Poems

ಹಾಯ್ ಹೆಂ ಕಿತೆಂ ಘಡ್ಲೆಂ?

ಫ್ರಾನ್ಸಿಸ್ ಫುಡ್ತಾದೊ

ಸಂಪಾದಕೀಯ್:

ಹಿ ಕಥಾ-ಕವಿತಾ ಯಾ ಕ್ರಿಸ್ತಾಂವ್ ಕವಿತಾ?

ಕವಿತೆಂತ್ ಸ್ತ್ರೀವಾದಿ, ಧರ್ಮಾಚ್ಯೊ, ದಲಿತ್ - ಅಶೆಂ ನಮುನ್ಯಾವರ್ ರಿತಿಂನಿ ವಾಂಟೆ ಕರ್‍ಚೆಂ ಆಮಿ ಪಳೇತ್ ಆಸಾಂವ್. ಮ್ಹಾಕಾ ಮಾತ್ರ್ ಅಸಲೆ ವಾಂಟೆ ಸೊಸನಾಂತ್. ಮ್ಹಾಕಾ ಕಳಿತ್ ಆಸ್ಚೊ ದೋನ್‌ಚ್ ರಿತಿಂಚ್ಯೊ ಕವಿತಾ. ಏಕ್ ಬರಿ ಆನಿ ದುಸ್ರಿ ಬರಿ ನ್ಹಯ್ ಆಸ್‌ಲ್ಲಿ. ಬರ್‍ಯೊ ಕವಿತಾ ತುಕಾ ಎಕಾ ಭೊಂವಾರಾ ಥಾವ್ನ್ ದುಸ್ರ್ಯಾ ಎಕಾ ಭೊಂವಾರಾಕ್ ಪಾಸಾಯೊ ಮಾರುಂಕ್ ಆಪೊವ್ನ್ ವರ್‍ತಾತ್. ಪುಣ್ ಬರ್‍ಯೊ ನ್ಹಯ್ ಆಸ್‌ಲ್ಲ್ಯೊ ತಶೆಂ ಕರ್‍ಚ್ಯಾಂತ್ ಅಸ್ಕತ್ ಥಾರ್‍ತಾತ್.

ಹಾಂಗಾಸರ್ ದಿಲ್ಲಿ ಕವಿತಾ ದುಸ್ರ್ಯಾ ವರ್ಗಾಚಿ. ತಶೆಂ ಮ್ಹಣೊನ್ ಹಾಂಗಾಚಿ ಠರಾವಣ್ ಭೆಷ್ಟಿ ಮ್ಹಣೊನ್ ಹಾಂವ್ ಲೆಕಿನಾ. ಹಿಚ್ ಠರಾವಣ್ ಘೆವ್ನ್ ಮತಿಂತ್ ಸಾಸ್ಣಾಕ್ ಉರ್‍ಚ್ಯೊ ಕವಿತಾ ಬರೊಂವ್ಕ್ ಜಾತಾತ್. ಪುಣ್ ಫ್ರಾನ್ಸಿಸ್ ಫುಡ್ತಾದೊ ಫಕತ್ ಆಸ್‌ಲ್ಲೆಂ ಆಸಾ ತಶೆಂ ಸಾಂಗೊನ್ ಗೆಲಾ, ಕಥಾ ಸಾಂಗ್‌ಲ್ಲ್ಯಾಬರಿ. ಹಾಕಾ ಕಾಂಯ್ ಕಥಾ-ಕವಿತಾ ಮ್ಹಣೊಂ ಯಾ ಕ್ರಿಸ್ತಾಂವ್ ಕವಿತಾ ಮ್ಹಣೊಂ ಮ್ಹಾಕಾ ಸಮ್ಜನಾ.

ಮಾಗೀರ್ ತುಮಿ ಸವಾಲ್ ಕರುಂಕ್ ಆಸಾತ್. ಸಂಪಾದಕಾನ್ ಕಿತ್ಯಾಕ್ ಹಿ ಕವಿತಾ ಪರ್ಗಟ್ ಕೆಲ್ಯಾ! ಆಮ್ಚೊ ಶೆವೊಟ್ ಇತ್ಲೊಚ್, ನವ್ಯಾಂಕ್ ಪ್ರೋತ್ಸಾವ್ ದಿಂವ್ಚೊ. ಫ್ರಾನ್ಸಿಸಾ ಥಂಯ್ ಕವಿತಾ ಬರೊಂವ್ಕ್ ಗರ್ಜೆಚಿ ತಾಕತ್ ದಿಸ್ತಾ, ತಿ ತಾಣೆಂ ಪೋಸ್ ಕರಿಜಾಯ್ ಮ್ಹಳ್ಳಿಚ್ ಆಮ್ಚಿ ಆಶಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಹಾಯ್ ಹೆಂ ಕಿತೆಂ ಘಡ್ಲೆಂ?

ಹಾಯ್ ದೆವಾ ಹೆಂ ಕಿತೆಂ ಆನಿ ಕಶೆಂ ಘಡ್ಲೆಂ?
ಪಳೆ ಭಾವಾನ್‌ಚ್ ಭಾವಾಕ್ ಮಾಡ್ತಿರ್ ಮಾರ್‍ಲೆಂ!
ಬುರ್ಶ್ಯಾ ರಾಜ್‌ಕಾರಣಿಂನಿ ಮತಿಂತ್ ವೀಕ್ ಭರ್‍ಲೆಂ
ಸಮಡ್ತಿಚ್ಯಾ ನಿಬಾನ್ ಕ್ರಿಸ್ತಾಂವಾಂಚೆಂ ವಧ್ ಜಾಲೆಂ.

ಶೆಂಭರಾಂನಿ ಇಗರ್ಜೊ ಮೊಡ್ಲ್ಯೊ ಆನಿ ಹುಲ್ಪಾಯ್ಲ್ಯೊ
ನಶ್ಟ್ಯಾಂನಿ ಕ್ರಿಸ್ತಾಂವ್ ಮಾದ್ರಿಂಚೆರ್ ಬಲಾತ್ಕಾರ್ ಕೆಲೊ,
ದಾಂಡ್ಯಾ-ಕುಂಟಾಂನಿ ಪಾದ್ರಿಂಚೆರ್ ತಾಂಣಿ ಆಕ್ರಮಣ್ ಕೆಲೊ,
ಕ್ರಿಸ್ತಾಂವಾಂಕ್ ಕಠಿಣ್ ದಗ್ದಣಿ ದೀವ್ನ್ ಜಿವೆಶಿಂ ಮಾರ್ಲೊ.

ಕಿತೆಂ ಕಿತೆಂ ಕರುಂಕ್ ಪಾವ್ಲೆ, ಹ್ಯಾ ರಾಜ್‌ಕಾರಣಾ ಖಾತಿರ್,
ನಿರ್ದೋಷ್, ನಿರಾಪ್ರಾಧಿ ಸಾದ್ಯಾ ನಿಶ್ಕಪಟ್ ಕ್ರಿಸ್ತಾಂವಾಂಚೆರ್,
ಬಲಾತ್ಕಾರ್, ಹಿಂಸಾಚಾರ್, ಮನ್ಶಾಪಣ್ ಸೊಡುನ್ ಜಾಲೆ ತೆ ಕ್ರೂರ್,
ಹುಲ್ಪಾಯ್ಲಿಂ ಘರಾಂ, ಕ್ರಿಸ್ತಾಂವಾಂಕ್ ವೊಡುನ್ ಘರಾ ಭಾಯ್ರ್.

ಬೆಷ್ಟಾಯ್ತಾತ್ ತಾಂಚಿ ಸಮಡ್ತ್ ಸೊಡುಂಕ್ ಕ್ರಿಸ್ತಾಂವಾಂಕ್,
ಭುರ್ಗಿಂ ಆನಿ ಬಾಯ್ಲಾಂಕ್ ಪಾಸುನ್ ನಾ ತಾಂಣಿ ಸೊಡುಂಕ್,
ಕಾವ್ಜೆಲ್ಯಾತ್ ಕ್ರಿಸ್ತಾಂವ್, ತಾಂಕಾಂ ಕೊಣ್‌ಚ್ ಯೇನಾ ಸಹಾಯ್ ಕರುಂಕ್,
ಕ್ರೂರಿಂಚ್ಯಾ ಹಾತಾಂಕ್ ಸಾಂಪಡ್ಲೆ ದುಸ್ರಿ ವಾಟ್ ನಾಸ್ತಾಂ ಧರುಂಕ್.

ಕ್ರಿಸ್ತಾಂವ್ ಸಮಡ್ತ್ ಶಾಂತಿ ಪಾಳ್ತಾ ಆನಿ ಶಾಂತಿ ಆಧಾರ್‍ತಾ,
ತಾಂಕಾಂ ಬದ್ಲಾಕ್ ಅಮಾನುಶ್, ಕ್ರೂರ್, ನಿರ್ದಯ್ ಸಜಾ ಮೆಳ್ತಾ.
ಗಾಂಧಿನ್ ಶಿಕಯಿಲ್ಲಿ ಅಹಿಂಸಾಚಿ ದೇಕ್ ಭಾರತ್ ಕಸೊ ವಿಸರ್‍ತಾ,
ಸಂಸಾರಾ ಮುಕಾರ್ ಅಪಮಾನ್, ಭಾರತಾಕ್ ಲಜೆರ್ ಘಾಲ್ತಾ.

ಗೆಲ್ಲೊ ಜೀವ್ ಮೆಳನಾ, ಘರ್ ಬದಿಕ್ ತಾಂಚೆಂ ಮೆಳೊಂದಿ ತಾಂಕಾಂ,
ಅಪ್ರಸನ್ನ್, ಅಧರ್ಮ್, ನೀಚ್, ಅತಿಕ್ರಮ್ ಹಿಂಸಾಚಾರ್ ತಿರಸ್ಕಾರ್ ಕರ್‍ತಾಂ,
ಖದ್ವಳ್ಳಲೆಂ ಉದಕ್ ನಿತಳ್ ಜಾಂವ್ದಿ ಮ್ಹಣ್ ದೆವಾಕಡೆ ಮಾಗ್ತಾಂ,
ಭಯಾನಕ್ ವಾತಾವರಣಾಂತ್ ಜೀವ್ ಉಸ್ಮಡ್ತಾ, ದೆಕುನ್ ಅಶೆಂ ಬರಯ್ತಾಂ.

- ಫ್ರಾನ್ಸಿಸ್ ಫುಡ್ತಾದೊ, ಕಾಂದಿವ್ಲಿ