ಸಕಾಳಿಂಚಿ ಧುಂವ್ರಿ

ಸಂಪಾದಕೀಯ್:

ಸಕಾಳಿಂಚೆ ಧುಂವ್ರೆಂತ್ ಸಾರಿಯೆಚೊ ಧುಂವರ್ ಭರ್‍ಲಾ

ಹಿ ಕವಿತಾ ವಾಚುನ್ ಎಕೆ ಕುಶಿನ್ ಹಾಂವ್ ಅಸ್ವಸ್ಥ್ ಜಾವ್ನ್ ವೆತಾನಾ, ಆನ್ಯೇಕೆ ಕುಶಿನ್ ಇತ್ಲಿ ಆಪುರ್ಬಾಯೆಚಿ ಕವಿತಾ ಬರಯಿಲ್ಲ್ಯಾ ಮ್ಹಜೊ ಆಪ್ತ್ ಮಿತ್ರ್ ಮಾವ್ರಿಸಾ ವಿಶಿಂ ಮ್ಹಾಕಾ ದಾಧೊಸ್ಕಾಯ್ ಭೊಗ್ತಾ. ಆಮ್ಚ್ಯಾ ದೊಳ್ಯಾಂ ಮುಕಾರ್ ಸುಂದರ್, ಚಿಂತುಂಕ್ ಕರ್‍ಚೆ ತಸಲಿಂ, ಅದ್ಭುತ್ ಉತ್ರಾಂಚಿಂ ಪಿಂತುರಾಂ ತಾಣೆಂ ಸೊಡಯ್ಲ್ಯಾಂತ್. ಸಾಳ್ಕಾಕ್ ಉಜ್ವಾಡುಂಕ್ ಸುರ್ಯೊ ಜಾಯಿಚ್. ಪುಣ್ ಆಜ್ ತೊ ಉದೆನಾ ಮ್ಹಣ್ತಾನಾ ಜಾಲ್ಲಿ ಪರಿಗತ್ ಪಳೆಯಾ. ಆಮ್ಚಿ ಸಂಸ್ಕೃತಿ ಆಜೂನ್ ಫಾಡ್ಲಾ ಮುಡ್ಲಾಚ್ಯಾ ಸಂಘರ್‍ಶಾಂತ್ ನವೆಂ ರೂಪ್ ಜೊಡುಂಕ್ ಪಾವೊಂಕ್ ನಾತಲ್ಲ್ಯಾ ವೆಳಾರ್ ಹಿ ಪಾರ್ಟಿ ಕಿತೆಂ ಸಾಂಗ್ತಾ ಆಮ್ಕಾಂ?

ಮಾಗೀರ್ ಹೆಂ ಸಕ್ಕಡ್ ಆಮಿ ಪಳೆವ್ನ್ ಆಸ್ಚ್ಯಾ ದೊಳ್ಯಾಂಚೆರ್ ಹೊಂದೊನ್ ಆಸ್ತಾ ನ್ಹಯ್? ಆಮ್ಚ್ಯಾ ಆಮ್ಚ್ಯಾ ಚಿಂತ್ಪಾಚೆರ್ ಹೊಂದೊನ್ ಆಸ್ತಾ ನ್ಹಯ್? ಬರೆಂ ಆನಿ ವಾಯ್ಟ್ ಹಾಂಚೆ ಮಧೆಂ ಕೊಣ್ ಕಸೊ ಗೀಟ್ ವೊಡ್ತಾ ಮ್ಹಳ್ಳೆಂ ಸಾಂಗೊಂಕ್ ಜಾಯ್ನಾ. ತರೀ ಆತಾಂ ಘಡ್ಚೆಂ ಘಡೊನ್ ಜಾಲಾಂ. ಹ್ಯಾ ಮೊರ್ನಿಂಗ್ ಮಿಸ್ಟಾಂತ್ (ಸಕಾಳಿಂಚೆ ಧುಂವ್ರೆಂತ್) ಆನ್ಯೇಕಾ ನಮುನ್ಯಾಚೊ ಧುರೊ ಭರ್‍ಲಾ ಜಾಲ್ಲ್ಯಾನ್ ಧುಂವ್ರಿ ಖಂಯ್ಚಿ, ಧುಂವರ್ ಖಂಯ್ಚೊ ಮ್ಹಳ್ಳೆಂ ಕಳನಾಸ್ತಾಂ ಲೋಕ್ ಘುಸ್ಪಡ್ಲಾ ಪಳೆಯಾ, ತೆಂ ಲೆಗುನ್ ಕವಿನ್ ಚಮತ್ಕಾರಿ ಉತ್ರಾಂನಿ ಸಾಂಗ್ತಾ.

ಮಂಗ್ಳುರಾಕ್ ಥರ್ಥರಾಯಿಲ್ಲೆಂ ಹೆಂ ಘಡಿತ್, ನಪಯಿಂಚ್ ಜಾವ್ನ್ ವೆಚ್ಯಾರ್ ಆಸಲ್ಲ್ಯಾ ಮ್ಹಜ್ಯಾ ಮೊಗಾಚ್ಯಾ ಕವಿಕ್ ಪುನರ್‌ಜೀವ್ ದೀಂವ್ಕ್ ಸಕ್ಲಾಂ.  ಹಿ ಕವಿತಾ ಮಾವ್ರಿಸ್ ಡೆಸಾಚೆ ಥಾಕ್ತೆಚೆಂ ಥೊರುಂ ಆದಿಂ ಕಿತ್ಲೆಂ ಬಳಾಧಿಕ್ ಆಸಲ್ಲೆಂ, ತಿತ್ಲೆಂಚ್ ಬಳ್ ಆಜಯ್ ಆಸಾ ಮ್ಹಳ್ಳೆಂ ದಾಕೊವ್ನ್ ದಿತಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಸಕಾಳಿಂಚಿ ಧುಂವ್ರಿ

ಉದೆನಾತ್ಲ್ಯಾ ದಿಸಾಂತ್
ಬಾವಲ್ಲೆಂ ಸಾಳಕ್
ಉಬ್ರಾಂತ್ ರಗತ್ ಭರ್‍ಸುನ್
ಉಜ್ವಾಡ್ ಕರುಂಕ್ ಚಿಂತಾ
ಸಕಾಳಿಂಚೆ ಧುಂವ್ರೆಂತ್

ಫಾಡ್ಲಾ-ಮುಡ್ಲಾಚ್ಯಾ
ಅನಿಸ್ಕಳ್ ಎಕ್ವಟಾಂತ್
ಆಜೂನ್ ಜಲ್ಮನಾತ್ಲೊ ಜೀವ್
ಜಾಲ್ಲೊ ದೀಸ್ ಆಚರ್‍ಶಿತಾ
ಸಕಾಳಿಂಚೆ ಧುಂವ್ರೆಂತ್

ಬೆತಾನ್ ಚಲ್ಚ್ಯಾ ಕುಡ್ಡ್ಯಾಚೆ
ಆಸ್ಡ್ಯೊ ನಾತಲ್ಲೆ ದೊಳೆ
ಆಪ್ಣಾಕ್ ಸಾರ್ಕೆಂ ದಿಸ್ತಾ ಮ್ಹಣ್
ಪಿಂತ್ರಾಂ ಪುಸಿನಾಸ್ತಾಂ ತಿಳ್ತಾತ್
ಸಕಾಳಿಂಚೆ ಧುಂವ್ರೆಂತ್

ಆಂಗ್‌ಭರ್ ಪಾಂಗರ್‍ಲಲೆಕ್
ನಾಗ್ಡೆಂ ಮ್ಹಣ್ ದಿಲ್ಲೊ ಪಾಲಂವ್
ಬಲಾತ್ಕಾರಾನ್ ನ್ಹೆಸಯ್ತಾನಾ
ಕೂಡ್ ಸಗ್ಳಿಚ್ ವಿಣ್ಗಿ ದಿಸ್ತಾ
ಸಕಾಳಿಂಚೆ ಧುಂವ್ರೆಂತ್

ಹ್ಯಾಯಿ ಧುವ್ರೆಚೆಂ
ಲುಟ್ಲೆಂ ನಿಸ್ಕಳ್‌ಪಣ್
ಆತಾಂ ಉರ್‍ಲಾ ಫಕತ್
ಸಾರಿಯೆರ್ ಜಳ್ಚ್ಯಾ ಮೊಡ್ಯಾಚೊ ಧುರೊ
ಸಕಾಳಿಂಚೆ ಧುಂವ್ರೆಂತ್

-ಮಾವ್ರಿಸ್ ಡೆಸಾ