Poems

ಸೊಂಶಾಚೆ ಕಾನ್

ಕವಿತಾ:

ಸೊಂಶ್ಯಾಚೆ ಕಾನ್

ಮಾತ್ಯೆ ಧುಳಿಂತ್ ದುರ್ಬಳ್ಯಾಂಚೆ
ಘಾಮಾ ಮಣೀ ಮೊಳುನ್
ಅಸ್ತಮ್ತೆಚ್ಯಾ ದಿಗಂತಾಚೆರ್
ಆಯ್ಲೆಂ ರಗತ್ ಪಿಳುನ್
ದೆಖೊನ್ ದೆಖೊನ್, ಸೊಮ್ಯಾ ಮ್ಹಜ್ಯಾ
ದಿಷ್ಟಿ ಗೆಲ್ಯೊ ವೊಳುನ್
ಆತಾಂ ನಾಕಾತ್, ದೊಳೆ ನಾಕಾತ್
ರಗ್ತಾ ಪಿಶೆ ರಗ್ತಾಂ ದೆಖಾತ್
ಮ್ಹಾಕಾ ದೆವಾ, ದಾನ್ ದೀ
ಸೊಂಶಾ ಸಾಂಗ್ಡೆ ಕಾನ್ ದೀ.

ಸಂಸಾರಾಚ್ಯೊ ಘಾಣಿ ಖಾಯೀತ್
ನಾಕಾ ರಂಧಿರ್ ಮೆಲಾಂ
ಜಿವಿತಾಚ್ಯಾ ಪಾನಾ ಪಾನಾರ್
ಮರ್ಣಾನ್ ಮ್ಹೆಳೆಂ ಕೆಲಾಂ
ಹಾಡಾಂ ಮಾಸಾಂ ಹುಂಗಪ್ ಹಾಂವೆಂ
ಕೆನ್ನಾಂಚ್ ಸೊಡುನ್ ದಿಲಾಂ
ಆತಾಂ ನಾಕಾತ್, ನಾಕಾಂ ನಾಕಾತ್
ವಾಸ್ ಪರ್ಮಳ್ ತುಮಿಂಚ್ ಹುಂಗಾತ್
ಲ್ಹಾನ್ ನಾಕಾ, ಮ್ಹಾನ್ ದೀ
ಸೊಂಶಾ ಸಾಂಗ್ಡೆ ಕಾನ್ ದೀ.

ಜಿಬ್ಲಿ ನಾಚ್ಲ್ಯಾ ದಾಂತಾಂ ಪಾಟಿಂ
ಕಲ್ವಂತಾಚ್ಯಾ ಪಾಂಯಾಂ ಭಾಶೆನ್
ರುಚಿ ಗೊಸ್ತಾ ಬಾಜ್ವೊ ಸುಟೊವ್ನ್
ಮಸ್ತೆನ್ ಧಾಂವ್ಲ್ಯಾತ್ ಧಾಯ್ ದಿಶೆನ್
ಕಾಂದೆ ಪೆಂದೆ ಮುಳೆ ಖಾಯ್ಲ್ಯಾತ್
ಪಾಲೊ ಮಾಸಾಂ ವ್ಹಡೆ ಖುಶೆನ್
ಆತಾಂ ನಾಕಾ, ಜಿಬ್ಲಿ ನಾಕಾ
ರಗ್ತಾಂ ಮಾಸಾಂ ತುಮಿಂಚ್ ಚಾಕಾ
ಆಯ್ಕೊಪಾಚಿ ತಾನ್ ದೀ
ಸೊಂಶಾ ಸಾಂಗ್ಡೆ ಕಾನ್ ದೀ.

ಭೊಂವ್ಚಿ ಸಕತ್ ಘೊಣಿಕ್ ದಿಲಿ
ನಾಕಾಂತುಲಿ ಮಸ್ತಿ ಮೆಲಿ
ಸೊಂಶಾ ಸಾಂಗ್ಡೆ ಕಾನ್ ಮೆಳ್ಟಾಂ
ಖುಶಿ ಮನಾಂತ್ ಕುಸ್ತ್ಯೊ ಘಾಲಿ
ಆತಾಂ ಲೋಕ್ ಕಾನಾಂಕ್ ಧರ್‍ತಾ
ಸೊಂಶಾ ಭಾಶೆನ್ ಜಾತಾಂ ಗುಳಿ
ಬಾಬಾ ಬಾಯೆ ಸೊಡಾತ್ ಮ್ಹಾಕಾ
ಕಾನಾಂಕ್ ಮ್ಹಜ್ಯಾ ಧರುಂ ನಾಕಾ
ದೆವಾ, ತುಂವೆಂ ಕಾನ್ ದಿಲೆ
ಸೊಸುನ್ ವ್ಹರ್‍ಚೆಂ ತ್ರಾಣ್ ದೀ.

-ಚಾ.ಫ್ರಾ. ದೆಕೊಸ್ತಾ