ಒಕ್ಟೋಬರ್ 5 ತಾರಿಕೆರ್ ದೊನ್ಪಾರಾಂ ಕನ್ನಡ ಲೇಖಕ್, ನಾಟಕಕಾರ್ ತಶೆಂ ಕವಿ, ವಿವೇಕ ಶಾನಭಾಗಾಚ್ಯಾ ಅಧ್ಯಕ್ಷಪಣಾಖಾಲ್ ಬಹುಭಾಷಾ ಕವಿಗೋಷ್ಟಿ ಚಲೊನ್ ಹಾಂತುಂ ಕೊಂಕಣಿ ತರ್ಫೆನ್ ಮೆಲ್ವಿನ್ ರೊಡ್ರಿಗಸ್, ತುಳು ತರ್ಫೆನ್ ಮುದ್ದು ಮೂಡುಬೆಳ್ಳೆ, ಹವ್ಯಕ್ ತರ್ಫೆನ್ ಗಾ. ಸು. ಭಟ್ಟ ಬೆಟ್ಟಗೇರಿ ಆನಿ ಬ್ಯಾರಿ ತರ್ಫೆನ್ ಬಿ ಎ ಮೊಹಮ್ಮದ್ ಆಲಿನ್ ತಾತಾಂಚ್ಯೊ ಕವಿತಾ ವಾಚ್ಲ್ಯೊ. ಕವಿತಾಂಚೊ ಕನ್ನಡ ಅನುವಾದ್ ಥೊಡ್ಯಾ ಸಂದರ್ಭಾಂನಿ ವಿವೇಕಾನ್ ಆನಿ ಥೊಡೆ ಪಾವ್ಟಿಂ ಕವಿನಿಂಚ್ ವಾಚುನ್ ಸಾಂಗ್ಲೊ. ಹಾಚೆ ಸಾಂಗಾತಾ ತಾತಾಂಚ್ಯಾ ಭಾಸಾಂಚಿ ಪರಿಗತಯ್ ತಾಂಣಿ ಮಾತ್ಸಿ ವಿವರಾವ್ನ್ ಸಾಂಗ್ಲಿ.
 
ಸುರ್ವೆರ್ ಉಲಯಿಲ್ಲ್ಯಾ ವಿವೇಕ್ ಶಾನ್‌ಭಾಗಾನ್: "ಆಯ್ಚಿ ಹಿ ಬಹುಭಾಶಾ ಕವಿಗೋಷ್ಟಿ ಶಾ ಬಾಲುರಾವಾಚ್ಯಾ ಉಡಾಸಾಕ್ ಆಮಿ ಸಮರ್ಪಿತಾಂವ್. ಏಕ್ ಅನುವಾದಕ್ ಜಾವ್ನ್ ಶಾ ಬಾಲುರಾವಾನ್ ಕನ್ನಡಾಕ್ ಮಹತ್ವಾಚೆಂ ಯೋಗದಾನ್ ದಿಲಾಂ. ಬ್ರೆಕ್ಟಾಚೆಂ ಆನಿ ಹೆರ್ ಯುರೋಪಿಯನ್ ಸಾಹಿತಿಂಚೆಂ ಸಾಹಿತ್ಯ್ ಕನ್ನಡಾಕ್ ತಾಣೆಂ ಹಾಡ್ಲಾಂ. ತಾಚಿ ವಿಶೇಶತಾ ಕಿತೆಂಗೀ ಮ್ಹಳ್ಯಾರ್ ಮೂಳ್ ಭಾಷೆಥಾವ್ನ್ ಶೀದಾ ಹ್ಯೊ ಕೃತಿಯೊ ತಾಣೆಂ ಅನುವಾದ್ ಕೆಲ್ಯಾತ್. ಜಾಯ್ತ್ಯೊ ಭಾಸೊ ಎಕಾ ಅನುವಾದಕಾಕ್ ಕಿತ್ಲ್ಯೊ ಗರ್ಜೆಚ್ಯೊಗಿ ತಿತ್ಲ್ಯೊ ಶಿಕೊನ್, ಆನಿ ತ್ಯಾ ಭಾಸಾಂಚ್ಯಾ ಪಂಡಿತಾಂಕ್ ಮೆಳೊನ್, ಅಸಲಿಂ ಮಹತ್ವಾಚಿಂ ತರ್ಜಣಾಂ ಕನ್ನಡಾಂತ್ ತಾಣೆಂ ಹಾಡ್ಲ್ಯಾಂತ್. ಅಸಲಿಂ ತರ್ಜಣಾಂ ಕನ್ನಡಾಂತಚ್ ಅಮೊಲಿಕ್ ಮ್ಹಣ್ಚೆ ತಿತ್ಲಿಂ ಮಹತ್ವಾಚಿಂ ಆಸಾತ್. ಇತ್ಲೆಂಚ್ ನ್ಹಯ್, ತಾಚೊ ಸ್ವತಾಚೊ ಕಾವ್ಯ ಸಂಗ್ರಹ್ 'ಸೂರ್ಯ ಇವನೊಬ್ಬನೆ' ನಾಂವಾಖಾಲ್ ಪರ್ಗಟ್ ಜಾಲಾ.

 
"ಪಾಟ್ಲ್ಯಾ ಥೊಡ್ಯಾ ದಿಸಾಂನಿ ಆಮಿ ದೇಸ್ ಆನಿ ತ್ಯಾ ದೇಸಾಂಚ್ಯಾ ಭಾಸಾಂವಿಶಿಂ ಉಲೊವ್ನ್, ಚರ್ಚಾ ಕರುನ್ ಆಯ್ಲ್ಯಾಂವ್. ಅನುವಾದಾವಿಶಿಂ, ಭಾಷಾಂತರಾಂ ವಿಶಿಂ, ಆಮ್ಚೆ ಭಿತರ್ ಘಡ್ಚ್ಯಾ ಭಾಷಾಂತರಾಂವಿಶಿಂ, ಮನಾಭಿತರ್ ಜಾಂವ್ಚ್ಯಾ ಭಾಷಾಂತರಾಂ ವಿಶಿಂ ಚರ್ಚಾ ಕೆಲ್ಯಾ.
 
"ಆಜ್ ಕನ್ನಡಾಚೆ ಧರ್ಣಿರ್ ಆಸ್ಚ್ಯಾ ಹೆರ್ ಭಾಸಾಂಚೆ ಮ್ಹಳ್ಯಾರ್ ಬ್ಯಾರಿ, ತುಳು, ಕೊಂಕಣಿ ಆನಿ ಹವ್ಯಕ ಭಾಸಾಂಚೆ ಕವಿ ಆಮ್ಚೆ ಮಧೆಂ ಆಸಾತ್. ಕರ್ನಾಟಕಾಚ್ಯಾಚ್ ಧರ್ಣಿಚೆ ಜಾವ್ನಾಸೊನ್ ಕನ್ನಡ ಲಿಪಿನ್ ಬರೊಂವ್ಚೆ ಕವಿ ತೆ. ಆಜ್ ಆಪ್ಲ್ಯಾ ಸೃಜನ್‌ಶೀಲತೆಚೆ ಅನ್ಭೋಗ್ ತೆ ಆಮ್ಚ್ಯಾ ಮಧೆಂ ವಾಂಟುಂಕ್ ಆಯ್ಲ್ಯಾತ್.  ಕನ್ನಡ ಕಾವ್ಯಾಕ್ ಪಂಪ, ರನ್ನ, ಕುಮಾರವ್ಯಾಸಾಕ್ ಧರುನ್ ಹಜಾರಾಂನಿ ವರ್ಸಾಂಚಿ ಪರಂಪರಾ ಆಸಾ. ಆಯ್ಚ್ಯಾ ಸನ್ನಿವೇಶಾಂತ್ ತ್ಯಾ ಎಕೆ ಪರಂಪರೆಲಾಗಿಂ ಆಮಿ ಆಮ್ಕಾಂಚ್ ಕಶೆಂ ವೊಳ್ಕತಾಂವ್ ಮ್ಹಳ್ಳೆವಿಶೀಂಯ್ ಆಮಿ ಚರ್ಚಾ ಕೆಲಿ.
 
"ಹಾಂಗಾಸರ್ ಕವಿತಾ ವಾಚ್ಚ್ಯಾ ಕವಿಂಕ್ ಅಸಲ್ಯಾ ಎಕಾ ದೀಗ್ ಪರಂಪರೆಚೊ ಲಾಭ್ ನಾ. ಲಾಭ್ ನ್ಹಯ್ ಲೆಕ್ಚ್ಯಾ ಪ್ರಾಸ್, ಎಕಾ ಥರಾಚೆಂ ಸ್ವಾತಂತ್ರ್ಯ್ ಆಸಾ ಮ್ಹಣೊನಯ್ ಲೆಕಾಕ್ ಧರ್‍ಯೆತ್. ಹೆ ಭಾಶೆಂತ್ ಬರಯ್ತಲ್ಯಾಂಕ್ ಭಾಶೆಚೆ ಸಂಸ್ಕಾರ್ ಮ್ಹಣೊನ್ ಕಿತೆಂ ಆಸಾತ್ - ಮ್ಹಳ್ಯಾರ್ ಪರಿಕರಾಂ, ಸನ್ನಿವೇಶಾಂ, ಅವ್ಕಾಸ್ ಜೆ ಆಸಾತ್, ತೆ ಕನ್ನಡ ಬರೊವ್ಪ್ಯಾಂಕ್ ಮೆಳ್ಚ್ಯಾ ತಿತ್ಲ್ಯಾ ಮಾಪಾನ್ ಮೆಳನಾಂತ್. ಜಾಲ್ಯಾರಿ ಹೆ ಸಗ್ಳೆ ಬರೊವ್ಪಿ ಪ್ರಜ್ಞಾಪೂರ್ವಕ್ ಜಾವ್ನ್ ಹಿ ಭಾಸ್ ಆಪ್ಲೆ ಅಭಿವ್ಯಕ್ತಿಕ್ ಉಪೇಗ್ ಕರುನ್ ಆಸಾತ್. ಥಂಯ್ಸರ್ ಆಸ್ಚ್ಯಾ ಸರ್ಜನ್‌ಶೀಳ್ ಸಕ್ತೆಂಕ್ ತಾಂಣಿ ಸಮ್ಜೊನ್, ವೊಳ್ಕುನ್ ಘೆತ್ಲಾಂ. ಥಂಯ್ಚ್ಯಾ ಸವಾಲಾಂಕ್ ತೆ ಫುಡ್ ಕರುನ್ ರಾವ್ಲ್ಯಾತ್. ಹೆ ಎಕೆ ಪಾಟ್‌ಭುಂಯ್ಚೆರ್, ಹಿ ಕವಿಗೋಷ್ಟಿ ಚಲಯ್ತಾನಾ, ಅಸಲೆ ವಿಷಯ್ ಸಮ್ಜೊನ್ ಘೆಂವ್ಕ್ ಅನಿ ಹಿ ಸಮ್ಜೊಣಿ ವಿಸ್ತಾರಾಂವ್ಕ್ ಆಮಿ ಆವ್ಕಾಸ್ ಕರ್ನ್ ದಿತಾಂವ್." ಅಶೆಂ ಸಾಂಗ್ಲೆಂ.
 
ಮುದ್ದು ಮೂಡುಬೆಳ್ಳೆನ್ ತುಳು ಸಂಸ್ಕೃತಿಕ್ ಸಂಬಂಧ್ ಜಾಲ್ಲಿ ಏಕ್ ಕವಿತಾ, ಆಳ್ಸಾಯೆಂತ್ ಬುಡಲ್ಲ್ಯಾ ಮನ್ಶಾಕ್ ಜಾಗೊಂವ್ಚಿ `ಮೆನಿಪುಲೆ' ಕವಿತಾ ಆನಿ ಥೊಡಿಂ ಚುಟ್ಕುಲಾಂ ವಾಚುನ್ ಸಾಂಗ್ಲಿಂ ಜಾಲ್ಯಾರ್, ಮೆಲ್ವಿನ್ ರೊಡ್ರಿಗಸಾನ್ ಪ್ರತಿಭಾವಂತ್ ವ್ಯಕ್ತಿಂಚ್ಯಾ ಪ್ರತಿಭೆಂ ಲಾಗಿಂ ಬಳ್ವಂತ್ ಮನ್ಶಾಂನಿ ಖೆಳ್ಚೆ ಜುಗಾರೆವಿಶಿಂತ್ಲಿ `ಮಾರ್‌ಶ್ಯಾಸಾಚೆಂ ಮಾಗ್ಣೆಂ' ಕವಿತಾ ಪೇಶ್ ಕೆಲಿ ತಶೆಂಚ್ ಎಕಾ ಕೆಲ್ಶಿಚ್ಯಾ ಸೆಲುನಾಂತ್ ಸುರು ಜಾಂವ್ಚ್ಯಾ `ಭಾರತ್-ಪಾಕಿಸ್ತಾನಾ ಮಧ್ಲ್ಯಾ ಝುಜಾಚೆರ್' ಬಾಂದಲ್ಲಿ `ಝುಜ್' ಕವಿತಾ ವಾಚುನ್ ಸಾಂಗ್ಲಿ. ಗಾ ಸು ಭಟ್ಟಾನ್ ಏಕ್ ನಾಟಕೀಯ್ ಕವಿತಾ ಆಪ್ಲೆ ವೆಗ್ಳೆಚ್ ಶೈಲೆನ್ ವಾಚುನ್ ಸಾಂಗ್ಲಿ ತರ್, ಮೊಹಮ್ಮದ್ ಆಲಿನ್ ಬ್ಯಾರಿ ಬಾಯ್ಲಾಂಚ್ಯಾ ಸಮಸ್ಯಾಂಚೆರ್ ಬಾಂದುನ್ ಹಾಡಲ್ಲಿ ಕವಿತಾ ವಾಚ್ಲಿ.