ಲ್ಲ್ಯಾ ಪ್ಲೇಟೊಚೊ ಶಿಸ್ ಜಾವ್ನಾಸ್‌ಲ್ಲ್ಯಾ ಅರಿಸ್ಟಾಟಲಾಚ್ಯಾ ಚಿಂತ್ಪಾ ಪರ್ಮಾಣೆ ಕಾವ್ಯಾ ಥಾವ್ನ್ ಸಂತೊಸ್ ಆನಿ ಸುಖ್ ಮೆಳ್ಚೆಂಚ್ ಚಡ್ ಗರ್‍ಜೆಚೆಂ. ಸೊಭಿತ್ ಪ್ರತಿಮಾಂನಿ ವಿಣ್‌ಲ್ಲೆಂ "ಕುಡ್ಡೊ" ಕವನ್ ಕಾಳ್ಜಾಕ್ ಖೂಬ್ ಧಾದೊಸ್ಕಾಯ್ ದಿತಾ. ಬಳ್ವಂತ್ ಸಮಾಜಿಕ್ ಠರಾವಣ್ ಘೆವ್ನ್, ವಲ್ಲಿಚ್ಯಾ ಕಾವ್ಯಾ ಘೊಸಾಚಿಚ್ ಠರಾವಣ್ ಸಾಂಗ್ಚೆಂ "ಕಟ್‌ಪುತ್ಳಿ" ಕವಿತಾ ವಿಶೇಸ್ ರಸಾನ್ಭೋಗ್ ಉಬ್ಜಂವ್ಚೆಂ ಕಾವ್ಯೆಂ ಮ್ಹಣ್ಯೆತ್. ಜೆಣ್ಯೆಥಾವ್ನ್ ಜೊಡ್‌ಲ್ಲೊ ಅನ್ಭೊಗ್ ಕವಿ ಭಿತರ್ ವಿಶೇಸ್ ರಿತಿನ್ ಪರಿವರ್‍ತನ್ ಜಾಲ್ಲೊ ದಿಸ್ತಾ." ಕೋಣ್ ಪಿಕೊಂ ಕೊಣ್ ಥಕೊಂ ಬೊಂಬಿಂ ಮಾತ್ರ್ ನಾಚೊಂ". ಆಮ್ಚ್ಯಾಚ್ ಸಮಾಜೆಚ್ಯೊ ಸದಾಂನೀತ್ ಪಳೆಂವ್ಕ್ ದಿಸ್ಚ್ಯೊ, ಭೊಗುಂಕ್ ಮೆಳ್ಚ್ಯೊ ಸಾದ್ಯೊ ವಸ್ತು/ಸಾದ್ಯೊ ಸಂಗ್ತಿ ಕವಿ ಭಿತರ್ ರುಪಾಂತರ್ ಜಾಲ್ಯಾತ್. ಹೆಂ ಪರಿವರ್‍ತನ್ ಆನಿ ರುಪಾಂತರ್ ಘಡ್ಚ್ಯಾ ಘಡ್ಯೆ ಉದೆಲ್ಲೆಂ 'ಕಟ್‌ಪುತ್ಳಿ' ತಸಲೆಂ ಕವನ್ ರಸಾನ್ಭೋಗ್ ದಿತಾ ಮಾತ್ರ್ ನ್ಹಯ್ ಸಮಾಜಿಕ್ ವೆವಸ್ತೆಚಿ ನಿಂದಾ ಕರ್‍ಚ್ಯಾ ಆನಿ ಅಸಹಾಯಕ್ ಮನ್ಶಾಂಚೆ ದಣ್ಸಣೆ ಥಂಯ್ ಭಿರ್‍ಮತ್ ಆನಿ ಜಾಗ್ ಉಟಂವ್ಚ್ಯಾ ಸಮಾಜಿಕ್ ಜವಾಬ್ದಾರಿಚೆಂ ಕಾಮ್‌ಯ್ ಕರ್‍ತಾ.

     ಬೊಂಬ್ಯಾಂಕ್ ಜಿರ್‍ವಣ್ ನಾ, ನಾ ತಾಂಕಾಂ ಭುಕ್
     ವಸ್ತುರ್ ಕಿತ್ಯಾಕ್ ಸಿಂಗಾರ್ ಕಿತ್ಯಾಕ್? ನಾ ತಾಂಕಾ ಲಜ್
     ವ್ಹಯ್ಲೆ ದಾಗೆ ಸಡಿಲ್ ಜಾತಾಂ, ಧರ್‍ಣಿರ್ ಪಡ್ತಾ ಉಸ್ವಾಸ್ ಸೊಡ್ತಾ
     ಬೊಂಬ್ಯಾನಾಚ್ ಚಾಲುಚ್ ಆಸ್ತಾ, ಏಕ್ ಪಡ್ತಚ್ ಆನ್ಯೇಕ್ ಯೆತಾ
     ಕಿತ್ಯಾಕ್ ಹೊಚ್ ಬೊಂಬ್ಯಾಂಚೊ ಖೆಳ್

ವಲ್ಲಿಚಿಂ ಕವಿತಾ ವಾಚ್ತಾನಾ ಮ್ಹಜೆಥಂಯ್ ಉಟ್‌ಲ್ಲಿಂ ಸವಾಲಾಂ - ಕವಿಚಿ ಮುಖ್ಯ್ ಜವಾಬ್ದಾರಿ ಕಿತೆಂ, ಸಮಾಜಿಕ್ ಬದ್ಲಾವಣೆ ಥಂಯ್ ತಾಣೆ ಕಿತ್ಲಿ ಜವಾಬ್ದಾರಿ ಘೆವ್ಯೆತ್? ಹ್ಯಾ ವಿಶಯಾಚೆರ್ ವಲ್ಲಿಚಿಂ ಆನಿ ಹೆರ್ ಕವಿಚಿಂ ಕವಿತಾಂ ವಿಂಚುನ್ ವೆಗ್ಳೆಂಚ್ ಏಕ್ ತರ್ಕ್ ಚಲವ್ಯೆತ್.

ಸಮಾಜಿಕ್ ನೀತ್‌ಚ್ ವಲ್ಲಿಚಾ ಕವಿತೆಂಚೊ ವ್ಹರ್‍ತೊ ಗೂಣ್ ಮ್ಹಣ್ಯೆತ್. ಹ್ಯಾ ಗುಣಾನ್ ಆಪ್ಲೊ ಭಾವ್ ಅಭಿವ್ಯಕ್ತ್ ಕರ್‍ತಾನಾ ಥೊಡ್ಯಾ ಕವಿತೆಂನಿ ಕಾವ್ಯಾಳ್ ತಾಳ್ ಚುಕೊನ್ ಗೆಲ್ಲ್ಯಾಪರಿಂ ಭೊಗ್ತಾ ತರಿ ನೀತ್ ಜೊಡ್ಚ್ಯಾ ಆನಿ ವಾಂಟ್ಚ್ಯಾ ಆಪ್ಲ್ಯಾ ಮುಖ್ಯ್ ಶೆವೊಟಾ ಮುಖಾರ್ ಕಾವ್ಯಾಚ್ಯಾ ಅಲಂಕಾರಾ ವಿಶಿಂ ಕವಿನ್ ಚಡ್ ಗಣ್ಣೆಂ ಕೆಲಾಂ ಮ್ಹಣ್ ಮಾಕಾ ಭೊಗನಾ. ಕವಿ ಹ್ಯಾ ವಿಶಿಂ ಜರ್ ಇಲ್ಲೆಂ ಚಡ್ ಗರ್‍ಜೆಚೆಂ ಧ್ಯಾನ್ ದೀತ್ ತರ್ ಕವಿತೆಂತ್ಲ್ಯಾ ಖತ್ಕತ್ಯಾಂತ್‌ಯ್ ಗೀತ್ ವ್ಹಾಳಂವ್ಚಿ ಊಂಚ್ ಸಕತ್ ಆನಿ ಶಾಣೆಪಣ್ ಹ್ಯಾ ಕವಿಲಾಗಿಂ ಆಸಾ. "ಆಜ್" ಕವಿತಾ ಹಾಕಾ ಏಕ್ ರುಜ್ವಾತ್. ಏಕ್ ದೋನ್ ಪಾವ್ಟಿಂ ಹಿ ಕವಿತಾ ವಾಚ್ತಾನಾ ಘರಾಂ, ಮನಾಂ, ಕಾಳ್ಜಾಂ ದೆವಾಚೊ ಧರ್ಮಾಚೊ ದಂಧೊ - ಪೊರ್‍ಚೆ, ಕಾಲ್ಚೆಪರಿಂ ಆಜ್‌ಯ್ ಚಲ್ತಾ ಮ್ಹಣ್ ಕವಿ ನಿರಾಶಾವಾದ್ ಪಾತ್ಳಾಯ್ತಾ ಮ್ಹಣ್ ಮಾಕಾ ಭೊಗ್ಲೆಂ ತರ್‌ಯ್ ಮಾಗಿರ್ ಪರತ್ ಪರತ್ ವಾಚ್ತಾನಾ ಕವಿತೆಚೆ ಗುಂಡಾಯೆ ಥಾವ್ನ್ ಉಮಾಳೊನ್ ಯೆಂವ್ಚೊ "ಫಾಲ್ಯಾಂ ಅಶೆಂ ಘಡುಂಕ್ ನಜೊ" ಮ್ಹಣ್ಚೊ ಆಶಾವಾದ್ ಭರೊನ್ ವೊಮ್ತೊಂಕ್ ಲಾಗ್ಲೊ. ಚರಿತ್ರೆಚೆ ಸುರ್‍ವೆ ಥಾವ್ನ್ ಆಸ್‌ಲ್ಲೆಂ ಪೊಕ್ಳೆಪಣ್ ಆಜೂನ್‌ಯ್ ಘಟ್ ಜಾವ್ನಾ ತರ್ ಪ್ರಗತೆಚಿ ಗತ್ ಕಸಲಿ? ಪ್ರಗತೆಚಿ ಗರ್‍ಜ್ ಕಸಲಿ? ಮ್ಹಳ್ಳಿಂ ತೀಕ್ಶ್ಣ್ ಸವಾಲಾಂ ಹೆ ಕವಿತೆಚಿಂ ಕುಸಾಂ ಸೊಡಯ್ತಾನಾ ಹುಳ್ವುಳೊನ್ ಭಾಯ್ರ್ ಯೆತಾತ್. ಬರ್‍ಯಾ ಕವಿತೆಂಚೊ ಘುಟ್ ಹೊಚ್. ಸೊಡವ್ನ್ ಆಕೇರ್ ಜಾಂವ್ಚೊ ನ್ಹಯ್.

ಕವಿಚೊ ಆದರ್‍ಶ್‌ವಾದ್‌ಯ್ ಕವಿತೆಂನಿ ಉಟೊನ್ ದಿಸ್ತಾ. ಕವಿತಾಂ ಕವಿಚ್ಯಾ ವ್ಯಕ್ತಿತ್ವಾಚಿ ವೊಳಕ್ ಕರ್‍ನ್ ದಿತಾತ್. ಖುರ್ಸಾರ್ ಮೆಲ್ಲೊ ಜೆಜುಚ್ ಕವಿಚೊ ಆದರ್‍ಶ್ ಜಾಲಾ ಮ್ಹಣ್ ಕವಿತಾಂನಿ ಸ್ಪಶ್ಟ್ ಕಳ್ತಾ. ತ್ಯಾಚ್ ವರ್‍ವಿಂ ಕೊಣ್ಣಾ ಜೆಜುಕ್ ಖುರ್‍ಸಾವಾಟ್ ದಾಕಯಿಲ್ಲ್ಯಾ ಪಿಲಾತ್, ಜುದಾಸ್, ಬಾರಬ್ಬಾಸ್ ಅಸಲ್ಯಾ ಕಪಟ್ಯಾಂಕ್ ಕವಿ ಘಡ್ಯೆ ಘಡ್ಯೆ ನೀತ್ ಕರ್‍ನ್ ಹಿಪೊಕ್ರೆಸಿ ವಿರೋಧ್ ಆಪ್ಲೊ ಕ್ರೋಧ್ ಆನಿ ಕಾಂಟಾಳೊ ದಾಕಯ್ತಾ. 'ಕುಡ್ಡೆ', 'ಆಂದ್ಳೆ', 'ಬಜಾರ್', 'ಉಗ್ತ್ಯಾ ಬಜಾರಾಂತ್ ಏಕ್ ವಿಕ್ರೊ', 'ಸರ್‍ಕಸ್', 'ಕಟ್‌ಪುತ್ಳಿ' - ಅಸಲ್ಯಾ ಕವಿತಾಂಚಿ ನಾಂವಾಂಚ್ ಕವಿತಾಚೊ ಘುಟ್ ಭಾಯ್ರ್ ಘಾಲ್ತಾತ್. ಆಪ್ಲ್ಯಾ ಸಾಮಾಜಿಕ್ ಝುಜಾಂತ್ ಕವಿ "ಯೆಯಾ ಮ್ಹಜಿ ನೀತ್ ಕರಾ" ಕವಿತೆ ಮುಖಾಂತ್ರ್ ಖುರ್‍ಸಾರ್ ಮರೊಂಕ್ ತಯಾರ್. ಪುಣ್ ನೀತ್ ಸೊಡುಂಕ್ ತಯಾರ್ ನಾ. ಪುಣ್ ಜಶೆಂ ಜೆಜು ಕ್ರೀಸ್ತಾನ್ "ಬಾಪಾ ತುಜಿ ಖುಶಿ ತರ್ ಮ್ಹಜೆ ವ್ಹಯ್ಲಿ ಹಿ ಕಾಲ್ಸ್ ನಿವಾರ್" ಮ್ಹಳ್ಳೆಪರಿಂ, ಹ್ಯಾ ಝುಜಾಂತ್ ಕವಿಕ್‌ಯ್ ಎಕ್ಸುರ್‌ಪಣ್ ಭೊಗುನ್, ಥಕೊನ್ ಮ್ಹಳ್ಳೆಪರಿಂ "ಮನಿಸ್ ಹಾಂಗಾ ಮನ್ಶಾಂಕ್ ಖಾತಾ, ಮನ್ಶಾಂಕ್ ಮನಿಸ್ ಕರುಂಕ್ ತುಂ ಯೇ" ಮ್ಹಣ್ ಜೆಜುಕ್‌ಚ್ ಉಲೊ ಮಾರ್‍ಚೆಂ ದಿಸ್ತಾ.

ವಲ್ಲಿಕ್ ಹಾಂವ್ ಕೊಂಕ್ಣೆಂತ್ ಅಪ್ರೂಪ್ ಜಾವ್ನ್ ಉದೆಲ್ಲೊ ಏಕ್ ಬಂಡಾಯ್ ಕವಿ ಮ್ಹಣ್ ಆಪಯ್ತಾಂ. ಅನ್ಯಾಯ್, ಅತ್ಯಾಚಾರ್, ಅನೀತ್, ದಣ್ಸಣೆಕ್ ಬಲಿ ಜಾಲ್ಲ್ಯಾ ಅಸಹಾಯಕ್ ವೆಕ್ತಿಂಚೊ ತಾಳೊ ಜಾವ್ನ್ ವ್ಹಾಳ್ಚ್ಯಾ ಕಾವ್ಯಾಂ ಥಾವ್ನ್, ಹಿಪೊಕ್ರಿಸಿ ವಿರೋಧ್ ಬೊಬಾಟ್ ಮಾರ್‍ಚ್ಯಾ ಕವಿತೆಂ ಥಾವ್ನ್ ಕಸಲೊ ರಸ್ ಆಶೆವ್ಯೆತ್? ಪ್ರಾಸಾಂನಿ ಆಟಾಪುಂಕ್ ಜಾಯ್ನಾತ್‌ಲ್ಲ್ಯಾ ಉದ್ರೇಕಾಂಕ್, ಪ್ರತಿಭಟನೆಚ್ಯಾ ಉತ್ರಾಂಕ್ ಸಂಗೀತಾಚೊ ಸ್ವರ್, ಶೃಂಗಾರ್ ರಸ್ ಕಿತ್ಲೊ ಸೊಭಾತ್? ಸಮಾಜೆಚಿ ಕುಸಡಾಯ್ ನಿವ್ರಾಂವ್ಚೊ ಸೊಂಪೊ ಇರಾದೊ ಆಸ್ಚ್ಯಾ ಅಸಲ್ಯಾ ಬಂಡಾಯ್ ಕಾವ್ಯಾಂ ಥಾವ್ನ್‌ಯ್ ರಸಗ್ರಾಯಕಾಕ್ ರಸಾನ್ಘೋಗ್ ಮೆಳ್ತಾ. ವಲ್ಲಿಚ್ಯಾ ಕವಿತೆಂನಿ ಚಡಾವತ್ ದಿಸ್ಚ್ಯಾ ಹ್ಯಾ ರಸಾಕ್ ಕೊಂಕ್ಣೆಂತ್ ಸ್ಪಶ್ಟ್ ನಾಂವ್ ಕಸಲೆಂ ದಿವ್ಯೆತ್? ಕ್ರೋಧಿತ್ ರಸ್ ಮ್ಹಣ್ಯೆತ್‌ಗಿ? ಹ್ಯಾ ವಿಶಿಂ ಚಡಿತ್ ಸಾಂಗೊಂಕ್ ಮೆಲ್ವಿನಾಕ್ ಸೊಡ್ತಾಂ. ಕಾವ್ಯಾ ಥಾವ್ನ್ ಮೆಳ್ಚ್ಯಾ ವೆವೆಗ್ಳ್ಯಾ ರಸಾಂ ವಿಶಿಂ ಮೆಲ್ವಿನ್ ಏಕ್ ಕ್ಲಾಸ್‌ಚ್ ಘೆವ್ಯೆತ್ ಕೊಣ್ಣಾ.

ಥೊಡ್ಯಾಚ್ ಉತ್ರಾಂನಿ ವಲ್ಲಿಚ್ಯಾ ಕವಿತಾ ವಿಶಿಂ ಸಾಂಗ್ಚೆಂ ತರ್:

ವಲ್ಲಿಚ್ಯಾ ಕವಿತೆಂನಿ ಉಜೊ ದಿಸ್ತಾ...ಕಿಟಾಳಾಂ ಉಸಳ್ತಾತ್. ದಣ್ಸಣೆಕ್ ಬಲಿ ಜಾಲ್ಲೊ ಸಾಧೊ ವ್ಯಕ್ತಿ "ಹಾಂವ್ ಹಾಂವ್ ನಂಯ್" ಕವಿತೆಂತ್ ಮೊನೊ ಜಾವ್ನ್ ನಾಂಚ್ ಜಾಲಾ ಜಾಲ್ಯಾರ್‌ಯ್ ಸಮಾಜಿಕ್ ನೀತಿ ಖಾತಿರ್ ಝುಜ್ ಮಾಂಡ್ಚ್ಯಾ ಚಡ್ತಾವ್ ಕವಿತೆಂನಿ ಖರ್‍ಕಟ್ಯಾ ವೊತಾಂತ್ ಬೊಂಗೆ ಫುಲಂವ್ಚ್ಯಾ ತಸಲ್ಯಾ ಊಂಚ್ ತತ್ವಾಂಚಿ ಜಡಾಯ್ ಆಸ್‌ಲ್ಲ್ಯಾನ್, ಕುಪಾಂ ಧರ್‍ಚ್ಯಾ ಆಶಾವಾದಾಚೆ ಪಾಕಟೆ ಆಸ್‌ಲ್ಲ್ಯಾನ್, ವಾತ್ ಪೆಟಂವ್ಕ್, ಉಜ್ವಾಡ್ ಫಾಂಕಂವ್ಕ್ ಕವಿ ಯಶಸ್ವಿ ಜಾಲಾ. ಹೆ ಯಶಸ್ವೆಕ್ ಕವಿಕ್ ಹಾಂವ್ ಉಲ್ಲಾಸ್ ಪಾಟಯ್ತಾಂ ಅನಿ ಸರ್‍ವ್ ಬರೆಂ ಮಾಗ್ತಾಂ.