ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾಂತ್ಲ್ಯೊ ಝರಿ

ಕವಿ ಆಂಡ್ರ್ಯೂ ಎಲ್. ಡಿ'ಕುನ್ಹಾಚೊ ಫುಡ್ಲದ್ ಕವಿತಾ ಸಂಗ್ರಹ್ "ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ" ವಾಚ್ತಾನಾ ಹಿಂ ಸರ್ವ್ ಚಿಂತ್ನಾಂ ಯೇನಾಸ್ತಾಂ ರಾವನಾಂತ್. ತಶೆಂ ಮ್ಹಣ್ ಹಾಂಗಾಸರ್ ಕವಿ ಕ್ರಾಂತೆಕ್ ಭಾಯ್ರ್ ಸರ್‍ಲಾ ಮ್ಹಣ್ ಹಾಂವೆಂ ಮ್ಹಣ್ಚೆಂ ನ್ಹಯ್. ತೊ ಕೇವಲ್ ಕಾಳ್ಜಾಂ ಉಮಾಳ್ಯಾಂಕ್ ಉತ್ರಾಂಚೊ 'ವ್ಹಾಳೊ' ದಿತಾ ಮಾತ್ರ್. ಸಗ್ಳ್ಯಾ ಸಂಗ್ರಹಾಂತ್ ಸಹೃದಯಿ ವಾಚ್ಪ್ಯಾಕ್ ಆವಡ್ಚೊ ಪ್ರಮುಕ್ ವಿಷಯ್ ಕವಿಚೆಂ ಸೂಕ್ಷ್ಮ್ ಸಂವೇದನ್.

ಹ್ಯಾ ಸಂಗ್ರಹಾಚೊ ಕವಿ ಖಂಡಿತ್ ಸೂಕ್ಷ್ಮ್. ಚಡ್ತಾವ್ ಜಣಾಂಕ್ ಸಂಪೊ ಮ್ಹಣ್ ದಿಸ್ಲೊ ವಿಷಯ್‌ಯೀ ತಾಕಾ ಎಕೆ ಕವಿತೆಕ್ ಆಧಾರ್ ಜಾತಾ. ದಾಕ್ಲ್ಯಾಕ್ 'ತುಮ್ಚಿ ಹಿ ನೀದ್ ಕಸಲಿ?' ಕವಿತಾ. ಹಾಂಗಾಸರ್ ಫುಟ್‌ಪಾತಿರ್ ನಿದ್‌ಲ್ಲ್ಯಾ ಲಿಂಗಿ, ತನಿಯಾ, ಚೋಮ, ದುಗ್ಗ ಹಾಂಚಿ ನೀದ್ ಕವಿಕ್ ಎಕೆ ವಿಶಿಷ್ಟ್ ಕವಿತೆಚೊ ವಿಶಯ್ ಜಾತಾ.
ಕವಿಚೆಂ ಸೂಕ್ಷ್ಮ್ ಸಂವೇದನ್ ಪ್ರಕೃತೆ ತೆವ್ಶೀಂಯ್ ವ್ಹಾಳ್ಳಾಂ. 'ಮೊಗಾರೊಸಾಂತ್ ನವೆಂ ಜೆವಣ್', 'ರಾಕನಾಕಾಗೊ ಚೆಡ್ವಾ, ರಾಕನಾಕಾ' ಹ್ಯಾ ಕವಿತೆಂನಿ ತೆಂ ಚಡ್ ದಿಸ್ತಾ.
ಮೊಗಾರೊಸಾಂತ್ ಕಾಳೀಜ್ ಬುಡವ್ನ್ ನವೆಂ ಜೆವ್ಯಾಂ.. ಮ್ಹಣ್ ಕವಿ ಗಾಯ್ತಾನಾ ಆಮ್ಚೆಥಂಯ್ ಮಾರ್ಮಿಕ್ ಭೊಗ್ಣಾಂ ಉಬ್ಜೊಂಕ್ ಫಾವೊ. ಕವಿ ಚಡಿತ್ ಸೂಕ್ಷ್ಮ್ ಆನಿ ಸಿಂತಿಮೆಂತಾಳ್ ಜಾತಾ. 'ತಿ ರಡ್ಲಿಂ ಕಿತ್ಯಾಕ್?' ಕವನಾಂತ್. 'ಗರ್ಭಾ ಪಿಂಪ್ರ್ಯಾಕ್ ತಿಸ್ರ್ಯಾ ಬಾಳಾಕ್' ಕಿಮ್ಚಿಲ್ಲಿ ಸ್ಥಿತಿ ಕವಿಚೆ ಆಂತರಿಕ್ ದೊಳೆ ಚೊಯ್ತಾತ್ ತೆದ್ನಾಂ ತೊ ಮಾರ್ಮಿಕ್ ರಿತಿಂ ತೆ ಆವಯ್ ಸಾಂಗಾತಾ ರಡ್ತಾ. ವಾಚ್ಪ್ಯಾಕಿ ರಡಯ್ತಾ. ಸ್ತ್ರೀಯೆ ತೆವ್ಶಿಂ ತಾಚೆಂ ಸೂಕ್ಷ್ಮ್ ಸಂವೇದನ್ ಚಡಿತ್ ಆವಡ್ಚೆಂ 'ಹಾಂವ್‌ಯ್ ವೇಸ್ ಘಾಲ್ತಾಂ' ಕವನಾಂತ್. ಸ್ತ್ರೀಯೆಚೆ ಅಸಹಾಯಕ್ ಸ್ಥಿತೆಕ್ ತೊ ಸ್ಪಂದನ್ ಕರ್‍ತಾ.

ವಜ್ರಾಂ ವೈಭವ್ ಆಮ್ಕಾಂ ನಾಕಾ
ತುಂಚ್ ಪುತಾ ವಜ್ರ್ ಮ್ಹಾಕಾ
ಮ್ಹಣೊನ್ ಏಕ್ ಆವಯ್ ಆಪ್ಲ್ಯಾ ಪುತಾಕ್ ಥಾಂಬಯ್ತಾನಾ ಕವಿಚ್ಯಾ ಕಾಳ್ಜಾಥಳಾಂತ್ ಉಬ್ಜಾಲ್ಲಿಂ ದುಕಾಳ್ ಭೊಗ್ಣಾಂ ಆಮಿ ಸಮ್ಜಜೆ.

ಕವಿಚೆರ್ ಪಡ್ಲಾ ತೊ ನವ್ಯೋತ್ತರ್ ಪ್ರಭಾವ್:
ಆಯ್ಚೊ ಸಂಸಾರ್ ನವ್ಯೋತ್ತರ್ ಚಿಂತ್ಪಾನ್ ಗರ್ಭೆಸ್ತ್ ಜಾಲಾ. ಆನಿ ತ್ಯಾ ಚಿಂತ್ಪಾಚೊ ಪ್ರಭಾವ್ ಜಿಣ್ಯೆಚೆರ್‌ಯ್ ಬರ್‍ಪೂರ್ ಪಡೊನ್ ಆಸಾ ತೆಂ ಆಮಿ ಚೊಯ್ತಾಂವ್. ಹಾಂಗಾಚೆ ಕವಿಚೆರ್‌ಯ್ ನವ್ಯೋತ್ತರ್ ಚಿಂತ್ಪಾಚೊ ಪ್ರಭಾವ್ ಪಡ್ಲಾ ತೆಂ ವಾಚ್ಪ್ಯಾಕ್ ಖಂಡಿತ್ ಗಮ್ತಾ.

ಥೊಡ್ಯಾ ಥೊಡ್ಯಾ ಕವನಾಂನಿ ಕವಿ ಆದರ್‍ಶ್ ಅಸಹಜ್ ಸಂಸ್ರಾಖಾತೀರ್ ಆಂವ್ಡೊ ಗಳಯ್ತಾ. ಹೆಂ ಚಿಂತಪ್ ಕವಿನ್ ಹ್ಯಾ 'ದಳ್ದಿರ್' ಸಂಸ್ರಾಥಾವ್ನ್ ಘೆಂವ್ಕ್ ಅತ್ರೆಗ್ಚಿ ಪೊಳಾಪೊಳ್ ಮ್ಹಣ್ ಸಮ್ಜೊಂಕ್ ನಜೊ. 'ನವ್ಯೋತ್ತರ್' ಸಂಸ್ರಾಂತ್ ಅಸಹಜತಾ ಆನಿ ಆದರ್‍ಶ್‌ವಾದ್ ಹಾಂಚೆಂ ಮೆಳಾಪ್ ಜಾಂವ್ಚೆಂ ಸಹಜ್.

'ತುಮ್ಚಿ ಹಿ ನೀದ್ ಕಸಲಿ?" ಕವಿತಾಚ್ ಘೆವ್ಯಾಂ. ಸಂಗ್ರಹಾಂತ್ಲಿ ಏಕ್ ಉಂಚ್ಲಿ ಕವಿತಾ ಹಿ. ಹಾಂಗಾ 'ನೀದ್' ಪ್ರಮುಕ್ ಸಂಕೇತ್ ಜಾತಾ. ಹಿ ನೀದ್ ಅನೀತೆಕ್ ಬಾಗ್ವೊನ್, ಕುರ್‍ವೊನ್ ಅಧೀರ್ ಜಾಲ್ಲಿ ನೀದ್. ಕವಿ ಲಿಂಗಿ, ತನಿಯಾ, ಚೋಮ, ದುಗ್ಗ ಹಾಂಚಿ ನೀದ್ ಸುಟಂವ್ಚೆಂ ಪ್ರೇತನ್ ಕರ್‍ತಾ:

ಬೋವ್ ಚಡ್ ಕವನಾಂ ಕವಿನ್ ಕರುಣ್‌ರಸ್ ಪ್ರಧಾನ್ ಕೆಲ್ಯಾಂತ್. ಸಂಗ್ರಹಾಂತ್ ಸಂಭ್ರಮಾಚಿಂ ಕವನಾಂ ಥೊಡಿಂಚ್ ಮ್ಹಣಜೆ. ಗಲ್ಫಾಕ್ ಪಾವ್‌ಲ್ಲ್ಯಾ ಕವಿಂಚಿ ಅಸ್ಕತ್ಕಾಯ್ ಹೀ-ಗಿ ಕಳನಾ. ಕರುಣ್‌ರಸ್ ಚಡ್ತಾವ್ ನಿರಾಸ್‌ವಾದಾಕ್ ಇಡೆಂ ಕರ್‍ನ್ ದಿತಾ - ಜೆಂ ಹ್ಯಾ ಸಂಗ್ರಹಾಂತ್ ಸಭಾರ್ ಕಡೆ ಪಳೆವ್ಯೆತಾ. ಸರ್‍ವ್ ಸಂಕಷ್ಟಾಂ ಮಧೇಂಯ್ ಜಿಣಿ ಸುಂದರ್, ಸೊಭಿತ್ ಕರ್‍ಯೆತಾ, ತಿ ಜಿಯೆಂವ್ಕ್ ಅಸಾಧ್ಯ್ ಮ್ಹಣ್ಚೆ ತಿತ್ಲಿ ಕಷ್ಟಾಂಚಿ ನ್ಹಯ್ ತೆಂ ಕವಿ ಜಾಲ್ಲ್ಯಾನ್ ಸಮ್ಜಲ್ಯಾರ್ ಜಿಣಿ ಸಂಭ್ರಮ್ಚೆಂ ಚಡಿತ್ ಕಷ್ಟಾಂಚೆಂ ನ್ಹಯ್.