Poems

ಸೊಧ್ನಾಂ - ಏಕ್

ಕವಿತಾ:

ಸೊಧ್ನಾಂ: ಏಕ್

ತ್ಯಾ ದೊಂಗ್ರಾ ದೆಗೆರಿ, ತೆ ಪಾಯ್ ವಾಟೆರಿ
ಪುನ್ವೆ ರಾತಿಂ ಗೆಲೊಲೆಂಯ್ ತುಂ ನಾಚೊನ್ ನಾಚೊನ್

ತ್ಯಾ ದೊಂಗ್ರಾ ದೆಗೆರಿ, ತ್ಯಾ ಮಳ್ಯಾ ಮೆರೆರಿ
ದೊಳ್ಯಾಂಕ್ ಮ್ಹಜ್ಯಾ ಗೆಲೊಲೆಂಯ್ ತುಂ ಚುಕೊನ್ ಚುಕೊನ್

ತೆ ಪುನ್ವೆ ರಾತಿಂತು, ತೆ ಚಾಂದ್ನ್ಯಾ ವಾತಿಂತು
ಪಾಯ್ ವಾಟೆರ್ ಸೊಧ್ತಾಲೊಂಗೊ ಬಾಗ್ವೊನ್ ಬಾಗ್ವೊನ್

ತಿಂ ಮೊವಾಳ್ ಬೊಟಾಂ, ತಿಂ ಪಾಯಾಂಚಿಂ ಮೆಟಾಂ
ಪಾಯ್ ವಾಟೆರ್ ಆಸ್ತಾಲಿಂಗೊ ಮಾಜ್ವೊನ್ ಮಾಜ್ವೊನ್

ತೊ ಕೊಂಬೊ ಸಾದೆಲೊ, ತೊ ರವಿ ಉದೆಲೊ
ಪಾವ್ಲಾಂ ತುಜಿಂ ಸೊಧ್ತಾಲೊಂಗೊ ಥಕೊನ್ ಥಕೊನ್

ತ್ಯೊ ಕೊಬಾಂತ್ಲ್ಯೊ ಚಲಿಯೊ, ಘೆವುನ್ ಗೊಡಾಂಚ್ಯೊ ಬೆಲಿಯೊ
ದೆಖೊನ್ ಮ್ಹಾಕಾ ವೆತಾಲ್ಯೊಗೊ ಹಾಸೊನ್ ಹಾಸೊನ್

ತಿ ಸಕಾಳ್ ಉದೆಲಿ, ಮ್ಹಾಕಾ ಲಜ್ ದಿಸೊಲಿ
ಮಳ್ಯಾ ಬಗ್ಲೆಂತ್ ಲಿಪ್ಲಲೊಂಗೊ ದುಖೊನ್ ದುಖೊನ್

ಸದಾಂ ಪುನ್ವೆಚೆ ರಾತಿಂ, ತೆ ಪಾಯ್ ವಾಟೆರಿ
ಪಾವ್ಲಾಂ ತುಜಿಂ ಸೊದ್ತಾಲೊಂಗೊ ಬಾಗ್ವೊನ್ ಬಾಗ್ವೊನ್

ತೆ ಪಾಯ್ ವಾಟೆರಿ, ತಿಂ ಪಾವ್ಲಾಂ ಮೆಳ್ಳ್ಯಾರಯ್
ಸೊಧ್ನೆಚಿ ರೂಚ್ ಸಾಂಗ್ತಲೊಂಗೊ ಹಾಸೊನ್ ಹಾಸೊನ್

-ಚಾ. ಫ್ರಾ. ದೆಕೊಸ್ತಾ