Kavita Kular

ಅಂತ್ಯಯಾತ್ರಾ

ಸಂಪಾದಕೀಯ್:

ಕೊಣಾಕ್ ಫರಕ್ ಪಡ್ತಾ?

ಸ್ವತಾಚ್ಯೆ ಅಂತ್ಯಯಾತ್ರೆ ವೆಳಾರ್ ಕಿತೆಂ ಘಡ್ತಲೆಂ ತೆಂ ಪಯ್ಲೆಂಚ್ ಸಮ್ಜುನ್ ಘೆಂವ್ಚಿ ಆಶಾ ಹ್ಯಾ ಕವಿಚಿ. ತಾಕಾ ತಾಚ್ಯಾ ಖಾಸ್ ಮನ್ಶಾಂಕ್ ಧರುನ್ ಕೊಣಯ್ ಎಕ್ಲ್ಯಾಚೊ ಭರ್‍ವಸೊ ನಾ. ಎಕ್ಲೊ ಮನೀಸ್ ಸೊಂಪ್ತಚ್ ಕಿತೆಂ ಸಗ್ಳೆಂ ಜಾತಾ, ತೆಂ ಫಕತ್ ದೊಳ್ಯಾಂಕ್ ಮಾತಿ ಘಾಲ್ಚೆ ತಸಲೆಂ ಮ್ಹಣುನ್ ತೊ ನಖ್ಖಿ ಜಾಣಾ. ಪುಣ್ ಹಾಂತುಂ ಕೊಣಾಚೆಂ ವಜನ್ ಕಿತ್ಲೆಂ ಮ್ಹಣುನ್ ತಾಕಾ ಮರ್‍ಚೆ ಆದಿಂಚ್ ಬರೊವ್ನ್ ಕಾಡುಂಕ್ ಜಾಯ್.

ತ್ಯಾ ದೆಕುನ್ ವಿಚಿತ್ರ್ ಚಿಂತಪ್ ತಾಚೆ ಮತಿಂತ್ ಘುಂವ್ತಾ. ತೊ ಅಸಲೆ ಎಕೆ ಪರಿಸ್ಥಿತಿಂತ್ಲ್ಯಾನ್ ಪಾಶಾರ್ ಜಾತಾಕಿ, ಥಂಯ್ಸರ್ ಜಿತೊ ಆಸುನಯ್ ಮರಣ್ ಪಾಂವ್ಚಿ ಘಡಿ ತಾಚ್ಯಾ ದೊಳ್ಯಾಂ ಮುಕಾರ್ ಉಬಿ ಜಾವ್ನ್ ತೊ ಥರ್ಥರ್‍ತಾ. ಆನಿ ಮರ್ಣಾ ಆದಿಂ, ಮರ್ಣಾ ಉಪ್ರಾಂತ್ಲೊ ಭೊಂವಾರ್ ಜಾಣಾ ಜಾಂವ್ಚೆಂ ಪಿಶೆಪಣ್ ಕಾಂಯ್ ಉಪ್ಕಾರಾಕ್ ಪಡ್ಚೆಂ ನ್ಹಯ್ ಮ್ಹಣುನ್ ತಾಕಾ ಸಮ್ಜುಂಕ್ ಲಾಗ್ತಾ.

ಮಾಗೀರ್ ಫರಕ್ ಕೊಣಾಕ್ ಪಡ್ತಾ?

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

 

 

 

 

 

 

ಅಂತ್ಯಯಾತ್ರಾ

ಆಯುಷ್ಯ್ ಸೊಂಪ್ತಾ ಮ್ಹಣಸರ್
ಭೊಂವ್ತಿಂ ಸಗ್ಳ್ಯಾಂಕ್
ಸಗ್ಳೆಂ ಭೊಗುಂಕ್ ಮೆಳ್ಟಾ
ಸಗ್ಳೆಂ ಪಳೆಂವ್ಕ್ ಮೆಳ್ಟಾ
ದುರ್ದೈವಾನ್ ಪಳೆಂವ್ಕ್ ಮೆಳನಾ
ಆಪ್ಲಿ ಸ್ವತಾಚಿ ಅಂತ್ರಯಾತ್ರಾ.

ಆಪುಣ್ ಮೆಲೊಂ ಕಿ
ಕೊಣ್ ರಡ್ಟಾ, ಕೊಣ್ ರಡನಾ
ತೆಂ ಪಳೆಂವ್ಕ್ ಮೆಳನಾ
ಕೊಣ್ ಚಡ್ ರಡ್ಟಾ, ಕೊಣ್ ಕಮೀ ರಡ್ಟಾ
ತೆಂ ಅಯ್ಕುಂಕ್ ಯೆನಾ
ಕೊಣ್ ಖರ್‍ಯಾಂನಿ ರಡ್ಟಾ
ಕೊಣ್ ಮಾನ್ಗ್ಯಾಂನಿ ದುಕಾಂ ಗಳಯ್ತಾ ತೆಂ ದಿಸನಾ
ಕೊಣ್ ಆಪ್ಲೆ ಖಾತೀರ್ ರಡ್ಟಾ
ಕೊಣ್ ಆಪ್ಲ್ಯಾ ನಾಂವಾನ್ ರಡ್ಟಾ
ತೆಂ ದಿಷ್ಟಿ ಪಡನಾ
ಆಪ್ಲೆ ರಡ್ಟಾತ್ ಕಾಂಯ್ ಬೊಲ್ತೆಚ್ ರಡ್ಟಾತ್
ತೇಂಯ್ ಸಮ್ಜನಾ

ಭಟಾಕ್ ಕೊಣ್ ಆಪಯ್ತಾ?
ನಿಸಣ್ ಕೊಣ್ ಬಾಂದ್ತಾ?
ಕೆಳಿಚೆಂ ಪಾನ್ ಕೊಣ್ ಹಾಡ್ಟಾ?
ಸೂಪ್, ಧವೊ ಕಪ್ಡೊ, ಮಡ್ಕೆಂ ಕೊಣ್ ಘೆವ್ನ್ ಯೆತಾ?
ಶವವಾಹಿಕಾ ಕೊಣ್ ಮಾಗಯ್ತಾ?
ತೆಂ ದೊಳೆ ಉಗ್ತೆ ಉರ್‍ಲ್ಯಾರ್ ಲೆಗೀತ್ ದಿಸನಾ
ಆಪ್ಲಿ ಸಾರಿ ಕಶಿ ದಾಳ್ಳ್ಯಾ
ಲಾಕ್ಡಾಂ ಸುಕಿಂ ಆಸಾತ್ ಕಾಂಯ್ ವೊಲಿಂ?
ಕೊಣ್ ಕೊಣ್ ಆಯ್ಲ್ಯಾತ್?
ಕೊಣ್ ಕೊಣ್ ಯೇಂವ್ಕ್ ನಾಂತ್?
ಕೊಣ್ ಕಿತೆಂ ಉಲಯ್ತಾತ್?
ಕಾಂಯಿಂಚ್ ಕಳನಾ.

ಬರೆಂ, ಜಿತೊ ಆಸ್ತಾನಾ
ಹೆಂ ಸಗ್ಳೆಂ ಘಡೊವ್ನ್ ಪಳೆತಲೊಂ ಮ್ಹಣ್ಲ್ಯಾರ್ ಅಡ್ಚಣ್
ಅಂತ್ಯಯಾತ್ರೆಚೆ ರಂಗೀನ್ ತಾಲಿಮೆಕ್
ಕೊಣ್ ಆಪಯ್ಲ್ಯಾರ್ ಯೆತಲೊ
ಹಾಚಿ ಗ್ಯಾರಂಟಿ ನಾ.

ಮನೀಸ್ ಜಿತೊ ಆಸ್ತಾನಾ ಮ್ಹಣ್ ರಡಪ್?
ಜಿತ್ಯಾ ಮನ್ಶಾಕ್ ನಿಸಣೀಕ್ ಬಾಂದಪ್?
ಆಪಯ್ಲ್ಯಾರ್ ಭಟ್ ಲೆಗೀತ್ ಯೆಂವ್ಚೊ ನಾ
ಜಿತ್ಯಾ ಮನ್ಶಾಕ್ ವ್ಹರ್‍ಪಾಕ್ ಶವವಾಹಿಕಾ
ಮೆಳಪ್ ಕುಸ್ತಾರ್

ಸಮ್ಜಾತ್
ಕೊಣಾ 'ಈವೆಂಟ್ ಮೆನೆಜರಾಕ್' ದಿಲೊ 'ಕೊಂಟ್ರೆಕ್ಟ್'
ಲೋಕ್ ಆಯ್ಲೆಯ್ ಬಿ
ರಡ್ಲೆಯ್ ಬಿ
ಮ್ಹಾಕಾ ನಿಸಣೀಕ್ ಬಾಂದ್ಲೋಯ್ ಬಿ
ಭಟಾಕ್ ಉಕ್ಲೂನ್ ಹಾಡ್ಲೊಯ್ ಬಿ
ಸಾರಿ ದಾಳುನ್ ವಯ್ರ್ ದವರ್‍ಲೊಯ್ ಬಿ
ಮಂತ್ರಪಾಠ್ ಚಲ್ತಾಯ್ ಬಿ
ಆನಿ ಇತ್ಲ್ಯಾನ್ ಚುಕುನ್ ಕೊಣೆ ಉಜೊ ಲಾಯ್ಲೊಯ್ ಬಿ
ಲಾಕ್ಡಾಂ ಸುಕಿಂ ಆಸ್ಲೀಂಯ್ ಬಿ
ಸಾರಿ ವಯ್ಲ್ಯಾನ್ ಬೆಗಿಬೆಗೀನ್ ಉಟ್ಲೊಂಯ್ ಬಿ
ಪುಣ್ ಕೊಣೇಂಯ್ ದುಸ್ಮಾನಾನ್ ಪರತ್ ಉಜ್ಯಾಂತ್ ಧುಕಲ್ಲೊ ಜಾಲ್ಯಾರ್
ಸೊಂಪ್ಲಿ ರಂಗೀನ್ ತಾಲೀಮ್
ಕೆದಿ ಮೊಟಿ ಜೊಖೀಮ್!
ಜಿವಾರ್ ಯೆವ್ಪಿ ಹ್ಯೊ ಭಾನ್ಗಡಿ ಜಾಯ್ ಕೊಣಾಕ್?
ಪಾಡ್ ಪಡುಂ ತೆಂ ರಂಗೀನ್ ತಾಲಿಮೆಚೆಂ
ಮಾಗೀರ್ ರಡ್ಟಾತ್ ತೆ ರಡುಂ
ಆನಿ ವ್ಹರ್‍ತಾತ್ ತೆಂ ವ್ಹರುಂ
ಆನಿ ಕರ್‍ತಾತ್ ತೆಂ ಕರುಂ
ಗೊಬೊರ್
ಮರ್‍ತಕೂಚ್ ಕಿತೆಂ ಫರಕ್ ಪಡ್ಟಾ?

-ಅರುಣ್ ಸಾಖರ್‌ದಾಂಡೆ

संपादकीय:

कोणाक फरक पडता?

स्वताच्ये अंत्ययात्रे वेळार कितें घडतलें तें पयलेंच समजून घेंवची आशा ह्या कविची. ताका ताच्या खास मनशांक धरून कोणय एकल्याचो भर‍वसो ना. एकलो मनीस सोंप्तच कितें सगळें जाता, तें फकत दोळ्यांक माती घाल्चे तसलें म्हणून तो नख्खी जाणा. पूण हांतूं कोणाचें वजन कितलें म्हणून ताका मर‍चे आदिंच बरोवन काडुंक जाय.

त्या देकून विचित्र चिंतप ताचे मतिंत घुंवता. तो असले एके परिस्थितिंतल्यान पाशार जाताकी, थंयसर जितो आसुनय मरण पांवची घडी ताच्या दोळ्यां मुकार उबी जावन तो थर्थर‍ता. आनी मर्णा आदीं, मर्णा उपरांतलो भोंवार जाणा जांवचें पिशेपण कांय उपकाराक पडचें न्हय म्हणून ताका समजुंक लाग्ता.

मागीर फरक कोणाक पडता?

-मेल्विन रोड्रीगस

कविता:

अंत्ययात्रा

आयुषय सोंप्ता म्हणसर
भोंवतीं सगळ्यांक
सगळें भोगुंक मेळटा
सगळें पळेवंक मेळटा
दुर्दैवान पळेवंक मेळना
आपली स्वताची अंत्रयात्रा.

आपूण मेलों की
कोण रडटा, कोण रडना
तें पळेवंक मेळना
कोण चड रडटा, कोण कमी रडटा
तें अयकुंक येना
कोण खर‍यांनी रडटा
कोण मानग्यांनी दुकां गळयता तें दिसना
कोण आपले खातीर रडटा
कोण आपल्या नांवान रडटा
तें दिषटी पडना
आपले रडटात कांय बोल्तेच रडटात
तेंय समजना

भटाक कोण आपयता?
निसण कोण बांदता?
केळिचें पान कोण हाडटा?
सूप, धवो कपडो, मडकें कोण घेवन येता?
शववाहिका कोण मागयता?
तें दोळे उग्ते ऊर‍ल्यार लेगीत दिसना
आपली सारी कशी दाळ्ळ्या
लाकडां सुकीं आसात कांय वोलीं?
कोण कोण आयल्यात?
कोण कोण येवंक नांत?
कोण कितें उलयतात?
कांयिंच कळना.

बरें, जितो आसताना
हें सगळें घडोवन पळेतलों म्हणल्यार अडचण
अंत्ययात्रेचे रंगीन तालिमेक
कोण आपयल्यार येतलो
हाची ग्यारंटी ना.

मनीस जितो आसताना म्हण रडप?
जित्या मनशाक निसणीक बांदप?
आपयल्यार भट लेगीत येंवचो ना
जित्या मनशाक व्हर‍पाक शववाहिका
मेळप कुसतार

समजात
कोणा 'ईवेंट मॅनेजराक' दिलो 'कोंट्रेकट'
लोक आयलेय बी
रडलेय बी
म्हाका निसणीक बांदलोय बी
भटाक उकलून हाडलोय बी
सारी दाळून वयर दवर‍लोय बी
मंत्रपाठ चल्ताय बी
आनी इतल्यान चुकून कोणे उजो लायलोय बी
लाकडां सुकीं आसलींय बी
सारी वयल्यान बेगिबेगीन उटलोंय बी
पूण कोणेंय दुस्मानान परत उज्यांत धुकल्लो जाल्यार
सोंपली रंगीन तालीम
केदी मोटी जोखीम!
जिवार येवपी ह्यो भानगडी जाय कोणाक?
पाड पडूं तें रंगीन तालिमेचें
मागीर रडटात ते रडूं
आनी व्हर‍तात तें व्हरूं
आनी कर‍तात तें करूं
गोबोर
मर‍तकूच कितें फरक पडटा?

-अरूण साखर‌दांडे



Title : ಅಂತ್ಯಯಾತ್ರಾ

Please fill in the form below with your feedback/ suggestions .

Fields marked with * are necessary



Disclaimer : Please write your correct name and email address. Kindly do not post any personal, abusive, defamatory, infringing, obscene, indecent, discriminatory or unlawful or similar comments. kavitaa.com/konkanipoetry.com will not be responsible for any defamatory message posted under this article.

Please note that sending false messages to insult, defame, intimidate, mislead or deceive people or to intentionally cause public disorder is punishable under law. It is obligatory on kavitaa.com / konkanipoetry.com to provide the IP address and other details of senders of such comments, to the authority concerned upon request.

Hence, sending offensive comments using kavitaa.com / konkanipoetry.com will be purely at your own risk, and in no way will kavitaa.com / konkanipoetry.com be held responsible.


 A  B  C  D  E  F  G  H  I  J  K  L  M
 
 N  O  P  Q  R  S  T  U  V  W  X  Y  Z