ಬುತಾಂವ್ ನಿಕ್ಳಾಯ್ತಾನಾ....

ಹೀಯ್ ಏಕ್ ಬಾಜು. ಬಾಜು ಸಂಸ್ಕೃತೆಚಿ; ಮಾನ್ ಮರ್ಯಾದ್, ಲೊಕಾಮೊಗಾಳಾಯೆಕ್ ಲಬ್ದಲ್ಲ್ಯಾಂಚ್ಯಾ ಗಾಂವಾಂತ್ ಹರ್ಧೆಂ ಫುಲಯಿಲ್ಲಿ. ಮನ್ಶಾ ಸಹಜ್ ಭೊಗ್ಣಾಂ ಭೊಗುಂಕ್ ಖಾಡುಂ ಘಾಲ್ಲಿ. ಸ್ವತಂತ್ರ್ ಹಾತಾಂಕ್ ಖೊಡೊ ಜಾಲ್ಲಿ. ಎಕಾಚ್ ಉತ್ರಾನ್ ಸಾಂಗ್ಚೆಂ ತರ್ ಹರ್ಧ್ಯಾಚೊ ಕೋಟ್ ಆನಿ ಭೊಗ್ಣಾಂಚೊ ಕಾಟ್ ಹಿ ಬಾಜು. ಜೆನ್ನಾಂ ಹಿಚೆ ಎಕೇಕ್ ಬುತಾಂವ್ ನಿಕಳ್ತಾತ್ ತೆನ್ನಾಂ ಖರೆಂಚ್ ಮರ್ಯಾದ್‌ವಂತಾಂಕ್ ಲಜೆರ್ ಘಾಲ್ತಾತ್ ವಾ ಲಜೆಂವ್ಚ್ಯಾ ಬರಿ ಅಭಿನಯ್ ಕರುಂಕ್ ಲಾಯ್ತಾತ್.

ಇತ್ಲೇಂಯ್ ಲಿಕುಂಕ್ ಕಾರಣ್ ಮ್ಹಜಿ "ಬಾಜ್ವೆ ಭಿತರ್" ನಾಂವಾಚಿ ಏಕ್ ಕವಿತಾ. ಬಾಜ್ವೆ ಭಿತರ್ಲೊ ಸಂಸಾರ್‌ಚ್ ವೆಗ್ಳೊಗೆ ಸಾಯ್ಬಿಣಿ! ಕಾಂಯ್ ಥೊಡ್ಯಾಂಚೆ ಬಾಜ್ವೆ ಭಿತರ್ ಚೆಪ್‌ಲ್ಲೆ ನೋಟ್ ಆಸ್ತಿತ್. ತ್ಯಾಯ್ ನೊಟಾಂನಿ ಜಿಣಿಯೆ ಮೊಲಾಂ ವಿಕ್ತಾನಾ ಝೆಂಜ್ರಾಲ್ಲೆ ಗಾಂಧಿಚೆ ತಕ್ಲೆ ಅಸ್ತಿತ್. ಕಾಲ್ವಾರ್ ದೊಂಗ್ರಾಚೆಂ ಖಡಪ್ ವಿಸ್ರೊನ್ ಮೊವಾಳಾಯೆಂತ್ ರೊಂಬ್‌ಲ್ಲೆ ಭಾಂಗಾರ್ ರುಪ್ಯಾಂಚೆ ಖುರಿಸ್ ಆಸ್ತಿತ್. ತರ್ನ್ಯಾ ಪ್ರೇಮಿಚಿ ವೋಡ್ ಆಸತ್. ರಸಿಕಾಚಿ ವಿದ್ಯಾ ಆಸತ್. ನೆಂಟ್ಯಾ ಬಾಳಾಂಚೆಂ ಉಶ್ಟೆಂ ಆಸತ್. ಉಣೆಪಣ್ ಲಿಪಂವ್ಚ್ಯಾಕ್ ಚೆಪ್‌ಲ್ಲೆಂ ಸ್ಪಂಜ್ ಆಸತ್. ನಾಟಕಾಚೆ ಪಾತ್ರ್‌ದಾರ್ ತರ್ ಸುಕ್ಯೊ ನಾರ್ಲಾಂಚ್ಯೊ ಕಟ್ಟ್ಯೋಯ್ ಆಸ್ತಿತ್. ಬಾಜ್ವೆ ಭಿತರ್ಲೊ ಸಂಸಾರ್‌ಚ್ ವೆಗ್ಳೊಗೆ ಸಾಯ್ಬಿಣಿ!

ಸಾಹಿತ್ಯಾಂತ್ ಪೊಜ್ಡೆಪಣ್ ಯೆಂವ್ಚೆಂ ಚೂಕ್ ನ್ಹಯ್. ಪೂಣ್ ವಾಚ್ಪಿ ಆನಿ ಬರವ್ಪ್ಯಾಂ ಮದೆಂ ನಿರ್ಲಿಪ್ತತಾ ಹಾಡ್ಚೆ ತಸಲೆಂ ಪ್ರಬುದ್ದ್‌ಪಣ್ ಕೃತಿಯೆ ಪಾಟ್ಲ್ಯಾ ವಿಚಾರಾಕ್ ಆಸಜಾಯ್. ಪೊಜ್ಡೆಪಣ್‌ಯ್ ಆಮ್ಚಿಂ ಭೊಗ್ಣಾಂ ವ್ಯಕ್ತ್ ಕರ್ಚೆಂ ಬಳ್ವಂತ್ ಮಾಧ್ಯಮ್. ರಾಗಿಶ್ಟ್ ಮನ್ಶಾಚೊ ಖತ್ಕತೊ ಪೊಜ್ಡ್ಯಾ ಉತ್ರಾಂನಿಂಚ್ ವೊತುನ್ ವೆತಾ. ಈಶ್ಟ್-ಇಶ್ಟಿಣ್ಯಾಂ ಮಧೆಂ ಪೊಜ್ಡೆಂ ಉಲವ್ಪ್ ವಾ ಎಸ್.ಎಮ್.ಎಸ್. ಆದ್ಲಿ-ಬದ್ಲಿ ಜಾಂವ್ಚೆಂ ಚಡ್ `ಕ್ಲೋಸ್' ಜಾಲ್ಲ್ಯಾಚೊ ಸಂಕೇತ್. ಮಾಲ್ಘಡ್ಯಾಂಚ್ಯೊ ಕಿತ್ಲ್ಯೊಗಿ ಅರ್ಥಾಭರಿತ್ ಗಾದಿ ಪೊಜ್ಡ್ಯೊ ಆಸಾತ್. ವೊಡ್ಣೆ ಖಾತಿರ್(ಕನ್ನಡಾಂತ್ `ಕಾಮ') ಕಿತ್ಲ್ಯೊ ಜಾತಿ ಕಾತಿ ಹಾಂಗಾ ವಿಣ್ಗ್ಯೊ ಜಾತಾತ್. ಕಿತ್ಲ್ಯಾ ಜಣಾಂಚೊ ಮೋಗ್ ಯೆದೊಳ್ ಪರ್ಯಾಂತ್ ಲೈಂಗಿಕ್ ಕರ್ನೆಂತ್ ಸಂಪ್ಲಾ ಕೊಣ್ಣಾ. ಪುಣ್ ಲೈಂಗಿಕ್ ಕ್ರಿಯೆ ಉಪ್ರಾಂತ್ ದೊಗಾಂ ಮದೆಂ ಮೋಗ್ ಉಬ್ಜಾಲ್ಲೊ ದಾಕ್ಲೊ ಆಸಾ? ಆಸಾ ತರ್ ತೊ ಖರೊ ಮೋಗ್.

ಮಾನ್ ಮರ್ಯಾದೆವಿಶಿಂ ಕೊಣಾಯ್ಕಿ ಶೆರ್ಮಾಂವ್ ದಿವ್ಯೆತಾ. ಪುಣ್ ಆಪ್ಣಾಚಿ ಭಿತರ್ಲಿ ವೊಡ್ಣಿ ಕುಮ್ಸಾರ್ ಜಾಂವ್ಕ್ ಆಪ್ಲೊಚ್ ಕೋಣ್ ತರೀ ಖಾಸ್ ಮನಿಸ್ ಜಾಯ್ಜಾಯ್ ಪಡ್ತಾ. `ನವ್ಯ್' ಸಾಹಿತ್ಯಾಂತ್ `ವೊಡ್ಣಿ' ಅಭಿವೆಕ್ತೆಚೆಂ ಏಕ್ ಬಳ್ವಂತ್ ಮಾಧ್ಯಮ್. ಸುಕೆ ಸುಕೆ ಜಿಣಿಯೆಂತ್ ವೊಡ್ಣಿ ಜಿವಾಳಾಯ್ ದಿಂವ್ಚೊ ಅಂಶ್- ಅಶೆಂ ಮ್ಹಣ್ತಾ ಡಿ. ಎಚ್. ಲಾರೆನ್ಸ್.

ಹಾಂವೆಂ ಹಾಂಗಾಸರ್ ಉಲಂವ್ಚೆಂ `ಫೋನ್ ಸೆಕ್ಸ್' ಮ್ಹಳ್ಯಾರ್ ಉಲವ್ಣ್ಯಾಕ್ ಮೋಲ್ ಬಾಂದುನ್ ಪೊಜ್ಡೆಂ ಉಲವ್ನ್ ಭೊಗ್ಚ್ಯಾ ವಿಲಕ್ಶಣ್ ತೃಪ್ತೆವಿಶಿಂ ನ್ಹಯ್ ಬಗರ್ ವಿಧವ್ ಬಾಯ್ಲ್ ಎಕ್ಲಿ ಪರ್ಕಿ ದಾದ್ಲ್ಯಾಕ್ ಭುಲ್ಲ್ಯಾರಿ ಸಮಾಜೆಚ್ಯಾ ಮಾನ್ ಮರ್ಯಾದ್, ರಿತಿ ರಿವಾಜಿಂಕ್ ದಾಕ್ಶೆವ್ನ್ ಭಿತರ್ಲ್ಯಾ ಭಿತರ್ ಭೊಗ್ಚ್ಯಾ ಮೌನ್ ಅತೃಪ್ತೆವಿಶಿಂ. ಅಸಲ್ಯಾ ಎಕಾ ವ್ಯಕ್ತಿತ್ವಾಚಿಂ ಭೊಗ್ಣಾಂ ಉತ್ರಾಂವ್ಕ್ ಕವಿತಾ ಶಿವಾಯ್ ಹೆರ್ ಕೋಣ್ ಸಕತ್?

ಕನ್ನಡಾಚೊ ನವ್ಯ್ ಸಾಹಿತಿ ಜ್ಞಾನ್‌ಪೀಠ್ ಜಿಕ್ಪಿ ಯು.ಆರ್. ಅನಂತಮೂರ್ತಿ ಅಶೆಂ ಸಾಂಗ್ತಾ... "ಖಂಯ್ಚೋಯ್ ವಿಶಯ್ ಜಾಂವ್ ತೀವ್ರ್ ಥರಾನ್, ಗಂಭೀರ್ ರಿತಿನ್, ಗುಂಡಾಯೆನ್ ಎಕೆ ಕೃತಿಯೆಂತ್ ಸೊಧಿಜಾಯ್ ತರ್ ಕೃತಿಕಾರ್ ಆನಿ ವಾಚ್ಪ್ಯಾ ಮದೆಂ ಎಕೆ ರಿತಿಚಿ ನಿರ್ಲಿಪ್ತತಾ ಗರ್ಜೆಚಿ. ಅಸಲೆ ನಿರ್ಲಿಪ್ತತೆಂತ್ ಸೊಧ್‌ಲ್ಲೆಂ ಅಶ್ಲೀಲ್ ಆಸೊಂಕ್ ಸಾಧ್ಯ್ ನಾ. ಲೈಂಗಿಕತಾ ಕಿತ್ಲಿ ಹ್ಯಾ ನಿರ್ಲಿಪ್ತತೆಕ್ ಆಡ್ ಯೇತ್, ತಿತ್ಲೆಂಚ್ `ಮರ್ಯಾದಿ'ಚೆಂ ಕಲ್ಪನ್ ಸಯ್ತ್ ಜಿಣಿಯೆ ಅನ್ಭೊಗಾಚೆ ಅಭಿವ್ಯಕ್ತೆಕ್ ಆಡ್ ಯೇಂವ್ಕ್ ಸಾಧ್ಯ್ ಆಸಾ". ಮುಖಾರುನ್ ಮ್ಹಣ್ತಾ ತೊ-"ವೊಡ್ಣೆ ವಿಶ್ಯಾಂತ್ ಆತ್ಮರತಿ ಕರುನ್ ಲಿಕ್ಚ್ಯಾಕ್‌ಯ್, ಮಾನ್ ಮರ್ಯಾದ್ ಮ್ಹಣೊನ್ ಆತ್ಮವಂಚನ್ ಕರ್‍ಚ್ಯಾಯ್ ಹ್ಯಾ ಸೊಧಾಂತ್ಲೆ ಆಟೆವಿಟೆ ಕಳ್ಚೆನಾಂತ್, ನಿರ್ಲಿಪ್ತತೆಚಿ ಗರ್ಜ್ ಪಡ್ಚಿ ನಾ."

ಅಸಲಿ ನಿರ್ಲಿಪ್ತತಾ ವಾ ಪ್ರಬುದ್ದ್‌ಪಣ್ ನಾತ್‌ಲ್ಲ್ಯಾಂಕ್ ಅಸಲ್ಯೊ ಕವಿತಾ ವಾಚ್ತಾನಾ ಲಜ್ ದಿಸತ್. ಕಾವ್ಯೆಂ ಮ್ಹಳ್ಯಾರ್ ಫಕತ್ ಭಾಯ್ಲಿ ದಾಕವ್ಣಿ ಶಿವಾಯ್ ಭಿತರ್ಲಿ ಪೆಕೊವ್ಣಿ ನ್ಹಯ್ ಮ್ಹಣ್ ಚಿಂತ್ಚ್ಯಾಂಕ್ ಮಾನ್ ಮರ್ಯಾದ್ ಧೊಸ್ತಾ.

ಇತ್ಲ್ಯಾಕ್‌ಯ್ ಹಾಂವೆಂ ಕವಿತಾ ವಾಚ್ತಾನಾ ತುಮಿ ಕಿತ್ಯಾಕ್ ಲಜಜಾಯ್? ಮ್ಹಾಕಾ ತರೀ ಬಾಂಗ್ಲಾಚಿ ಕವಯಿತ್ರಿ, ಸ್ತ್ರೀಯಾಂಚ್ಯಾ ಹಕ್ಕಾಂಖಾತಿರ್ ಝಗಡ್ಚಿ, ಧಾರ್ಮಿಕ್ ಬಂಧಡೆ ವಿರೋದ್ ಝುಜ್ಚಿ, `ಲಜ್ಜಾ' ಕೃತಿ ಲಿಕ್ಪಿಣ್ ತಸ್ಲೀಮಾ ನಸ್ರೀನಾಚ್ಯೊ ಹ್ಯೊ ವೊಳಿ ವಾಚ್ತಾನಾ ಲಜ್ ಭೊಗನಾ ಬಗರ್ ಸ್ತ್ರೀ ಸಹಜ್ ಭೊಗ್ಣಾಂ ಉತ್ರಾಯಿಲ್ಲ್ಯಾಕ್ ಗೌರವ್ ಆನಿ ಅಭಿಮಾನ್ ಭೊಗ್ತಾ:

                       "ಹೆ ಹಾತ್ ಮ್ಹಜೆಚ್ ತರೀ
                                     ತಾಂಕಾಂ ಸಂಪೂರ್ಣ್ ನೆಣಾಂ ಹಾಂವ್.
                                     ಹೆ ಮ್ಹಜೆ ವೋಂಟ್, ಥಾನಾಂ
                                     ಜಾಂಗ್ಳಾಂ, ಪೊಟ್ರ್ಯೊ
                                     ಹಾಂಚೊ ಏಕ್‌ಚ್ ಏಕ್ ಸ್ನಾಯು ವಾ
                                     ಕಾತಿ ವಯ್ಲೆ ಲ್ಹಾನ್ ಲ್ಹಾನ್ ರಂಧ್ರ್ ಸಯ್ತಿ
                                     ಮ್ಹಜ್ಯಾ ಸ್ಥಿಮಿತಾಕ್ ಮೆಳನಾಂತ್ ಆತಾಂ..."