Poems

ಖರಸ್

ಚಾ ಫ್ರಾ ದೆಕೊಸ್ತಾ

ಕವಿತಾ:

ಖರಸ್

ಆಲ್ಮಾರಿಂತ್ ಬೂಕ್, ಬುಕಾಂತ್ ಕವಿತಾ, ವಾಚುಂಕ್ ಆಶೆಲೊಂ
ಕಿರ್ಕೊಳಿ ವಾಳಯ್ ವಾಚುನ್ ಗೆಲಿ ಹಾಂವ್ ಖರ್ಶೆಲೊಂ

ಝಾಡಾಚೆರ್ ತಾಳಿ, ತಾಳ್ಯೆರ್ ಚಿಕೊಳಿ ಮಾಳುಂಕ್ ಆಶೆಲೊಂ
ಶೆಜಾರ್ಚಿ ಚಲಿ ಮಾಳುನ್ ಗೆಲಿ ಹಾಂವ್ ಖರ್ಶೆಲೊಂ

ರಸ್ಮಿ ಆಂಗ್ಲೆಂ ಫಿಂತಾಂ ನ್ಹೆಸ್ಲಲೆಂ ವೆಂಗುಂಕ್ ಆಶೆಲೊಂ
ನವ್ರೊ ತಿಗೆಲೊ ವೆಂಗುನ್ ಗೆಲೊ ಹಾಂವ್ ಖರ್ಶೆಲೊಂ

ನಿರ್‌ನಿಳೆಂ ತಳೆಂ, ತಳ್ಯಾಂತ್ ಲ್ಹಾರಾಂ ಉಪ್ಯೆಂವ್ಕ್ ಆಶೆಲೊಂ
ಅಡ್ಸರ್ ಸೊಣ್ಣಾಂ ಉಪ್ಯೆವ್ನ್ ಗೆಲಿಂ ಹಾಂವ್ ಖರ್ಶೆಲೊಂ

ಉಸ್ವಲ್ಯಾ ವೇಳ್, ವೆಳೆರ್ ಕರ್ಲಾಂ ವಿಂಚುಂಕ್ ಆಶೆಲೊಂ
ಸಾಂಡ್ಲಲಿಂ ಬಾಳಾಂ ವಿಂಚುನ್ ಗೆಲಿಂ ಹಾಂವ್ ಖರ್ಶೆಲೊಂ

ಕಾಳ್ಶೆಲಾಂ ಮಳಬ್ ಮಳ್ಬಾರ್ ನೆಕೆತ್ರಾಂ ಮೆಜುಂಕ್ ಆಶೆಲೊಂ
ಮವಾಲಿ ಪೋರ್ ಮೆಜುನ್ ಗೆಲೊ ಹಾಂವ್ ಖರ್ಶೆಲೊಂ

ಜಿಣ್ಯೆಚಿಂ ನವ್ಲಾಂ ಘುಸ್ಪಟಿಂ ಸವ್ಲಾಂ ಸಮ್ಜೊಂಕ್ ಆಶೆಲೊಂ
ದುಬ್ಳಿಂ ಅಬಳಿಂ ಸಮ್ಜೊಂಕ್ ಸಕ್ಲಿಂ ಹಾಂವ್ ಖರ್ಶೆಲೊಂ

-ಚಾಫ್ರಾ ದೆಕೊಸ್ತಾ