Poems

ಲಿಪೊನ್ ರಾವ್ಲ್ಯಾ ಸುರಿ

ಸಂಪಾದಕೀಯ್:

ಭುರ್ಗ್ಯಾಂಚ್ಯಾಶೋಷಣಾಕ್ ಪಿಗ್ಳೊಂಚೆಂ ಆವಯ್ಚೆಂ ಕಾಳೀಜ್

ಲ್ಹಾನ್ ನೆಂಟುಲ್ಯಾ ಭುರ್ಗ್ಯಾಂಚ್ಯಾ ಶೋಷಣಾವಿಶಿಂ ಹಿ ಕವಿತಾ ಉಲಯ್ತಾ. ವೆವೆಗ್ಳ್ಯಾ ಕಾರಣಾಂ ಖಾತೀರ್ ಭುರ್ಗ್ಯಾಂಚೆಂ ಶೋಷಣ್ ಜಾತಾ. ಫೆಕ್ಟರಿಂನಿ, ಘರಾಂನಿ ಭುರ್ಗ್ಯಾಂಕ್ ಘೊಳೊವ್ನ್ ಎಕೆ ರಿತಿಚೆಂ ಶೋಷಣ್ ಜಾತಾನಾ, ಆನ್ಯೇಕೆ ವಾಟೆನ್ ಕುಡಿಚ್ಯಾ ಸುಖಾ ಖಾತೀರ್ ಲೆಗುನ್ ಭುರ್ಗ್ಯಾಂ ಬಾಳಾಂಚೆಂ ಶೋಷಣ್ ಜಾತಾ.

ಪುಣ್ ಎಕೆ ಆವಯ್ಚೆಂ ಕಾಳೀಜ್ ಕಶೆಂ ಕಳ್ವಳ್ತಾ ಮ್ಹಳ್ಳೆಂ ಹಿ ಕವಿತಾ ಸಾಂಗ್ತಾ.

ಸುರಿ ಅಸಲ್ಯಾ ಶೋಷಣಾಂಚೆಂ ಪ್ರತೀಕ್ ಜಾವ್ನ್ ಹೆ ಕವಿತೆಂತ್ ಪಿಂತ್ರಾಯ್ಲಾಂ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಲಿಪೊನ್ ರಾವ್ಲ್ಯಾ ಸುರಿ

ದಿಸಾಳ್ಯಾರ್ ಖಬರ್:
'ಪಾಲ್ವಾ ಪೊಂದಾ ಲಿಪ್ಚೆಂ ಬಾಳ್
ಸುರಿಯೆಧಾರಿ ಲಾಗಿಂ ಝುಜ್ತಾ'
ಕಾಳ್ಜಾ ಧಡ್ದಡೆ ಚಡಯ್ತಾ

ಸುರಿಯೆಂತ್ ಜಾವ್ನ್ ಶಿಂದಪ್
ಜಾಯ್ತ್ ರುಚಿಕ್ ರಾಂದಪ್ ವಾ
ಜಾಯ್ತ್ ಮನಿಸ್ ಆನಿ ಮನ್ಶಾಪಣಾಚಿಚ್ ಖುನಿ

'ಖತ್ ನಾಸ್ತಾಂ, ಸಕ್ಕಡ್ ನಿತಳ್ ಜಾಲಾಂ'
ಭೃಮಿದೆಂತ್ ಖಂತಿವಿಣೆಂ ಸರ‍್ತಾನಾ ದೀಸ್

ಎಕಾಚ್ ಫಾರಾ ಯೆಂವ್ಚ್ಯಾ,
ಘಡ್ಗಡ್ಯಾ ಝಗ್ಲಣ್ಯಾಪರಿಂ
ಬಂಧ್ ಕುಡಾಂತ್ ಆಯ್ಕತಾ
ನೆಣ್ತ್ಯಾ ಬಾಳಾಂಚೊ ತಾಳೊ
"ಕೊಣ್ ತರೀ ಆಮ್ಕಾಂ ಬಚಾವ್ ಕರಾ"
ಪೂಣ್, ಸಾಂಗುಂ ಕಿತೆಂ?
ಹಾಣಿಂ ಚಿರ್ಡಿಲಾ ತಾಂಚೊ ಗಳೊ

ಆವಯ್ ಕಾಳ್ಜಾಕ್ ತೊಪ್ಚೊ ಭಾಲೊ
ಶಿರಾಂನಿ ವ್ಹಾಳ್ಚೊ ರಗ್ತಾ ಸಳ್ಸಳೊ
ಗಾಲಾಂ ವಯ್ಲ್ಯಾನ್ ಆಪ್ಶೆಂಚ್ ದೆಂವ್ಚೆಂ ದೂಕ್

ಸಕ್ಕಡ್ ಮೆಳೊನ್
ಮತಿಂತ್ ಚಲಯ್ತಾನಾ ಝುಜ್
ವಣದಿಕ್ ಚಿಡ್ಕಲ್ಲಿಂ ಖತಾಂಚ್
ದಿತಾತ್ ಸಾಕ್ಸ್
ಲಿಪೊನ್ ರಾವ್‍ಲ್ಲೆ ಸುರಿಯೆಚಿಂ.

- ಪ್ರಮಿಳಾ ಫ್ಲಾವಿಯಾ, ಕಾರ್ಕಳ್

संपादकीय:

भुरग्यांच्या शोषणाक पिगळोंचें आवयचें काळीज

ल्हान नेंटुल्या भुरग्यांच्या शोषणाविशीं ही कविता उलयता. वेवेगळ्या कारणां खातीर भुरग्यांचें शोषण जाता. फॅक्टरिंनी, घरांनी भुरग्यांक घोळोवन एके रितिचें शोषण जाताना, आन्येके वाटेन कुडिच्या सुखा खातीर लेगून भुरग्यां बाळांचें शोषण जाता.

पूण एके आवयचें काळीज कशें कळवळता म्हळ्ळें ही कविता सांगता.

सुरी असल्या शोषणांचें प्रतीक जावन हे कवितेंत पिंत्रायलां.

-मेल्विन रोड्रीगस

कविता:

लिपोन रावल्या सुरी

दिसाळ्यार खबर:
'पालवा पोंदा लिपचें बाळ
सुरये धारी लागीं झुजता'
काळजा धडदडे चडयता

सुरयेंत जावन शिंदप
जायत रुचीक रांदप वा
जायत मनीस आनी मनशापणाचीच खुनी

'खत नासतां, सगळें नितळ जालां'
भृमिदेंत खंतीविणें सरताना दीस

एकाच फारा येंवच्या,
घडगड्या झगलण्या परीं
बंद कुडांत आयकता
नेणत्या बाळांचो ताळो
"कोण तरी आमकां बचाव करा"

पूण, सांगूं कितें?
हाणीं चिर्डिला तांचो गळो

आवय काळजाक तोपचो भालो
शिरांनी व्हाळचो रगता सळसळो
गालां वयल्यान आपशेंच देंवचें दूक

सगळें मेळोन
मतींत चलयताना झुज
वणदीक चिडकल्लीं खतांच
दितात साक्स
लिपोन राव‍ल्ले सुरयेचीं.

- प्रमिळा फ्लाविया, कार्कळ



  A   B   C   D   E   F   G   H   I   J   K   L   M
 
  N   O   P   Q   R   S   T   U   V   W   X   Y   Z