Poems
ಪಾವ್ಸಾಚೆಂ ಯೆಣೆಂ
ಸನ್ನಿ ಎ ಡಿಸೋಜಾ
ಕವಿತಾ:
ಪಾವ್ಸಾಚೆಂ ಯೆಣೆಂ
ಪಾಡ್ಲಾ ಕುಶಿನ್, ಪಾವ್ಸಾ ಮೋಡ್, ಉದೆವ್ನ್ ಆಯ್ಲಾಂ
ಕೆದಾ ಸಾಳಕ್, ಪಾಕ್ಳಿ ಉಸವ್ನ್, ವೆಂಗೊಂಕ್ ರಾವ್ಲಾಂ
ಗುಮ್ಟಾಂ ಹಾಡ್ಯಾಗೊ, ಪಾಂಯ್ಜಣಾಂ ಬಾಂಧ್ಯಾಂಗೊ
ನವ್ಯಾ ಪಾವ್ಸಾಕ್, ನಾಚೊನ್ ಗಾವುನ್, ನಮೋ ಕರ್‍ಯಾಂಗೊ
ಓ...ಓ.. ಓ.. ಸುಕ್ಣಿಂ ಸಾವ್ಜಾಂ ಸಂತೊಸ್ಲ್ಯಾಂತ್
ಓ...ಓ.. ಓ.. ಶೆತಾಂ ಭಾಟಾಂ ಅತ್ರೆಗ್ಲ್ಯಾಂತ್
ಯೇರೆ ಪಾವ್ಸಾಚೆಂ ಯೆಣೆಂ, ಬಾಬಾ, ದೆವಾಚೆಂ ದೆಣೆಂ
ಜವಾನ್ ಆಮ್ಚೊ ಗಡ್ ರಾಕ್ತಾ, ದೇಶಾ ಭೊಂವಾರಿಂ
ದೇಶಾಂತ್ ಮ್ಹಜ್ಯಾ ಶೆತ್ಕಾರ್‍ಯಾ, ತುಂ ಭುಕೆ ಝುಜಾರಿ
ಕರ್‌ರೆ ತಯಾರಿ, ಉಬೊ ರಾವ್‌ರೆ ಪಾಂಯಾಂರಿ
ಶೆತಾಂತ್ ಭಾಂಗರ್ ಪಿಕೊಂಕ್ ಸಕ್ತಾ, ಖರೊ ಶೆತ್ಕಾರಿ
ಜಯ್ ಜವಾನಾ, ಜಯ್ ಕಿಸಾನಾ
ಓ...ಓ.. ಓ.. ಝೆಮ್ಚೆಂ ಪಶು ಜಾಗ್‌ಲಾಂ
ಓ...ಓ.. ಓ.. ನರಾ ತೋಂಡ್ ಪರ್ಜಳ್ಳಾಂ
ಕೊಗುಳ್ ಗಾಯ್ತಾರೆ ರಾನಾಂತ್, ಮೋರ್ ನಾಚ್ತಾರೆ ವನಾಂತ್
ಘರಾಂತ್ ತೆರಾಂತ್ ಪ್ರಕಾಸ್ ಫಾಂಕ್ಲಾ ದೆವಾ ದುವಾರಿ
ಅಂತ್ರಳಾರ್ ಸುಕ್ರು ಉದೆಲಾ, ಫಾಂತ್ಯಾ ಫಾಂತ್ಯಾರಿ
ಕೊಂಬ್ಯಾ ಸಾದಾರಿ, ಝುಂ ಘೆವ್ನ್ ಖಾಂದಾರಿ
ಶೆತಾಂತ್ ತುಕಾ ರಾಕೊನ್ ರಾವ್ಲಾ ತುಜೊ ಶೆಜಾರಿ
ಜಯ್ ಕಿಸಾನಾ, ಜಯ್ ಜವಾನಾ
(`ಭಾಂಗರ್ ಪಿಕ್ಲಾಂ' ನಾಟಕಾಂತ್ಲೆಂ ಗೀತ್)
-ಸನ್ನಿ ಎ. ಡಿ'ಸೋಜಾ
Copyright © Kavita Trust (R) 2026 . All Rights Reserved.