ಸಂಪಾದಕೀಯ್:
ಕಡಲ್ಲ್ಯಾ ಕಾಳ್ಜಾಂನಿ ಸುಶೆಗ್ ದೀಂವ್ಕ್ ಜಾಯ್
ಹಾಂಕಾಂ ರಚಲ್ಲೊ ದೇವ್‌ಚ್ ಕಾಂಯ್ ದುಬ್ಳೊ ಆಸ್ತಲೊ! ನಾಂತರ್ ಹಾಂಚಿ ಗತ್ ಅಶಿ ಕಿತ್ಯಾಕ್? ಹ್ಯಾ ದುಬ್ಳ್ಯಾ ದೆವಾಚ್ಯಾ ಭುರ್ಗ್ಯಾಂಚ್ಯೆ ಜಿಣಿಯೆಚಿ ಕಾಣಿ ವಿಣ್ಲ್ಯಾ ಸಿಜ್ಯೆಸ್ ತಾಕೊಡೆನ್ ಹ್ಯೆ ಕವಿತೆಂತ್. ತಾಂಚೆಂ ರಡ್ಣೆಂ ಆನಿ ವಿಳಾಪ್ ಆಯ್ಕತಾನಾ ಕೊಣಾಯ್ಚೆಂ ಕಾಳೀಜ್ ಕಡ್ತಾ.
ಕಾಳೀಜ್ ಕಡ್ಲ್ಯಾರ್ ಪಾವನಾ, ಆಮ್ಚ್ಯಾ ಬರ‍್ಯಾ ಮನಾಚ್ಯಾ ಪಾವ್ಸಾನ್ ತಾಂಕಾಂ ಸುಶೆಗ್ ದಿಲೊ ಜಾಲ್ಯಾರ್ ಹ್ಯೆ ಕವಿತೆಚೊ ಆಶಯ್ ಫಳಾದಿಕ್ ಜಾಯ್ತ್ ಕೊಣ್ಣಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ದುಬ್ಳ್ಯಾ ದೆವಾಚಿಂ ಭುರ್ಗಿಂ
ದುಬ್ಳ್ಯಾ ದೆವಾಚಿಂ
ಭುರ್ಗಿಂ ಆಮಿ
ದುಬ್ಳ್ಯಾ ದೆವಾಚಿಂ ಭುರ್ಗಿಂ
ಉಬ್ರಾಂತ್
ಆಮಿ ಜಲ್ಮಲ್ಯಾಂವ್
ಗೊಬ್ರಾಂತ್
ಖೆಳುನ್ ಲೊಳುನ್
ವಾಡ್ಲ್ಯಾಂವ್
ಶಿಕಪ್ ಆಮ್ಕಾಂ ನಾ
ಶೆತಾಂ ಭಾಟಾಂ ನಾಂತ್
ಹಿತ್ಲಾಂ ತೊಟಾಂ ನಾಂತ್
ಕಾಮಾಂ ನಾಂತ್
ದೆಕುನ್ ಆಮಿ
ಕಾಮ್ ಸೊದುನ್
ವೆವೆಗ್ಳ್ಯಾ ಗಾಂವಾಂಕ್
ಪಾವ್ಲ್ಯಾಂವ್!
ಪೊಟಾಚ್ಯಾ ಗ್ರಾಸಾಖಾತಿರ್
ದೀಸ್ ರಾತ್ ಕಾಮ್ ಕರುನ್
ಇಲ್ಲೆಂ ಜೊಡುನ್
ಇಲ್ಲೆಂ ಉರೊವ್ನ್
ಗಾಂವಾಕ್ ಆಮಿ
ಧಾಡುಂಕ್ ಸಕ್ಲ್ಯಾಂವ್!
ತಿತ್ಲ್ಯಾರ್
ಕೊರೊನಾ ಮ್ಹಳ್ಳೆ
ಮಹಾಮಾರಿನ್
ಜಿಣಿಯೆರ್ ಆಮ್ಚ್ಯಾ
ದಾಢ್ ಘಾಲಿ
ಫುಡಾರಾಚೆರ್ ಆಮ್ಚ್ಯಾ
ಕುರಾಡ್ ಮಾರ‍್ಲಿ!
ಕಾಮ್ ನಾ
ಕೂಲ್ ನಾ
ಖಾಣ್ ನಾ
ಜೆವಣ್ ನಾ
ನ್ಹೆಸುಂಕ್ ನಾ
ಪಾಂಗ್ರುಂಕ್ ನಾ
ವಸ್ತೆಕ್ ಬಿಡಾರ್ ನಾ
ಮಾತೆಂ ತೆಂಕುಂಕ್
ಜಾಗೊ ನಾ
ಆಕಾಸ್ ಆಮ್ಚೆಂ ಪಾಕೆಂ
ಧರ್ತಿ ಆಮ್ಚಿ ಮಾಂದ್ರಿ!
ಹಾತಾಂತ್ ಪಯ್ಶೆ ನಾಂತ್
ಹೆಣೆಂ ತೆಣೆಂ ಮಾಗುನ್
ದಾನಿಂನಿ ದಿಲ್ಲ್ಯಾಂತ್
ಎಕೇಕ್ ಭಾಕ್ರಿ ಖಾವ್ನ್
ಎಕೇಕ್ ಗೊಬ್ಳೊ
ಉದಕ್ ಪಿಯೆವ್ನ್
ದೀಸ್ ಸಾರುಂಕ್
ಲಾಗ್ಲ್ಯಾಂವ್!
ಬಾಳ್ಶಾಂಕ್ ದೂಧ್
ಹಾಡುಂಕ್
ಹಾತಾಂತ್ ದಮ್ಡಿ ನಾ
ರೀಣ್, ಉಸ್ಣೆಂ
ಕೊಣೀ ದೀನಾಂತ್
ಕಿತ್ಯಾಕ್ ಆಮ್ಚೆಕಡೆ
ಕಾಂಯ್ ನಾ
ಕಾರಣ್
ಆಮಿ ದುಬ್ಳ್ಯಾ ದೆವಾಚಿಂ
ಭುರ್ಗಿಂ!
ಗಾಂವಾಕ್ ವಚುಂಕ್
ಪಯ್ಶೆ ನಾಂತ್!
ವರ್ಸಾಂ ಆದಿಂ
ಮ್ಹಾಲ್ಗಡ್ಯಾಂಕ್
ಆನಿ ಮೊಗಾಚ್ಯಾಂಕ್
ಸೊಡುನ್
ಖಾಲಿ ಪೊಟಾಂಸಂಗಿಂ
ಶಿಂದ್ಲೆಲಿಂ ಕಾಳ್ಜಾಂ ಘೆವ್ನ್
ಮೊಗಾಚೊ
ಗಾಂವ್ ಸಾಂಡುನ್
ಬರೊ ಫುಡಾರ್ ಸೊದುನ್
ಹೆವ್ಶಿನ್ ಆಯಿಲ್ಲ್ಯಾಂವ್...
ಆನಿ ಆಜ್ ಆಮಿ
ನಿರಾಶ್ರಿತ್ ಜಾಲ್ಯಾಂವ್
ಅಸಹಾಯಕ್ ಜಾವ್ನ್
ಅನಾಥ್ ಜಾವ್ನ್
ವಾಟೆರ್ ಪಡ್ಲ್ಯಾಂವ್!
ಆಮಿ ರಾನಾಂತ್ಲಿ ಲಜೆಕಾಂಟಿ
ವಾಟೆವಯ್ಲಿಂ ಘಾಣೆರಿಂ ಫುಲಾಂ
ಕೊಣೀ ಆಮ್ಕಾಂ ಲೆಕಿನಾಂತ್
ಮನ್ಶಾ ದಿಶ್ಟಿನ್ ಪಳೆನಾಂತ್!
ರಾಜ್ಯ್ ರಾಜ್ಯಾ ಮದೆಂ ಗಡಿ
ಜಿಲ್ಲ್ಯಾ ಜಿಲ್ಲ್ಯಾ ಮದೆಂ ಗಡಿ
ಗಾಂವಾಕ್ ವಚುಂಕ್
ಬಸ್ಸಾಂ ನಾಂತ್
ರಯ್ಲಾಂ ನಾಂತ್!
ಆಸ್ಲ್ಯಾರೀ
ಆಮ್ಚೆಕಡೆ ಪಯ್ಶೆ ನಾಂತ್!
ಆಮ್ಚೆ ಬರಿಂ
ಲಾಕೋಂ ಲೋಕ್
ಥಳಾಂತರಿ ವಾವ್ರಾಡಿ
ಖರ್ಕಟ್ಯಾ ವೊತಾಂತ್
ತಾಪ್ಲೆಲ್ಯಾ ರಸ್ತ್ಯಾರ್
ತುಟ್ಕರ್ ವ್ಹಾಣೊ ಘಾಲ್ನ್
ವಾ ಖಾಲಿ ಪಾಂಯಾಂನಿ
ಝರ‍್ಲಲ್ಯೊ ಕಾತಿ
ಪಾಜಾರ‍್ಚ್ಯೊ ರಗ್ತಾಝರಿ
ಲೆಕಿನಾಸ್ತಾಂ
ಖಾಂದಾರ್ ಆನಿ ಪಾಟಿರ್
ಪಿಂಜ್ಕರ್ ಬೆಗಾಂ ಘೆವ್ನ್
ಪಾಂಯ್ಶಿಂ ಸಯ್ಶಿಂ
ಮಯ್ಲಾಂಚಿ ವಾಟ್
ಗುಡ್ಡಾವ್ನ್ ಆಸಾಂವ್!
ಆಮ್ಚೆ ಮದೆಂ ಆಸಾತ್
ಮಾತ್ಯಾರ್ ವೊಜಿಂ
ಹಾಂಡಿಯೆರ್
ಬಾಳ್ಶಾಂಕ್ ಘೆವ್ನ್
ಥಕುನ್ ಲಕುನ್
ಚಲ್ಚ್ಯೊ ಗರ್ಭೆಸ್ತ್ ಸ್ತ್ರೀಯೊ!
ಆವಯ್ಚೊ ಪಾಲಂವ್
ವಾ ಬಾಪಾಯ್ಚೊ ಹಾತ್
ಧರುನ್ ಮೆಟಾಂ ಕಾಡ್ಚಿಂ
ನೆಣ್ತಿಂ, ನಿರಾಪ್ರಾದಿ
ಮಾಸುಮ್ ಭುರ್ಗಿಂ
ಆಮ್ಚೆ ಫುಡೆಂ ಆಸಾ
ದಿಕ್ಕ್ ನಾತ್ಲಲಿ ವಾಟ್
ಅಂತ್ಯ್ ನಾತ್ಲಲೆಂ ಪಯ್ಣ್
ಧಂಡಳ್ಳಲೊ ಭರ್ವಸೊ
ಅಧುರೆಂ ಸಪಣ್
ಆನಿ
ಜೀವನ್--ಮರಣ್!
ವಾಟೆರ್ ಕೊಣ್‌ಗೀ
ಖಾಣಾಂ ಪೊಟ್ಲ್ಯೊ
ಜೆವ್ಣಾ ಪೊಟ್ಲ್ಯೊ
ವಾಂಟ್ತಾತ್
ಮೊಬಾಯ್ಲಾರ್
ಫೊಟೊ ಕಾಡ್ತಾತ್
ಭುಕೇ ವೊಡಿಕ್
ಪೊಟ್ಲ್ಯೊ ಆರಾಂವ್ಕ್
ಎಕಾಮೆಕಾ ಆಂಗಾರ್ ಪಡ್ತಾತ್
ದೊಳ್ಯಾಂನಿ ರಗತ್ ನಾತ್ಲಲೆ
ಫಾತ್ರಾ ಕಾಳ್ಜಾಂಚೆ ಪೊಲಿಸ್
ಬೆತಾಂನಿ, ಲಾಠಿಂನಿ
ಆಂಗಾಚಿ ಕಾತ್ ಫುಟುನ್
ರಗತ್ ಉಸಳ್ಚೆಬರಿಂ
ಮಾರ‍್ತಾತ್
ಮೊನ್ಜಾತಿಂಕ್ ಬಡಯಿಲ್ಲೆಬರಿಂ
ಬಡಯ್ತಾತ್!
ಕಾಂಯ್ ಥೊಡ್ಯೊ
ಗರ್ಭೆಸ್ತ್ ಸ್ತ್ರೀಯೊ
ಪ್ರಸೂತ್ಪಣಾಚಿ ದೂಖ್
ಸೊಸುಂಕ್ ಜಾಯ್ನಾಸ್ತಾಂ
ರಸ್ತ್ಯಾ ದೆಗೆರಚ್
ಬಾಳಂತ್ ಜಾತಾತ್!
ಭುಕೆನ್ ನಿತ್ರಾಣ್ ಜಾವ್ನ್
ಮೆಟಾಂ ಕಾಡುಂಕ್
ಜಾಯ್ನಾಸ್ತಾಂ
ತಕ್ಲೆ ಘುಂವಳ್ ಯೇವ್ನ್
ದೊಳ್ಯಾಂಕ್ ಕಾಳೊಕ್ ಯೇವ್ನ್
ಧಡ್ಡ್ ಕರುನ್
ವಾಟೆರ್ ಪಡುನ್
ಜೀವ್ ಸೊಡ್ಲಲಿಂ
ಭುರ್ಗಿಂ ಕಿತ್ಲಿಂ
ವ್ಹಡಾಂ ಕಿತ್ಲಿಂ
ಚಿಂತುಂಕ್ ಗೆಲ್ಯಾರ್
ಕಾಳಿಜ್ ಕುಡ್ಕೆ ಕುಡ್ಕೆ!
ರಸ್ತ್ಯಾರ್ ಚಲುನ್
ವೆತಾನಾ
ಪಳೆಂವ್ಕ್ ಮೆಳ್ತಾತ್
ಸಬಾರ್ ದುರಂತಾಂ
ರಸ್ತ್ಯಾ ಅವ್ಗಡಾಂ
ಲೊರಿಯೆಪೊಂದಾ
ಟ್ರಕ್ಕಾಪೊಂದಾ
ಪಡುನ್ ಮೆಲ್ಲಿಂ
ದುಬ್ಳ್ಯಾ ದೆವಾಚಿಂ
ದುಬ್ಳಿಂ ಭುರ್ಗಿಂ!
ಕಾಳಿಜ್ ಭೆಸಾಂ ಜಾತಾ
ಪಳೆವ್ನ್ ತಾಂಚ್ಯೊ
ನಿರ್ಜೀವ್ ಕುಡಿ
ದುಕಾಂ ಗಳ್ತಾತ್
ನಿಯಾಳ್ನ್
ದುಬ್ಳ್ಯಾ ದೆವಾಚ್ಯಾ
ದುಬ್ಳ್ಯಾ ಭುರ್ಗ್ಯಾಂಚಿ
ಕರಾಳ್ ಕಾಣಿ
ಆನಿ ವಾಸ್ತವ್ ಜಿಣಿ!
ದುಬ್ಳ್ಯಾ ದೆವಾಚಿಂ
ದುಬ್ಳಿಂ ಭುರ್ಗಿಂ ಆಮಿ
ಶೋಶಿತ್ ವಾವ್ರಾಡಿ
ತಾಳೊ ನಾತ್ಲಲೆ
ಕೂಲಿ ಕಾರ್ಮಿಕ್
ಧಮ್ಕಣೆಕ್ ಬಲಿ ಜಾಲ್ಲೆ
ಅಸ್ಕತ್ ಶ್ರಮಿಕ್
ಚಿರ್ಡುನ್ ಮುರ್ಡುನ್
ಮೊನ್ಜಾತಿಂ ಪ್ರಾಸ್
ಕೀಳ್ ಮಟ್ಟಾರ್ ಜಿಯೆಂವ್ಚೆ
ಹಕ್ಕಾಂ ಖಾತಿರ್
ಪ್ರತಿಭಟನ್ ಕೆಲ್ಯಾರ್
ಪೊಲಿಸಾಂಚ್ಯೊ
ಖೊಟೊ ಮುಟಿ ಖಾಂವ್ಚೆ
ನಿರಾಶ್ರಿತ್ ಗುಲಾಮ್
ಆಮಿ!
ಮೀಡಿಯಾಗಾರ್ ಆನಿ
ವೀಡಿಯೋಗ್ರಾಫರ್
ಫೊಟೊ ಕಾಡ್ತಾತ್
ವೀಡಿಯೋ ಕಾಡ್ತಾತ್
ಆನಿ ಪ್ರಸಾರ್ ಕರ‍್ತಾತ್
ಪುಣ್ ಕಸ್ಲೆಂಚ್
ಬರೆಪಣ್ ಜಾಲೆಂನಾ!
ದುಬ್ಳ್ಯಾ ದೆವಾಚಿಂ
ದುಬ್ಳಿಂ ಭುರ್ಗಿಂ ಆಮಿ
ಆಮ್ಚ್ಯಾಚ್ ದೇಶಾಂತ್
ಪರ್ದೆಶಿ ಆಮಿ!
ಆಮ್ಕಾಂ ವಿಚಾರ‍್ತಲೊ
ಕೊಣೀ ನಾ
ಆಮ್ಚಿ ಜತನ್ ಘೆತಲೊ
ಕೊಣೀ ನಾ
ಭುಕೆನ್ ವಳ್ವಳುನ್ ಮೆಲ್ಯಾರೀ
ವಕ್ತಾಂ ನಾಸ್ತಾಂ
ಪಿಡೆಸ್ತಾಂನಿ ವಾಟೆರ್
ಜೀವ್ ಸೊಡ್ಲ್ಯಾರೀ
ಆಸ್ಪತ್ರೆಕ್ ವ್ಹರ್ತಲೊ
ಘರ‍್ಚ್ಯಾಂಕ್ ಕಳಯ್ತಲೊ
ಕೊಣೀ ನಾ!
ರಗ್ತಾಚೊ ಕೆಲೊ
ಘಾಮ್ ಆಮಿ,
ರಗ್ತಾಚಿಂ ಜಾಲಿಂ
ದುಕಾಂ ಆಮ್ಚಿಂ,
ಹುಲ್ಪೊನ್ ಗೆಲೆಂ
ಜಿವಿತ್ ಆಮ್ಚೆಂ,
ದುಬ್ಳ್ಯಾ ದೆವಾಚ್ಯಾ
ದುಬ್ಳ್ಯಾ ಭುರ್ಗ್ಯಾಂನಿ
ಆಮಿ ವಾಂಚ್ಚೆಂ ತರೀ
ಖಂಯ್ಚ್ಯಾ ಸುಖಾಕ್?
ಮನ್ಶಾಪಣ್ ಹೊಗ್ಡಾಯಿಲ್ಲೊ
ಹೊ ಸಂಸಾರ್ ಕಿತ್ಯಾಕ್?
ಹಾಂಗಾಸರ್ ಪಡ್ಲ್ಯಾರ್
ಉಕಲ್ತಲೊ ಕೊಣೀ ನಾ
ರಡ್ಲ್ಯಾರ್
ಭುಜಯ್ತಲೊ ಕೊಣೀ ನಾ
ಆನಿ ಮೆಲ್ಯಾರ್
ಪುರ‍್ತಲೋಯ್ ಕೊಣೀ ನಾ
ಕಿತ್ಯಾಕ್
ದುಬ್ಳ್ಯಾ ದೆವಾಚಿಂ
ದುಬ್ಳಿಂ ಭುರ್ಗಿಂ ಆಮಿ!
- ಸಿಜ್ಯೆಸ್ ತಾಕೊಡೆ
संपादकीय:
कडल्ल्या काळजांनी सुशेग दीवंक जाय
हांकां रचल्लो देवच कांय दुबळो आसतलो! नांतर हांची गत अशी कित्याक? ह्या दुबळ्या देवाच्या भुरग्यांच्ये जिणयेची काणी विणल्या सिज्येस ताकोडेन ह्ये कवितेंत. तांचें रडणें आनी विळाप आयकताना कोणायचें काळीज कडता.
काळीज कडल्यार पावना, आमच्या बर्या मनाच्या पावसान तांकां सुशेग दिलो जाल्यार ह्ये कवितेचो आशय फळादीक जायत कोण्णा.
-मेल्विन रोड्रीगस
कविता:
दुबळ्या देवाचीं भुरगीं
दुबळ्या देवाचीं
भुरगीं आमी
दुबळ्या देवाचीं भुरगीं
उबरांत
आमी जल्मल्यांव
गोब्रांत
खेळून लोळून
वाडल्यांव
शिकप आमकां ना
शेतां भाटां नांत
हितलां तोटां नांत
कामां नांत
देकून आमी
काम सोदून
वेवेगळ्या गांवांक
पावल्यांव!
पोटाच्या ग्रासाखातीर
दीस रात काम करून
इल्लें जोडून
इल्लें उरोवन
गांवाक आमी
धाडुंक सकल्यांव!
तितल्यार
कोरोना म्हळ्ळे
महामारीन
जिणयेर आमच्या
दाढ घाली
फुडाराचेर आमच्या
कुराड मारली!
काम ना
कूल ना
खाण ना
जेवण ना
न्हेसुंक ना
पांग्रुंक ना
वस्तेक बिडार ना
मातें तेंकुंक
जागो ना
आकास आमचें पाकें
धर्ती आमची मांद्री!
हातांत पयशे नांत
हेणें तेणें मागून
दानींनी दिल्ल्यांत
एकेक भाक्री खावन
एकेक गोबळो
उदक पियेवन
दीस सारुंक
लागल्यांव!
बाळशांक दूध
हाडुंक
हातांत दमडी ना
रीण, उसणें
कोणी दीनांत
कित्याक आमचेकडे
कांय ना
कारण
आमी दुबळ्या देवाचीं
भुरगीं!
गांवाक वचुंक
पयशे नांत!
वरसां आदीं
म्हालगड्यांक
आनी मोगाच्यांक
सोडून
खाली पोटांसंगीं
शिंदलेलीं काळजां घेवन
मोगाचो
गांव सांडून
बरो फुडार सोदून
हेवशीन आयिल्ल्यांव...
आनी आज आमी
निराश्रीत जाल्यांव
असहायक जावन
अनाथ जावन
वाटेर पडल्यांव!
आमी रानांतली लजेकांटी
वाटेवयलीं घाणेरीं फुलां
कोणी आमकां लेकीनांत
मनशा दिश्टीन पळेनांत!
राज्य राज्या मदें गडी
जिल्ल्या जिल्ल्या मदें गडी
गांवाक वचुंक
बस्सां नांत
रयलां नांत!
आसल्यारी
आमचेकडे पयशे नांत!
आमचे बरीं
लाकों लोक
थळांतरी वावराडी
खर्कट्या वोतांत
तापलेल्या रस्त्यार
तुटकर व्हाणो घालन
वा खाली पांयांनी
झरलल्यो काती
पाजारच्यो रगताझरी
लेकीनासतां
खांदार आनी फाटीर
पिंजकर बेगां घेवन
पांयशीं सयशीं
मयलांची वाट
गुड्डावन आसांव!
आमचे मदें आसात
मात्यार वोजीं
हांडयेर
बाळशांक घेवन
थकून लकून
चलच्यो गर्भेस्त स्त्रीयो!
आवयचो पालंव
वा बापायचो हात
धरून मेटां काडचीं
नेणतीं, निराप्रादी
मासूम भुरगीं
आमचे फुडें आसा
दिक्क नातलली वाट
अंत्य नातललें पयण
धंडळ्ळलो भर्वसो
अधुरें सपण
आनी
जीवन--मरण!
वाटेर कोणगी
खाणां पोटल्यो
जेवणा पोटल्यो
वांटतात
मोबायलार
फोटो काडतात
भुके वोडीक
पोटल्यो आरावंक
एकामेका आंगार पडतात
दोळ्यांनी रगत नातलले
फात्रा काळजांचे पोलीस
बेतांनी, लाठिंनी
आंगाची कात फुटून
रगत उसळचेबरीं
मारतात
मोनजातींक बडयिल्लेबरीं
बडयतात!
कांय थोड्यो
गर्भेस्त स्त्रीयो
प्रसूतपणाची दूख
सोसुंक जायनासतां
रस्त्या देगेरच
बाळंत जातात!
भुकेन नित्राण जावन
मेटां काडुंक
जायनासतां
तकले घुंवळ येवन
दोळ्यांक काळोक येवन
धड्ड करून
वाटेर पडून
जीव सोडललीं
भुरगीं कितलीं
व्हडां कितलीं
चिंतुंक गेल्यार
काळीज कुडके कुडके!
रस्त्यार चलून
वेताना
पळेवंक मेळतात
साबार दुरंतां
रस्त्या अवगडां
लोरयेपोंदा
ट्रक्कापोंदा
पडून मेल्लीं
दुबळ्या देवाचीं
दुबळीं भुरगीं!
काळीज भेसां जाता
पळेवन तांच्यो
निर्जीव कुडी
दुकां गळतात
नियाळन
दुबळ्या देवाच्या
दुबळ्या भुरग्यांची
कराळ काणी
आनी वास्तव जिणी!
दुबळ्या देवाचीं
दुबळीं भुरगीं आमी
शोशीत वावराडी
ताळो नातलले
कूली कार्मीक
धमकणेक बली जाल्ले
अस्कत श्रमीक
चिर्डून मुर्डून
मोनजातीं प्रास
कीळ मट्टार जियेंवचे
हक्कां खातीर
प्रतिभटन केल्यार
पोलिसांच्यो
खोटो मुटी खांवचे
निराश्रीत गुलाम
आमी!
मीडियागार आनी
वीडियोग्राफर
फोटो काडतात
वीडियो काडतात
आनी प्रसार करतात
पूण कसलेंच
बरेपण जालेंना!
दुबळ्या देवाचीं
दुबळीं भुरगीं आमी
आमच्याच देशांत
पर्देशी आमी!
आमकां विचारतलो
कोणी ना
आमची जतन घेतलो
कोणी ना
भुकेन वळवळून मेल्यारी
वक्तां नासतां
पिडेस्तांनी वाटेर
जीव सोडल्यारी
आस्पत्रेक व्हरतलो
घरच्यांक कळयतलो
कोणी ना!
रगताचो केलो
घाम आमी,
रगताचीं जालीं
दुकां आमचीं,
हुलपोन गेलें
जिवीत आमचें,
दुबळ्या देवाच्या
दुबळ्या भुरगयांनी
आमी वांच्चें तरी
खंयच्या सुखाक?
मनशापण होगडायिल्लो
हो संसार कित्याक?
हांगासर पडल्यार
उकलतलो कोणी ना
रडल्यार
भुजयतलो कोणी ना
आनी मेल्यार
पुरतलोय कोणी ना
कित्याक
दुबळ्या देवाचीं
दुबळीं भुरगीं आमी!
- सिज्येस ताकोडे