ಫೆಲ್ಸಿ ಲೋಬೊಚ್ಯಾ ’ಪಾಲ್ವಾ ಪೊಂತ್’ ಪುಸ್ತಕಾಕ್ ಡೆನಿಸ್ ಆನಿ ಮೇರಿ ಡಿಕುನ್ಹಾ ಸ್ಮಾರಕ್ ಇನಾಮ್
ಡೆನಿಸ್ ಡಿಕುನ್ಹಾ ಆನಿ ಮೇರಿ ಡಿಕುನ್ಹಾ ಸ್ಮಾರಕ್ ಕವಿತಾ ಟ್ರಸ್ಟ್ - 2025 ವರ್ಸಾಚೆಂ ಅತ್ಯುತ್ತಮ್ ಕವಿತಾ ಪುಸ್ತಕ್ ಇನಾಮ್ ಫೆಲ್ಸಿ ಲೋಬೊ, ದೆರೆಬೈಲ್ ಹಿಚ್ಯಾ ’ಪಾಲ್ವಾ ಪೊಂತ್’ ಪುಸ್ತಕಾಕ್ ಫಾವೊ ಜಾಲಾಂ. ಹೆಂ ಇನಾಮ್ ರುಪಯ್ 25,000 ಆನಿ ಯಾದಸ್ತಿಕಾ ಆಟಾಪ್ತಾ. 2026 ವರ್ಸಾಚ್ಯಾ ಜನೆರ್ 11 ತಾರಿಕೆರ್ ಮಂಗ್ಳುರ್ಚ್ಯಾ ಸಾಂ. ಲುವಿಸ್ - ಪರಿಗಣಿತ್ ವಿಶ್ವವಿದ್ಯಾಲಯಾಚ್ಯಾ ಪೀಸ್ ಪಾರ್ಕಾಂತ್ ಚಲ್ಚ್ಯಾ ವಿಸಾವ್ಯಾ ಕವಿತಾ ಫೆಸ್ತ್ ಸಂದರ್ಭಾರ್ ಹೆಂ ಇನಾಮ್ ತಿಕಾ ಭೆಟಯ್ತಲೆ.
"ಫೆಲ್ಸಿ ಲೋಬೊ ಎಕ್ಲಿ ಸಮಾಜ್ಮುಖಿ ಕವಿ. ಫೆಲ್ಸಿಚಿಂ ಕವಿತಾಂ ಅನ್ಯಾಯ್ ಆನಿ ಅಸಮಾನತೆ ವಿರೋಧ್ ನಿರ್ಭಯ್ ಜಾವ್ನ್ ಝಗ್ಡ್ಯಾಕ್ ಉಬಿಂ ರಾವ್ತಾತ್. ತಿಚ್ಯೊ ಕವಿತಾ ಕೇವಲ್ ದೂಖ್ ಉಚಾರಿನಾಂತ್. ತ್ಯೊ ನೈತಿಕ್ ಸಂವೇದನಾಂನಿ ಭರುನ್ ವೊಮ್ತತಾತ್. ನೈತಿಕ್ ಜಾಗೄತಿ ಉಟೊವ್ನ್, ಸಮಾಜಾಚ್ಯಾ ಆನಿ ದೇಶಾಚ್ಯಾ ಯಥಾರ್ಥ್ ಸ್ಥಿತೆಕ್ ಧಯ್ರಾನ್ ಸವಾಲಾಂ ಜೊಕ್ತಾತ್. ನೀತ್, ಶಾಂತಿ, ಎಕ್ವಟ್ ಆನಿ ಸಂತೊಸಾಚೆ ಆಶಯ್ ತಿಚ್ಯಾ ಕವಿತೆಂನಿ ಆಸಾತ್.
the Late Dennis and Mary DCunha
"ಪ್ರಕೃತಿಚ್ಯಾ ಜಿವಾಚೆರ್ ಅಕ್ರಮಣ್ ಕರ್ಚ್ಯಾ ಅಕ್ರಮಿ ಹಟ್ಟಿ ಹಾತಾಂಕ್ ಬಳಾನ್ ಆಡಾಂವ್ಚೆಂ ಕ್ರಿಯಾಳ್ ಕವಿಮನ್ ತಿಚ್ಯಾ ಕವಿತಾಂನಿ ಉಗ್ತೆಂ ಜಾತಾ. ಸ್ತ್ರಿವಾದ್ ಅಭಿವ್ಯಕ್ತ್ ಕರ್ಚ್ಯೊ ಬಳ್ವಂತ್ ಕವಿತಾ ಹ್ಯಾ ಪುಸ್ತಕಾಂತ್ ಆಸಾತ್. ಸ್ತ್ರೀಯೆಚೆಂ ದೂಕ್ ಮಾತ್ರ್ ಅಭಿವ್ಯಕ್ತ್ ಕರಿನಾಸ್ತಾಂ, ಸ್ತ್ರೀ ಅನಿ ಪ್ರಕೃತಿಚೊ ಸಂಘರ್ಶ್ ತಿಚ್ಯಾ ಕವಿತೆಂನಿ ಝಳ್ಕತಾ. ಹ್ಯಾ ಸಂಘರ್ಷಾ ಬರಾಬರ್ ಸ್ತ್ರೀಯೆ ಥಂಯ್ ಬಳ್ ಭರ್ಚೆಂ ಪ್ರಯತ್ನ್ ತಿಚ್ಯಾ ಕವಿತೆಂನಿ ದಿಸ್ತಾ.
"ಮನ್ಶಾಚ್ಯಾ ಬಲಾತ್ಕಾರಿ ಮನೋಸ್ಥಿತಿ ವಿರೋಧ್ ಆವಾಜ್ ಆನಿ ಪ್ರತಿರೋಧ್ ಫೆಲ್ಸಿಚ್ಯಾ ಕವಿತಾಂನಿ ಸ್ಪಷ್ಟ್ ಜಾವ್ನ್ ಉಟೊನ್ ದಿಸ್ತಾ". - ಅಶೆಂ ಆಂಡ್ರ್ಯೂ ಎಲ್. ಡಿಕುನ್ಹಾ, ಕಿಶೂ ಬಾರ್ಕೂರ್ ಆನಿ ವಿಲಿಯಮ್ ಪಾಯ್ಸ್ - ಹ್ಯಾ ತೆಗಾಂಚೆ ವೆಂಚ್ಣುಕೆ ಸಮಿತಿನ್ ಹೆಂ ಪುಸ್ತಕ್ ಇನಾಮಾಕ್ ವಿಂಚ್ತಾನಾ ಆಪ್ಲೊ ಮತ್ ಉಚಾರ್ಲಾ.
ಕವಿತಾ ಟ್ರಸ್ಟಾನ್ ಹ್ಯಾ ಇನಾಮಾ ಖಾತೀರ್ 2024 ವರ್ಸಾ ಪರ್ಗಟ್ ಜಾಲ್ಲ್ಯಾ ಪುಸ್ತಕಾಂಚಿ ಅರ್ಜಿ ಆಪಯಿಲ್ಲಿ. ವೆವೆಗ್ಳ್ಯಾ ಲಿಪಿಂನಿ ಪರ್ಗಟ್ ಜಾಲ್ಲಿಂ ನೋವ್ ಪುಸ್ತಕಾಂ ಕವಿತಾ ಟ್ರಸ್ಟಾಕ್ ಆಯಿಲ್ಲಿಂ.
ಜನೆರಾಂತ್ ಚಲ್ಚ್ಯಾ ಕವಿತಾ ಫೆಸ್ತಾಚ್ಯಾ ಸಮಾರೋಪ್ ಸುವಾಳ್ಯಾಕ್ ನಾಮ್ಣೆಚೆ ಜ್ಞಾನಪೀಠ್ ಪುರಸ್ಕೃತ್ ಕೊಂಕಣಿ ಲೇಖಕ್ ದಾಮೋದರ್ ಮಾವ್ಜೊ ಹಾಜರ್ ಆಸುನ್ ಹೆಂ ಇನಾಮ್ ದಿತಲೆ. ದಿವಂಗತ್ ಡೆನಿಸ್ ಡಿಕುನ್ಹಾ ಆನಿ ಮೇರಿ ಡಿಕುನ್ಹಾ ಹಾಂಚೊ ಸುಪುತ್ರ್ ಫ್ರಾನ್ಸಿಸ್ ಡಿಕುನ್ಹಾ ಹ್ಯಾ ಸಂದರ್ಭಾರ್ ಮಾನಾಚೊ ಸೈರೊ ಮ್ಹಣುನ್ ಹಾಜರ್ ಆಸ್ತಲೊ.
फेल्सी लोबोच्या ’पालवा पोंत’ पुस्तकाक डेनीस आनी मेरी डिकुन्हा स्मारक इनाम
डेनीस डिकुन्हा आनी मेरी डिकुन्हा स्मारक कविता ट्रसट - 2025 वरसाचें अत्युत्तम कविता पुस्तक इनाम फेल्सी लोबो, देरेबैल हिच्या ’पालवा पोंत’ पुस्तकाक फावो जालां. हें इनाम रुपय 25,000 आनी यादस्तीका आटापता. 2026 वरसाच्या जानेर 11 तारकेर मंगळूरच्या सां. लुवीस - परिगणीत विश्वविद्यालयाच्या पीस पार्कांत चलच्या विसाव्या कविता फेस्त संदर्भार हें इनाम तिका भेटयतले.
"फेल्सी लोबो एकली समाजमुखी कवी. फेल्सिच्यो कविता अन्याय आनी असमानते विरोध निर्भय जावन झगड्याक उबीं रावतात. तिच्यो कविता फकत दूख उचारीनांत. त्यो नैतीक संवेदनांनी भरून वोमततात. नैतीक जागृती उटोवन, समाजाच्या आनी देशाच्या यथार्थ स्थितेक धयरान सवालां जोकतात. नीत, शांती, एकवट आनी संतोसाचे आशय तिच्या कवितेंनी आसात.
"प्रकृतिच्या जिवाचेर अक्रमण करच्या अक्रमी हट्टी हातांक बळान आडांवचें क्रियाळ कविमन तिच्या कवितांनी उगतें जाता. स्त्रिवाद अभिव्यक्त करच्यो बळवंत कविता ह्या पुस्तकांत आसात. स्त्रीयेचें दूक मात्र अभिव्यक्त करीनासतां, स्त्री अनी प्रकृतीचो संघर्श तिच्या कवितेंनी झळकता. ह्या संघर्षा बराबर स्त्रीये थंय बळ भरचें प्रयत्न तिच्या कवितेंनी दिसता.
"मनशाच्या बलात्कारी मनोस्थिती विरोध आवाज आनी प्रतिरोध फेल्सिच्या कवितांनी स्पश्ट जावन उटोन दिसता". - अशें आंडऱ्यू एल. डिकुन्हा, किशू बार्कूर आनी विलियम पायस - ह्या तेगांचे वेंचणुके समितीन हें पुस्तक इनामाक विंचताना आपलो मत उचारला.
कविता ट्रस्टान ह्या इनामा खातीर 2024 वर्सा पर्गट जाल्ल्या पुस्तकांची अर्जी आपयल्ली. वेवेगळ्या लिपिंनी पर्गट जाल्लीं नोव पुस्तकां कविता ट्रस्टाक आयिल्लीं.
जानेरांत चलच्या कविता फेस्ताच्या समारोप सुवाळ्याक नामणेचे ज्ञानपीठ पुरस्कृत कोंकणी लेखक दामोदर मावजो हाजर आसून हें इनाम दितले. दिवंगत डेनीस डिकुन्हा आनी मेरी डिकुन्हा हांचो सुपुत्र फ्रान्सीस डिकुन्हा ह्या संदर्भार मानाचो सोयरो म्हणून हाजर आसतलो.