Poems
ಎಕಾ ಭಾತಾಕ್ ತುಪ್ಯಾಲಾಗಿಂ
ಚಾಫ್ರಾ ದೆಕೊಸ್ತಾ
ಕವಿತಾ:
ಎಕಾ ಭಾತಾಕ್ ತುಪ್ಯಾಲಾಗಿಂ
ಹಾತಿಂ ಆಸಾ ತೆರ್ಯಾಪೊತಿ, ಖಂಯ್ ವೆತಾಯ್ ಮರ್ಯಾ?
‘ಮಿಟಾ ಭರ್ಣಿ ಜಾಲ್ಯಾ ರಿತಿ, ಹಾಡುಂಕ್ ವೆತಾಂ ದರ್ಯಾ’
ಮರ್ಯೆಂ ಮಿಟಾಕ್ ದರ್ಯಾಕ್ ಗೆಲೆಂ
ಮಿಟಾ ರಾಶಿಂತ್ ಜಾಲೆಂ ವೊಲೆಂ
ಮಿಟಾಂತ್ ಲೊಳ್ಳೆಂ, ಮಿಟಾಂತ್ ಮೆಲೆಂ
ಆತಾಂ ತಾಚಿ ಜಾಲ್ಯಾ ಮಾತಿ, ಕೊಣಯ್ ಭರುನ್ ವ್ಹರ್ಯಾ
ಮುಯ್ಲಿಬಾಯ್ ಆಯ್ಲಿ ವೆಗಿಂ, ಮಾತ್ಯಾರ್ ಭಾಟಿ ರಿತಿ
‘ಸಾಂಗ್‍ಗೆ ಭಾಯೆ, ಖಂಯ್ಸರ್ ವೆತಾ? ದೊಂಗ್ರಾಕ್ ಹಾಡುಂಕ್ ಮಾತಿ?’
ಮುಯ್ಲಿಬಾಯ್ ದೊಂಗ್ರಾಕ್ ಗೆಲಿ
ಮಾತ್ಯೆಂತ್ ಭರ್ಲಿ, ಮಾತ್ಯೆಂತ್ ನ್ಹಾಲಿ
ಮಾತ್ಯೆಂತ್ ಲೊಳ್ಳಿ, ಮಾತ್ಯೆಂತ್ ಮೆಲಿ
ಮಾತ್ಯೆಂತ್ ಆತಾಂ ಕೂಡ್ ತಿಚಿ ಸಾರುನ್ ಜಾಲ್ಯಾ ಕಾತಿ
ಕಾಜುಲ್‌ಬಾಬ್ ಧಾಂವತ್ ವೆತಾ, ಖಂಯ್‌ರೇ ಬಾಬಾ ಧಾಂವ್?
‘ಶಿಮ್ಟೆದೊಂದಿ ಮಾಜ್ವೊನ್ ವೆತಾ, ಜಳೊಂವ್ಕ್ ವೆತಾಂ ಹಾಂವ್’
ಸುರ್ಯಾಲಾಗ್ಚೊ ಉಜ್ವಾಡ್ ಭರುಂಕ್
ತಾಚೆ ದಿವ್ಟೆಕ್ ಶಿಮ್ಟಿ ಧರುಂಕ್
ಲಾಗ್ತಾ ಆಪ್ಲಿಚ್ ಖುಶೀ ಕರುಂಕ್
ಕಾಜುಲ್‌ಬಾಬ್ ಕರಿ ಜಾತಾ, ಆಳ್ವೊನ್ ತಾಚೆಂ ನಾಂವ್
ತುಂಗೊ ಜಾಣಾಂ ತಾಂಚಿ ಕಥಾ, ತರಿ ಲಾಲೆವ್ನ್ ಯೆತಾ
ಮೊಗಾ ಉತ್ರಾಂಕ್ ಮ್ಹಜೆ ಲಾಗಿಂ ಕಾಳೀಜ್ ಭಿತರ್ ಖಾತಾ
ಉಸ್ಳೊನ್ ಫಾಸ್ಳೊನ್ ಚೋಯ್ ದಿಶಿಂ
ಉತ್ರಾಂ ಮ್ಹಜಿಂ ಸುಟ್ಟೀತ್ ಅಶಿಂ
ಅಂತರ್ಮಳಾಂ ಕರುನ್ ಪಿಶಿಂ
ತುಪ್ಯಾಲಾಗಿಂ ತುಂಗೊ ಯೆತಾ, ಆಶೇನ್ ಎಕಾ ಭಾತಾ!
-ಚಾಫ್ರಾ ದೆಕೊಸ್ತಾ
Copyright © Kavita Trust (R) 2026 . All Rights Reserved.